Iperidiken alu kesah si badia. Johanes Peridiken bage pe Jesus Kristus pernah singetkenna kerna iperidiken alu kesah si badia. (Matius 3:11; Lukas 3:16; Perbahanen Rasul-Rasul 1:1-5) Peridin e la seri ras iperidiken bas gelar kesah si badia. (Matius 28:19) Ja nari banci siteh?

Labo kerina pengikut Jesus iperidiken alu kesah si badia. Jumlah kalak e terbatas. Kalak e enggo ipilih guna ngelayani jadi raja ras imam radu ras Jesus i surga. E me sebapna kalak e ilantik alu kesah si badia.f (1 Petrus 1:3, 4; Ketangkasen 5:9, 10) Si jadi rakyat kalak e eme jutan pengikut Jesus si arapenna nggeluh seh rasa lalap i doni si sempurna ras mejile.—Matius 5:5; Lukas 23:43.

Iperidiken alu api. Pernah ikataken Johanes Peridiken, “Kalak si nandangi reh kenca aku [maksudna Jesus], peridikenna pagi kena alu kesah si badia ras api. . . . Alat miari lit bas tanna, bersihkenna pagi inganna ngerik. Pepulungna pagi gandumna ku bas lumbung, tapi tutungna pagi segalna alu api si la banci imateken.” (Matius 3:11, 12) Kata-kata e ncidahken maka iperidiken alu api la seri ras iperidiken alu kesah si badia. Kai erti dua peridin e?

Gandum ngelambangken kalak si nggit megiken Jesus ras matuhi ia. Lit kesempaten kalak e guna iperidiken alu kesah si badia. Segal ngelambangken kalak si la nggit megiken Jesus. Kalak e tempa-tempa iperidiken alu api, maksudna ikernepken seh rasa lalap.—Matius 3:7-12; Lukas 3:16, 17.