Kamus Pustaka si Badia

A B C D E G H I J K L M N O P R S T U W Z

A

• Ab.

  Gelar bulan pelimaken bas kalender agama kalak Jahudi janah bulan pe-11-ken bas kalender umum kalak Jahudi. Gelar enda ipake kenca pembebasen arah Babilon. Bulan e mulai pertengahen Juli seh ku pertengahen Agustus. Gelar enda la lit ikataken bas Pustaka, tapi ikataken ‘bulan pelimaken.’ (Bil 33:38; Esa 7:9)​—Nen Ket. B15.

• Abip.

  Gelar bulan pertama si asli bas kalender kalak Jahudi janah bulan pepituken bas kalender umum kalak Jahudi. Bulan e mulai pertengahen Maret seh ku pertengahen April. Ertina “Biji-bijin si Meratah.” Kenca kalak Jahudi ibebasken arah Babilon, bulan e igelari Nisan. (Ul 16:1)​—Nen Ket. B15.

• Adar.

  Gelar bulan pe-12-ken bas kalender agama kalak Jahudi kenca penabanen i Babilon, janah bulan peenemken bas kalender umum kalak Jahudi. Bulan e mulai pertengahen Februari seh ku pertengahen Maret. (Est 3:7)​—Nen Ket. B15.

• Ahli-ahli bintang.

  Kalak si mpelajari pergeraken matawari, bulan, ras bintang guna meteh kai si terjadi i bas wari si pepagi.​—Dan 2:27; Mat 2:1.

• Ahli-ahli Undang-Undang Musa.

  Si nulis mulihi Kitap-Kitap Heber. Bas jaman Jesus, si igelari penulis eme ahli Undang-Undang Musa. Itentang kalak enda Jesus.​—Esa 7:6; Mrk 12:38, 39; 14:1.

• Akaya.

  Bas Kitap Junani Kristen, enda gelar propinsi Romawi i sebelah selatan Junani si ibu kotana Korinti. Si termasuk bas Akaya eme kerina Peloponesus ras bagin tengah daraten Junani. (Perb 18:12)​—Nen Ket. B13.

• Alamot.

  Istilah musik si ertina “Piga-Piga Singuda-nguda; Diberu-Diberu si Nguda Denga,” mungkin maksudna sora sopran arah diberu si nguda denga. Banci saja istilah enda ncidahken maka lagu si iendeken ras musik si imainken bas nada tinggi.​—1Kro 15:20, ctt.; Ms 46:Superskripsi.

• Alat mateken sumbu lampu.

  Alat si ipake bas kemah ingan ersembah ras bas rumah pertoton. Alat e iban arah emas ntah tembaga. Bentukna bagi gunting guna motong sumbu.​—2Raj 25:14.

• Alpa ras Omega.

  Hurup pertama ras hurup terakhir bas abjad Junani. Bas buku Ketangkasen, kata enda telu kali itulis jadi penggelaren Dibata. Bas konteks enda ertina seri ras “si pertama ras si terakhir” bage pe “si pemena ras si pendungi.”​—Ket 1:8; 21:6; 22:13.

• Amin.

  “Terjadilah bage,” ntah “pasti.” Kata dasarna eme kata Heber aman, si ertina “setia; terteki.” “Amin” ikataken tanda setuju man sumpah, toto, ntah pe man kata-katata sendiri bage pe kalak si deban. Bas buku Ketangkasen, kata e ipake jadi penggelaren man Jesus.​—Ul 27:26; 1Kro 16:36; Ket 3:14.

• Anak Daud.

  Penggelaren si rusur ipake man Jesus, si ngataken maka ia Ahli Waris perjanjin Kerajan, si menurut nubuat eme salah sada keturunen Daud.​—Mat 12:23; 21:9.

• Anak-anak Harun si dilaki.

  Anak-anak Harun si dilaki eme keturunen Harun kempu Lewi. Kalak e si ipilih jadi imam si mbelin menurut Undang-Undang Musa. Anak-anak Harun ngelakoken tugas-tugas bas kemah ingan ersembah ras bas rumah pertoton.​—1Kro 23:28.

• Anak manusia.

  Istilah si lit kira-kira 80 kali bas kitap Injil. Penggelaren man Jesus Kristus si ncidahken ia lahir jadi manusia biasa, labo jadi mahluk roh bas daging jasmani. Istilah enda pe ncidahken maka Jesus erban nubuat bas Daniel 7:13, 14 terjadi. Bas Kitap-Kitap Heber, istilah enda ipake man Esekiel ras Daniel, guna ncidahken maka kalak e juru bicara si banci mate, beda ras Dibata Sumber berita kalak e.​—Esek 3:17; Dan 8:17; Mat 19:28; 20:28.

• Anak sintua.

  Biasana si imaksud eme anak pertama arah sekalak perbapan (lenga tentu anak pertama arah sekalak pernanden). Bas jaman Pustaka si Badia, anak dilaki sintua ndatken kehamaten bas keluarga janah ia jadi kepala keluarga adi mate bapakna. Istilah enda pe ipake man binatang jantan si pertama lahir.​—Kel 11:5; 13:12; Kej 25:33; Heb 1:6.

• Aram; Kalak Aram.

  Kalak Aram eme keturunen Aram. Aram e anak Sem. Kalak Aram tading i daerah Pegunungen Libanon seh ku Mesopotamia bage pe arah Pegunungen Taurus si lit i sebelah utara seh ku Damaskus i sebelah selatan. Bas bahasa Heber, daerah e igelari Aram, dungna daerah e igelari Siria, janah pendudukna ikataken kalak Siria.​—Kej 25:20; Ul 26:5; Hos 12:12.

• Areopagus.

  Sada bukit si meganjang i Aten, sebelah barat laut Akropolis. Pengadilen si lit i je pe igelari Areopagus. Paulus enggo ibaba pengikut Setoa ras Epikurea ku Areopagus guna njelasken kinitekenna.​—Perb 17:19.

• Asasel.

  Enda gelar bas bahasa Heber si banci saja ertina “Kambing si Bene.” Bas Wari Pendamen, kambing si itentuken man Asasel, ipulahi ku taneh mesawang, tempa-tempa babana lawes dosa-dosa bangsa e bas tahun si enggo lewat.​—Im 16:8, 10.

• Aselgeia.​—

  Nen PERBAHANEN SI LA METEH MELA.

• Asia.

  Bas Kitap-Kitap Junani Kristen, enda gelar salah sada propinsi i Roma si daerahna termasuk bagin barat negara Turki jaman gundari, bage pe piga-piga pulau bagi Samos ras Patmos. Ibu kotana eme Epesus. (Perb 20:16; Ket 1:4)​—Nen Ket. B13.

• Astarte.

  Dewi kalak Kanaan eme dewi perang ras dewi kesuburen. Dewi enda diberu Baal.​—1Sam 7:3.

B

• Baal.

  Dewa kalak Kanaan si ianggap si mpuna langit, si mereken udan, ras dewa kesuburen. “Baal” pe igunaken jadi penggelaren man dewa-dewa si lit i je si rendahen kedudukenna. Bas bahasa Heber, Baal ertina “Si Mpuna; Tuan.”​—1Raj 18:21; Rom 11:4.

• Badia.

  Sipat si lit bas Jahwe; bersih bas perbahanen; suci. (Kel 28:36; 1Sam 2:2; Kua 9:10; Jes 6:3) Adi imaksud man manusia (Kel 19:6; 2Raj 4:9), binatang (Bil 18:17), benda (Kel 28:38; 30:25; Im 27:14), ingan (Kel 3:5; Jes 27:13), waktu (Kel 16:23; Im 25:12), ras kegiaten (Kel 36:4), kata aslina bas bahasa Heber ngertiken ipisahken ntah pe ipebadia guna Dibata si badia; ikhususken guna ngelayani Jahwe. Bas Kitap-Kitap Junani Kristen, kata “badia” ngertiken ipisahken guna Dibata. Kata e pe ngertiken perbahanen si bersih.​—Mrk 6:20; 2Kor 7:1; 1Pet 1:15, 16.

• Bahasa Aram.

  Mirip ras bahasa Heber, hurupna pe seri. Tangtangna bahasa Aram ipake kalak Aram saja, tapi dungna ipake jadi bahasa internasional bas perdagangen ras percakapen bas pemerentahen Assur ras Babilon. Bahasa Aram pe bahasa si sah bas pemerentahen Persia. (Esa 4:7) Sebagin buku Esra, Jeremia, ras Daniel itulis bas bahasa Aram.​—Esa 4:8–6:18; 7:12-26; Jer 10:11; Dan 2:4b–7:28.

• Balsebul.

  Penggelaren si ibereken man Setan si jadi penguasa malekat-malekat jahat. Banci saja enda ibuat arah gelar Baalsebub, eme Baal si isembah kalak Pilisti i Ekron.​—2Raj 1:3; Mat 12:24.

• Bat.

  Takaren man cairen, kira-kira 22 liter, menurut hasil penemuan arkeologi arah pecahen-pecahen si make gelar enda. Buen takaren si deban bas Pustaka, guna nakar bahan si kerah ntah pe cairen, ikira menurut perhitungen sada bat eme 22 liter. (1Raj 7:38, ctt.; Esek 45:14)​—Nen Ket. B14.

• Batang kayu kegeluhen.

  Batang kayu bas Taman Eden. Bas Pustaka la lit ikataken maka bas buahna lit si banci mereken kegeluhen. Tapi batang kayu e lambang guna njamin maka bereken Dibata kegeluhen si rasa lalap man kalak si ijinkenNa guna manca.​—Kej 2:9; 3:22.

• Batang kayu pemeteh kerna si mehuli ras si jahat.

  Batang kayu bas Taman Eden si pake Dibata jadi tanda kerna hakNa nentuken kai si “mehuli” ras si “jahat” man manusia.​—Kej 2:9, 17.

• Batar-batar.

  Ingan mpersembahken korban ntah kemenyan si iban arah batu si isusun, arah taneh, ntah pe arah kayu si ilapisi logam. Bas ruang pertama kemah ingan ersembah ras bas rumah pertoton, lit “ingan nutung persembahen emas” si kitik guna mpersembahken kemenyan si iban arah kayu si ilapisi emas. Bas arah darat, bas bagin halamen, lit “ingan nutung persembahen tembaga” si tergalangen guna mpersembahken korban tutungen. (Kel 27:1; 39:38, 39; Kej 8:20; 1Raj 6:20; 2Kro 4:1; Luk 1:11; ctt.)​—Nen Ket. B5 ras B8.

• Batu gilingen; Batu penggilingen.

  Bentuk batu e kibul janah itama i datas batu si deban si mirip ras batu e, ipake guna nggiling biji gelah jadi tepung. I tengah batu si arah teruh, lit iban kayu si pinter jadi pusatna man batu si arah datas. Bas jaman Pustaka si Badia, gilingen tan ipake diberu bas rumah. Tiap wari, persedian roti bas keluarga bergantung ku gilingen tan. Emaka bas Undang-Undang Musa, gilingen ntah pe batu gilingen si arah datas la banci ibuat jadi jaminen. Lit ka gilingen si galang si bentukna seri, si iputar binatang.​—Ul 24:6; Mrk 9:42.

• Batu utama.

  Batu si itama i bas suki sada bangunen, eme i bas perjumpan dua tembok, janah iperluken guna mpersada dua tembok e. Batu si utama eme batu pondasi si utama. Batu si biasana ipilih guna erban bangunen umum ras tembok kota, eme batu si seh kel paguhna. Kata enda ipake guna nggambarken uga tangtangna doni iciptaken. Jesus me “batu pondasi si utamana” man runggun Kristen, janah runggun Kristen ipeseri ras sada rumah rohani.​—Ep 2:20; Jop 38:6.

• Benar.

  Bas Pustaka si Badia, “benar” maksudna benar menurut Dibata sesuai patokenNa kerna kai si benar ras si salah.​—Kej 15:6; Kua 11:4; Sep 2:3; Mat 6:33.

• Berhala; Nembah berhala.

  Patung, gambar, ntah pe lambang arah kai situhu-tuhu lit ntah pe kai si ibayangken si igunaken bas ibadah. Nembah berhala ertina sujud nembah berhala, engkelengi, ras muji berhala.​—Ms 115:4; Perb 17:16; 1Kor 10:14.

• Berita si meriah.

  Bas Kitap-Kitap Junani Kristen, berita si meriah kerna Kerajan Dibata ras kerna keselamaten si idat alu erkiniteken man Jesus Kristus.​—Luk 4:18, 43; Perb 5:42; Ket 14:6.

• Biji-bijin.

  Buah ntah pe biji sinuan-sinuan bagi gandum ntah pe barli.​—Kej 27:28; Bil 15:20.

• Bintang erpagi-pagi.

  Enda bintang terakhir si teridah arah timur sope terbit matawari. Adi bintang erpagi-pagi e enggo teridah, e tandana wari si mbaru.​—Ket 22:16; 2Pet 1:19.

• Botol marmar.

  Gelar botol minak wangi si kitik si iban arah batu nari, si lit i deher Alabastron, Mesir. Biasana leher botol enda kitik janah banci itutup gelah minak si merga la mambur. Batu e pe itandai batu marmar.​—Mrk 14:3.

• Buah si pertama.

  Buah-buah si pertama bas musim rani, ntah pe hasil pertama bas kai pe. Suruh Jahwe bangsa Israel mpersembahken buah si pertama man baNa, ntah e manusia, binatang, bage pe buah-buahen. Selaku sada bangsa, persembahken kalak Israel buah si pertama man Dibata bas Perayan Roti si La Itama Ragi ras bas Perayan Pentakosta. Istilah ‘buah si pertama’ pe ipake guna ngertiken Kristus ras pengikut-pengikutna si ipilih ku surga.​—2Kro 31:5; 1Kor 15:23, ctt.; Rom 8:23, ctt.; Ket 14:4.

• Bukit.

  Banci maksudna bukit ntah pe bangunen si lit bas Kota Daud. Mungkin tembok-tembok penopang bas teras-teras bukit ntah pe penopang si debanna si ibangun.​—2Sam 5:9; 1Raj 11:27.

• Bul.

  Gelar bulan pewaluhken bas kalender agama Jahudi ras bulan peduaken bas kalender umum kalak Jahudi. Bulan e mulai pertengahen Oktober seh ku pertengahen November. Kata dasarna ertina “erbuah; erhasil.” (1Raj 6:38)​—Nen Ket. B15.

• Bulan baru.

  Wari pertama tiap bulan bas kalender Jahudi, eme wari pulung, erpesta, ras mpersembahken korban si istimewa. Dungna wari e jadi perayan si penting man bangsa e, janah la lit si erdahin bas wari e.​—Bil 10:10; 2Kro 8:13; Kol 2:16.

• Buluh; Peren.

  Istilah enda igunaken man batang-batang si biasana turah bas ingan si lit launa. Batang-batang si imaksud biasana Arundo donax. (Jop 8:​11; Jes 42:3; Mat 27:29; Ket 11:1)​—Nen TONGKAT PENGUKUR.

C

• Cambuk.

  Sada bentuk hukumen. Bas Kitap-Kitap Junani Kristen, enda maksudna ipekpek, icambuk alu nali si iiket ras duri.​—Mat 20:19; Joh 19:1.

• Cincin stempel.

  Meterai si ipake bas jari-jari ntah pe ikalungken, si jadi tanda kuasa sekalak penguasa ntah pe pejabat, janah mon-mon ikataken cincin cap. (Kej 41:42)​—Nen METERAI.

• Cingkeru.

  Sinuan-sinuan enda salah sada jenis dukut. Batangna iban jadi pangan asuh-asuhen janah bijina iban jadi pangan.​—Jes 28:25; Esek 4:9.

D

• Dagon.

  Dewa kalak Pilisti. Asal usul kata enda la banci ipastiken, tapi menurut piga-piga ahli, kata enda lit hubungenna ras kata Heber dagh (ikan).​—Hak 16:23; 1Sam 5:4.

• Dalan Tuan.

  Pengikut-pengikut Jesus igelari pengikut “Dalan Tuan,” perban ikutken kalak e usihen Jesus Kristus janah kegeluhen si idalani kalak e sesuai ras kinitekenna man Jesus.​—Perb 19:9.

• Danau api.

  Ingan si ‘apina gurlah si lit belerangna,’ enda labo ingan situhu-tuhu lit. Si e igelari ka “kematen si peduaken.” Kalak si erdosa si la nggit ertobat, Iblis, kematen, ras Kuburen ibenterken ku Danau api e. Danau enda ngertiken pengkernepen seh rasa lalap, labo siksan si seh rasa lalap, sebap mahluk roh, kematen, ras Kuburen ikut ibenterken ku je padahal si e kerina la banci ipengaruhi api.​—Ket 19:20; 20:14, 15; 21:8.

• Darik.

  Sen logam Persia si iban arah emas nari, beratna 8,4 gram. (1Kro 29:7)​—Nen Ket. B14.

• Dekapolis.

  Sada kelompok kota i Junani, si buena lit sepuluh kota (bas bahasa Junani nari deka, si ertina “sepuluh,” ras polis, si ertina “kota”). Buen kota e lit i sebelah timur Laut Galilea ras Lau Jordan, emaka daerah e pe igelari Dekapolis. Kota-kota e jadi pusat kebudayan ras perdagangen Helenistik. Pernah ilewati Jesus daerah enda, tapi la lit cataten si ngataken maka dahina kota-kota e. (Mat 4:25; Mrk 5:20)​—Nen Ket. A7 ras B10.

• Delima.

  Buah si bentukna bagi apel janah lit mahkota bas salah sada ujungna. I teruh kulitna si piher e, melala si bagi kapsul kitik si risi cairen. Tiap kapsul e lit biji-bijina si megara ntah megara nguda. Lit hiasen si bentukna bagi delima bas pinggir rompi biru imam si mbelin bage pe bas takal tiang Jakin ras Boas, si lit i lebe-lebe rumah pertoton.​—Kel 28:34; Bil 13:23; 1Raj 7:18.

• Depa.

  Satuan panjang guna ngukur asa kai bagesna lau. Depa seri ras 1,8 meter. (Perb 27:28, ctt.)​—Nen Ket. B14.

