1 Johanes
4 O turang senina si kukelengi, ula kena tek man kata-kata si tempa-tempa rehna arah Dibata nari.+ Tapi ujilah lebe guna metehsa tuhu kin e arah Dibata nari,+ sebap enggo enterem nabi palsu bas doni enda.+
2 Bagenda cara metehsa adi tuhu kin e arah Dibata nari: Adi kata-kata e ngakui maka Jesus Kristus enggo reh jadi manusia, si e rehna arah Dibata nari.+ 3 Tapi adi kata-kata si tempa-tempa rehna arah Dibata nari e la ngakui maka Jesus enggo reh jadi manusia, si e labo rehna arah Dibata nari,+ tapi arah musuh Kristus nari. Enggo begi kena maka si e nandangi terjadi,+ janah gundari enggo lit i doni enda.+
4 O anak-anak si kukelengi, kena rehna arah Dibata nari janah enggo taluken kena nabi-nabi palsu e,+ perban gegehen si ersada ras kena+ asangken si ersada ras doni enda.+ 5 Kalak e rehna arah doni enda nari,+ e me sebapna kai si kataken kalak e rehna arah doni enda nari janah begiken doni enda kalak e.+ 6 Tapi kita rehna arah Dibata nari. Ise pe si nandai Dibata, begikenna kita.+ Tapi si labo rehna arah Dibata nari, labo begikenna kita.+ Bage ndai me carana gelah banci sibedaken benar ntah salah kata-kata si tempa-tempa rehna arah Dibata nari e.+
7 O turang senina si kukelengi, teruslah kita sikeleng-kelengen+ perban kekelengen e rehna arah Dibata nari. Ise pe si lit kekelengenna, ia anak Dibata janah tandaina Dibata.+ 8 Ise pe si la lit kekelengenna, labo tandaina Dibata, perban Dibata e kekelengen.+ 9 Bagenda cara Dibata mbuktiken kekelengenNa man banta: SuruhNa AnakNa si tonggal+ ku doni enda, gelah banci sidat kegeluhen arah ia.+ 10 Suruh Dibata AnakNa jadi korban pendamen+ guna dosa-dosata,+ labo perban enggo sikelengi Ia, tapi perban Ia si engkelengi kita.
11 O turang senina si kukelengi, adi bagenda cara Dibata engkelengi kita, kita pe arus sikeleng-kelengen.+ 12 Ise pe la pernah ngidah Dibata,+ tapi adi terus kita sikeleng-kelengen, Dibata tetap ras kita janah kekelengenNa jadi sempurna bas kita.+ 13 Perban enggo bereken Dibata kesahNa man banta, siteh maka ersada kita ras Ia, janah Ia ersada ras kita. 14 Selain si e, enggo idah kami janah enggo saksiken kami, maka Bapak enggo nuruh AnakNa ku doni jadi juru selamat man doni enda.+ 15 Ise pe si ngakui maka Jesus e Anak Dibata,+ Dibata tetap kap ersada ras ia janah ia ersada ras Dibata.+ 16 Gundari enggo siteh janah tek kita maka keleng ate Dibata kita.+
Dibata e kekelengen.+ Ise pe si lit bas ia kekelengen, ia tetap ersada ras Dibata, janah Dibata tetap ersada ras ia.+ 17 Perban si e, kekelengen jadi sempurna bas kita. Alu bage banci kita bebas ngerana+ bas wari penghakimen sebap geluhta i doni enda bagi kegeluhen Kristus. 18 Bas kekelengen la lit kebiaren.+ Tapi kekelengen si sempurna erban kita lanai mbiar, perban perasan mbiar erban kita la bebas. Kalak si mbiar denga, e tandana lenga lit bas ia kekelengen si sempurna.+ 19 Kita engkelengi, sebap leben Dibata si engkelengi kita.+
20 Adi lit si ngataken, “Keleng teku Dibata,” tapi segat tena turang seninana, perbual kap ia.+ Kalak si la engkelengi turang seninana+ si banci idahna, labo tuhu banci kelengina Dibata si la pernah idahna.+ 21 Enda me perentah si ibereken man banta: Kalak si engkelengi Dibata, arus ka kelengina turang seninana.+