PERPUSTAKAN ONLINE Sora Ermomo
PERPUSTAKAN ONLINE
Sora Ermomo
Batak (Karo)
  • PUSTAKA SI BADIA
  • PUBLIKASI
  • PERPULUNGEN
  • w22 Desember hal. 8-13
  • “Kam ras Aku i Pardis Pagi”

La lit video bas bagin enda.

Maaf, lit masalah sanga mutar video enda.

  • “Kam ras Aku i Pardis Pagi”
  • Sora Ermomo Mberitaken Kinirajan Dibata (Edisi Pelajaren)—2022
  • Subjudul
  • Keterangen si Lit Hubungenna
  • UGA NGE PAGI KEGELUHEN BAS PARDIS?
  • GAMBAREN KERNA PARDIS ARAH PEMERENTAHEN SALOMO
  • KAI PAGI TUGAS KALAK SI IPILIH KU SURGA?
  • KAI SI ARUS ILAKOKEN ‘BIRI-BIRI SI DEBAN’ GELAH BANCI TADING I PARDIS?
  • BANCI KAM NGGELUH RASA LALAP BAS PARDIS
  • “Jumpa Pardis Pagi!”
    Sora Ermomo Mberitaken Kinirajan Dibata (Edisi Pelajaren)—2018
  • Kai Sura-Sura Dibata nandangi Doni Enda?
    Berita si Meriah I Bas Dibata Nari!
  • Iban Jesus Doni Enda Jadi Pardis janah Idungina Tugasna
    Jesus kap Dalan, Kebenaren, ras Kegeluhen
  • Pardis i Doni—Tuhu-Tuhu Lit ntah Hayalen saja?
    Sora Ermomo Mberitaken Kinirajan Dibata Jahwe (Man Jelma si Nterem)—2017
Sora Ermomo Mberitaken Kinirajan Dibata (Edisi Pelajaren)—2022
w22 Desember hal. 8-13

ARTIKEL PELAJAREN 50

“Kam ras Aku i Pardis Pagi”

“Situhuna kukataken man bandu wari enda: Kam ras aku i Pardis pagi.”​—LUK. 23:43.

LAGU 145 Janji Jahwe kerna Pardis

SI IBAHASa

1. Sope Jesus mate, kai si katakenna man penjahat si lit i sampingna? (Lukas 23:39-43)

MESUI kel akap Jesus ras dua penjahat si lit i sampingna sanga kalak e ihukum mate bas tiang siksan. (Luk. 23:32, 33) Duana penjahat e nokohi Jesus, emaka kalak e pasti labo muridna. (Mat. 27:44; Mrk. 15:32) Tapi, salah sada penjahat e berubah. Bagenda nina man Jesus, “O Jesus, inget min aku sanga kam masuk ku Kerajanndu.” Nina Jesus ngaloi, “Situhuna kukataken man bandu wari enda: Kam ras aku i Pardis pagi.” (Baca Lukas 23:39-43.) Banci saja la pernah begi penjahat e kerna “Kerajan surga,” si iberitaken Jesus bas pelayanenna. Selain si e, labo pernah ikataken Jesus maka masuk pagi dilaki e ku Kerajan surga. (Mat. 4:17) Pardis si cakapken Jesus man bana eme Pardis si lit i doni pagi. Ja nari siteh?

Jesus ipakuken i tiang. Penjahat si lit i sampingna ngerana man bana.

Kai kesimpulenta kerna penjahat si ngerana man Jesus ras kerna kai si iteh penjahat e? (Nen paragrap 2-3)

2. Ja nari siteh maka penjahat si robah e kalak Jahudi?

2 Mbelin kemungkinenna penjahat e kalak Jahudi. Nina man penjahat si sada nari, “La kin kam mbiar man Dibata? Seri kap hukumenndu ras ia.” (Luk. 23:40) Sada ngenca Dibata si isembah kalak Jahudi. Tapi bangsa si deban sembahna melala dibata. (Kel. 20:2, 3; 1 Kor. 8:5, 6) Adi penjahat e labo kalak Jahudi, banci saja nina, “La kin kam mbiar man dibata-dibata?” Selain si e, Jesus iutus man ‘kalak Israel si bagi biri-biri si enggo papak,’ labo man kalak arah bangsa si deban. (Mat. 15:24) Enggo kataken Dibata man kalak Israel maka pekekeNa pagi kalak mate. Banci saja penjahat e pe tehna kerna si e. Arah kata-katana teridah maka tek ia banci pekeke Jahwe Jesus guna merentah bas Kerajan Dibata. Banci saja ngarap penjahat e gelah ia pe ipekeke Dibata pagi.

