Perbahanen Rasul-Rasul

4 Sanga Petrus ras Johanes ngerana denga man jelma si enterem, reh imam-imam, kepala penjaga rumah pertoton, ras kalak Saduki+ ndahi kalak e. 2 Merawa ate kalak e perban ajari rasul-rasul jelma si enterem janah jelaskenna alu terus terang kerna kekeken Jesus arah si mate nari.+ 3 Emaka tangkap kalak e Petrus ras Johanes janah penjarakenna+ seh paginna, sebap sanga si e enggo berngi. 4 Tapi enterem kalak si tek kenca megi si kataken kalak e, emaka reh teremna murid-murid, lit kira-kira 5.000 kalak.+

5 Pepagina, pulung penguasa-penguasa kalak e, peminpin-peminpin, ras ahli-ahli Undang-Undang Musa i Jerusalem, 6 radu ras Annas+ si jadi imam kepala, Kayapas,+ Johanes, Aleksander, bage pe kerina kade-kade imam kepala. 7 Suruh kalak e Petrus ras Johanes tedis i tengah-tengah kalak e, janah sungkunina, “Alu kuasa ise ras bas gelar ise kena ngelakoken enda?” 8 Petrus si dem alu kesah si badia,+ ngerana,

“O penguasa-penguasa ras peminpin-peminpin, 9 adi adili kena kami wari enda perban kai si mehuli si lakoken kami man dilaki si lumpuh ndai,+ janah merhat kena meteh ise si erban ia malem, 10 emaka kataken kami man kena ras man kerina kalak Israel, dilaki enda banci tedis i lebe-lebe kena alu keadan sehat perban gelar Jesus Kristus kalak Nasaret,+ si bunuh kena bas tiang*+ tapi pekeke Dibata arah si mate nari.+ 11 Ia me ‘batu si tulak tukang bangunen, enggo jadi batu si utama.’+ 12 Selain si e, arah Jesus ngenca kalak banci iselamatken, sebap la lit gelar si deban+ si pilih Dibata arah manusia nari si lit bas doni, si banci nelamatken kita.”+

13 Mamang ate kalak e ngidah Petrus ras Johanes perban pang* kel kalak e ngerana, sebap tehna kalak e duana rakyat biasa si la erpendidiken.*+ Teh kalak e me maka dilaki e duana radu ras Jesus mbarenda.+ 14 Lanai teh kalak e ngataken kai pe+ sebap idahna kalak si ipepalem ndai enggo tedis ras dua rasul e.+ 15 Emaka perentahkenna si telu kalak e ndarat arah Pengadilen Agama Jahudi* nari. Kenca si e, nina man sada ras si debanna, 16 “Uga nge siban kalak e?+ Tuhu-tuhu lakokenna mukjizat si luar biasa, kerina kalak Jerusalem ngidahsa.+ Labo ka banci sikataken maka si e la tuhu. 17 Adi bage, gelah ula tersebar berita e man jelma si enterem, eta siancam janah silarang gelah ula nai kalak e ngerana man ise pe bas gelar Jesus.”+

18 Kenca si e, dua rasul ndai ilebuh janah ilarang ngerana ntah pe ngajar bas gelar Jesus. 19 Tapi nina Petrus ras Johanes, “Cuba ukuri kena, apai nge akap Dibata ulin, patuh man kena ntah man Dibata? 20 Tapi kami, la terngadiken kami ngerana kerna kai si enggo idah kami ras si begi kami.”+ 21 Emaka kenca ancamna dua rasul e, bebaskenna kalak e duana sebap la lit datna alasen guna ngukumsa. Mbiar ka kalak e man jelma si enterem+ si muji Dibata perban kejadin e. 22 Sebap dilaki si ipepalem alu mukjizat ndai enggo lebih 40 tahun umurna.

23 Kenca ibebasken, dahi dua rasul e murid-murid si deban janah ceritakenna kai si enggo kataken imam-imam kepala ras peminpin-peminpin. 24 Megi si e, ras-ras kalak e ertoto man Dibata, nina,

“O Tuhan Si Meganjangna, Kam kap si njadiken langit, doni, laut, ras kerina isina,+ 25 si ngerana alu kesah si badia arah nini bulang kami Daud,+ pelayanNdu, ‘Engkai maka bangsa-bangsa la tenang janah suku-suku bangsa ngukuri kai si sia-sia? 26 Raja-raja i doni ersikap janah penguasa-penguasa ersada arihna ngelawan Jahwe* ras kalak si pilihNa.’*+ 27 Situhuna, Herodes, Pontius Pilatus,+ bangsa Israel, ras bangsa si deban, enggo pulung i kota enda guna ngelawan Jesus, pelayanNdu si badia si pilihNdu.+ 28 Pulung kalak e guna ngelakoken kerina si enggo tentukenNdu nai nari alu kuasaNdu* ras peratenNdu.+ 29 O Jahwe,* perdiateken min ancamen kalak e, janah ban min kami budak-budakNdu enda pang mberitaken kataNdu. 30 Dudurken min tanNdu guna mpepalem, janah ban min mukjizat ras tanda-tanda si luar biasa+ bas gelar Jesus, pelayanNdu si badia.”+

31 Kenca ertoto kalak e alu bulat ukur, mugur-ugur inganna pulung e, kerina kalak e dem alu kesah si badia.+ Jenari, beritaken kalak e kata Dibata alu pang.+

32 Kerina kalak si enggo erkiniteken e ersada ukurna ras sepenggejapen. La lit sekalak pe si erpengakap maka kai si lit bas ia jangna sisada, tapi kerina raskenna.+ 33 Selain si e, beluh kel rasul-rasul mereken kesaksin kerna kekeken Tuan Jesus janah terus kalak e ersaksi.+ Emaka kerina kalak e ngaloken kiniulin Dibata si luar biasa si seh kel buena. 34 La lit sekalak pe si kekurangen,+ perban kerina si lit taneh ntah pe rumahna, dayakenna janah babana hasilna, 35 jenari berekenna man rasul-rasul.+ Kenca si e, bagi-bagiken rasul-rasul man tiap kalak menurut keperlunna.+ 36 Lit sekalak dilaki si gelarna Jusup. Ia keturunen Lewi si lahir i Kiprus. Rasul-rasul ngelebuh ia Barnabas,+ si ertina “Kalak si Nggit Nampati.” 37 Dayakenna tanehna jenari berekenna senna man rasul-rasul.+