• Dibata si benar.

  Terjemahen arah istilah Heber Ha-Elohim ras Ha-El. Bas melala ayat, kata awalen Ha ipake guna mbedaken Jahwe eme Dibata si benar ras dibata-dibata palsu. Bas ayat-ayat si bage, ipake me istilah “Dibata si benar” sebap bas istilah e kerina makna bas bahasa Heberna enggo masuk.​—Kej 5:22, 24; 46:3; Ul 4:39.

• Dinar.

  Sen pirak Roma si beratna kira-kira 3,85 gram janah lit i je gambar Kaisar. Erga sada dinar seri ras gaji sada wari erdahin. Sen enda ka nge si ipake kalak Jahudi guna nggalar “pajak kepala” si pindo kalak Roma. (Mat 22:17; Luk 20:24)​—Nen Ket. B14.

• Doni; Jaman.

  Bas bahasa Junani aion. Kata e banci ertina kai si sangana terjadi bas sada jaman ntah pe kai si jadi tanda sada masa ntah pe jaman tertentu, si mbedaken masa ntah pe jaman e ras masa ntah pe jaman si debanna. Pake Pustaka si Badia istilah “doni” ntah pe “jaman” ngertiken keadan si umum bas doni enda bage pe kegeluhen menurut doni enda. (2Tim 4:10) Paksa perjanjin Undang-Undang Musa berlaku, ban Dibata jaman si mbaru si igelari jaman kalak Israel ntah pe jaman kalak Jahudi. Sanga Jesus Kristus jadi korban tebusen, pake Dibata ia guna erban jaman si deban, si terlibat eme runggun kalak Kristen si ipilih ku surga. E me tangtangna sada jaman si mbaru. Bas jaman e, kai si igambarken perjanjin Undang-Undang Musa mulai terjadi. Istilah doni ntah pe jaman ertina keadan si enggo terjadi ntah pe si nandangi terjadi.​—Mat 24:3; Mrk 4:19; Rom 12:2; 1Kor 10:11.

• Drakhma.

  Bas Kitap-Kitap Junani Kristen, kata e lit hubungenna ras sen pirak Junani. Beratna paksa si e 3,4 gram. Bas Kitap-Kitap Heber, lit ayat si ngataken drakhma emas arah jaman Persia si seri nilaina ras darik Persia. (Neh 7:70, ctt.; Mat 17:24)​—Nen Ket. B14.

• Dua lembar batu.

  “Dua lembar batu” biasana maksudna Sepuluh Perentah si itulis bas dua lembar batu e, si ibereken man Musa.​—Kel 31:18.

E

• Edom.

  Gelar si deban man Esau anak Isak. Keturunen Esau (Edom) nguasai daerah Seir, eme daerah pegunungen antara Laut Mate ras Teluk Aqaba. Daerah e tandai kalak gelarna Edom. (Kej 25:30; 36:8)​—Nen Ket. B3 ras B4.

• Elul.

  Gelar bulan peenemken bas kalender agama Jahudi kenca itaban i Babilon, bulan pe-12-ken bas kalender umum Jahudi. Bulan e mulai pertengahen Agustus seh ku pertengahen September. (Neh 6:15)​—Nen Ket. B15.

• Epa.

  Takaren man bahan si kerah ras ingan si ipake guna nakar biji-bijin. Takaren enda seri ras takaren bat guna nakar cairen, eme 22 liter. (Kel 16:36; Esek 45:10)​—Nen Ket. B14.

• Eperaim.

  Gelar anak Jusup si peduaken. Bas pudi wari jadi gelar salah sada suku Israel. Kenca Israel ibagi, Eperaim jadi wakil kerajan Israel 10 suku perban Eperaim suku si hebatna.​—Kej 41:52; Jer 7:15.

• Epikurea.

  Guru Junani si nggeluh bas tahun 341-270 SM. Dasar ajarenna eme perukuren maka tujun geluh tiap kalak eme senang-senang.​—Perb 17:18.

• Epod.

  Baju si mirip ras celemek si ipake imam. Imam si mbelin pakena epod si khusus, bas bagin si arah lebe epod e iban penutup dada ras 12 batu si merga. (Kel 28:4, 6)​—Nen Ket. B5.

• Eprat.

  Lau si gedangna i Asia barat daya ras si pentingna, janah salah sada arah dua lau si utama i Mesopotami. Lau e tangtangna iceritaken bas Kejadin 2:14, salah sada lau arah empat lau i Eden. Lau enda jadi batas utara daerah Israel. (Kej 15:18; Ket 16:12)​—Nen Ket. B2.

• Erceda ate; Ceda ate.

  Perasan sedih perban kematen ntah pe perban kiniseran si deban. Bas jaman Pustaka si Badia, biasana kalak erceda ate bas sada waktu tertentu. Selain tangis kel janah nderkuh, biasana kalak si erceda ate make baju si khusus, itamana abu ku takalna, rigatkenna bajuna, janah temtemina dadana. Mon-mon lit kalak si iupahi guna ngandung sanga acara penguburen.​—Ul 34:8; Est 4:3; Ket 21:4.

• Erlua-lua.

  Hubungen seks si ilakoken kalak si enggo erjabu ras kalak si deban si labo teman geluhna.​—Kel 20:14; Mat 5:27; 19:9.

• Ertobat.

  Bas Pustaka si Badia, ertina berubah pikiren janah menyesal alu bulat ukur perban sedekah enda la mehuli lagu langkahna, salah perbahanenna, ntah lakokenna kai si la arusna lakokenna. Kalak situhu-tuhu ertobat ibuktikenna arah perbahanenna janah robah ia.​—Mat 3:8; Perb 3:19; 2Pet 3:9.

• Etanim.

  Gelar bulan pepituken bas kalender agama Jahudi ras bulan pertama bas kalender umum Jahudi. Bulan e mulai pertengahen September seh ku pertengahen Oktober. Kenca kalak Jahudi mulih arah Babilon, bulan e igelari Tisri. (1Raj 8:2)​—Nen Ket. B15.

• Etiopia.

  Bangsa bas jaman si nai si lit i selatan Mesir. Daerahna mulai daerah Mesir si arah selatanna kel ras Sudan si gundari. Kata enda mon-mon ipake man kata Heber “Kus.”​—Est 1:1.

G

• Gandum spelta.

  Gandum spelta (Triticum spelta) eme salah sada jenis gandum si kurang jilena. Segalna ntah kulitna la nukah ipisahken arah buahna.​—Kel 9:32, ctt.

• Gehena.

  Bas bahasa Junani, enda gelar man Lembah Hinnom. Inganna arah barat daya Jerusalem kuno. (Jer 7:31) Enggo inubuatken maka i je melala mayat-mayat. (Jer 7:32; 19:6) La lit bukti maka binatang ntah pe manusia ibenterken ku bas Gehena guna isiksa ntah pe itutung nggeluh-nggeluh. Emaka, Gehena labo nggambarken ingan tendi manusia isiksa alu api seh rasa lalap. Tapi Jesus ras murid-muridna make kata Gehena guna nggambarken “kematen si peduaken” eme hukumen guna ikernepken seh rasa lalap.​—Ket 20:14; Mat 5:22; 10:28.

• Gera.

  Satuan berat si seri ras 0,57 gram. Gera seri ras 1/20 sekel. (Im 27:25)​—Nen Ket. B14.

• Gereta.

  Dua rodana janah biasana itarik kuda bas perang.​—Kel 14:23; Hak 4:13; Perb 8:28.

• Gileat.

  Situhuna enda daerah si subur i sebelah timur Lau Jordan terus ku sebelah utara ras selatan Lembah Jabok. Tapi mon-mon si imaksud eme kerina daerah Israel i sebelah timur Lau Jordan eme ingan tading suku Ruben, Gat, ras setengah suku Manase. (Bil 32:1; Jos 12:2; 2Raj 10:33)​—Nen Ket. B4.

• Gitit.

  Istilah musik, ertina la banci ipastiken. Tapi kata enda mungkin rehna arah kata Heber eme gath. Lit si ngataken maka istilah enda maksudna nada bas lagu-lagu kerna erban inemen anggur, sebap gath ertina ingan meras anggur.​—Ms 81:Superskripsi.

• Gubernur.

  Kepala pemerentahen bas propinsi. Si ngawasi gubernur eme dewan perwakilen rakyat si meganjangna si igelari Senat Roma. Gubernur erkuasa selaku hakim ras komandan, amin pe perbahanenna iawasi Senat, ia erkuasa nandangi propinsina.​—Perb 13:7; 18:12.

• Gulungen.

  Lembaren si gedang si iban arah kulit ntah pe arah papirus nari. Sembelah arah gulungen e lit tulisenna, si biasana igulung bas sada tongkat. Kitap si Badia itulis janah itulis mulihi bas gulungen-gulungen. Bage me bentuk buku bas jaman si mbarenda paksa Pustaka si Badia itulis.​—Jer 36:4, 18, 23; Luk 4:17-20; 2Tim 4:13.

• Gulungen si iban arah kulit nari.

  Iban arah kulit biri-biri, kambing, ras kulit lembu guna ingan nulis. Gulungen enda dekahen tahan asangken papirus si ipake jadi gulungen Pustaka si Badia. Gulungen kulit si suruh Paulus gelah baba Timotius, kemungkinen bagin arah Kitap-Kitap Heber. Piga-piga arah Gulungen Laut Mati itulis bas gulungen si iban arah kulit.​—2Tim 4:13.

• Gundik.

  Ndehara si peduaken, biasana budak si diberu.​—Kel 21:8; 2Sam 5:13; 1Raj 11:3.

H

• Hades.

  Kata Junani si ertina seri ras kata Heber eme “Syeol.” Kata enda iterjemahken jadi “Kuburen” (hurup awalna hurup galang), guna ncidahken maka si imaksud eme ingan kalak mate. Ingan enda gambaren ngenca ntah pe lambang.​—Nen KUBUREN.

• Hakim-hakim.

  Kalak si ilantik Jahwe guna nelamatken umatNa ope lenga lit raja bas Israel.​—Hak 2:16.

• Halamen.

  Ingan si erpagar si lit i sekeliling kemah ingan ersembah, ras daerah terbuka si ertembok i sekeliling bangunen utama rumah pertoton. Batar-batar persembahen guna persembahen tutungen lit i halamen kemah ingan ersembah bage pe halamen si arah bas i rumah pertoton. (Nen Ket. B5, B8, B11.) Ceritaken Pustaka si Badia ka kerna halamen rumah ras halamen istana.​—Kel 8:13; 27:9; 1Raj 7:12; Est 4:11; Mat 26:3.

• Hama jamur.

  Kerina jenis penakit sinuan-sinuan si iban jamur, si nyerap pangan ras lau arah sinuan-sinuan si iserangna. Lit si erpengakap maka hama jamur si ikataken bas Pustaka eme jamur karat hitam (Puccinia graminis).​—1Raj 8:37.

• Harmagedon.

  Kata enda arah bahasa Heber nari eme Har Meghiddohn si ertina “Gunung Megido.” Kata enda lit hubungenna ras ‘perang bas wari si mbelin eme wari Dibata Si Madakuasa’ sanga “raja-raja si lit i doni” ipepulung guna ngelawan Jahwe. (Ket 16:14, 16; 19:11-21)​—Nen KINISERAN SI MBELIN.

• Hasta.

  Satuan panjang si gedangna kira-kira antara siku-siku seh ku ujung jari tengah. Hasta si pake kalak Israel biasana gedangna 44,5 sentimeter (17,5 inci), tapi pake kalak e ka hasta si tergedangen, gedangna 51,8 sentimeter (20,4 inci). Beda hasta biasa ras hasta si tergedangen e eme sada tapak tan. (Kej 6:15; Luk 12:25; ctt.)​—Nen Ket. B14.

• Heber.

  Penggelaren si tangtangna ibereken man Abram (Abraham). Penggelaren enda mbedaken kalak Amori si tading rembak ras Abraham. Kenca si e, penggelaren e ipake keturunen Jakup, kempu Abraham. Bahasa si igunaken kalak e pe ikataken bahasa Heber. Bas jaman Jesus, bahasa Heber melala make kata-kata bas bahasa Aram nari. Bahasa enda me si ipake Kristus ras murid-muridna.​—Kej 14:13, ctt.; Kel 5:3; Perb 26:14.

• Hermes.

  Salah sada dewa kalak Junani, anak Zeus. I Listera, Paulus igelari Hermes, sebap Hermes ianggap suruhen dewa-dewi janah beluh ia ngerana.​—Perb 14:12.

• Herodes.

  Gelar keluarga man dinasti si ilantik kalak Roma guna merentah kalak Jahudi. Herodes Agung terkenal perban enggo ibangunna mulihi rumah pertoton i Jerusalem, janah perban berena perentah gelah kerina anak-anak dilaki bas jaman Jesus ibunuh. (Mat 2:16; Luk 1:5) Herodes Arkelaus ras Herodes Antipas, anak Herodes Agung ilantik guna merentah daerah-daerah si pernah iperentah bapak kalak e. (Mat 2:22) Antipas rusur itandai selaku “raja.” Ia merentah sedekah telu setengah tahun pelayanen Kristus seh asa waktu si ikataken bas Perbahanen Rasul-Rasul pasal 12. (Mrk 6:14-17; Luk 3:1, 19, 20; 13:31, 32; 23:6-15; Perb 4:27; 13:1) Kenca si e, Herodes Agripa I, eme kempu Herodes Agung, ibunuh malekat Dibata kenca ntisik ia merentah. (Perb 12:1-6, 18-23) Anakna, Herodes Agripa II merentah seh asa masa pemberontaken kalak Jahudi man Roma.​—Perb 23:35; 25:13, 22-27; 26:1, 2, 19-32.

• Higayon.

  Istilah guna mandu permainen musik. Bagi bas Masmur 9:16, kata enda banci saja maksudna selingen permainen harpa si nadana rendah ras entabeh ntah pe jeda si cocok guna rukur.

• Hin.

  Takaren man cairen ras ingan si ipake guna nakar. Isina seri ras 3,67 liter. (Kel 29:40)​—Nen Ket. B14.

• Hisop.

  Sinuan-sinuan si cabang ras bulungna mejile, si ipake bas upacara mpebadiaken guna mercikken dareh ntah pe lau. Kata Junani ras kata Heber si igunaken bas Pustaka banci saja maksudna piga-piga jenis sinuan-sinuan, mungkin Origanum maru ras Origanum syriacum. “Hisop” si ikataken bas Johanes 19:29 mungkin jenis sinuan si perturahna agak meganjang, alu bage tangkena si gedang e banci ipake ndudurken bunga karang ku babah Jesus.​—Kel 12:22; Ms 51:7, ctt.

• Homer.

  Takaren guna bahan si kerah si seri ras takaren kor. Menurut perkiran man takaren bat, sada homer seri ras 220 liter. (Im 27:16, ctt.)​—Nen Ket. B14.

• Horep; Gunung Horep.

  Daerah pegunungen si lit i deher Gunung Sinai. Gunung enda pe igelari Gunung Sinai. (Kel 3:1; Ul 5:2)​—Nen Ket. B3.

I

• Iblis.

  Ertina “Tukang Pitnah.” Kata enda igunaken bas Kitap-Kitap Junani Kristen jadi penggelaren man Setan, sebap ia tukang pitnah si utama bas mereken tuduhen palsu man Jahwe, man kataNa si benar, ras man gelarNa si badia.​—Mat 4:1; Joh 8:44; Ket 12:9.

• Iliria.

  Propinsi Roma arah barat laut Junani. Lawes Paulus seh ku propinsi enda sanga pelayanenna, tapi la iceritaken maka beritakenna nge berita si meriah bas Iliria ntah lang, ntah lawes saja ngenca ia ku je. (Rom 15:19)​—Nen Ket. B13.

• Ilmu sihir.

  Make kuasa si rehna arah malekat-malekat jahat.​—2Raj 9:22.

• Imam.

  Kalak si erdahin si jadi wakil Dibata, si ngelayani umatNa ras ngajar kalak e kerna Dibata bage pe undang-undangNa. Ia pe jadi wakil umat Dibata i lebe-lebe Dibata. Persembahkenna korban, ia jadi perantara, bage pe si mindo man Dibata guna kepentingen umatNa. Sope lit Undang-Undang Musa, si jadi imam bas keluarga eme kepala keluarga. Kenca lit Undang-Undang Musa, si jadi imam eme si dilaki arah keluarga Harun si rehna bas suku Lewi nari. Si nampati kalak e eme dilaki si debanna arah suku Lewi ka. Sanga perjanjin si mbaru mulai berlaku, Israel si jadi jang Dibata jadi bangsa imam, janah Jesus Kristus jadi Imam si Mbelin.​—Kel 28:41; Heb 9:24; Ket 5:10.

• Imam kepala.

  Enda penggelaren si deban man “imam si mbelin” bas Kitap-Kitap Heber. Bas Kitap-Kitap Junani Kristen, istilah “imam kepala” banci saja maksudna imam si ngelakoken tugas si penting bas aturen imam-imam. Banci ka termasuk kalak si pernah ngelayani jadi imam si mbelin ras kalak si pernah jadi kepala bas 24 kelompok imam.​—2Kro 26:20; Esa 7:5; Mat 2:4; Mrk 8:31.

• Imam si mbelin.

  Bas Undang-Undang Musa, imam si mbelin eme imam si utama si jadi wakil kalak Israel i lebe-lebe Dibata, ras si ngawasi imam-imam si deban. Igelari ka “imam kepala.” (2Kro 26:20; Esa 7:5) Ia ngenca si banci masuk ku Ingan Sibadiana, eme bagin si arah basna si lit i kemah ingan ersembah, janah bas pudi wari i rumah pertoton. Sekali setahun ngenca ia banci masuk ku bas eme sanga Wari Pendamen. Istilah “imam si mbelin” pe ngertiken Jesus Kristus.​—Im 16:2, 17; 21:10; Mat 26:3; Heb 4:14.

• Ingan meganjang; Ingan ersembah.