3. Banci saja kai si ukuri penjahat e sanga kataken Jesus kerna Pardis? Jelasken. (Kejadin 2:15)

3 Perban penjahat si robah e kalak Jahudi, pasti tehna kerna Adam ras Hawa bage pe kerna Pardis si iban Jahwe jadi ingan kalak e. Emaka, banci saja tek penjahat e maka Pardis si imaksud Jesus eme sada taman si mejile i doni.​—Baca Kejadin 2:15.

4. Kata-kata Jesus man penjahat e ngiahken kita ngukuri kai?

4 Kata-kata Jesus man penjahat e ngiahken kita ngukuri uga kin pagi kegeluhen bas Pardis. Banci reh jelasna siteh kerna Pardis adi sipelajari kerna keadan si dame sanga Raja Salomo merentah. Tek kita maka Jesus, kalak si belinen asangken Salomo, kerja sama pagi ras 144.000 kalak guna erban doni enda jadi Pardis si seh kel jilena. (Mat. 12:42) Selain si e, selaku ‘biri-biri si deban’ pasti merhat kita meteh kai si perlu silakoken gelah banci nggeluh rasa lalap bas Pardis.​—Joh. 10:16.

UGA NGE PAGI KEGELUHEN BAS PARDIS?

5. Adi si ibayangkenndu, uga nge pagi geluhndu bas Pardis?

5 Sanga bayangkenndu kerna Pardis, kai nge si ukurindu? Banci saja bayangkenndu taman si mejile bagi Taman Eden. (Kej. 2:7-9) Banci jadi ingetndu nubuat Miha si ngataken maka umat Dibata kundul pagi “masing-masing i teruh batang anggurna bage pe batang arana.” (Mi. 4:3, 4) Banci ka, ingetndu ayat-ayat Pustaka si ngataken maka mbue pagi pangan i je. (Ms. 72:16; Jes. 65:21, 22) Cuba bayangkenndu: Kam sangana i tengah-tengah taman si mejile. Hirupndu udara si bersih, anggehndu bunga-bunga ras sinuan-sinuan si merim. Kenca si e, kundul kam i lebe-lebe meja si dem pangan si entabeh. I deherndu lit keluarga ras teman-temanndu, termasuk kalak si enggo ipekeke. Meriah kapndu tawa-tawa ras kalak e. Si e kerina labo terjeng nipi. E pasti pagi terjadi! Selain si e, meriah pagi siakap ndahiken dahinta. Kai saja pagi dahinta?

Turang senina si enggo metua si lit bas artikel sebelumna, enggo nguda bas Pardis, iajarina penjahat si ihukum mate i deher Jesus.

Lit pagi dahin si penting man banta eme ngajari kalak si enggo ipekeke (Nen paragrap 6)

6. Kai saja pagi dahinta bas Pardis? (Nen gambar.)

6 Mbarenda nari, ate Jahwe meriah min siakap ndahiken dahinta. (Peng. 2:24) Pasti sibuk kel pagi kita khususna bas Pemerentahen Seribu Tahun Kristus. Kalak si selamat arah kiniseran si mbelin bage pe jutan kalak si ipekeke pasti perlu pagi pangan, baju, ras ingan tading. Guna nikapken si e kerina, pasti mbue kel pagi si arus silakoken. Tapi, pasti meriah siakap ndahikenca. Selain si e, siban pagi doni enda jadi Pardis, bagi si perentahken Jahwe man Adam ras Hawa mbarenda. Siajari ka pagi jutan kalak si ipekeke. Buen arah kalak e lenga tehna kerna Jahwe ras sura-suraNa. Lit ka arah kalak e si enggo jadi umat Jahwe sope jaman Jesus. Pasti meriah kel ukurta ngajari kalak e kerina.

