Perbahanen Rasul-Rasul

3 Bas sada wari, kira-kira jam telu karaben* eme waktuna guna ertoto, lawes Petrus ras Johanes ku rumah pertoton. 2 Lit sekalak dilaki si lumpuh mulai lahirna nari sangana ibaba ku je. Tiap wari tama kalak ia i deher pintu rumah pertoton si igelari Gerbang si Mejile, gelah banci ia mindo-mindo man kalak si masuk ku rumah pertoton e. 3 Sanga idahna Petrus ras Johanes nandangi masuk ku rumah pertoton, pindona perkuah ate kalak e. 4 Tapi tatap Petrus ras Johanes ia, nina, “Nen dage kami.” 5 Emaka tatapna kalak e janah arapkenna lit si alokenna. 6 Tapi nina Petrus, “Pirak ras emas la lit bas aku, tapi kubereken ateku man bandu kai si lit bas aku. Bas gelar Jesus Kristus kalak Nasaret, erdalanlah!”+ 7 Jemak Petrus tan kananna janah sampatina ia tedis.+ Mis megegeh nahena.+ 8 Lompat ia janah mulai erdalan.+ Jenari masuk ia ras kalak e ku rumah pertoton janahna lompat-lompat ras erdalan muji Dibata. 9 Kerina kalak ngidah ia erdalan ras muji Dibata. 10 Jenari mulai tandai kalak e maka ia kap dilaki si biasa mindo-mindo i Gerbang si Mejile i rumah pertoton.+ Mamang kel ate kalak e janah takjup kel kalak e ngidah kai si enggo terjadi man bana.

11 Sanga jemak dilaki e denga Petrus ras Johanes i Serambi Salomo,+ kerina kalak kiam ndahi kalak e perban senggetna. 12 Ngidah si e, nina Petrus, “O kalak Israel, engkai maka kena sengget ngidah si enda? Engkai maka tatap kena kami, tempa-tempa perban kuasa kami ntah pe perban kami kalak si tutus erdibata maka ia banci erdalan? 13 Dibata Abraham, Isak, Jakup,+ eme Dibata nini bulangta, enggo muliakenNa PelayanNa+ eme Jesus,+ si enggo serahken kena+ janah tulak kena i lebe-lebe Pilatus, amin pe bebasken Pilatus atena ia. 14 Tulak kena kalak si badia ras si benar e, janah pindo kena gelah sekalak pembunuh ibebasken man kena.+ 15 Kalak si Ipilih guna mere kegeluhen bunuh kena.+ Tapi pekeke Dibata ia arah si mate nari, kami kap saksina.+ 16 Alu gelarna janah perban erkiniteken kami man gelarna, dilaki si idah kena e ras si tandai kena e enggo jadi megegeh. Kiniteken kami man Jesus kap si erban dilaki enda malem i lebe-lebe kena. 17 O turang senina, kuteh maka la angka kena kai si enggo lakoken kena,+ bagi peminpin kena.+ 18 Tapi alu bage, terjadi me kai si enggo kataken Dibata arah kerina nabi, maka nanami Kristus nge pagi kiniseran.+

19 “Emaka ertobatlah,+ janah mulihkenlah+ gelah dosa-dosa kena iampuni.+ Alu bage, bereken Jahwe* kemalemen ate man kena, 20 janah suruhNa Jesus eme Kristus si enggo pilihNa man kena. 21 Ia arus tetap tading i surga seh ngasa kerina iban mulihi bagi si mbarenda, bagi si enggo kataken Dibata arah nabi-nabiNa si badia si lit bas jaman si nai. 22 Bagi si enggo kataken Musa, ‘Lantik Dibata Jahwe* pagi man kena sekalak nabi arah bangsata si bagi aku guna kena.+ Arus begiken kena kai pe si katakenna.+ 23 Ise pe si la nggit megiken Nabi e pasti kernepken Dibata.’+ 24 Kerina nabi, mulai arah Samuel nari seh ngasa nabi-nabi si reh kenca ia pe, ikut mberitakenca alu tangkas kerna jaman enda.+ 25 Kataken nabi-nabi e kerna perjanjin si iban Dibata ras nini bulang kena,+ janah perjanjin e guna kena ka nge, sebap Dibata enggo erjanji man Abraham, ‘Dat pasu-pasu pagi kerina bangsa i doni arah keturunenndu.’+ 26 Kenca pilih Dibata PelayanNa e, suruhNa ia leben ndahi kena+ gelah banna kena sekalak-sekalak ertobat arah kejahaten kena nari. Enda pasu-pasu man kena.”