  Ingan ersembah si inganna i datas bukit ntah gunung ntah bangunen si iban manusia. Amin pe ingan si meganjang e mon-mon ipake guna ersembah man Dibata, biasana ingan e ipake guna nembah dewa-dewi.​—Bil 33:52; 1Raj 3:2; Jer 19:5.

• Ingan meras anggur.

  Biasana bas ingan e lit dua lubang si galang si iban arah batu kapur nari, si ihubungken saluren si kitik. Sada lubang ganjangen asa lubang si debanna. Sanga anggur ihancurken bas lubang si ganjangen, launa maler ku lubang si meteruh. Istilah enda nggambarken penghakimen Dibata.​—Jes 5:2; Ket 19:15.

• Ingan si badia.

  Ingan si ikhususken guna nembah Dibata. Tapi, si rusurna igelari ingan si badia eme kemah ingan ersembah ntah pe rumah pertoton i Jerusalem. Penggelaren enda pe ipake man ingan tading Dibata i surga.​—Kel 25:8, 9; 2Raj 10:25; 1Kro 28:10; Ket 11:19.

• Ingan si Badia.

  Ingan si pertama bas kemah ingan ersembah ras rumah pertoton. Galangen ingan enda asangken Ingan Sibadiana, eme ingan si arah basna kel. Bas Ingan si Badia bas kemah ingan ersembah, lit nahe lampu emas, ingan nutung persembahen arah emas guna nutung kemenyan, meja man roti si ipersembahken, ras perkakas emas. Bas Ingan si Badia bas rumah pertoton, lit ingan nutung persembahen arah emas, sepuluh nahe lampu emas, ras sepuluh meja guna ingan roti si ipersembahken. (Kel 26:33; Heb 9:2)​—Nen Ket. B5 ras B8.

• Ingan Sibadiana.

  Ingan si arah basna kel i kemah ingan ersembah ntah pe i rumah pertoton. Peti Perjanjin itama i je. Menurut Undang-Undang Musa, imam si mbelin ngenca si ibere masuk ku Ingan Sibadiana janah paksa Wari Pendamen saja ngenca ia masuk ku bas.​—Kel 26:33; Im 16:2, 17; 1Raj 6:16; Heb 9:3.

• Ingan sumbu.

  Iban arah emas, pirak, ntah pe tembaga. Igunaken bas kemah ingan ersembah ras rumah pertoton guna nutung kemenyan, mpedarat arang arah ingan nutung persembahen nari, bage pe mpedarat sumbu si enggo meseng bas nahe lampu emas nari. Kerinana enda igelari ka ingan nutung.​—Kel 37:23; 2Kro 26:19; Heb 9:4.

• Israel.

  Gelar si ibereken Dibata man Jakup. Kenca si e igunaken man kerina keturunen Jakup. Keturunen anak Jakup si dilaki, si buena lit 12 kalak, rusur igelari umat Israel, keturunen Israel, bangsa Israel, ras kalak Israel. Kata Israel pe igunaken jadi gelar kerajan utara si buena sepuluh suku, si terpisah ras kerajan i selatan. Kenca si e, kata enda igunaken jadi penggelaren man kalak Kristen si ipilih guna lawes ku surga, eme “Israel si jadi jang Dibata.”​—Gal 6:16; Kej 32:28; 2Sam 7:23; Rom 9:6.

J

• Jahwe.

  Terjemahen bas bahasa Karo man Tetragramaton (empatna hurup Heber man gelar Dibata), si lit lebih 7.000 kali iterjemahken bas Pustaka enda.​—Nen Ket. A4 ras A5.

• Jakup.

  Anak Isak ras Ribka si dilaki. Bas pudi wari, ban Dibata gelarna jadi Israel janah ia jadi kepala keluarga bangsa Israel (si igelari ka kalak Israel janah dungna igelari kalak Jahudi). Lit 12 anakna dilaki. Anak-anakna si dilaki ras keturunen anak-anakna e jadi 12 suku bangsa Israel. Gelar Jakup lalap igunaken man bangsa ntah pe kalak Israel.​—Kej 32:28; Mat 22:32.

• Jaminen.

  Erta si ibereken kalak si minjam man si mere pinjamen, guna jadi jaminen maka utangna e pasti galarina. Bas Undang-Undang Musa, lit ketetapen kerna jaminen, si tujunna ngelindungi kalak mesera ras kalak si deban si lemah bas bangsa Israel.​—Kel 22:26; Esek 18:7.

• Janji.

  Janji si iban alu bulat ukur man Dibata guna ngelakoken sada hal, mereken persembahen tertentu, ngelayani alu cara tertentu, ntah mpedauh hal-hal tertentu si ilarang. Janji seri pentingna ras sumpah.​—Bil 6:2; Peng 5:4; Mat 5:33.

• Jarahen.

  Barang si merga ntah asuh-asuhen si irampas arah musuh si italuken.​—Jos 7:21; 22:8; Heb 7:4.

• Jedutun.

  Istilah si ertina la banci ipastiken, si lit bas superskripsi Masmur 39, 62, ras 77. Superskripsi enda banci saja petunjuk guna ngendeken ntah pe jadi iringen man masmur e, mungkin petunjuk kerna gaya ntah pe alat musik si ipake. Perban lit sekalak pemain musik arah kalak Lewi si gelarna Jedutun, banci jadi gaya ntah alat musikna lit hubungenna ras ia ntah pe anak-anakna.

• Jengkal.

  Ukuren panjang si seri ras jarak antara ujung jempol ras ujung kelingking sanga jari-jari tan ipebelang. Perban sada hasta seri ras 44,5 sentimeter (17,5 inci), emaka sada jengkal seri ras 22,2 sentimeter (8,75 inci). (Kel 28:16; 1Sam 17:4; ctt.)​—Nen Ket. B14.

• Juda.

  Anak Jakup si dilaki si peempatken arah Lea. Sope Jakup mate, sanga tayang ia bas ingan medemna, inubuatkenna maka keturunen Juda jadi penguasa si hebat janah merentah seh rasa lalap. Sanga Jesus jadi manusia, ia keturunen Juda. Gelar Juda pe ipake jadi gelar suku, janah dungna jadi gelar kerajan. Kerajan Juda pe ikataken ka kerajan selatan, si termasuk i je arah dua suku Israel eme Juda ras Benyamin, bage pe imam-imam ras kalak Lewi. Daerah Juda lit bas bagin selatan negri e, termasuk Jerusalem ras rumah pertoton.​—Kej 29:35; 49:10; 1Raj 4:20; Heb 7:14.

• Junani.

  Bahasa si ipake kalak Junani, kalak si lahir i Junani, ntah pe si asal keluargana Junani nari. Bas Kitap-Kitap Junani Kristen, kata “Junani” igunaken secara umum, banci man kalak si labo Jahudi ntah pe man kalak si ipengaruhi bahasa ras kebudayan Junani.​—Joel 3:6; Joh 12:20.

K

• Kab.

  Takaren man bahan si kerah, ukurenna 1,22 liter. Galang takaren enda iban menurut perkiran takaren bat. (2Raj 6:25, ctt.)​—Nen Ket. B14.

• Kai pe si lit hubungenna ras malekat jahat.

  Ajaren si ngataken maka tendi kalak mate nggeluh denga kenca dagingna mate. Alu bage banci ia ngerana ras kalak si nggeluh denga khususna erkelangken sekalak jelma si banci erhubungen ras malekat jahat. Kata Junanina eme pharmakia, si ertina “ibius.” Istilah enda pe ihubungken ras kai si lit hubungenna ras malekat jahat, perban bas jaman si nai obat bius ipake sanga mindo kuasa malekat jahat guna ngelakoken sihir.​—Gal 5:20; Ket 21:8.

• Kain guni.

  Kain si kasar si ipake guna erban guni ntah pe kantongen, si biasa ipake guna ingan biji sinuan-sinuan. Biasana, kain guni iban arah mbulu kambing si warnana gelap janah ipake sanga erceda ate.​—Kej 37:34; Luk 10:13.

• Kaisar.

  Gelar keluarga kalak Roma si jadi penggelaren man penguasa Roma. Contohna Agustus, Tiberius, Klaudius, ras Nero. Tapi Nero ngenca si la lit gelarna ikataken bas Pustaka si Badia. “Kaisar” pe igunaken bas Kitap-Kitap Junani Kristen guna ngertiken sada kerajan ntah pe Negara.​—Mrk 12:17; Perb 25:12.

• Kalak Jahudi.

  Istilah si igunaken man kalak bas suku Juda nari kenca kerajan Israel sepuluh suku ndabuh. (2Raj 16:6) Kenca itaban ku Babilon, istilah enda ipake man kerina kalak Israel si mulih ku Israel. (Esa 4:12) Kenca si e, istilah enda ipake i belang-belang doni guna mbedaken kalak Israel ras kalak si labo Jahudi. (Est 3:6) Istilah enda pe ipake Rasul Paulus guna nggambarken maka bas runggun Kristen, la lit perbedan antara kalak Jahudi ras kalak si labo Jahudi.​—Rom 2:28, 29; Gal 3:28.

• Kalak Nasaret.

  Penggelaren man Jesus perban ia mbelin-mbelin i kota Nasaret. Mungkin lit hubungenna ras kata Heber si ipake man kata “tunas” bas Jesaya 11:1. Bas pudi wari, ipake guna penggelaren man pengikut Jesus.​—Mat 2:23; Perb 24:5.

• Kalak Nasir.

  Asalna arah kata Heber si ertina “Kalak si Ipisahken; Kalak si Ikhususken.” Lit dua jenis kalak Nasir: kalak Nasir perban nggit ia janah sada nari perban isuruh Dibata. Dilaki ntah pe diberu banci erban janji khusus man Jahwe gelah nggeluh jadi kalak Nasir ngasa waktu tertentu. Lit telu larangen utama man kalak si nggit erban janji si bage, eme la banci minem alkohol ntah kai pe arah hasil batang anggur, la banci motong buk, janah la banci kuitna mayat. Kalak si isuruh Dibata jadi kalak Nasir, segedang geluhna ia jadi kalak Nasir janah Jahwe si nuruhsa kai saja si arus lakokenna.​—Bil 6:2-7; Hak 13:5.

• Kalak Samaria.

  Tangtangna kalak enda eme kalak Israel arah kerajan sepuluh suku i utara. Tapi kenca Samaria italuken Assur bas tahun 740 SM, kalak asing si ibaba kalak Assur ku je igelari ka kalak Samaria. Bas jaman Jesus, kalak Samaria labo maksudna kalak arah suku ntah pe daerah Samaria, tapi maksudna pengikut sekte agama si lit i daerah Sikem ras i Samaria bas jaman si nai. Kai si iteki sekte e la seri ras kai si iteki agama Jahudi.​—Joh 8:48.

• Kalak si bebas; Kalak si ibebasken.

  Bas pemerentahen Roma, “kalak si bebas” eme kalak si mulai lahirna nari pe enggo bebas arah perbudaken janah tuhu-tuhu lit hak kewarganegaranna. Tapi kalak si lanai jadi budak igelari “kalak si ibebasken.” Budak si ibebasken secara resmi, alokenna hak selaku warga negara Roma, tapi la lit hakna ndatken jabaten politik. Budak si ibebasken alu cara si la resmi, lanai nggeluh selaku budak, tapi la alokenna kerina hak selaku warga negara.​—1Kor 7:22.

• Kalak si beluh ngelebuh begu kalak mate.

  Kalak si ngaku-ngaku banci ngerana ras kalak mate.​—Im 20:27; Ul 18:10-12; 2Raj 21:6.

• Kalak si ertanggung jawap nampati.

  Kalak si lit hakna ntah tanggung jawapna nebus ntah pe nukur mulihi keluargana arah perbudaken. Termasuk nebus ntah pe nukur mulihi erta ntah warisen keluarga. (Im 25:25-27, 47-54) Istilah enda pe lit hubungenna ras kebiasan ngempoi anggota keluarga si enggo janda ras mpebelin keturunenna guna seninana si enggo mate.​—Rut 4:7-10.

• Kalak si Ipilih.

  Istilah bahasa Junani si erti utamana eme “Peminpin Utama.” Enda lit hubungenna ras tugas Jesus Kristus si penting guna mbebasken manusia si setia arah dosa ras kematen nari. Jesus ka si maba manusia si setia gelah ndatken kegeluhen si rasa lalap.​—Perb 3:15; 5:31; Heb 2:10; 12:2.

• Kalak si lit pengenehenenna.

  Kalak si bereken Dibata kengasupen guna meteh sura-suraNa, si matana ibuka guna ngenen ntah pe ngangkai si la biasa iteh manusia. Kata Heberna asalna arah kata “mperdiateken,” eme “ngenen” ntah pe “ngangkai.” Sanga lit masalah, biasana ipindo nasehat si pentar arah kalak si lit pengenehenenna.​—1Sam 9:9.

• Kalak si ngikutken agama Jahudi.

  Bas Pustaka si Badia, enda maksudna kalak si pindah agama ku agama Jahudi. Adi dilaki ia, ia arus isunat.​—Mat 23:15; Perb 13:43.

• Kaldea; Kalak Kaldea.

  Tangtangna maksudna taneh ras kalak si lit i daerah Lau Tigris ras Lau Eprat. Dungna maksudna kerina daerah Babilon ras pendudukna. “Kalak Kaldea” pe maksudna kalak si lit sekolahna bas bidang sejarah, ilmu pengetahuan, bahasa, ras kerna bintang-bintang, bage pe kalak si make ilmu sihir ras ngeramal menurut bintang-bintang.​—Esa 5:12; Dan 4:7; Perb 7:4.

• Kanaan.

  Kempu Nuah, ras anak Ham si peempatken. Sepulu sada suku keturunen Kanaan tading i gedang-gedang daerah timur arah Laut Tengah antara Mesir ras Siria. Ingan e igelari “negri Kanaan.” (Im 18:3; Kej 9:18; Perb 13:19)​—Nen Ket. B4.

• Kantong kulit.

  Kantong si iban arah kulit binatang nari, bagi kambing ntah pe biri-biri guna nimpan inemen anggur. Inemen anggur itama bas kantong kulit si mbaru denga. Perban anggur e sangana berubah, emaka karbon dioksida si ihasilken nekan kantong kulit e. Kulit si mbaru e dungna kembang, tapi kulit si enggo ndekah ras piher banci dungna pecah.​—Jos 9:4; Mat 9:17.

• Kapal-kapal Tarsis.

  Tangtangna maksudna kapal-kapal si berkat ku Tarsis jaman si mbarenda (si gundari eme Spanyol). Bas pudi wari, mungkin si imaksud eme kapal-kapal si galang si banci ndauh perdalanna. Pake Salomo ras Josapat kapal-kapal si bage bas bisnis.​—1Raj 9:26; 10:22; 22:48.

• Kedungen jaman.

  Enda sada jangka waktu sope doni si ikuasai Setan ikernepken. Enda terjadi radu ras kerehen Kristus. Bas petunjuk Jesus, malekat-malekat pagi “misahken kalak jahat arah kalak si benar nari” ras engkernepken kalak e. (Mat 13:40-42, 49) Merhat murid-murid Jesus meteh ndigan nge terjadi “kedungen” e. (Mat 24:3) Sope Jesus mulih ku surga, erjanji ia man pengikut-pengikutna maka katawari pe tetap nge ia ras kalak e seh ku kedungen jaman.​—Mat 28:20.

• Kekeken.

  Keke bas si mate nari. Kata Junani anastasis ertina “keke; cinder.” Lit siwah kekeken si itulis bas Pustaka si Badia, termasuk Jesus si ipekeke Dibata Jahwe. Aminna pe kalak mate si deban ipekeke erkelangken Elia, Elisa, Jesus, Petrus, ras Paulus, kerina mukjizat enda terjadi perban kuasa Dibata. “Kalak si benar ras kalak si la benar” perlu ipekeke i doni gelah peraten Dibata terjadi. (Perb 24:15) Pustaka si Badia pe mpebetehken kerna kekeken ku surga si ikataken “kekeken si pertama” si inanami turang senina Jesus si ipilih alu kesah si badia.​—Pil 3:11; Ket 20:5, 6; Joh 5:28, 29; 11:25.

• Kekelengen si setia.

  Si rusurna iterjemahken arah kata Heber khesedh, eme kekelengen si ibuktiken perban lit janji kesetian ras hubungen si rembak. Istilah enda rusur ipake man kekelengen Dibata nandangi manusia, tapi kekelengen enda pe ibuktiken manusia man sesama manusia.​—Kel 34:6; Rut 3:10.

• Kemah ingan ersembah.

  Kemah guna ingan ibadah si banci ipindah-pindahken si pake kalak Israel kenca kalak e ndarat arah Mesir nari. Kemah e eme ingan Peti Perjanjin Jahwe, si nggambarken kerehen Dibata, janah jadi ingan guna mpersembahken korban ras nembah Dibata. Mon-mon kemah e ikataken “kemah perjumpan.” Kemah e eme rangka-rangka kayu, si itutupi linen si isulamken i je gambar kerubim-kerubim. Kemah e ibagi jadi dua ingan, eme Ingan si Badia ras Ingan Sibadiana. (Jos 18:1; Kel 25:9)​—Nen Ket. B5.

• Kemah perjumpan.

  Istilah man kemah Musa ras kemah ingan ersembah si tangtangna ipajekken i taneh mesawang.​—Kel 33:7; 39:32.

• Kemenyan.

  Campuren getah si merim ras balsem si ngasilken bau si merim sanga itutung. Kemenyan si iban arah empat jenis bahan igunaken bas kemah ingan ersembah ras rumah pertoton. Kemenyan si istimewa enda itutung tiap erpagi-pagi ras berngi i datas ingan nutung persembahen bas Ingan si Badia, janah bas Wari Pendamen, kemenyan e itutung bas Ingan Sibadiana. Kemenyan nggambarken toto si ngena ate Dibata. Kalak Kristen labo iwajipken nggunaken kemenyan.​—Kel 30:34, 35; Im 16:13; Ket 5:8.

• Kemenyan mbentar.