7. Kerna kai nge kita tek, ras engkai?

7 Tek kita maka bas Pardis pagi dame geluhta ras ratur kerina. Kerina keperlunta pe lit. Engkai maka tek kita kerna si e? Perban enggo bereken Jahwe gambaren kerna uga pagi geluhta bas pemerentahen AnakNa. Gambaren e banci siidah arah pemerentahen Salomo mbarenda.

GAMBAREN KERNA PARDIS ARAH PEMERENTAHEN SALOMO

8. Uga kata-kata bas Masmur 37:10, 11, 29 terjadi mbarenda? (Nen “Penungkunen Si Mbaca” bas majalah enda.)

8 Alu penegu-negu kesah si badia, igambarken Raja Daud uga kegeluhen kalak adi rajana pentar ras erkiniteken. (Baca Masmur 37:10, 11, 29.) Rusur sibacaken Masmur 37:11 man kalak sanga sibahas kerna Pardis. Silakoken si e, perban Jesus pe ikutipna ayat e bas khotbahna i gunung, janah katakenna maka ayat e pasti pagi terjadi. (Mat. 5:5) Tapi, kata-kata Daud e pe ncidahken kai si terjadi bas pemerentahen Raja Salomo. Sanga Salomo si merentah bas Israel, dame ras makmur kegeluhen umat Dibata bas negri si “melala kel i je susu ras madu.” Erjanji Dibata man kalak e, nina, “Adi terus kena nggeluh menurut peraturen-peraturenKu . . . , Kuban pagi negri kena dame, janah sanga kena medem la lit ise pe si erban kena mbiar.” (Im. 20:24; 26:3, 6) Janji e enggo terjadi bas pemerentahen Salomo. (1 Kro. 22:9; 29:26-28) Selain si e, erjanji Dibata maka kalak jahat pe ‘lanai pagi lit.’ (Ms. 37:10) Emaka, kata-kata bas Masmur 37:10, 11, 29 enggo terjadi mbarenda janah terjadi ka pagi.

9. Kai nina ratu arah Syeba kerna kerajan Salomo?

9 Berita kerna kedamen ras kemakmuren kalak Israel sanga pemerentahen Salomo seh ku ratu arah Syeba. Guna mastiken berita e, reh ratu e ku Jerusalem amin pe ndauh arah inganna nari. (1 Raj. 10:1) Kenca inenna kerajan Salomo, nina, “Lenga setengahna pe si kubegi e. . . . Pasti meriah ukur rakyatndu bage pe pelayan-pelayanndu si lalap ras kam, sebap banci lalap begikenna kata-katandu si pentar.” (1 Raj. 10:6-8) Tapi, situasi bas pemerentahen Salomo e, gambaren si kitik ngenca arah kai si nandangi bereken Jahwe man manusia bas pemerentahen AnakNa, Jesus.

10. Engkai maka belinen Jesus asangken Salomo?

10 Jesus ndauh belinen asangken Salomo. Salomo la sempurna, pernah lakokenna kesalahen si mbelin si erban susah umat Dibata. Tapi Jesus, Penguasa si sempurna, la pernah erban salah. (Luk. 1:32; Heb. 4:14, 15) Tetap Jesus setia man Dibata amin pe mberat kel percuban si iban Setan man bana. Enggo buktiken Kristus maka la pernah lakokenna dosa janah la pernah lakokenna kai pe si banci ngerugiken kalak si setia man bana. Jesus me Raja si mehulina!

11. Ise pagi si nampati Jesus merentah?

11 Lit pagi 144.000 kalak si nampati Jesus ngurus keperlun umat manusia ras erban sura-sura Jahwe man doni enda terjadi. (Ket. 14:1-3) Kalak e enggo ngadapi mbue tentangen ras kesusahen sanga kalak e i doni denga. Emaka, pasti angkaina uga keadan kalak si nggeluh i doni. Kai saja pagi si ilakoken kalak e?

KAI PAGI TUGAS KALAK SI IPILIH KU SURGA?

12. Tugas kai si ibere Jahwe man si 144.000 kalak?

12 Tugas Jesus bage pe si 144.000 kalak ndauh belinen asangken tugas Salomo. Mbarenda, si perlu iperdiateken Salomo jutan kalak Israel ngenca janah bas sada negri saja. Tapi, si perlu iperdiateken Jesus ras temanna merentah eme miliaren kalak si tading i sebelang doni. Luar biasa kel tugas si ibere Jahwe man si 144.000 kalak e!

