PASAL 3

“Dem alu Kesah si Badia”

Si terjadi kenca kesah si badia icurcurken bas wari Pentakosta

Arah Perbahanen Rasul-Rasul 2:1-47

1. Uga nge suasanana bas Perayan Pentakosta?

ENTEREM kel kalak bas dalan i Jerusalem.a Asap nangkih arah ingan nutung persembahen i rumah pertoton, janah kalak Lewi ngendeken Halel (Masmur 113 seh 118), mungkin alu cara sialo-alon. Dem dalan-dalan perban enterem kalak si reh. Kalak e rehna arah ingan-ingan si ndauh kel bagi Elam, Mesopotami, Kapadokia, Pontus, Mesir, ras Roma.b Erkai kalak e reh ku Jerusalem? Guna ngerayaken Perayan Pentakosta si igelari ka “wari rani si pertama.” (Bil. 28:26) Perayan tahunen enda jadi tanda maka rani barli enggo dung janah imulai me rani gandum. Seh kel riahna bas wari e.

Peta si ncidahken kuta kalak si megiken berita si meriah bas Pentakosta 33 M. 1. Daerah: Libia, Mesir, Etiopia, Bitinia, Pontus, Kapadokia, Judea, Mesopotami, Babilon, Elam, Media, ras Partia. 2. Kota: Roma, Aleksandria, Mempis, Antiokia (Siria), Jerusalem, ras Babilon. 3. Laut: Laut Tengah, Laut Hitam, Laut Merah, Laut Kaspia, ras Teluk Persia.

JERUSALEM—PUSAT AGAMA JAHUDI

Mbue kejadin bas pasal-pasal awal buku Perbahanen Rasul-Rasul terjadi i Jerusalem. Kota Jerusalem e lit i antara bukit-bukit i daerah pegunungen bas tengah Judea, kira-kira 55 kilometer i sebelah timur Laut Tengah. Bas lokasi e, i puncak Gunung Sion, lit kota si ertembok. Bas tahun 1070 SM, italuken Raja Daud me kota e. Dungna, kota e jadi ibu kota bangsa Israel si mbarenda.

I deher Gunung Sion lit Gunung Moria. Menurut turi-turin kalak Jahudi si nai, bas Gunung Moria me Abraham hampir ngorbanken Isak. Si e terjadi kira-kira 1.900 tahun sope terjadi erbage-bage kejadin si iceritaken bas buku Perbahanen Rasul-Rasul. Dungna, Gunung Moria jadi bagin kota Jerusalem sanga ibangun Salomo rumah pertoton Jahwe si pertama i je. Rumah pertoton e me si jadi pusat ingan kalak Jahudi nembah Jahwe. Daerah rumah pertoton e pe jadi ingan kalak Jahudi ngelakoken kegiatenna tiap wari.

Kerina kalak Jahudi arah erbage ingan ratur reh ku rumah pertoton Jahwe e guna mpersembahken korban, nembah Jahwe, ras mperingeti telu perayan tahunen. Si e ilakoken kalak e guna matuhi perentah Dibata, “Telu kali setahun, kerina dilaki arus reh ku lebe-lebe Jahwe Dibata kena bas ingan si pilihNa.” (Ul. 16:16) Bas Jerusalem pe lit Sanhedrin Agung ntah pe Pengadilen Agama Jahudi si Meganjangna. Pengadilen e lit kuasana bas masyarakat, bas pemerentahen, bage pe bas agama.