  Getah si enggo kerah si ibuat arah batang tertentu ntah pe peren tertentu arah jenis Boswellia. Merim adi itutung. Enda salah sada campuren bas kemenyan si badia si igunaken bas kemah ingan ersembah ras rumah pertoton. Enda ipersembahken ka ras korban biji-bijin janah itama radu ras roti si ipersembahken bas Ingan si Badia.​—Kel 30:34-36; Im 2:1; 24:7; Mat 2:11.

• Kemos.

  Dewa si utama kalak Moap.​—1Raj 11:33.

• Kepala gubernur.

  Kepala gubernur ntah pe gubernur sada propinsi bas pemerentahen Babilon ras Persia. Kepala gubernur ilantik raja selaku kepala penguasa.​—Esa 8:36; Dan 6:1.

• Kerajan Dibata.

  Istilah enda khususna maksudna kekuasan Dibata si meganjangna si iwakili kerajan AnakNa, Kristus Jesus.​—Mat 12:28; Luk 4:43; 1Kor 15:50.

• Kerehen.

  Bas piga-piga bagin Kitap-Kitap Junani Kristen, kata enda maksudna kerehen Jesus Kristus jadi raja, mulai kin ia ilantik jadi raja i surga jadi Raja Kerajan Dibata seh ku wari-wari pendungi jaman enda. Kerehen Kristus labo bas masa si ntisik saja. Labo ia reh ntisik jenari minter ka lawes. Tapi kerehenna terjadi piga-piga waktu dekahna.​—Mat 24:3.

• Kerubim.

  Malekat-malekat si meganjang kedudukenna janah istimewa tugasna. Malekat enda la seri ras serapim.​—Kej 3:24; Kel 25:20; Jes 37:16; Heb 9:5.

• Kesah si badia.

  Gegeh si la teridah si igunaken Dibata bas ngelakoken peratenNa. Gegeh enda badia perban rehna arah Jahwe nari eme Dibata si bersihna ras si benarna, janah perban igunakenNa gegehNa e bas ngelakoken pendahin si badia.​—Luk 1:35; Perb 1:8.

• Kiniseran si mbelin.

  Kata Junani man “kiniseran” ngertiken keadan si seh kel serana si iadapi sekalak jelma si sangana lit bas kesusahen. Ceritaken Jesus kerna “kiniseran si mbelin” si iadapi Jerusalem, khususna si nandangi iadapi manusia bas wari si pepagi sanga reh pagi Jesus ‘alu kemulian.’ (Mat 24:21, 29-31) Ikataken Paulus maka kiniseran enda sada tindaken si benar si iban Dibata pagi man “kalak si la nandai Dibata ras si la patuh man berita si meriah” kerna Jesus Kristus. Bas Ketangkasen pasal 19, icidahken maka Jesus si minpin pasuken tentera surga guna erperang ngelawan “binatang buas ras raja-raja i doni bage pe pasukenna.” (2Tes 1:6-8; Ket 19:11-21) Katakenna ka kerna “kelompok jelma si enterem” si selamat ngelewati kiniseran enda. (Ket 7:9, 14)​—Nen HARMAGEDON.

• Kiniulin si luar biasa.

  Makna utama bas bahasa Junanina eme kai si erban senang janah luar biasa. Kata e rusur ipake guna ngertiken kai si ibereken perban kiniulin. Adi si ibahas eme kiniulin Dibata si luar biasa, maksud kata e eme pemere Dibata si seh kel buena janah la ngarapken balasen. Emaka istilah e ncidahken pemere Dibata si seh kel buena bage pe kekelengen ras kiniulinNa si mbelin man manusia. Bas bahasa Junani, banci ka iterjemahken jadi “sumbangen sukarela,” si ncidahken maka pemere e ibereken labo perban si ngalokenca cocok ndatkenca jadi upahna, tapi perban kalak si merekenca tuhu-tuhu nggit mere.​—2Kor 6:1; Ep 1:7.

• Kislew.

  Gelar bulan pesiwahken bas kalender agama Jahudi kenca kalak Jahudi mulih arah Babilon, janah e bulan peteluken bas kalender umum kalak Jahudi. Bulan e mulai pertengahen November seh ku pertengahen Desember. (Neh 1:1; Sak 7:1)​—Nen Ket. B15.

• Kitap si Badia.

  Tulisen Kata Dibata si badia. Istilah enda bas Kitap-Kitap Junani Kristen ngenca lit.​—Luk 24:27; 2Tim 3:16.

• Kor.

  Takaren guna bahan si kerah ras cairen si buena 220 liter. Galangna takaren enda itentuken menurut perkiran takaren bat. (1Raj 5:11, ctt.)​—Nen Ket. B14.

• Koral.

  Batu karang si piher, si terbentuk arah tulan-tulan binatang laut si kitik. Koral lit bas laut janah melala warnana, lit megara, mbentar, ras mbiring. Melala kel koral bas Laut Merah. Bas jaman Pustaka, koral warna megara merga kel janah iban jadi manik-manik ntah perhiasen si deban.​—Kua 8:11, ctt.

• Korban.

  Persembahen man Dibata guna ngataken bujur, ngakui kesalahen, janah erdame mulihi ras Dibata. Mulai arah Abil nari, erbage-bage korban ipersembahken manusia alu sukarela, termasuk binatang. Kenca si e, bas perjanjin Undang-Undang Musa, korban-korban arus ipersembahken. Kenca persembahken Jesus kegeluhenna jadi korban si sempurna, korban binatang lanai iperluken, tapi tetap persembahken kalak Kristen korban-korban si deban man Dibata.​—Kej 4:4; Heb 13:15, 16; 1Joh 4:10.

• Korban persadan.

  Korban si ibereken man Jahwe guna mindo perdamen ras Ia. Si mereken korban e, keluargana, imam si mpersembahkenca, ras imam si ertugas ikut man korban e. Tempa-tempa aloken Jahwe asap lemak korban si itutung e si erban meriah ukurNa. Dareh si nggambarken kegeluhen pe ibereken man Jahwe. Imam-imam ras si mereken korban e tempa-tempa man ras Jahwe si jadi tanda persadan ras Ia.​—Im 7:29, 32; Ul 27:7.

• Kota Daud.

  Gelar si ibereken man kota Jebusi kenca taluken Daud kota e janah bangunna istanana i je. Kota e pe igelari Sion. Kota e bagin Jerusalem si ndekahna kel si lit bas bagin tenggara.​—2Sam 5:7; 1Kro 11:4, 5.

• Kota perlindungen.

  Kota-kota kalak Lewi, ingan erlindung man kalak si la sengaja munuh, gelah la ia itangkap kalak si atena mbalas ia. Lit enem kota si bage i belang-belang Negri Perjanjin si itetapken Musa, bas pudi wari itetapken Josua menurut petunjuk Jahwe. Kenca seh bas kota perlindungen, kalak si atena erlindung arus njelasken masalahna man peminpin i gerbang kota, janah ialo-alo ia alu mehuli. Gelah kalak si sengaja munuh la banci salahgunakenna pengaturen enda, kalak si erlindung arus iadili i kota ingan pembunuhen e terjadi janah arus terbukti ia la ersalah. Adi terbukti ia la ersalah, iulihken ia ku kota perlindungen e janah la ia banci ndarat arah batas kota perlindungen e segedang geluhna, ntah pe ngasa imam si mbelin mate.​—Bil 35:6, 11-15, 22-29; Jos 20:2-8.

• Kristen.

  Gelar si ibereken Dibata man pengikut Jesus Kristus.​—Perb 11:26; 26:28.

• Kristus.

  Penggelaren man Jesus. Bas bahasa Junani nari Khristos, si seri ertina ras bahasa Heber si iterjemahken jadi “Mesias,” ntah “Kalak si Ipilih.”​—Mat 1:16; Joh 1:41.

• Kuan-kuanen.

  Kata-kata si pentar, cerita si risiken pelajaren, ntah pe kebenaren si mbages si iceritaken alu gendek. Kuan-kuanen si lit bas Pustaka si Badia lit bentukna bagi teka-teki ntah pe kata-kata si arus iukuri alu mbages guna ngangkaisa. Kebenaren ipebetehken alu cara si menarik janah rusur iban bas bentuk perumpaman. Lit kuan-kuanen si isina nokohi ntah pe mpermelaken kalak.​—Peng 12:9; 2Pet 2:22.

• Kuburen.

  Adi imulai alu hurup kitik, ngertiken sada kuburen. Adi imulai alu hurup galang, ngertiken kuburen man kerina kalak mate. Kata enda cocok ras kata Heber eme “Syeol” janah kata Junani eme “Hades.” Bas Pustaka si Badia, kata “Kuburen” enda labo ingan situhu-tuhu lit, tapi gambaren man keadan sekalak jelma si lanai banci ngelakoken kai pe janah lanai sadar.​—Kej 47:30; Peng 9:10; Perb 2:31.

• Kursi penghakimen.

  Biasana lit i darat janah lit tanggana. Kursi e ingan pejabat kundul guna ngerana man jelma si enterem ras ngumumken keputusen si enggo iban. Istilah “kursi penghakimen Dibata” ras “kursi penghakimen Kristus” ngertiken pengaturen Jahwe guna ngakimi manusia.​—Rom 14:10; 2Kor 5:10; Joh 19:13.

• Kusta.

  Penakit kulit si mekelek. Penakit kusta si iceritaken bas Pustaka si Badia la seri ras penakit kusta si lit gundari, perban bas Pustaka si Badia penakit enda banci ngelangketi manusia, baju, ras rumah.​—Im 14:54, 55; Luk 5:12.

L

• La itama ragi.

  Enda maksudna roti si la itama ragi.​—Ul 16:3; Mrk 14:12; 1Kor 5:8.

• Labang.

  Serangga-serangga si seh kel buena bas sada kelompok si pindah ku daerah si deban. Menurut Undang-Undang Musa, labang banci ipan. Sada kelompok labang si seh kel buena, si mangani kerina si lewatina seh asa ceda kel ibanna, si e ianggap bencana.​—Kel 10:14; Mat 3:4.

• Lagu ceda ate.

  Susunen lirik lagu ntah pe musik, si ncidahken perasan ceda ate bagi ceda ate perban kematen teman ntah pe kalak si ikelengi. Enda pe ikataken ka lagu perngandungen.​—2Sam 1:17; Ms 7:Superskripsi.

• Lagu Kalak si Nangkeng ku Kota.

  Superskripsi man Masmur 120-134. Amin pe lit piga-piga pendapat kerna erti istilah enda, melala si tek maka 15 masmur enda iendeken kalak Israel si nembah Dibata alu meriah ukur, sanga ‘nangkeng’ ku Jerusalem, ingan si meganjang i daerah pengunungen Juda, guna ndahi telu perayan tahunen utama i je.

• Lantik.

  Kata bas bahasa Heber si ertina “ngolesi alu cairen.” Minak itamaken ku sekalak jelma ntah pe ku barang si jadi tanda maka ia enggo isahken guna ngelakoken sada tugas khusus. Bas Kitap-Kitap Junani Kristen, kata e pe igunaken sanga kesah si badia icurcurken ku kalak si ipilih si arapenna nggeluh i surga.​—Kel 28:41; 1Sam 16:13; 2Kor 1:21, ctt.

• Lawang.

  Hasil batang kayu lawang (Cinnamomum cassia) si sejenis ras batang kayu manis. Lawang ipake jadi minak wangi ras bahan minak pelantiken si badia.​—Kel 30:24; Ms 45:8; Esek 27:19.

• Legiun.

  Enda sada pasuken tentera Roma kuno si teremna lit 4.000 seh asa 6.000 tentera. Bas Pustaka si Badia, biasana kata “Legiun” ngertiken jumlah si seh kel buena.​—Mat 26:53, ctt.; Mrk 5:9; Luk 8:30.

• Lembah.

  Lembah ntah dasar lau maler si biasana kerah kecuali bas musim perudan. Lembah pe banci maksudna lau maler. Lau maler si launa arah mata lau labo arah lau udan emaka banci lalap maler gedang-gedang tahun. Bas piga-piga ayat, lembah pe ikataken ka “lau maler.”​—Kej 26:19; Bil 34:5; Ul 8:7; 1Raj 18:5; Jop 6:15.

• Lempengen si badia.

  Lempengen si iban arah emas murni janah iukir kata-kata i je bas bahasa Heber, “Jahwe badia kap.” Lempengen e itama i lebe-lebe penutup takal imam si mbelin. (Kel 39:30)​—Nen Ket. B5.

• Lepton.

  Bas jaman Kitap-Kitap Junani Kristen, lepton eme sen logam Jahudi si kitikna si iban arah tembaga ntah pe perunggu. Bas piga-piga versi Pustaka si Badia, enda iterjemahken jadi “peser.” (Mrk 12:42; Luk 21:2; ctt.)​—Nen Ket. B14.

• Lewi; Kalak Lewi.

  Anak Jakup si dilaki si peteluken arah Lea. Enda pe ngertiken suku Lewi. Telu kalak anak dilaki arah Lewi jadi nini bulang man telu keluarga si utama si mbentuk perpulungen imam keturunen Lewi. Mon-mon istilah “kalak Lewi” ngertiken kerina suku Lewi, tapi biasana la termasuk keluarga Harun si jadi imam. La bagi suku-suku si deban, la aloken suku Lewi taneh warisen bas Negri Perjanjin. Tapi man kalak e ibereken 48 kota si lit bas daerah si iwarisi suku-suku si deban.​—Ul 10:8; 1Kro 6:1; Heb 7:11.

• Lewiatan.

  Sejenis binatang si nggeluh bas lau. Bas Jop 3:8 ras 41:1, banci saja si imaksud eme buaya ntah pe binatang laut si deban si galang ras megegeh. Bas Masmur 104:26, si imaksud mungkin sejenis paus. Bas ayat-ayat si deban, binatang enda ipake jadi gambaren, emaka la banci ipastiken binatang si apai si imaksud.​—Ms 74:14; Jes 27:1.

• Log.

  Takaren si kitikna si ipake bas Pustaka guna nakar cairen. Bas Talmud (cataten kerna undang-undang Jahudi), sada log seri ras 1/12 hin. Emaka menurut keterangen enda, sada log seri ras 0,31 liter. (Im 14:10, ctt.)​—Nen Ket. B14.

• Lubang si seh kel bagesna.

  Bas bahasa Junani, kata abyssos, ertina “seh kel bagesna,” ntah “la banci iukur, la lit batasna.” Kata si ipake bas Kitap-Kitap Junani Kristen ngertiken sada ingan ntah pe keadan si terkurung. Banci ka ngertiken kuburen.​—Luk 8:31; Rom 10:7; Ket 20:3.

M

• Mahalat.

  Istilah musik si lit bas superskripsi Masmur 53 ras 88. Banci saja lit hubungenna ras kata kerja Heber si ertina “reh lemahna; sakit,” guna ncidahken keadan si sedih ras la mehuli, si cocok ras isi dua lagu sedih e.

• Makedoni.

  Daerah i sebelah utara Junani, si terkenal sanga Aleksander Agung erkuasa janah la ikuasai ise pe seh asa italuken kalak Roma. Makedoni enggo jadi propinsi Roma sanga Rasul Paulus tangtangna reh ku Eropa. Telu kali Paulus reh ku daerah e. (Perb 16:9)​—Nen Ket. B13.

• Malekat-malekat.

  Arah kata Heber malakh ras kata Junani aggelos. Duana e ertina “utusen” tapi adi maksudna mahluk si la teridah si jadi utusen, iterjemahken jadi “malekat.” (Kej 16:7; 32:3; Ket 22:8) Malekat eme mahluk si la teridah si megegeh, si iciptaken Dibata sope ciptakenNa manusia. Mon-mon malekat e ikataken “anak-anak Dibata,” ras “bintang erpagi-pagi.” (Jop 1:6; 38:7) Malekat iciptaken sada per sada janah la banci lit keturunenna. Jumlah malekat lit seratus juta lebih. (Dan 7:10) Bas Pustaka ikataken maka tiap malekat lit gelarna ras sipat-sipatna. Malekat-malekat meteruk ukur, la nggit isembah janah teremen si la nggit ngataken ise gelarna. (Kej 32:29; Luk 1:26; Ket 22:8, 9) Keduduken malekat beda-beda, tugasna pe beda-beda, lit si ngelayani i lebe-lebe tahta Jahwe, lit si mpeseh kataNa, lit si nampati pelayan-pelayan Jahwe i doni, lit si ndalanken hukumen arah Dibata, ras si ndukung dahin erberita si meriah. (2Raj 19:35; Ms 34:7; Luk 1:30, 31; Ket 5:11; 14:6) Bas masa depan, malekat-malekat ndukung Jesus bas perang Harmagedon.​—Ket 19:14, 15.

• Malekat-malekat jahat.

  Mahluk roh si jahat si la teridah, janah ngasup ngelakoken si la banci ilakoken manusia. Bas Kejadin 6:2 kalak e igelari “anak-anak Dibata si benar,” ras bas Judas 6 igelari ka “malekat-malekat.” Tangtangna iciptaken, malekat-malekat enda malekat si mehuli. Tapi dungna, banna dirina jadi musuh Dibata alu la matuhi Dibata sanga jaman Nuah, janah ikutkenna Setan ngelawan Jahwe.​—Ul 32:17; Luk 8:30; Perb 16:16; Jak 2:19.

• Man Berngi guna Mperingeti Tuan.

  Man roti si la itama ragi ras minem anggur si ngertiken daging Kristus ras darehna, enda acara mperingeti kematen Jesus. Perban kalak Kristen iperentahken bas Pustaka guna ngerayakenca, cocok ikataken e acara “Peringet-ingeten.”​—1Kor 11:20, 23-26.

• Manna.

  Pangan utama kalak Israel si isikapken Jahwe sanga tading i taneh mesawang sedekah 40 tahun. Tiap erpagi-pagi, selain wari Sabat, nusur manna alu mukjizat ku datas taneh. Sanga tangtangna kalak Israel ngidah manna e, nungkun kalak e, “Kai enda?” bas bahasa Heber, “man hu?” (Kel 16:13-15, 35) Bas konteks si deban, manna maksudna “biji-bijin arah langit nari” (Ms 78:24), “roti arah surga nari” (Ms 105:40), ras “pangan arah malekat” (Ms 78:25). Jesus pe pernah ikataken manna bas erti gambaren.​—Joh 6:49, 50.