13. Kai tanggung jawap si 144.000 kalak?

13 Bali bagi Jesus, si 144.000 kalak e pe jadi raja ras imam pagi. (Ket. 5:10) Sanga kalak Israel arus patuh man Undang-Undang Musa, imam-imam me si utamana ertanggung jawap nampati kalak e gelah tetap sehat ras rembak ras Jahwe. Nina Pustaka, Undang-Undang e “bayangen ngenca kerna kai si mehuli si nandangi reh.” Emaka banci sisimpulken, tanggung jawap si 144.000 kalak e pe seri ras tanggung jawap imam-imam si mbarenda. Kalak e ertanggung jawap nampati umat Dibata gelah tetap sehat janah rembak ras Jahwe. (Heb. 10:1) La siteh uga pagi raja-raja ras imam-imam e komunikasi ras rakyat Kerajan Dibata si lit i doni. Tapi, la soal pengaturen kai pagi si iban Jahwe, tek kita maka bas Pardis pagi, kalak si lit i doni pasti ndatken petunjuk si iperlukenna.​—Ket. 21:3, 4.

KAI SI ARUS ILAKOKEN ‘BIRI-BIRI SI DEBAN’ GELAH BANCI TADING I PARDIS?

14. Kai hubungen “rarasen si kitik” ras ‘biri-biri si deban’?

14 Igelari Jesus kelompok kalak si merentah ras ia selaku “rarasen si kitik.” (Luk. 12:32) Selain si e, lit ka kelompok si peduaken, igelari Jesus kalak e ‘biri-biri si deban.’ Duana kelompok e enggo jadi sada rarasen. (Joh. 10:16) Duana kelompok e enggo rusur kerja sama janah terus pagi kerja sama sanga doni enda iubah jadi Pardis. “Rarasen si kitik” nggeluh i surga pagi, tapi ‘biri-biri si deban’ nggeluh rasa lalap i doni. Tapi, kai si arus ilakoken ‘biri-biri si deban’ gundari gelah banci pagi nggeluh i Pardis?

Turang senina si enggo metua e mbahas brosur “Ermeriah Ukur Seh Rasa Lalap!” ras kalak si lit bas apotik.

Gundari nari, banci kita ersikap guna tading bas Pardis (Nen paragrap 15)b

15. (a) Uga ‘biri-biri si deban’ ndukung senina-senina Kristus? (b) Uga carata ngusih turang senina si sangana nukur tambar, bagi si lit bas gambar?

15 Penjahat si robah ndai mate sope cidahkenna pengerganna man kai si enggo lakoken Jesus. Tapi kita selaku ‘biri-biri si deban,’ mbue kesempatenta ncidahken pengerganta. Contohna, banci sibuktiken maka siergai Jesus alu ndukung kalak si ipilih ku surga. Ikataken Jesus maka ihakimina pagi biri-birina menurut perbahanenna man kalak si ipilih ku surga. (Mat. 25:31-40) Banci sidukung senina-senina Kristus alu semangat bas dahin erberita ras erban murid. (Mat. 28:18-20) Guna ngelakoken si e, sipake ateta alu mehuli alat-alat guna ngajarken Pustaka si enggo isikapken, termasuk buku Ermeriah Ukur Seh Rasa Lalap! Adi lenga lit si erlajar Pustaka ras kam, ban e jadi tujunndu janah tawarken pelajaren Pustaka man enterem kalak.

16. Kai si perlu silakoken gelah banci kita jadi rakyat Kerajan Dibata?

16 Pasti merhat kita ipilih Jahwe jadi rakyat KerajanNa. Emaka gundari nari, siusahakenlah jadi kalak si jujur bas ranan ras perbahanen, janah seimbang bas kebiasan geluhta. Teruslah kita setia man Jahwe, teman geluhta, ras turang seninata. Adi bas doni si jahat enda pe patuh kita man Jahwe, reh nukahna pagi siakap patuh man baNa bas Pardis. Banci ka kita ersikap nggeluh i Pardis alu mpehuli sipat-sipatta ras siusahaken gelah reh beluhna kita bas keterampilen si erguna. Nen ka artikel “Enggo nge Kam Ersikap Nggeluh Rasa Lalap i Doni Enda?” bas majalah enda.

