2 Korinti
8 O turang senina, gundari ate kami gelah teh kena kiniulin Dibata si luar biasa si enggo icidahken man runggun-runggun si lit i Makedoni.+ 2 Sanga adapi kalak e kiniseran ras percuban si mberat, meriah kel ukur kalak e. Amin pe kalak e mesera, tapi nggit* kel kalak e mere. 3 Bereken kalak e asa ngasupna,+ janah lebih ka asa ngasupna.+ Aku saksina. 4 Arah ukur kalak e nari, terus pindoken kalak e man kami gelah datna kehamaten bas mere sumbangen, guna ikut mereken penampat man* kalak si badia.+ 5 Kai si lakoken kalak e lebih asangken si arapken kami, perban tangtangna enggo bereken kalak e dirina man Tuan bage pe man kami, sesuai ras peraten Dibata. 6 Emaka, pindoken kami man Titus+ gelah dungina mpepulung sumbangen sukarela kena, perban ia si mulaisa mpepulung sumbangen e arah kena nari. 7 Enggo mehuli kel kena bas kai pe: Paguh kiniteken kena, beluh kena ngerana, melala pemeteh kena, tutus ate kena ngelakoken kai pe, janah kelengi kena kalak si deban bagi kami engkelengi kena. Mbera-mbera terus ka kena nggit mere alu ukur meriah.+
8 Si enda kukataken labo guna mere perentah. Tapi guna ngataken man kena maka kalak si deban pe tutus atena janah kuuji ateku kena lit ntah lang kekelengen situhu-tuhu bas kena. 9 Enggo teh kena kerna kiniulin si luar biasa arah Tuanta Jesus Kristus, amin pe ia bayak, jadi mesera ia guna kena,+ gelah keadanna si mesera e erban kena jadi bayak.
10 Bas si enda, adi menurutku:+ Enda erguna man kena adi dungi kena dahin e. Sebap enggo mulai kena setahun si lewat janah semangat kena ngelakokenca. 11 Emaka gundari, dungilah kai si enggo mulai kena e alu semangat si seri, sesuai ras kai si lit bas kena. 12 Meriah ukur Dibata adi sekalak jelma mere alu ukur meriah, perban arapken Dibata gelah kalak mere sesuai ras kai si lit bas ia,+ labo si la lit bas ia. 13 Labo ateku erban baban kalak si deban reh nahangna janah nambahi baban kena. 14 Ateku gelah seri baban kena. Kai si lebih bas kena banci nutupi kai si kurang bas kalak e, janah kai si lebih bas kalak e banci ka nutupi kai si kurang bas kena. 15 Bagi ayat si ngataken, “Kalak si mbue pepulungna, la ia kelebihen, kalak si sitik pepulungna, la ia kekurangen.”+
16 Bujur man Dibata, si erban Titus ermediate man kena bagi kami pe ermediate man kena.+ 17 Labo saja meriah ukurna ngaloken pemindon kami, tapi semangat kel ia janah lawes ia ndahi kena arah ukurna nari. 18 Suruh kami ka turang senina si deban lawes ras ia. Kerina runggun mujiken turang senina e perban kai si lakokenna guna berita si meriah. 19 Selain si e, ia enggo ipilih runggun-runggun nemani kami bas mbagiken sumbangen enda. Si e lakoken kami guna kemulian Tuan* janah guna mbuktiken semangat kami bas nampati kalak si deban. 20 Emaka hati-hati kel kami gelah ula kami isalahken ise pe bas mbagiken sumbangen si mbelin enda.+ 21 Sebap ‘kerinana lakoken kami alu jujur labo saja i lebe-lebe Jahwe,* tapi i lebe-lebe manusia pe.’+
22 Selain si e, suruh kami ka turang senina si deban ras kalak e. Ia enggo rusur uji kami janah terbukti rajin, tapi gundari enggo reh rajinna ia perban tek kel ia man kena. 23 Adi lit si nungkun kerna Titus, kataken maka ia temanku sada dahin, si erdahin guna kepentingen kena. Adi lit si nungkun kerna turang seninata e, kataken maka kalak e rasul-rasul bas runggun-runggun janah jadi kemulian man Kristus. 24 Emaka buktiken kekelengen kena man kalak e,+ janah cidahken man runggun-runggun kai alasenna kami bangga man kena.