• Maskil.

  Istilah Heber si ertina la banci ipastiken. Istilah e lit bas superskripsi i 13 masmur. Mungkin ertina eme “puisi rukur.” Bentuk istilah enda mirip ras kata si ertina ‘ngelayani alu pentar,’ emaka lit si erpengakap maka erti istilah enda lit hubungenna ras erti kata e.​—2Kro 30:22; Ms 32:Superskripsi.

• Masmur.

  Lagu pujin man Dibata. Masmur iban guna imainken alu alat musik ras iendeken sanga nembah Dibata, termasuk sanga nembah Dibata Jahwe bas rumah pertotonNa i Jerusalem.​—Luk 20:42; Perb 13:33; Jak 5:13, ctt.

• Media.

  Kalak Media eme keturunen Madai anak Japet. Kalak e tading i daerah gunung si lit i daerah si meganjang i Iran, si jadi negri Media. Kalak Media ersada arihna ras Babilon guna naluken Assur. Sanga si e, Persia termasuk salah sada propinsi Media, tapi Kores mberontak emaka Media ras Persia ersada mbentuk Kerajan Media-Persia. Kenca si e, kerajan e naluken Kerajan Babilon si mbaru bas tahun 539 SM. Sanga Pentakosta 33 M, lit kalak Media i Jerusalem. (Dan 5:28, 31; Perb 2:9)​—Nen Ket. B9.

• Mere ku kalak mesera.

  Pemere si ibereken guna nampati kalak si merluken. Amin pe bas Kitap-Kitap Heber la lit ikataken langsung, Undang-Undang Musa erban kalak Israel arus mere ku kalak mesera.​—Mat 6:2.

• Merodak.

  Dewa utama bas kota Babilon. Kenca raja Babilon ras si erban undang-undangna eme Hamurabi erban Babilon jadi ibu kota, Merodak (Marduk) tambah imuliaken. Emaka melala dewa si debanna si igantiken. Merodak pe jadi dewa utama i tengah-tengah dewa Babilon. Dungna gelar Merodak (Marduk) iganti jadi gelar “Belu” (“Si Mpuna”), janah Merodak rusuren ikataken Bel.​—Jer 50:2.

• Mesias.

  Kata enda bas bahasa Heber ertina “ipilih” ntah “kalak si ipilih.” Kata e seri ertina ras kata “Kristus” bas bahasa Junani.​—Dan 9:25; Joh 1:41.

• Meterai.

  Alat si ipake bas erban cap (biasana ku taneh liat ntah pe lilin) guna mbuktiken kerna hak milik, asli ntah lang, ntah pe bukti tanda setuju. Meterai si mbarenda iban arah bahan si piher nari (batu, gading, ntah pe kayu) janah i je lit ukiren hurup ras gambar si terbalik. Istilah meterai jadi tanda si mbuktiken sada hal asli ntah lang, ntah mbuktiken kerna hak milik, ntah ncidahken maka sada hal ibuniken ntah pe irahasiaken.​—Jop 38:14; Ende 8:6; Ket 5:1; 9:4.

• Miktam.

  Kata Heber si lit bas superskripsi bas enem masmur (Ms 16, ctt.; 56-60). Erti istilah enda la banci ipastiken, tapi banci saja lit hubungenna ras kata si ertina “ukiren tulisen.”

• Mil.

  Satuan jarak si lit sekali ngenca bas teks Kitap-Kitap Junani Kristen, eme bas Matius 5:41, ctt. Banci saja maksudna mil Romawi si gedangna 1.479,5 meter (4.854 kaki).​—Nen Ket. B14.

• Milkom.

  Dewa si isembah kalak Ammon, banci saja seri ras Molekh. (1Raj 11:5, 7) Bangun Salomo ingan-ingan si meganjang guna nembah dibata palsu enda nandangi pendungi pemerentahenna.​—Nen MOLEKH.

• Mina.

  Ikataken ka mane bas Esekiel. Mina eme satuan berat bage pe mata uang. Menurut bukti arkeologi, sada mina seri ras 50 sekel, ras sada sekel seri ras 11,4 gram. Emaka sada mina bas Kitap-Kitap Heber seri ras 570 gram. Banci saja lit ka si ikataken mina kerajan, bagi hasta kerajan. Bas Kitap-Kitap Junani Kristen sada mina seri ras 100 drakhma. Beratna 340 gram. Janah 60 mina seri ras sada talenta. (Esa 2:69, ctt.; Luk 19:13)​—Nen Ket. B14.

• Molekh.

  Dewa kalak Ammon; banci saja seri ras Malkam, Milkom, ras Moloh. Banci saja enda penggelaren saja ngenca labo gelar dewa tertentu. Undang-Undang Musa netapken hukumen mate man kalak si ngorbanken anakna man Molekh.​—Im 20:2; Jer 32:35; Perb 7:43.

• Moloh.​—

  Nen MOLEKH.

• Mpepulung sisa peranin.

  Mpepulung kai pe si itadingken kalak si rani la soal isengaja ntah pe la isengaja. Bas Undang-Undang Musa iaturken gelah ula keri perani kalak seh ku ujung-ujung jumana ntah pe buatna kerina buah saitun bage pe anggur. Mpepulung sisa peranin eme hak si bereken Dibata man kalak mesera, kalak si ngadapi kesusahen, penduduk asing, anak si la erbapa, bage pe janda.​—Rut 2:7.

• Mukjizat; Perbahanen si luar biasa.

  Perbahanen ntah kai pe si luar biasa si ndauh gegehen asangken kuasa si teh manusia janah iakap rehna arah sumber si luar biasa nari. Mon-mon kata “tanda” ntah pe “perbahanen si luar biasa” si lit bas Pustaka si Badia seri ertina ras mukjizat.​—Kel 4:21; Perb 4:22; Heb 2:4.

• Mur.

  Getah si merim si ibuat arah erbage peren si erduri ntah pe arah batang kayu si kitik arah genus (kelompok) Commiphora. Mur eme salah sada bahan guna erban minak pelantiken si badia. Mur pe ipake guna erban merim barang-barang bagi uis ntah ingan medem, janah icampurken ras minak si ipake guna ngalun ras guna ngerawat kulit. Mur pe ipake ka man mayat si nandangi ikuburken.​—Kel 30:23; Kua 7:17; Joh 19:39.

• Murtad.

  Kata enda bas bahasa Junani (apostasia) si ertina “ndauh tedis arah.” Adi kata enda bas kata benda ertina “nilah, nadingken, ntah pe mberontak.” Bas Kitap-Kitap Junani Kristen, “murtad” biasana igunaken man kalak si nilah arah ibadah si benar.​—Kua 11:9; Perb 21:21, ctt.; 2Tes 2:3.

• Musuh Kristus.

  Istilah Junani enda lit dua ertina. Si pertama maksudna, kalak si nentang Kristus. Si peduaken maksudna Kristus palsu si nggantiken Kristus. Si ikataken musuh Kristus eme kerina kalak, kerina organisasi, ntah pe kelompok si ngaku jadi wakil Kristus ntah pe Mesias padahal situhuna labo. Musuh Kristus pe termasuk ka kalak si nentang Kristus ras murid-muridna.​—1Joh 2:22.

• Mutlaben.

  Istilah bas superskripsi bas Masmur 9, si ertina “kerna kematen anak si dilaki.” Tapi lit si erpengakap maka istilah enda eme gelar ntah pe kata-kata si pertama arah lagu si terkenal si nadana ipake guna ngendeken masmur enda.

N

• Nabi.

  Kalak si ngataken sura-sura Dibata, dahinna jadi juru bicara Dibata. Selain ngataken kai si nandangi terjadi, ia pe mpeseh ajaren, perentah, ras penghakimen Jahwe.​—Amos 3:7; 2Pet 1:21.

• Najis.

  Banci ngertiken dagingta si kotor ntah pe ngelanggar undang-undang si ngatur perbahanen. Bas Pustaka, kata enda biasana ngertiken kai si la cocok ras Undang-Undang Musa ntah pe si la bersih menurut Undang-Undang e.​—Im 5:2; 13:45; Perb 10:14; Ep 5:5.

• Nali si iban arah kulit nari; Kalimbawang.

  Nali arah kulit, ntah pe nali si icocang arah urat binatang, ntah arah tangke bulung-bulung, ntah arah buk binatang, si ipake guna mbenter. Batu ntah benda kai pe si ibenter e, itama ku bagin tengah si mbelang. Salah sada ujung kalimbawang iiket ku tan ntah pe pergelangen tan, janah ujungna si sada nari icikep janah ilepasken sanga kalimbawang iayunken. Bangsa-bangsa jaman si mbarenda lit prajuritna si senjatana kalimbawang.​—Hak 20:16, ctt.; 1Sam 17:50.

• Namaken tan ku datas takal kalak.

  Enda ilakoken guna ngelantik kalak bas ngelakoken tugas khusus. Ilakoken guna masu-masu, mpepalem, ntah pe mere kesah si badia man sekalak jelma. Mon-mon, tan itamaken ku datas takal asuh-asuhen sope ikorbanken.​—Kel 29:15; Bil 27:18; Perb 19:6; 1Tim 5:22.

• Narwastu.

  Minak wangi si merga si megara kel warnana. Ibuat arah sinuan-sinuan narwastu (Nardostachys jatamansi). Perban merga, rusur icampurken ras minak si lebih murah, janah mon-mon ipalsuken. Tapi ikataken Markus ras Johanes maka “narwastu asli” icurcurken ku Jesus.​—Mrk 14:3, ctt.; Joh 12:3.

• Nehilot.

  Istilah si ertina la banci ipastiken, si lit bas superskripsi Masmur 5. Lit si erpengakap maka istilah enda maksudna sada alat musik si iembus, perban mirip ras kata Heber si lit hubungenna ras khalil (suling). Tapi banci saja istilah enda maksudna sada nada.

• Nembah man Dibata.

  Hormat man Dibata Jahwe, nembah, ras ngelayani Ia alu setia selaku Dibata Si Madakuasa bas alam semesta.​—1Tim 4:8; 2Pet 1:6.

• Nephesh; Psykhe.

  Kata nephesh bas bahasa Heber, ras kata psykhe bahasa Junani, rusur iterjemahken bas Pustaka Bahasa Karo terjemahen si deban jadi tendi. Tapi kata tendi e la payo perban ngertiken maka adi sekalak jelma enggo mate lit bagin bas dirina si tetap nggeluh, janah menurut Pustaka si Badia ajaren si e salah. Erti kata psykhe eme (1) jelma, (2) binatang, (3) kesah jelma ntah binatang. (Kej 1:20; 2:7; 1Pet 3:20) Jadi, bas terjemahen enda kata psykhe iterjemahken menurut ertina bas tiap konteks, contohna “kegeluhen,” “mahluk,” ntah “jelma.” Kata e pe banci saja ngertiken kalak mate ntah mayat.​—Bil 6:6; Hag 2:13.

• Nepilim.

  Nepilim eme anak-anak si kejam, keturunen arah malekat si menyamar jadi manusia janah erjabu ras anak manusia si diberu sope Banjir si Mbelin.​—Kej 6:4, ctt.

• Netinim.

  Kalak Netinim eme kalak si ngelayani bas rumah pertoton, kalak e labo kalak Israel. Bas bahasa Heber istilah e ertina “Kalak si Ibereken.” E ncidahken maka kalak e ibereken guna ngelayani i rumah pertoton. Banci saja buen arah kalak e eme keturunen kalak Gibeon, si itugasken Josua guna “mpepulung ranting ras muat lau man kalak Israel bage pe man ingan nutung persembahen Jahwe.”​—Jos 9:23, 27; 1Kro 9:2, ctt.; Esa 8:17, ctt.

• Ngempoi diberu seninana.

  Enda kebiasan si dungna iban bas Undang-Undang Musa. Sekalak dilaki ngempoi diberu seninana si enggo mate tapi la lit anakna dilaki. Empoina diberu seninana e gelah banci lit anak dilaki arah seninana si enggo mate ndai, janah keturunen seninana si enggo mate e banci tetap lit.​—Kej 38:8; Ul 25:5.

• Ngerik; Ingan ngerik.

  Dahin guna misahken biji arah tangkena ras kulitna nari. Ingan ngerik eme ingan dahin e ilakoken. Ngerik ilakoken alu tan janah make tongkat, tapi adi melala bijina, lit peralaten si khusus igunaken, eme papan ngerik ntah pe penggilingen si itarik asuh-asuhen. Peralaten e nggiling biji-bijin si iamparken bas ingan ngerik. Inganna e rata janah bentukna kibul, biasana bas ingan si meganjang janah lit anginna.​—Im 26:5; Jes 41:15; Mat 3:12.

• Nisan.

  Gelar si mbaru man bulan Abip kenca penabanen ku Babilon. Bulan enda bulan si pertama bas kalender agama Jahudi janah bulan pepituken bas kalender umum Jahudi. Bulan e mulai pertengahen Maret seh ku pertengahen April. (Neh 2:1)​—Nen Ket. B15.

• Nubuat.

  Berita si rehna arah Dibata nari. Isina eme kerna mpebetehken ras mberitaken peraten Dibata. Nubuat banci ka ngertiken ajaren arah Dibata nari kerna kai si mehuli, kata-kata kerna perentah ras penghakimen Dibata, ntah pe berita kerna kai si nandangi reh.​—Esek 37:9, 10; Dan 9:24; Mat 13:14; 2Pet 1:20, 21.

• Numpahi; Sumpahi; Kena sumpah.

  Maksudna ngataken kai si la mehuli gelah terjadi man sekalak jelma ntah pe man sada hal. Enda labo maksudna kata-kata hinan ntah pe kata-kata si kasar. Enda pe maksudna kata-kata resmi guna ngataken ntah pe ngeramalken si la mehuli. Adi Dibata ntah pe kalak si lit kuasana si ngatakenca, kata-kata e banci ianggap nubuat si pasti terjadi.​—Kej 12:3; Bil 22:12; Gal 3:10.

O

• Omer.

  Takaren man bahan si kerah si isina 2,2 liter, ntah pe sepersepuluh epa. (Kel 16:16, 18, ctt.)​—Nen Ket. B14.

• Oniks.

  Batu si merga, batu akik si piher ntah pe batu kalsedon si loreng-loreng. Bas batu e lit lapisen mbentar si selang-seling ras lapisen mbiring, coklat, megara, abu-abu, ras meratah. Batu enda igunaken bas baju khusus imam si mbelin.​—Kel 28:9, 12; 1Kro 29:2; Jop 28:16.

P

• Papirus.

  Peren si turah bas lau janah iban jadi keranjang, jadi ingan-ingan, ras jadi perahu. Papirus pe iban jadi ingan nulis si mirip ras kertas janah melala jadi gulungen.​—Kel 2:3.

• Pardis.

  Taman si mejile. Pardis si pertama eme Taman Eden si sikapken Jahwe man pasangen manusia si pertama. Sanga ngerana Jesus ras penjahat si ipakuken i sebelahna, kataken Jesus maka doni enda jadi pardis pagi. Bas 2 Korinti 12:4, kata enda maksudna pardis si nandangi reh, janah bas Ketangkasen 2:7, kata enda maksudna pardis i surga.​—Ende 4:13; Luk 23:43.

• Parisi.

  Kelompok agama Jahudi si terhormat bas abad pertama M. Kalak e labo keturunen imam. Patuh kel kalak e man Undang-Undang Musa seh ngasa bagin si kitikna pe. Janah anggapna adat istiadat si la tertulis seri pentingna ras Undang-Undang Musa. (Mat 23:23) La kalak e nggit ngaloken pengaruh kai pe arah kebudayan Junani. Perban beluh kel kalak e bas Undang-Undang Musa ras adat istiadat, mbelin kel pengaruh kalak e bas masyarakat. (Mat 23:2-6) Lit ka arah kalak e jadi anggota Pengadilen Agama Jahudi. Rusur kalak e nentang Jesus kerna ndalanken Sabat, adat istiadat, pergaulen ras kalak si erdosa, bage pe ras pemungut pajak. Lit ka si jadi Kristen, bagi Saul arah Tarsus nari.​—Mat 9:11; 12:14; Mrk 7:5; Luk 6:2; Perb 26:5.

• Paro.

  Penggelaren si ibereken man raja-raja Mesir. Lima gelar paro ikataken bas Pustaka si Badia (Sisak, So, Tirhaka, Neko, ras Hopra), tapi gelar paro si deban la ikataken, termasuk si pernah erurusen ras Abraham, Musa, ras Jusup.​—Kej 12:15; Rom 9:17; ctt.

• Pasangen.

  Sada batang kayu si itama bas bara sekalak jelma si duana ujungna itama baban, ntah pe beloti ntah kayu si enggo ibentuk si itama i datas kerahung dua binatang (biasana lembu) sanga narik alat-alat ku juma ntah pe gereta. Perban rusur pake budak pasangen guna maba baban si mberat, pasangen jadi gambaren man perbudaken ntah pe kepatuhen man sekalak jelma, bage pe penindasen ras kesusahen. Sada pasangen si ibuat ntah pe ipenggelken jadi gambaren kerna pembebasen arah iketen, penindasen, bage pe arah perbudaken nari.​—Im 26:13; Mat 11:29, 30, ctt.

• Paskah.

  Perayan tahunen si ilakoken bas wari pe-14-ken bulan Abip (dungna igelari bulan Nisan) guna mperingeti pembebasen kalak Israel arah Mesir nari. Paskah ilakoken alu nggeleh ras manggang anak biri-biri (ntah pe kambing), kenca si e ipan ras gulen si pagit ras roti si la itama ragi.​—Kel 12:27; Joh 6:4; 1Kor 5:7.

• Pasung.

  Alat guna ngukum, iban arah rangka kayu si lit lubang-lubangna guna ngiket. Lit pasung si gunana ngiket nahe saja janah lit ka si erban daging kalak si ihukum jadi mbengkung perban nahe, tan, ras kerahungna iiket.​—Jer 20:2; Perb 16:24, ctt.

• Pegunungen Libanon.

