Matius

26 Kenca dung kataken Jesus kerina enda, nina man murid-muridna, 2 “Teh kena maka dua wari nari Paskah irayaken,+ janah Anak manusia iserahken pagi guna ihukum mate bas tiang.”*+

3 Paksa si e, imam-imam kepala ras tua-tua si minpin bangsa e pulung bas halamen rumah imam si mbelin si gelarna Kayapas,+ 4 janah arih-arih kalak e+ nangkap Jesus alu cara si licik guna munuh ia. 5 Tapi, nina kalak e, “Ula sanga perayan, gelah ula guntar jelma si enterem.”

6 Sanga Jesus i Betani, i rumah Simon si pernah sakit kusta,+ 7 sekalak diberu ndeheri ia alu maba sada botol marmar si isina minak wangi si merga, janah curcurkenna ku takal Jesus si sangana man. 8 Ngidah si e, merawa murid-murid janah nina, “Engkai maka sia-siaken e? 9 Adi dayaken seh kel ergana e, janah senna banci bereken man kalak mesera.” 10 Meteh si e, nina Jesus man kalak e, “Engkai maka susah ban kena diberu e? Si mehuli kap banna man bangku. 11 Sebap kalak mesera lalap nge ras kena,+ tapi aku labo lalap ras kena.+ 12 Sanga tamana minak wangi e ku dagingku, lakokenna e guna nikapken penguburenku.+ 13 Situhuna kukataken man kena, i japa pe berita si meriah iberitaken i belang-belang doni, kai si lakoken diberu enda iceritaken ka pagi guna nginget ia.”+

14 Kenca si e, salah sada arah 12 rasul nari, si igelari Judas Iskariot,+ lawes ndahi imam-imam kepala,+ 15 janah nina, “Kai kari bereken kena man bangku adi kuserahken* ia man kena?”+ Tawarken kalak e man bana 30 sen logam pirak.+ 16 Emaka mulai jenari, lalap daramina kesempaten si cocok guna nyerahken Jesus.

17 Sanga wari pertama bas Perayan Roti si La Itama Ragi,+ dahi murid-murid me Jesus, nina, “I ja atendu sikapken kami Paskah man bandu?”+ 18 Ngaloi ia, “To, laweslah ku kota, dahilah si Anu janah kataken man bana, ‘Bagenda nina Guru, “Waktu si enggo itentuken man bangku enggo ndeher, kurayaken ateku Paskah ras murid-muridku i rumahndu.”’” 19 Emaka lakoken murid-murid bagi si perentahken Jesus janah sikapkenna perayan Paskah.

20 Sanga berngi,+ kundul ia ras 12 murid-muridna guna man.+ 21 Sanga kalak e man, nina, “Situhuna kukataken man kena, sekalak arah kena nari hianatina kari aku.”+ 22 Perban ceda kel ate kalak e, mulai ia sekalak-sekalak nungkun man Jesus, “Me labo aku, Tuan?” 23 Nina ngaloi, “Kalak si ncelupken roti radu ras aku ku bas mangkok, ia kari si erhianat man bangku.+ 24 Payo, lawes me Anak manusia e, bagi si enggo itulisken kerna ia. Tapi cilaka kel+ kalak si erhianat man Anak manusia e!+ Ulin min ndai ia la lahir.”+ 25 Ngaloi Judas, si nandangi erhianat man Jesus, nina, “Me labo aku, Guru?”* Nina Jesus, “Tehndu nge jawapna.”