17. Engkai maka la perlu salah lalap siakap banta adi pernah silakoken dosa si serius? Jelasken.

17 Ula min salah lalap siakap banta perban dosa si serius si pernah silakoken. Memang, labo perban enggo lit tebusen “sengaja kita erban dosa.” (Heb. 10:26-31) Tapi, tek kita maka adi tuhu-tuhu kita robah arah dosata, sipindo penampat Jahwe ras pertua-pertua, janah silakoken si ngena ate Jahwe, pasti ampuniNa kita. (Jes. 55:7; Perb. 3:19) Ingetlah kata-kata Jesus man kalak Parisi, “Aku reh labo ndilo kalak si benar, tapi ndilo kalak perdosa.” (Mat. 9:13) Korban tebusen Jesus banci nutupi kerina dosata.

BANCI KAM NGGELUH RASA LALAP BAS PARDIS

18. Kai nge atendu icakapkenndu ras penjahat si mate i deher Jesus?

18 Cuba bayangken kam bas Pardis janah sangana ercakap-cakap ras penjahat si mbarenda ngerana man Jesus. Pasti ngata bujur kel kena man pengorbanen Jesus. Banci saja sungkunndu ia kerna kegeluhen Jesus piga-piga waktu sope ia mate bage pe kerna uga perasanna megi jawapen Jesus nandangi pemindonna. Selain si e, banci saja isungkunna kam kerna uga kegeluhen bas wari-wari pendungi i doni Setan enda. Tuhu-tuhu meriah kel pagi mpelajari Kata Dibata radu ras kalak si bagi dilaki e!​—Ep. 4:22-24.

Turang senina si enggo metua e, enggo nguda bas Pardis, sangana ngelukis janah inen sekalak diberu. Mejile kel pemandangen i sekeliling kalak e. Lit i je gunung, batang kayu, ras bunga. I deher kalak e lit singa, kelinci, ras kambing liar, kerinana erdame.

Bas Pemerentahen Seribu Tahun, ipake sekalak turang seninata keterampilen si enggo ipelajarina janah e erban meriah ukurna (Nen paragrap 19)

19. Engkai maka labo pagi bosan siakap nggeluh bas Pardis? (Nen gambar sampul.)

19 Labo pagi bosan siakap nggeluh bas Pardis. Banci pagi kita jumpa ras erbage-bage kalak janah meriah kel pagi siakap ndahiken dahinta. Tapi si pentingna, tiap wari banci kita reh rembakna ras Bapakta si i surga janah sigejapken pasu-pasuNa. Lit lalap si mbaru si banci sipelajari kerna Jahwe bage pe ciptanNa. Reh dekahna kita nggeluh, reh bagesna kekelengenta man Jahwe. Ngata bujur kel kita man Jahwe ras Jesus, perban lit arapenta nggeluh rasa lalap bas Pardis!

KAI JAWAPNDU?

  • Uga nge pagi kegeluhen i Pardis?

  • Uga pagi kalak si ipilih ku surga ikut erban doni enda jadi Pardis?

  • Kai si perlu ilakoken ‘biri-biri si deban’ gelah banci tading i Pardis?

LAGU 22 Rehlah KerajanNdu!

a Rusur nge ukurindu uga pagi kegeluhenndu bas Pardis? Adi rusur ukurindu, e banci mpegegehi kam. Reh rusurna siukuri kai pagi silakoken Jahwe man banta, reh semangatna kita nceritaken kerna doni si mbaru man kalak si deban. Artikel enda banci erban reh paguhna kinitekenta man janji Jesus kerna pardis i doni.

b KETERANGEN GAMBAR: Sekalak turang senina si merhat ngajari kalak si ipekeke, usahakenna ngajari kalak gundari nari.

    Publikasi Batak Karo (2014-2025)
    Ndarat
    Masuk
    • Batak (Karo)
    • Bagiken
    • Pengaturen
    • Copyright © 2025 Watch Tower Bible and Tract Society of Pennsylvania
    • Syarat Penggunan
    • Kebijaken Privasi
    • Pengaturen Privasi
    • JW.ORG
    • Masuk
    Bagiken