  Salah sada arah dua baris pegunungen bas daerah Libanon. Pegunungen Libanon lit i sebelah barat, janah pegunungen Anti-Libanon lit i sebelah timur. Duana pegunungen e ipisahken lembah subur si gedang. Pegunungen Libanon meganjang kel pas i samping daerah pantai Laut Tengah, janah rata-rata ganjang puncak gunung-gunungna eme 1.800 seh ngasa 2.100 meter (6.000 seh ku 7.000 kaki). Bas jaman si mbarenda, Libanon dem alu batang kayu aras si mejile, si merga kel ianggap bangsa-bangsa i sekelilingna. (Ul 1:7, ctt.; Ms 29:6; 92:12)​—Nen Ket. B7.

• Pejabat daerah.

  Pejabat si kedudukenna rendahen asangken kepala gubernur bas Babilon. Bas Pustaka, penguasa-penguasa daerah ikataken jadi kepala man kerina kalak si pentar bas istana Babilon. Pejabat daerah pe lit ikataken sanga pemerentahen Darius kalak Media.​—Dan 2:48; 6:7.

• Pejabat pengadilen.

  Bas pemerentahen Babilon, pejabat-pejabat pengadilen ertugas i propinsi. Beluh kalak e bas undang-undang janah ibere sitik kekuasan jadi hakim. Bas daerah-daerah jajahen Roma, pejabat-pejabat pengadilen erdahin man pemerentah. Tugas kalak e njaga ketertipen, ngatur keuangen, ras mereken perentah guna ngukum janah erban hukumen e idalanken.​—Dan 3:2; Perb 16:20.

• Pelacur.

  Kalak si erhubungen seks ras kalak si labo teman geluhna, si biasana igalari guna ngelakokenca. (Bas kata Junani eme porne, si ertina “erdaya.”) Biasana si imaksud kata enda eme diberu, tapi pelacur dilaki pe iceritaken bas Pustaka si Badia. Pendahin pelacur isumpahi bas Undang-Undang Musa, janah penggalaren si ibereken man pelacur la banci ijadiken sumbangen man ingan si badia Jahwe. Tapi bas rumah pertoton kalak si la nembah Dibata, ban kalak e pelacur-pelacur i je guna ndatken keuntungen. (Ul 23:17, 18; 1Raj 14:24) Bas Pustaka si Badia, si imaksud kata enda pe eme kalak, bangsa, ntah pe organisasi si ngaku nembah Dibata tapi situhuna nembah berhala. Contohna bas buku Ketangkasen, organisasi agama si igelari “Babilon si Mbelin” ipeseri ras pelacur, perban rembak kel ia ras penguasa-penguasa doni enda guna ndatken kekuasan ras kebayaken.​—Ket 17:1-5; 18:3; 1Kro 5:25.

• Pelanggaren.

  Ngelanggar batas undang-undang; perbahanen si ngelanggar undang-undang. Kata enda seri ras “dosa” si lit bas Pustaka si Badia.​—Ms 51:3; Rom 5:14.

• Pelayanen si badia.

  Pelayanen ntah pe pendahin si badia perban ianggap jadi bagin bas nembah Dibata.​—Rom 12:1; Ket 7:15.

• Peminpin; Pertua.

  Sekalak dilaki si enggo metua, tapi si imaksud bas Pustaka si Badia eme kalak si lit kuasa ras tanggung jawapna bas masyarakat ntah bangsa tertentu. Bas buku Ketangkasen, kata enda igunaken man mahluk-mahluk i surga. Kata Junani presbyteros iterjemahken jadi “pertua” si ertina kalak si ertanggung jawap minpin runggun.​—Kel 4:29; Kua 31:23; 1Tim 5:17; Ket 4:4.

• Peminpin malekat.

  Istilah enda igunaken man bentuk tunggal saja bas Pustaka. E ertina sada ngenca peminpin malekat. Bas Pustaka, gelar peminpin malekat e eme Mikael.​—Dan 12:1; Jud 9; Ket 12:7.

• Peminpin musik.

  Kata Heber si ipake bas Masmur banci saja maksudna kalak si erban lagu ras minpin laguna, ngelatih penyanyi arah kalak Lewi, bage pe minpin pertunjuken-pertunjuken si resmi. Bas terjemahen si deban, istilah enda iterjemahken jadi “peminpin paduan suara” ntah pe “peminpin biduan.”​—Ms 4:Superskripsi; 5:Superskripsi.

• Pendamen.

  Bas Kitap-Kitap Heber, pendamen lit hubungenna ras korban si ibereken gelah manusia banci ndeher ras Dibata janah gelah banci ngelayani Ia. Menurut Undang-Undang Musa, korban si ibereken khususna bas Wari Pendamen tiap tahun, tujunna gelah sekalak jelma ntah pe kerina bangsa banci erdame ras Dibata amin pe kalak e erdosa. Korban si ibereken e nggambarken korban Jesus si nasapken dosa manusia sekali seh rasa lalap. Emaka lit kesempaten manusia guna erdame ras Jahwe.​—Im 4:20; 23:28; Kol 1:20; Heb 9:12.

• Pengadilen Agama Jahudi.

  Mahkamah agung i Jerusalem. Bas jaman Jesus anggotana lit 71 kalak, termasuk imam si mbelin, mantan imam si mbelin, anggota keluarga imam si mbelin, tua-tua, kepala suku, peminpin keluarga, bage pe ahli Undang-Undang Musa.​—Mrk 15:1; Perb 5:34; 23:1, 6.

• Pengawal Kerajan.

  Sada kelompok prajurit Roma si ijadiken pengawal pribadi kaisar Roma. Kelompok enda mbelin kel pengaruhna bas bidang politik, perban banci ndukung ntah pe erban pemerentahen kaisar ndabuh.​—Pil 1:13.

• Pengawas.

  Sekalak dilaki si ertanggung jawap guna njaga ras mpermakani runggun. Kata Junani episkopos situhuna ertina ngawasi alu tujun ngelindungi. Bas runggun Kristen, sekalak “pengawas” ilebuh ka “pertua” (presbyteros). Kata “pertua” ncidahken sipat dewasa kalak si ilantik janah kata “pengawas” ncidahken dahin si arus dahikenna.​—Perb 20:28; 1Tim 3:2-7; 1Pet 5:2.

• Pengikut partai Herodes.

  Igelari ka pengikut Herodes. Sanga erkuasa bas pemerentahen kalak Roma, partai si ngena kel atena partaina sendiri e mereken dukungen man politik Herodes. Banci saja piga-piga kalak Saduki ikut jadi anggota partai enda. Ersada arih pengikut partai Herodes ras kalak Parisi guna munuh Jesus.​—Mrk 3:6.

• Penjaga.

  Kalak si ertugas njaga kalak ntah pe njaga ingan arah bahaya si banci saja reh, biasana ilakoken sanga berngi. Sanga lit bahaya, banna sora tanda bahaya. Penjaga-penjaga biasana erjaga i tembok kota ras menara gelah banci perdiatekenna kalak si reh sope reh deherna ia. I tengah-tengah prajurit pe lit ka penjaga-penjaga. Nabi-nabi pe banci ikataken penjaga bangsa Israel sebap persingetina bangsa e kerna kehancuren si nandangi terjadi.​—2Raj 9:20; Esek 3:17.

• Penjepit.

  Alat si iban arah emas nari, si ipake bas kemah ingan ersembah bage pe bas rumah pertoton guna mpegara api bas ingan lampu.​—Kel 37:23.

• Pentakosta.

  Perayan si peduaken arah telu perayan si penting si arus irayaken kalak Jahudi si dilaki bas Jerusalem. Pentakosta si ertina “(Wari) Pelima Puluhken” eme gelar si ipake bas Kitap-Kitap Junani Kristen guna ngertiken Perayan Peranin bas Kitap-Kitap Heber. Ilakoken bas wari pe-50-ken si ikira mulai tanggal 16 Nisan.​—Kel 23:16; 34:22; Perb 2:1.

• Penutup dada.

  Kantong si ihiasi batu-batu permata si ipake imam si mbelin bas Israel i dadana tiap masuk ia ku Ingan si Badia. Penutup dada enda pe igelari “penutup dada penghakimen” sebap isina Urim ras Tumim si ipake guna nentuken penghakimen arah Jahwe. (Kel 28:15-30)​—Nen Ket. B5.

• Penutup takal.

  Uis si iiket ku takal guna nutupi takal. Imam si mbelin make penutup takal arah linen halus. Bas bagin depan penutup takal e lit lempengen emas si iiket alu nali warna biru. Raja pe make penutup takal i teruh mahkotana. Pake Jop istilah enda jadi lambang sanga katakenna keadilen e bali ras penutup takal.​—Kel 28:36, 37; Jop 29:14; Esek 21:26.

• Peramal.

  Kalak si ngaku banci mpebetehken kai si terjadi bas waktu si nandangi reh. Bas Pustaka si Badia, si termasuk kalak si bage eme tukang sihir, si ngelebuh begu kalak mate, ahli bintang, ras si debanna.​—Im 19:31; Ul 18:11; Perb 16:16.

• Perantara.

  Kalak si nengahi ntah pe ndameken dua pihak. Bas Pustaka, Musa eme perantara perjanjin Undang-Undang Musa janah Jesus perantara perjanjin si mbaru.​—Gal 3:19; 1Tim 2:5.

• Perayan Mengket.

  Kenca rumah pertoton iban Antiokhus Epifanes jadi najis, iperingeti me Perayan Mengket tiap tahun guna mbersihken rumah pertoton. Perayan enda imulai tanggal 25 Kislew janah waluh wari dekahna irayaken.​—Joh 10:22.

• Perayan Peranin.​—

  Nen PENTAKOSTA.

• Perayan Roti si La Itama Ragi.

  Perayan si pertama arah telu perayan penting si ilakoken kalak Israel tiap tahun. Enda imulai bas tanggal 15 Nisan, eme sada wari kenca perayan Paskah janah ilakoken pitu wari dekahna. Si banci pan kalak Israel eme roti si la itama ragi ngenca guna mperingeti pembebasen kalak e arah Mesir nari.​—Kel 23:15; Mrk 14:1.

• Perayan Sapo-Sapo.

  Irayaken tanggal 15-21 Etanim. Perayan enda jadi tanda maka musim rani enggo dung bas akhir tahun. Enda waktuna ermeriah ukur janah ngata bujur man Jahwe perban ipasu-pasu Jahwe peranin kalak e. Sanga perayan enda, kalak e tading bas sapo-sapo guna nginget mulihi uga kalak e ndarat bas Mesir nari. Enda salah sada perayan arah telu perayan si erban kerina dilaki arus lawes ku Jerusalem guna ngerayakenca.​—Im 23:33, 34; Esa 3:4.

• Perbahanen seks si salah.

  Bas bahasa Junani eme porneia, kata enda ipake bas Pustaka guna ngertiken perbahanen seks si ilarang Dibata, termasuk pelacur, hubungen seks sope erjabu, hubungen seks sesama jenis (homo), janah hubungen seks ras binatang (bestialitas). Bas Ketangkasen, pelacur agama ikataken “Babilon si Mbelin” perban kompak ia ras penguasa-penguasa doni guna ndatken kekuasan ras kebayaken. (Ket 14:8; 17:2; 18:3; Mat 5:32; Perb 15:29; Gal 5:​19)​—Nen PELACUR.

• Perbahanen si la meteh mela.

  Bas bahasa Junani aselgeia, eme perbahanen salah si serius si ngelanggar undang-undang Dibata, si ncidahken perbahanen si la meteh mela ntah pe alu pang nghina, janah perbahanen si kurang ajar si la ngergai kekuasan, undang-undang, ras peraturen si itetapken. Istilah enda labo guna perbahanen salah si la serius.​—Gal 5:19; 2Pet 2:7.

• Peridin; Mperidiken.

  Kata enda ertina “nggedapken,” ntah pe ncelupken ku bas lau. Menurut Jesus, kalak si nggit jadi pengikutna arus iperidiken. Pustaka si Badia pe mpebetehken kerna peridin Johanes, peridin alu kesah si badia, peridin alu api, ras peridin si debanna.​—Mat 3:11, 16; 28:19; Joh 3:23; 1Pet 3:21.

• Perjanjin.

  Kesepakaten si resmi, ntah pe kontrak, antara Dibata ras manusia, ntah antara manusia ras manusia guna ngelakoken ntah pe la ngelakoken sada hal. Mon-mon sada pihak ngenca si arus ndalanken ketetapen bas perjanjin e. Perjanjin si bage ikataken perjanjin sada pihak (unilateral), perjanjin si bage situhuna seri ras janji. Lit ka perjanjin si duana pihak si erjanji arus radu ndalankenca, perjanjin si bage ikataken perjanjin dua pihak (bilateral). Selain perjanjin Dibata ras manusia, bas Pustaka pe lit ka perjanjin si iban antara manusia, antara suku, antara bangsa, ntah antara kelompok. Piga-piga perjanjin si mbelinna pengaruhna eme perjanjin si iban Dibata ras Abraham, ras Daud, ras bangsa Israel (perjanjin Undang-Undang Musa), bage pe ras Israel jang Dibata (perjanjin si mbaru).​—Kej 9:11; 15:18; 21:27; Kel 24:7; 2Kro 21:7.

• Perlengkapen perang.

  Perlengkapen si ipake tentera guna ngelindungi dirina eme pelindung takal, baju besi, ikat pinggang, sepatu, ras perisai.​—1Sam 31:9; Ep 6:13-17.

• Perpulungen.

  Sada kelompok kalak si pulung bas waktu si enggo itentuken. Bas Kitap-Kitap Heber, kata enda biasana maksudna perpulungen kalak Israel bas perayan agama ntah pe perayan penting bas pemerentahen.​—Ul 16:8; 1Raj 8:5.

• Persembahen dosa.

  Korban si ipersembahken guna dosa si ilakoken alu la sengaja perban kelemahen daging kalak si erdosa. Erbage-bage jenis binatang banci ikorbanken guna erban pendamen, arah lembu jantan nari seh ku merpati, sesuai ras keadan kalak si erdosa e.​—Bil 15:27, 28; Heb 10:8.

• Persembahen guna nepati janji.

  Persembahen si ibereken perban tersuruh ukur si merekenca, berekenna e perban enggo erjanji ia.​—Im 23:38; 1Sam 1:21.

• Persembahan inemen.

  Persembahen inemen anggur si iamburken ku ingan nutung persembahen janah ibereken radu ras persembahen si debanna. Ikataken Paulus ia jadi persembahen inemen guna ncidahken maka nggit ia mereken dirina man turang senina sada kiniteken.​—Bil 15:5, 7; Pil 2:17.

• Persembahen kesalahen.

  Korban persembahen guna dosa sekalak jelma. Beda sitik ras persembahen dosa si debanna. Persembahen enda perlu ibereken gelah kalak si ertobat banci ndatken mulihi hakna si sesuai ras perjanjin perban bene hakna sanga ia ngelakoken dosa. Selain si e, persembahen enda pe mbebasken ia arah hukumen nari.​—Im 7:37; 19:22; Jes 53:10.

• Persembahen pengatan bujur.

  Korban persadan si ibereken guna muji Dibata perban kai si enggo berekenNa ras perban kekelengenNa si setia. Daging korban, roti si itama ragina, ras roti si la itama ragi arus ipan. Daging persembahen e arus ipan bas wari e.​—2Kro 29:31.

• Persembahen si iayunken.

  Guna mpersembahken persembahen enda, tamaken imam tanna i teruh tan si mereken persembahen enda, eme si njemak persembahen e. Jenari persembahen e iayunken si mere persembahen e ntah pe imam. Geraken e ncidahken maka korban e sangana ipersembahken man Jahwe.​—Im 7:30.

• Persembahen tutungen.

  Binatang si ikorbanken si itutung kerinana i datas ingan nutung persembahen jadi persembahen man Dibata. Binatang si ikorbanken e eme lembu jantan, biri-biri jantan, kambing jantan, ndukur, ntah pe merpati si nguda denga. La lit bagin si apai pe arah binatang e si banci ibuat kalak si mpersembahkenca.​—Kel 29:18; Im 6:9.

• Persia; Kalak Persia.

  Negri Persia ras kalak Persia rusur ikataken radu ras Media, janah banci saja lit hubungen kalak e. Tangtangna kalak Persia tading bas dataren tinggi Iran i sebelah barat daya. Tapi bas pemerentahen Kores Agung (si bapakna kalak Persia ras mamakna kalak Media menurut piga-piga ahli sejarah), kalak Persia nguasai kalak Media amin pe duana mbentuk sada kerajan. Taluken Kores Kekaisaren Babilon tahun 539 SM, janah pediatna kalak Jahudi si itaban mulih ku negri asalna. Kerajan Persia nguasai daerah Lau Indus i sebelah timur seh ku Laut Aegea sebelah barat. Kalak Jahudi ikuasai Persia ngasa Aleksander Agung naluken Persia tahun 331 SM. Sope si e, enggo dat Daniel pengenehenen kerna Kerajan Persia, janah bas Pustaka kerajan e lit ikataken bas buku Esra, Nehemia, ras Ester. (Esa 1:1; Dan 5:28; 8:20)​—Nen Ket. B9.

• Persikapen.

  Penggelaren man wari sope wari Sabat, sanga kalak Jahudi erban persikapen guna Sabat. Wari persikapen dung sanga terbenam matawari bas wari si gundari igelari wari Jumat, eme paksa Sabat imulai. Menurut kalak Jahudi, sada wari dekahna mulai matawari terbenam seh ngasa matawari terbenam.​—Mrk 15:42; Luk 23:54.

• Peti Perjanjin.

  Peti si iban arah kayu akasia nari janah ilapisi alu emas. Peti enda isimpan bas Ingan Sibadiana i kemah ingan ersembah janah pudi wari isimpan bas Ingan Sibadiana i rumah pertoton si bangun Salomo. Penutup peti enda iban arah emas murni nari, i datas penutup e lit dua kerubim sihadap-hadapen. Bas peti e lit dua batu si risiken Sepuluh Perentah. (Ul 31:26; 1Raj 6:19; Heb 9:4)​—Nen Ket. B5 ras B8.