26 Sanga kalak e man denga, buat Jesus roti, kenca ia ertoto mindo pasu-pasu, cepik-cepikkenna roti e,+ janah berekenna man murid-muridna, nina, “Buatlah, panlah. Enda ngertiken dagingku.”+ 27 Kenca si e buatna sada calung,* ertoto ia ngataken bujur janah berekenna man kalak e, nina, “Minemlah kena kerina alu calung* enda,+ 28 sebap enda ngertiken darehku, ‘dareh+ perjanjin’+ si iamburken pagi guna ngampuni dosa+ enterem jelma.+ 29 Tapi kukataken man kena, lanai pagi kuinem anggur seh ngasa wari kuinem anggur si mbaru ras kena bas Kerajan Bapakku.”+ 30 Dungna, kenca ngendeken puji-pujin,* lawes kalak e ku Gunung Saitun.+

31 Kenca si e nina Jesus man kalak e, “Bas berngi enda, kerina kari kena nadingken aku perban kai si nandangi terjadi bangku, sebap bagi si tertulis, ‘Kuserang pagi permakan e, janah merap pagi rarasen biri-biri e.’+ 32 Tapi kenca aku ipekeke, leben pagi aku ku Galilea asangken kena.”+ 33 Tapi ngaloi Petrus, “Amin pe kerina kalak nadingken kam perban kai si terjadi man bandu, aku labo pagi nadingken kam!”+ 34 Nina Jesus man bana, “Situhuna kukataken man bandu, bas berngi enda, ope lenga tekuak manuk, enggo persokenndu kari aku telu kali.”+ 35 Ngaloi Petrus, “Amin pe arus aku mate ras kam, labo kari kam kupersoken.”+ Kerina murid-murid si deban pe bage ka nina.

36 Kenca si e, seh Jesus ras murid-murid bas sada ingan si igelari Getsemane,+ janah nina man kalak e, “Kundullah i jenda, ertoto aku lebe ku jah.”+ 37 Babana Petrus ras dua anak Sebedeus, janah sanga si e sedih kel akapna ras getem kel pusuhna.+ 38 Jenari nina man kalak e, “Sedih kel kuakap, tempa mate atena. Timai i jenda janah tetaplah erjaga-jaga ras aku.”+ 39 Kenca si e miser ia ku lebe, sujud ia janah ertoto,+ “O Bapakku, adi banci, pedauh min calung* enda+ bas aku nari. Tapi labo peratenku, peratenNdulah si jadi.”+

40 Mulihken ia ndahi murid-murid, dapetina kalak e sangana medem. Nina man Petrus, “La kin banci kena tetap erjaga-jaga sada jam sajalah gia ras aku?+ 41 Tetaplah erjaga-jaga+ janah teruslah ertoto,+ gelah ula kena nyerah ku bas percuban.+ Pusuh tuhu semangat, tapi daging lemah.”+ 42 Kenca si e, lawes ia pedua kaliken janah ertoto, “O Bapakku, adi la kin banci enda ipedauh ras arus kuinem, peratenNdulah si jadi.”+ 43 Kenca si e mulihken ka ia janah dapetina kalak e sangana medem, sebap mberat matana. 44 Emaka tadingkenna kalak e, lawes ka ia janah ertoto petelu kaliken, belaskenna sekali nari bagi si ndai. 45 Jenari mulihi dahina murid-murid janah nina, “Bas paksa si bagenda pe kena medem ras istrahat! Enggo seh jamna Anak manusia ihianati bas tan kalak perdosa. 46 Tediskenlah, ota kita lawes. Nenlah! Si erhianat man bangku enggo ndeher.” 47 Sanga ia ngerana denga, mis reh Judas, sekalak arah 12 rasul nari, reh ia radu ras sada rombongen si enterem si maba pedang ras perpalu. Kalak e isuruh imam-imam kepala ras peminpin-peminpin bangsa e.+

