1 Tesalonika
2 O turang senina, teh kena maka kerehen kami ndahi kena labo sia-sia.+ 2 Bagi si enggo teh kena, enggo nanami kami kiniseran janah ihina i Pilipi,+ tapi ban Dibata kami jadi pang guna mpeseh berita si meriah kerna Dibata+ man kena amin pe melala tentangen.* 3 Labo bereken kami nasehat alu perukuren si salah, ntah alu sura-sura si jahat, ntah pe guna nipu. 4 Tapi perban cocok akap Dibata kami si mpeseh berita si meriah e, emaka meriah akap kami mberitakenca, labo guna erban manusia senang tapi guna erban Dibata senang, Ia kap Dibata si mereksa pusuh kami.+
5 Teh kena maka labo pernah kami muji-muji ntah pe ban-ban kami mehuli guna ndatken untung si merangap.+ Bas si e, Dibata si jadi saksi! 6 Labo pernah darami kami kemulian arah manusia nari, ntah arah kena, ntah pe arah kalak si deban, amin pe banci saja kami jadi tanggungen si mberat man kena perban kami rasul-rasul Kristus.+ 7 Tapi lembut perbahanen kami man kena, bagi sekalak nande si sangana pepinemken* anakna janah lembut ia ngurus* anakna. 8 Perban kelengna ate kami man kena, meriah ukur kami mpeseh berita si meriah arah Dibata nari man kena, kesah kami pe bereken kami man kena+ perban keleng kel ate kami kena.+
9 O turang senina, pasti inget kena uga kerja keras kami ras uga latihna kap kami. Erdahin kami suari berngi, gelah sanga beritaken kami man kena berita si meriah arah Dibata nari, la kami jadi tanggungen ise pe.+ 10 Kena si jadi saksi bage pe Dibata, kerna perbahanen kami si setia, benar, ras la ersalah man kena selaku kalak si tek man Tuan. 11 Teh kena uga perbahanen kami man kena, bagi sekalak bapak+ man anak-anakna. Terus persingeti kami kena, pegegehi kami, janah bereken kami kesaksin man kena masing-masing.+ 12 Alu bage, perbahanen kena lalap ngena ate Dibata,+ si ngelebuh kena guna masuk ku bas KerajanNa+ janah aloken kena kemulian arah Ia nari.+
13 Perban si e kap maka la kami erngadi-ngadi ngata bujur man Dibata,+ perban sanga begi kena kata Dibata arah kami nari, aloken kena kata e labo bagi kata si rehna arah manusia nari, tapi bagi si arusna eme arah Dibata nari. Kata e erdahin bas diri kena, kalak si tek man Tuan. 14 O turang senina, enggo usih kena runggun-runggun Dibata si enggo ersada ras Kristus Jesus si lit i Judea. Bagi kalak e enggo isiksa kalak Jahudi, kena pe isiksa kalak si sada bangsa ras kena.+ 15 Kalak Jahudi pe munuh Tuan Jesus+ ras nabi-nabi janah kami pe siksana.+ La senangken kalak e Dibata janah lawanna kerina kalak. 16 Beritaken kami man bangsa si deban gelah kalak e pe iselamatken,+ tapi lalap halangi kalak Jahudi kami. Alu bage terus tambahi kalak e dosana. Tapi dungna reh rawa Dibata man kalak e.+
17 O turang senina, amin pe kita sirang ntisik janah la banci idah kami kena, tapi kena tetap lit bas pusuh kami. Perban merhat kel kami jumpa ras kena, emaka usahaken kami kel jumpa ras kena. 18 Dahi kami ate kami kena. Aku, Paulus, labo sekali ngenca kuusahaken tapi enggo dua kali. Amin pe bage, halangi Setan perdalanen kami. 19 Adi la kena, ise nari si jadi arapen kami, keriahen ukur kami, ntah pe mahkota kami si erban kami bangga i lebe-lebe Tuanta Jesus sanga kerehenna?+ 20 Kena kap kemulian ras keriahen ukur kami.