• Pilistia; Pilisti.

  Negri si lit i daerah pantai selatan Israel si dungna ikataken Pilistia, janah kalak si pindah arah Kreta si dungna tading i je ikataken kalak Pilisti. Taluken Daud kalak e tapi tetap denga lit pemerentahen kalak e sendiri janah kalak e lalap jadi musuh Israel. (Kel 13:17; 1Sam 17:4; Amos 9:7)​—Nen Ket. B4.

• Pim.

  Satuan berat bage pe erga si itetapken kalak Pilisti guna mpetelap erbage-bage peralaten logam. “Pim” bas hurup mate Heber tertulis bas batu-batu si idat bas ingan penggalian arkeologi i Israel. Rata-rata beratna 7,8 gram, eme kira-kira dua pertelu sekel.​—1Sam 13:20, 21, ctt.

• Pneuma.

  Bas bahasa Heber eme ruakh janah bas bahasa Junani eme pneuma. Ertina eme “kesah.” Duana kata enda lit ka piga-piga ertina, janah kerina e ngertiken kai si la banci idah manusia janah ncidahken maka lit gegeh si erdahin. Duana kata e ipake guna ngertiken (1) angin, (2) gegeh si mere kegeluhen man mahluk si nggeluh i doni, (3) ukur si tersuruh ntah pe semangat sekalak jelma si erban ia ngataken ntah pe ngelakoken kai pe, (4) kata-kata si rehna arah sumber si la teridah, (5) mahluk roh, ras (6) kesah si badia Dibata.​—Kel 35:21; Ms 104:29; Mat 12:43; Luk 11:13.

• Porneia.​—

  Nen PERBAHANEN SEKS SI SALAH.

• Puasa.

  Kai pe la ipan bas waktu tertentu. Kalak Israel puasa bas Wari Pendamen, sanga ngadapi kiniseran, ras sanga merluken penampat arah Dibata nari. Itetapken kalak Jahudi empat puasa tahunen guna mperingeti kejadin-kejadin si la mehuli si pernah adapi bangsa Israel. Kalak Kristen la iarusken puasa.​—Esa 8:21; Jes 58:6; Luk 18:12.

• Purim.

  Perayan tahunen si irayaken bas tanggal 14-15 Adar, guna mperingeti kebebasen kalak Jahudi arah pengkernepen bas jaman Ratu Ester. Kata purim (labo bahasa Heber) ertina “undi.” Perayan enda ikataken Perayan Purim, ntah pe Perayan Undi, perban Haman mbenterken Pur (Undi) guna nentuken wari guna ndalanken rencanana ngelawan kalak Jahudi.​—Est 3:7; 9:26.

R

• Ragi.

  Zat si itama ku bas adonen tepung ntah pe ku cairen gelah terjadi fermentasi, ntah pe bagin adonen si enggo ifermentasi, si ibuat arah adonen si enggo iban sebelumna. Rusur ipake Pustaka si Badia guna ngertiken dosa ras kai si ceda, janah mon-mon guna ncidahken perturah ras perkembangen si la teridah.​—Kel 12:20; Mat 13:33; Gal 5:9.

• Rahap.

  Sada istilah bas buku Jop, Masmur, ras Jesaya (labo maksudna diberu si gelarna Rahap si lit bas buku Josua). Bas buku Jop, ayat-ayatna ncidahken maka Rahap eme binatang laut si mbelin. Bas ayat-ayat si deban, binatang laut e ipake ngelambangken Mesir.​—Jop 9:13; Ms 87:4; Jes 30:7; 51:9, 10.

• Rahasia si badia.

  Rahasia si rehna arah Dibata nari, si jadi bagin arah tujun Dibata. Rahasia si badia enda tetap rahasia seh asa waktu si itetapkenNa janah rahasia e pebetehkenNa man kalak si ipilihNa ngenca.​—Mrk 4:11; Kol 1:26.

• Rasul.

  Kata dasarna ertina “kalak si isuruh” janah biasa igunaken man Jesus ras kalak si isuruh ngelayani kalak si deban. Kata enda rusuren ipake man murid-murid si langsung ipilih Jesus ras si ilantik jadi 12 wakilna.​—Mrk 3:14; Perb 14:14.

• Ratu Langit.

  Gelar man dewi si isembah kalak Israel si murtad bas jaman Jeremia. Lit si ngataken maka si imaksud eme Istar (Astarte) eme dewi Babilon. Gelar dewi kalak Sumer si setara ras ia eme Inana si ertina “Ratu Langit.” Ia ianggap penguasa surga ras dewi kesuburen. Bas tulisen-tulisen Mesir mbarenda, Astarte pe ikataken “Permaisuri Langit.”​—Jer 44:19.

• Roti persembahen.

  Roti si buena 12, si itama jadi dua kelompok, enem bas tiap kelompok. Roti e itama i datas meja si lit bas Ingan si Badia i kemah ingan ersembah bage pe bas rumah pertoton. Roti e igelari ka “roti lapis.” Tiap wari Sabat, roti si ipersembahken man Dibata e iganti alu roti si mbaru. Roti si ndekah biasana imam-imam saja si manca. (2Kro 2:4; Mat 12:4; Kel 25:30; Im 24:5-9; Heb 9:2)​—Nen Ket. B5.

• Rumah pertoton.

  Bangunen permanen i Jerusalem si jadi pusat ibadah kalak Israel. Rumah pertoton nggantiken kemah ingan ersembah si banci pindah-pindahken. Rumah pertoton si pertama, Salomo si mbangunsa janah ihancurken kalak Babilon. Rumah pertoton si peduaken ibangun Serubabel kenca mulih kalak si itaban arah Babilon, janah bas pudi wari ibangun Herodes Agung ka mulihi. Bas Pustaka, rumah pertoton rusur ikataken “rumah Jahwe.” (Esa 1:3; 6:14, 15; 1Kro 29:1; 2Kro 2:4; Mat 24:1)​—Nen Ket. B8 ras B11.

• Runggun.

  Sada kelompok kalak si pulung guna tujun ntah pe kegiaten tertentu. Bas Kitap-Kitap Heber, kata enda biasana lit hubungenna ras bangsa Israel. Bas Kitap-Kitap Junani Kristen, enda lit hubungenna ras sada runggun Kristen tertentu, tapi rusuren lit hubungenna ras kerina runggun Kristen secara umum.​—Ul 33:4, ctt.; Perb 9:31; Rom 16:5.

S

• Sabat.

  Bas bahasa Heber, ertina “istrahat; ngadi.” Enda wari si pepituken bas minggu kalak Jahudi, eme mulai arah terbenam matawari bas wari Jumat seh asa terbenam matawari bas wari Sabtu. Wari raya si debanna, termasuk tahun pe-7-ken ras tahun pe-50-ken pe igelari ka Sabat. Bas wari Sabat, la lit dahin si banci ilakoken selain dahin imam bas ingan si badia. Bas tahun-tahun Sabat, taneh la banci iperjumai, janah kalak Heber la banci ipaksa nggalar utang. Peraturen-peraturen Sabat si itetapken Undang-Undang Musa situhuna masuk akal, tapi peminpin-peminpin agama lalap erban peraturen si mbaru, emaka bas jaman Jesus, mesera akap kalak ndalanken Sabat.​—Kel 20:8; Im 25:4; Luk 13:14-​16; Kol 2:16.

• Saduki.

  Sekte agama Jahudi si terkenal, si anggotana kalak bayak si terhormat ras imam-imam si melala pengaruhna man kegiaten bas rumah pertoton. Tulak kalak e melala adat istiadat si la tertulis si dalanken kalak Parisi ras melala ajaren si iteki kalak Parisi. La kalak e tek lit kekeken ntah pe malekat. Lawan kalak e Jesus.​—Mat 16:1; Perb 23:8.

• Samaria.

  Ibu kota kerajan Israel sepuluh suku i utara 200 tahun dekahna. Kerina daerah kerajan e igelari Samaria. Kota Samaria ibangun i datas Gunung Samaria. Bas jaman Jesus, Samaria eme gelar daerah Roma. Kota e lit antara Galilea i utara ras Judea i selatan. Bas perdalanen, biasana Jesus la erberita i daerah e, tapi mon-mon lewat ia arah daerah e janah ngerana man pendudukna. Gunaken Petrus kunci Kerajan si peduaken sanga aloken kalak Samaria kesah si badia. (1Raj 16:24; Joh 4:7; Perb 8:14)​—Nen Ket. B10.

• Sea.

  Takaren man bahan-bahan si kerah. Menurut takaren man bahan-bahan si cair si seri ras takaren bat, sada sea seri ras 7,33 liter. (2Raj 7:1, ctt.)​—Nen Ket. B14.

• Sebat.

  Gelar bulan pe-11-ken i kalender agama Jahudi kenca itaban ku Babilon. Bulan enda pe bulan pelimaken bas kalender umum Jahudi. Bulan e mulai pertengahen Januari seh ku pertengahen Februari. (Sak 1:7)​—Nen Ket. B15.

• Segal.

  Kulit biji-bijin si ipisahken ras buah si banci ipan, sanga ierik ras ipiari. Segal rusur ipake nggambarken kai si la erguna ras si la iarapken.​—Ms 1:4; Mat 3:12.

• Sekel.

  Satuan dasar man berat ras mata uang si ipake kalak Heber. Beratna seri ras 11,4 gram (0,403 ons). Istilah ‘sekel si biasa ipake bas ingan si badia’ mungkin igunaken guna nekanken maka beratna arus seri ntah pe sesuai ras ukuren berat si ipake bas kemah ingan ersembah. Mungkin lit ka sekel kerajan (la seri ras sekel biasa) ntah pe ukuren berat si ipake bas istana kerajan.​—Kel 30:13.

• Sekte.

  Kelompok si ngikutken sada ajaren ntah pe peminpin tertentu janah lit ajarenna sendiri. Dua kelompok agama Jahudi si utama eme sekte Parisi ras Saduki. Kalak si labo Kristen nggelari agama Kristen “sekte” ntah pe “sekte kalak Nasaret,” perban iakap kalak e agama Kristen enggo nilah arah agama Jahudi nari. Lit ka sekte-sekte si reh arah runggun Kristen, bagi “sekte Nikola” si ikataken bas Ketangkasen.​—Perb 5:17; 15:5; 24:5; 28:22; Ket 2:6; 2Pet 2:1.

• Sela.

  Istilah bas mainken musik, rende, ntah pe mbaca, si lit i buku Masmur ras Habakuk. Banci saja, istilah enda ertina ngadi ntah pe jeda bas enden, bas musik, ntah pe bas enden ras musik. Tujunna guna ngukuri ntah pe ngangkai perasan si mbaru denga ibelasken. Terjemahenna bas Septuaginta Junani eme diapsalma, si ertina “jeda musik.”​—Ms 3:4; Hab 3:3.

• Seminit.

  Istilah musik si ertina “pewaluhken,” banci saja maksudna nada-nada ntah pe oktaf si lebih rendah. Adi istilah enda ipake man alat musik, mungkin ertina alat musik e ngasilken nada-nada bas. Adi istilah enda ipake man lagu, mungkin ertina iringen musik lagu e imainken i nada rendah, bage ka pe laguna.​—1Kro 15:21, ctt.; Ms 6:Superskripsi; 12:Superskripsi.

• Sepersepuluh (perpuluhen).

  Sepersepuluh bagin, ntah 10 persen, si arus ibereken ntah igalari perban tuntuten agama. (Mal 3:10; Ul 26:12; Mat 23:23) Bas Undang-Undang Musa, iatur gelah tiap tahun, sepersepuluh arah hasil taneh ras asuh-asuhen si tambah, ibereken man kalak Lewi jadi upahna. Kalak Lewi mereken sepersepuluh arah hasil taneh ras asuh-asuhen arah kai si dat kalak e man imam-imam keturunen Harun guna jadi upah kalak e. Lit ka si mereken perpuluhen si deban jadi tambahen. Kalak Kristen labo arus mereken perpuluhen.

• Serafim.

  Mahluk roh si dahinna bas sekeliling tahta Jahwe i surga. Kata Heber serafim ertina “si gurlah.”​—Jes 6:2, 6.

• Serambi Salomo.

  Dalan bas rumah pertoton i jaman Jesus, si lit atapna, si letakna i sebelah timur halamen si arah darat, janah umumna ianggap sisa arah rumah pertoton Salomo. Erdalan Jesus i je ‘sanga musim mbergeh’ janah kalak Kristen pulung i je guna nembah Dibata. (Joh 10:22, 23; Perb 5:12)​—Nen Ket. B11.

• Setan.

  Bas bahasa Heber ertina “Si Ngelawan.” Biasana kata enda itujuken man Setan si Iblis, eme musuh utama Dibata.​—Jop 1:6; Mat 4:10; Ket 12:9.

• Setoa.

  Kelompok Setoa eme guru-guru Junani si tek maka manusia arus ndalani kegeluhen alu masuk akal janah sesuai ras alam. Menurut kalak e, manusia situhu-tuhu pentar eme si la terpengaruh nandangi kai si gejapkenna, mesui ntah pe senang.​—Perb 17:18.

• Si jahat.

  Penggelaren man Setan si Iblis, si ngelawan Dibata ras peraturenNa si benar.​—Mat 6:13; 1Joh 5:19.

• Sinagoga.

  Ertina “mpepulung; perpulungen,” tapi bas melala ayat, si imaksud eme bangunen ntah pe ingan pulung kalak Jahudi guna mbaca Kitap si Badia, ngaloken petunjuk, mberitaken berita si meriah, janah ertoto. Bas jaman Jesus, lit sada sinagoga bas tiap kota Israel si mbelin, janah bas kota-kota si terbelinen lit piga-piga sinagoga.​—Luk 4:15; Perb 13:5; 15:21; ctt.

• Sinampati runggun.

  Bas kata Junani nari eme diakonos si rusur iterjemahken jadi “pelayan” ntah pe “budak.” “Sinampati runggun” maksudna kalak si ngelayani bas nampati badan pertua i runggun. Arus lakokenna syarat-syarat si enggo itentuken Pustaka si Badia sope ia ilantik jadi sinampati runggun.​—1Tim 3:8-10, 12.

• Sinuan-sinuan si pagit.

  Erbage sinuan-sinuan si lit batangna, nanamna seh kel pagitna ras mekelek ntah pe tajam kel bauna. Bas Pustaka istilah enda ipake guna nggambarken uga suina ntah pagitna akibat perbahanen seks si salah, perbudaken, perbahanen si la adil, ras perbahanen si murtad. Bas Ketangkasen 8:11, “sinuan-sinuan si pagit” maksudna zat si lit racunna janah pagit, si ikataken ka absinthe.​—Ul 29:18; Kua 5:4; Jer 9:15; Amos 5:7.

• Sion; Gunung Sion.

  Gelar kota kalak Jebus si lit bentengna si inganna i datas bukit arah tenggara Jerusalem. Kenca taluken Daud kota e, bangunna istanana i je, janah kota e igelari “Kota Daud.” (2Sam 5:7, 9) Sion jadi gunung si ipebadiaken man Jahwe sanga pindahken Daud Peti Perjanjin ku je. Bas pudi wari, gelar Sion termasuk daerah rumah pertoton i Gunung Moria, janah mon-mon kerina kota Jerusalem. Bas Kitap-Kitap Junani Kristen, enda rusur igunaken jadi gambaren.​—Ms 2:6; 1Pet 2:6; Ket 14:1.

• Sip.

  Gelar asli bulan peduaken bas kalender agama Jahudi ras bulan pewaluhken bas kalender umum kalak Jahudi. Bulan e mulai pertengahen April seh ku pertengahen Mei. Bulan e ikataken lyar bas Talmud (cataten kerna hukum Jahudi) bage pe bas tulisen-tulisen si debanna si iban kenca penabanen i Babilon. (1Raj 6:37)​—Nen Ket. B15.

• Siria.​—

  Nen ARAM.

• Sirtis.

  Dua teluk si mbelin si la mbages si lit i pantai Libia, Afrika Utara. I teruh laut e lit melala kersik si ergeser ku jah ku je perban entam gelombang. Emaka ingan e bahaya janah nai kalak si erlayar, mbiar lewat arah e. (Perb 27:17)​—Nen Ket. B13.

• Siwan.

  Gelar bulan peteluken bas kalender agama Jahudi kenca itaban ku Babilon, bulan pesiwahken bas kalender umum Jahudi. Bulan e mulai pertengahen bulan Mei seh ku pertengahen bulan Juni. (Est 8:9)​—Nen Ket. B15.

• Sumpah.

  Kata-kata si tegas guna mbuktiken maka sada hal e tuhu-tuhu benar. Enda pe sada perjanjin si serius maka sekalak jelma banci ngelakoken ntah pe la banci ngelakoken sada hal. Biasana kalak ersumpah man si ganjangen kedudukenna, terutama man Dibata. Ersumpah Jahwe guna mpepaguh perjanjinNa ras Abraham.​—Kej 14:22; Heb 6:16, 17.

• Sunat.

  Pemotongen kulit bas ujung alat kelamin dilaki. Enda arus ilakoken Abraham bage pe keturunenna, tapi labo arus ilakoken kalak Kristen. Bas piga-piga ayat, sunat si imaksud eme sunat gambaren, labo tuhu-tuhu isunat.​—Kej 17:10; 1Kor 7:19; Pil 3:3.

• Superskripsi.

  Kata-kata si lit bas bagin awal masmur, si isina keterangen kerna penulis, latar belakang, permainen musik, ntah pe kai gunana masmur e ras tujunna.​—Nen superskripsi bas Masmur 3, 4, 5, 6, 7, 30, 38, 60, 92, 102.

T

• Taban.

  Adi iterjemahken arah kata Heber si ertina “berkat,” maksudna eme ipelawes arah ingan asal sekalak jelma, biasana si mpelawessa eme si naluken ingan asalna e. Dua kali kalak Israel itaban janah seh kel teremna si itaban. Si pertama, kerajan sepuluh suku i utara itaban kalak Assur, jenari kerajan dua suku i selatan itaban kalak Babilon. Dungna tabanen e iulihken ku negrina bas pemerentahen Kores penguasa Persia.​—2Raj 17:6; 24:16; Esa 6:21.