48 Si erhianat man bana enggo mere sada tanda man kalak e, nina, “Ise kari si kuema, ia me jelmana. Tangkaplah ia.” 49 Kenca si e mis dahina Jesus, nina, “Mejuah-juah, Guru!”* jenari emana ia alu lembut. 50 Tapi nina Jesus man bana, “O Teman, erkai atendu ku jenda?”+ Kenca si e, maju kalak e janah tangkapna Jesus. 51 Rempet, sekalak si radu ras Jesus muat pedangna janah serangna budak imam si mbelin, retap banna cupingna.+ 52 Kenca si e nina Jesus man bana, “Masukken pedangndu ena ku inganna,+ sebap kerina si make pedang mate pagi iban pedang.+ 53 Akapndu kin la banci kupindo man Bapakku gelah berekenNa man bangku lebih 12 pasuken malekat?*+ 54 Adi bage, uga kata-kata bas Kitap si Badia banci terjadi, si ngataken maka kerina arus terjadi alu cara si bage?” 55 Jenari nina Jesus man jelma si enterem e, “Akap kena kin aku enda perampok maka reh kena maba pedang ras perpalu nangkap aku? Tiap wari aku kundul ngajar bas rumah pertoton,+ tapi la tangkap kena aku.+ 56 Tapi kerina enda terjadi gelah seh kai si tulisken nabi-nabi.”+ Kenca si e, kerina murid kiam nadingken ia.+

57 Kalak si nangkap Jesus maba ia ku rumah Kayapas,+ imam si mbelin e, i je enggo pulung ahli Undang-Undang Musa ras peminpin-peminpin.+ 58 Tapi Petrus terus ngikuti Jesus dauh-dauh nari, seh ku halamen rumah imam si mbelin. Kenca masuk, kundul ia ras pelayan-pelayan rumah guna ngenen kai kari si terjadi.+

59 Sanga si e, imam-imam kepala ras kerina anggota Pengadilen Agama Jahudi* ndarami kesaksin palsu guna ngelawan Jesus gelah ia ihukum mate.+ 60 Tapi la lit kai pe si dat kalak e, amin gia enterem saksi palsu si reh ku lebe.+ Kenca si e maju me dua saksi 61 nina, “Dilaki enda ngataken, ‘Banci kuruntuhken rumah pertoton Dibata janah kubangun mulihi bas telu wari.’”+ 62 Tedis imam si mbelin e janah nina, “La nge atendu katakenndu kai pe? Uga menurutndu tuduhen kalak e man bandu?”+ 63 Tapi tetap sinik Jesus.+ Emaka nina imam si mbelin e man bana, “Ersumpahlah bas gelar Dibata si nggeluh, janah kataken man kami tuhu nge kam Kristus, Anak Dibata!”+ 64 Nina Jesus ngaloi, “Payo bagi si kataken kena. Tapi kukataken man kena, mulai gundari nari, idah kena pagi Anak manusia+ kundul i sebelah kanan Si Erkuasa+ janah reh i datas embun i langit.”+ 65 Kenca si e, rigatken imam si mbelin uisna si arah darat, nina, “Enggo hinana Dibata! Man kadeta nari kin saksi? Gundari enggo ibegi kena hinana Dibata. 66 Uga akap kena?” Ijawap kalak e, “Bunuh saja ia.”+ 67 Kenca si e ciduri kalak e ayona+ janah tinjuna.+ Si deban marapi ayona,+ 68 janah nina, “O Kristus, adi nabi kin kam, kataken dage man kami ise si nggudam kam!”

69 Sanga kundul Petrus i darat, i halamen, reh sekalak pelayan si diberu ndahi ia, nina, “Kam pe ras Jesus kap, kalak Galilea ah!”+ 70 Tapi persokenna i lebe-lebe kalak e kerina, nina, “La kuangka kai maksudndu e.” 71 Sanga ia lawes ku gerbang, perdiateken diberu si deban ia janah nina man kalak si lit i je, “Dilaki enda teman Jesus kalak Nasaret e kap.”+ 72 Persokenna ka janah ersumpah ia, “La kutandai ia!” 73 La ndekah kenca si e, kalak si tedis i je ndahi Petrus janah nina, “Pasti kam pe salah sada arah kalak e, teridah kel arah pengeranandu.” 74 Kenca si e mulai ia ersumpah, “La ia kutandai!” Jenari mis tekuak manuk. 75 Kenca bage, inget Petrus kai si enggo kataken Jesus, “Ope lenga tekuak manuk, enggo persokenndu aku telu kali.”+ Jenari lawes ia ndarat janah tangis kel ia.