• Tahun Pembebasen.

  Tahun e eme tiap tahun pe-50-ken, ikira mulai Israel masuk ku Negri Perjanjin. Bas Tahun Pembebasen, taneh la banci isuani janah budak-budak Heber arus ibebasken. Taneh warisen si enggo idayaken pe arus iulihken. Tahun Pembebasen biasana ikataken tahun perayan perban bangsa e banci nggeluh mulihi bagi si sebelumna sanga tangtangna bangsa e ibentuk Dibata.​—Im 25:10.

• Takal tiang.

  Hiasen si iban i ujung tiang si arah datas. Hiasen enda lit i datas dua tiang eme Jakin ras Boas si lit i lebe-lebe rumah pertoton si bangun Salomo. (1Raj 7:16)​—Nen Ket. B8.

• Talenta.

  Eme ukuren si mberatna bage pe mata uang si ipake kalak Heber. Beratna seri ras 34,2 kilo (75,5 pon; 91,75 pon troy; 1.101 ons troy). Talenta Junani ukurenna terkitiken, janah beratna kira-kira 20,4 kilo (44,8 pon; 54,5 pon troy; 654 ons troy). (1Kro 22:14, ctt.; Mat 18:24)​—Nen Ket. B14.

• Tammus.

  (1) Gelar dewa si itangisi diberu-diberu arah kalak Heber si murtad. Lit si erpengakap maka Tammus eme sekalak raja, si dungna jadi dewa kenca ia mate. Bas tulisen kalak Sumer, Tammus ikataken Dumusi ras igambarken jadi pendamping ntah pe rondong dewi kesuburen, eme Inana (Istar si isembah kalak Babilon). (Esek 8:14) (2) Gelar bulan peempatken bas kalender agama kalak Jahudi kenca itaban i Babilon, bulan pe-10-ken bas kalender umum kalak Jahudi. Bulan e mulai pertengahen bulan Juni seh ku pertengahen bulan Juli.​—Nen Ket. B15.

• Tanda.

  Enda sada benda, perbahanen, keadan, ntah pe pertunjuken si la biasa, janah si e lit ertina, banci saja kerna kai si enggo terjadi ntah pe si nandangi terjadi.​—Kej 9:12, 13; 2Raj 20:9; Mat 24:3; Ket 1:1.

• Tanduk.

  Tanduk binatang si ipake guna ingan inemen, minak, tinta ras kosmetik, janah jadi trompet guna mainken musik ntah pe mereken tanda. (1Sam 16:1, 13; 1Raj 1:39; Esek 9:2) “Tanduk” rusur nggambarken gegeh, naluken, ras kemenangen.​—Ul 33:17; Mi 4:13; Sak 1:19.

• Tanduk si lit bas ingan nutung persembahen.

  Bagin si bentukna bagi tanduk, si lit bas empatna sudut ingan nutung persembahen tertentu. (Im 8:15; 1Raj 2:28)​—Nen Ket. B5 ras B8.

• Tartarus.

  Bas Kitap-Kitap Junani Kristen, istilah enda ertina keadan si irendahken bagi ipenjaraken. Malekat-malekat si la patuh bas jaman Nuah, tempa-tempa ibenterken ku je. Bas 2 Petrus 2:4, kata tartaroo si ertina “ibenterken ku Tartarus” labo maksudna “malekat-malekat si erdosa” e ibenterken ku Tartarus si iteki kalak si la nandai Dibata (eme penjara i teruh taneh si gelap, ingan dewa-dewa si lebih rendah). Tapi, ngertiken maka kalak e irendahken Dibata arah kedudukenna si terhormat i surga. Alu bage, tempa-tempa kalak e lit bas keadan si seh kel gelapna, la banci ngidah peraten Dibata si luar biasa. Keadan kalak e bas wari si pepagi la mehuli, perban ikataken Pustaka maka ikernepken pagi kalak e seh rasa lalap ras penguasana eme Setan si Iblis. Emaka Tartarus ertina keadan si seh kel rendahna si ibereken man malekat-malekat pemberontak e. Tartarus la seri ertina ras “lubang si seh kel bagesna” si ikataken i Ketangkasen 20:1-3.

• Tebet.

  Gelar bulan pe-10-ken bas kalender agama Jahudi kenca itaban i Babilon. Bulan e bulan peempatken bas kalender umum Jahudi. Bulan e mulai pertengahen Desember seh ku pertengahen Januari. Bulan e biasa ikataken “bulan si pe-10-ken.” (Est 2:16)​—Nen Ket. B15.

• Tebusen.

  Penggalaren guna mbebasken sekalak jelma arah tabanen, hukumen, dosa, ntah pe arah utang nari. Penggalarna labo lalap sen. (Jes 43:3) Tebusen iperluken bas erbage-bage keadan. Contohna, kerina anak dilaki si pertama ntah pe binatang jantan si pertama lahir bas Israel, jang Jahwe kap. Alu bage, kalak e arus itebus gelah bebas janah lanai perlu ipisahken guna nembah Jahwe. (Bil 3:45, 46; 18:15, 16) Adi lembu si banci erban bahaya janah la ikurung, si dungna munuh sekalak jelma, emaka si mpuna lembu e arus nggalari tebusen gelah bebas ia arah hukumen mate nari si itetapken bas undang-undang. (Kel 21:29, 30) Tapi la lit tebusen man kalak si sengaja munuh. (Bil 35:31) Bas Pustaka si Badia, tebusen si pentingna eme tebusen si galari Kristus alu ngorbanken geluhna, guna mbebasken manusia si patuh. Bebas kalak e arah dosa ras kematen nari.​—Ms 49:7, 8; Mat 20:28; Ep 1:7.

• Terapim.

  Dewa ntah berhala keluarga. Mon-mon, nungkun kalak man terapim guna ndatken tanda. (Esek 21:21, ctt.) Lit si bentukna ras ukurenna bagi manusia, janah lit ka si terkitiken. (Kej 31:19, 34; 1Sam 19:13, 16; ctt.) Barang-barang arkeologi si idat i Mesopotami ncidahken maka kalak si lit bas ia patung terapim, datna me warisen keluarga. (Banci saja enda sebapna maka buat Rahel terapim bapakna.) Aturen si bage, la lit bas Israel. Lit ka si nembah terapim bas Israel sanga jaman hakim-hakim ras jaman raja-raja. Selain si e, terapim termasuk barang-barang si ihancurken Raja Josia si setia.​—Hak 17:5; 2Raj 23:24; Hos 3:4; ctt.

• Tiang.

  Piga-piga bangsa make tiang guna ngukum mate. Mayat kalak si ihukum e iban jadi tontonen jelma si enterem gelah jadi persinget man si deban, ntah pe guna erban mela i lebe-lebe jelma si enterem. Kalak Assur si terkenal kejam bas erperang, nggunaken tiang si ujungna ntelap guna nebak beltek kalak si itabanna seh asa tembus ku dadana, janah pediatna tabanenna e igantung bas tiang e. Tapi bas undang-undang kalak Jahudi, kalak si ngelakoken kejahaten, contohna hinana Dibata ntah sembahna berhala, ibunuh alu cara ibenteri lebe alu batu ntah pe alu cara si deban, jenari mayatna igantung i tiang, ntah i batang kayu, guna jadi persinget man kalak si deban. (Ul 21:22, 23; 2Sam 21:6, 9) Mon-mon kalak Roma ngiket kalak si ihukumna i bas tiang, alu bage nggeluh denga ia piga-piga wari nari janah dungna mate perban mesui kapna, muas ia, melihe, ras kena las matawari. Contoh si deban, bali bagi Jesus sanga ihukum mate, nahe ras tanna ipakuken i tiang. (Luk 24:20; Joh 19:14-16; 20:25; Perb 2:23, 36) Tiang jenis si deban iban guna mperingeti kejadin si ersejarah. Tiang-tiang ipake guna natang ntah pe nahan rumah pertoton ras komplek istana Salomo. Kalak si la Jahudi erban tiang-tiang si badia man agama palsu kalak e, janah kalak Israel rusur ngikutken kalak e. (Hak 16:29; 1Raj 7:21; 14:23)​—Nen TIANG SIKSAN; TAKAL TIANG.

• Tiang si badia.

  Bahasa Heber (asyerah) si maksudna, (1) tiang berhala si jadi lambang man Asyera, dewi kesuburen kalak Kanaan, ntah (2) patung Dewi Asyera. Tiang e teridah tegak, janah kerina ntah pe deba arah tiang enda iban arah kayu. Banci saja lit tiang si badia si la iukir, ntah pe batang kayu saja.​—Ul 16:21; Hak 6:26; 1Raj 15:13.

• Tiang siksan.

  Bas bahasa Junani eme stauros si ertina tiang si pajek, bagi si ipake guna munuh Jesus. La lit bukti maka kata stauros bas bahasa Junani ngertiken salib bagi tanda agama si pake kalak si la nandai Dibata ratusen tahun dekahna sope Masehi. Kata stauros cocok iterjemahken jadi “tiang siksan” perban kata e ngertiken siksan, kiniseran, ras perasan mela si nandangi adapi pengikut-pengikut Jesus. (Mat 16:24; Heb 12:2)​—Nen TIANG.

• Tirai.

  Kain si itenun si mejile si lit isulam gambar kerubim i je. Enda ipake guna misahken Ingan si Badia ras Ingan Sibadiana i kemah ingan ersembah ras i rumah pertoton. (Kel 26:31; 2Kro 3:14; Mat 27:51; Heb 9:3)​—Nen Ket. B5.

• Tisri.​—

  Nen ETANIM ras Ket. B15.

• Tongkat.

  Tongkat si gedang si bas ujungna lit besi si ntelap. Tongkat e biasa ipake perjuma-juma ngarak-ngarak asuh-asuhen. Tongkat enda nggambarken kata-kata kalak si pentar, si banci erban kalak si megiken ia ngikutken nasehatna si pentar. Istilah “nukuli tongkat” ibuat arah perbahanen lembu si keras kepala si ngelawan arahen tongkat e janah tukulna tongkat e si erban ia suin.​—Perb 26:14, ctt.; Hak 3:31.

• Tongkat kerajan.

  Sada tongkat si iban arah buluh ntah pe si deban si jadi tanda kekuasan.​—Kej 49:10; Heb 1:8.

• Tongkat pengukur.

  Buluh pengukur si gedangna enem hasta. Menurut hasta si biasa, ukurenna 2,67 meter. Menurut hasta si gedang, ukurenna 3,11 meter. (Esek 40:3, 5; Ket 11:1, ctt.)​—Nen Ket. B14.

• Trompet.

  Alat musik si iembus si iban arah besi nari si ipake guna mere tanda ras mainken musik. Menurut Bilangen 10:2, suruh Jahwe gelah iban dua trompet pirak guna ngasilken sora si jadi tanda si khusus, bagi tanda guna mpepulung bangsa Israel, nuruh kalak e berkat, ras guna ngumumken perang. Trompet enda mungkin pinter la bagi “trompet tanduk” si iban arah tanduk binatang. Bas alat-alat musik si ipake i rumah pertoton, lit ka trompet si bahanna la ikataken. Sora trompet rusur igambarken nemani sanga penghakimen Jahwe iumumken, ntah pe sanga kejadin penting si debanna si terjadi iban Dibata.​—2Kro 29:26; Esa 3:10; 1Kor 15:52; Ket 8:7–11:15.

• Tuan; Tuhan.

  Bas bahasa Heber “Adhonai” janah bas bahasa Junani “Kyrios,” si ertina majiken, bos, si mpuna, ntah pe kepala. Duana kata e iterjemahken jadi “Tuhan” adi maksudna ku Jahwe.​—Joh 13:13; Heb 1:10.

• Tugu si badia.

  Tugu si biasana iban arah batu, banci saja lambang alat kelamin dilaki, si ipake guna nembah Baal ntah pe dibata-dibata palsu si debanna.​—Kel 23:24.

• Tukang kudin.

  Si erban piring, mangkok, ntah pe si debanna bas taneh liat nari. Bas bahasa Heber, kata tukang kudin ertina “si erban.” Hak sekalak tukang kudin nandangi taneh liat rusur ipake guna ncidahken hak Jahwe merentah tiap kalak bage pe tiap bangsa.​—Jes 64:8, ctt.; Rom 9:21.

• Tungku.

  Ingan guna erban meleleh biji besi ntah pe besi, bage pe ingan nutung barang-barang taneh liat ras barang-barang keramik si debanna. Bas jaman Pustaka, tungku iban arah batu bata ntah pe batu. Tungku si ipake guna nutung barang-barang arah taneh liat, keramik ras kapur igelari ka ingan ngkerahken.​—Kej 15:17; Esek 22:18; Ket 9:2.

• Tutup ingan pendamen.

  Tutup Peti Perjanjin si i lebe-lebena percikken imam si mbelin dareh persembahen dosa bas Wari Pendamen. Bas bahasa Heber, ertina “nutup (dosa)” ntah mungkin “nasapken (dosa).” Tutup enda iban arah emas nari, janah lit dua ujungna. Tiap ujungna itama sada kerubim. Mon-mon tutup enda ikataken ka “tutup” saja. (Kel 25:17-22; 1Kro 28:11, ctt.; Heb 9:5)​—Nen Ket. B5.

U

• Undang-Undang.

  Bas hurup galang, kata-kata enda biasana ngertiken Undang-Undang Musa ntah pe Kitap-Kitap Heber secara umum. Bas hurup kitik, kata enda banci ngertiken peraturen tertentu bas Undang-Undang Musa ntah pe patoken bas sada undang-undang.​—Bil 15:16; Ul 4:8; Joh 10:34.

• Undang-Undang Musa.

  Undang-undang si ibereken Jahwe arah Musa bas Taneh Mesawang Sinai tahun 1513 SM. Lima buku pertama si lit bas Pustaka si Badia rusur igelari Undang-Undang Musa.​—Jos 23:6; Luk 24:44.

• Undi.

  Batu-batu si kitik ntah pe kayu-kayu si kitik si ipake guna erban keputusen. Enda itama bas lipaten baju ntah pe bas mangkok jenari ikocok. Apai undi si ndarat ntah pe si icabut eme undi si terpilih. Biasana ilakoken alu toto. Kata bas bahasa aslina si lit hubungenna ras “undi” banci ka ertina ‘bagin’.​—Jos 14:2; Ms 16:5; Kua 16:33; Mat 27:35.

• Upeti.

  Penggalaren si bereken penguasa ntah negri tertentu man penguasa ntah negri si deban, si jadi tanda maka ia patuh bage pe gelah hubungenna tetap mehuli ntah pe guna ndatken perlindungen. (2Raj 3:4; 18:14-16; 2 Kro 17:11) Kata e pe banci ka maksudna pajak si ibereken sekalak jelma.​—Neh 5:4; Rom 13:7.

• Urim ras Tumim.

  Benda-benda bagi undi, si ipake imam si mbelin guna meteh kai sura-sura Jahwe sanga jawapen Jahwe iperluken man penungkunen-penungkunen si lit hubungenna ras kepentingen sada bangsa. Urim ras Tumim itamaken bas penutup dada imam si mbelin sanga masuk ia ku kemah ingan ersembah. Banci saja Urim ras Tumim lanai ipake kenca Jerusalem ihancurken kalak Babilon.​—Kel 28:30; Neh 7:65.

W

• Wabah penakit.

  Bas Kitap-Kitap Heber, istilah enda banci ngertiken penakit kai pe si meter menular, si dungna banci seh ku melala ingan (epidemi) janah erban mate (enda rusur ihubungken ku penghakimen Dibata). Tapi biasana kata enda maksudna penakit ntah bencana si rehna arah Jahwe si jadi hukumen.​—Bil 14:12; 16:49; Esek 38:22, 23; Amos 4:10.

• Wari Pendamen.

  Wari si badia si pentingna man kalak Israel. Wari e pe ikataken ka Yom Kippur (arah kata Heber yohm hakkippurim, eme “wari penutupen”) si iban bas tanggal 10 Etanim. Bas sada tahun, bas wari enda ngenca imam si mbelin masuk ku Ingan Sibadiana i kemah ingan ersembah ras dungna i rumah pertoton. I je, persembahkenna dareh korban guna dosana sendiri, guna dosa kalak Lewi si debanna, ras dosa bangsa e. E me waktuna guna puasa ras pulung nembah Dibata. Wari e eme wari Sabat, emaka la lit si banci erdahin bas wari e.​—Im 23:27, 28.

• Wari-wari pendungi.

  Bas nubuat Pustaka si Badia, istilah enda bage pe istilah si deban si bage ertina, bagi “pendungi masa e,” maksudna waktu sanga kejadin-kejadin si nai nandangi seh ku kedungenna. (Esek 38:16; Dan 10:14; Perb 2:17) Tergantung nubuatna, enda dekahna banci saja piga-piga tahun ntah pe lebih. Si rusurna ikataken bas Pustaka si Badia eme “wari-wari pendungi” man doni si gundari si terjadi sedekah kerehen Jesus si la teridah.​—2Tim 3:1; Jak 5:3; 2Pet 3:3.

• Wari Penghakimen.

  Wari ntah pe jangka waktu si itetapken Dibata guna ngakimi bangsa ntah kelompok tertentu, ntah pe kerina manusia. Man kalak si patut mate, banci saja ihukum mate bas wari penghakimen. Tapi man kalak si deban, enda kesempaten guna iselamatken janah nggeluh rasa lalap. “Wari Penghakimen” si iceritaken Jesus Kristus ras rasul-rasulna terjadi bas wari si pepagi, i je me kalak si nggeluh ras si mate ihakimi.​—Mat 12:36.

Z

• Zeus.

  Dewa si meganjangna bas melala dewa si isembah kalak Junani. I Listera, anggap kalak Barnabas e Zeus. Bas tulisen si nai si idat i deher Listera, lit itulis kerna “imam-imam Zeus” ras “Zeus dewa matawari.” Kapal si nangkihi Paulus arah Pulau Malta nari lit i je lambang “Anak-Anak Zeus,” eme Kastor ras Poluks, kalak enda kembar.​—Perb 14:12; 28:11.