2. Kejadin si luar biasa kai nge si terjadi bas Pentakosta 33 M?

² Kira-kira jam siwah erpagi-pagi bas musim semi tahun 33 M, terjadi me kejadin si luar biasa, si lalap inget kalak seh piga-piga abad kenca si e. Rempet, terbegi “sora arah langit bagi sora angin si meter,” ntah “bagi sora angin rembus erdeso.” (Perb. 2:2; Pustaka si Badia ras Ende-enden Edisi ke-4 © LAI 2003) Sora si megang e ndemi ingan murid-murid Jesus pulung. Kalak e lit kira-kira 120 kalak. Kenca si e terjadi me kejadin si luar biasa. Lit tempa-tempa bagi dilah api ncinepi takal tiap murid.c Kenca si e, kalak e “dem alu kesah si badia” janah mulai ngerana alu erbage-bage bahasa! Sanga ndarat kalak e arah rumah nari, mamang kel ate kalak asing si jumpa ras kalak e i dalan-dalan Jerusalem, sebap murid-murid e banci ngerana man kalak e. Begi kalak e murid-murid ‘ngerana bas bahasana sekalak-sekalak.’—Perb. 2:1-6.

3. (a) Engkai maka Pentakosta 33 M banci ikataken kejadin penting bas sejarah umat Jahwe? (b) Kai hubungen khotbah Petrus ras “kunci-kunci Kerajan”?

³ Kejadin si la terlupaken e eme kejadin penting bas sejarah umat Jahwe. Mulai kejadin e me lit Israel rohani ntah pe runggun Kristen si anggotana eme kalak si ipilih ku surga. (Gal. 6:16) Tapi lit ka kejadin si deban. Sanga khotbah Petrus man jelma si enterem bas wari e, gunaken Petrus kunci si pertama arah telu “kunci-kunci Kerajan.” Tiap kunci Kerajan banci mbuka kesempaten man sada kelompok kalak guna ndatken pasu-pasu si istimewa. (Mat. 16:18, 19) Kunci si pertama erban kalak Jahudi ras kalak si ngikutken agama Jahudi banci ndatken berita si meriah janah ilantik alu kesah si badia Dibata.d Alu bage, kalak e banci jadi bagin Israel rohani, janah lit arapen kalak e guna merentah jadi raja ras imam bas Kerajan Mesianik. (Ket. 5:9, 10) Bas pudi wari, hak istimewa e pe ibereken man kalak Samaria, kenca si e ibereken ka man kalak si labo Jahudi. Pelajaren kai si banci idat kalak Kristen si gundari arah kejadin-kejadin si penting bas Pentakosta 33 M?

“Kerina Murid-Murid Pulung bas Sada Ingan” (Perb. 2:1-4)

4. Engkai maka banci sikataken runggun Kristen si gundari nerusken pendahin runggun Kristen abad pertama?

⁴ Tangtangna, 120 murid ngenca bas runggun Kristen. ‘Kerina kalak e pulung bas sada ingan.’ Pulung kalak e bas sada loteng janah aloken kalak e kesah si badia. (Perb. 2:1) Bas pendungi wari e, enggo lit ribun kalak si iperidiken. Enda perkembangen awal denga. Ngasa gundari pe terus denga lit perkembangen bas organisasita! Kalak si lit bas runggun Kristen jaman gundari eme dilaki ras diberu si patuh man Dibata. Kalak e me si mberitaken “berita si meriah kerna Kerajan . . . man manusia i belang-belang doni guna kesaksin man kerina bangsa” sope seh kedungen e.—Mat. 24:14.

5. Pasu-pasu kai si banci idat anggota runggun Kristen, la soal bas abad si pertama ntah pe si gundari?

⁵ Runggun Kristen e pe jadi sumber gegeh secara rohani man anggotana, la soal man kalak si ipilih ku surga ntah pe bas pudi wari man ‘biri-biri si deban.’ (Joh. 10:16) Ergai Paulus dukungen si ibereken anggota runggun man sada ras si debanna. Bas suratna man kalak Kristen i Roma jelas kel katakenna kerna si e. Nina, “Merhat kel aku jumpa ras kena gelah banci kubereken pergegeh arah Dibata nari guna erban kiniteken kena reh paguhna. Maksudku, gelah pegegehi kena aku alu kiniteken kena, janah kupegegehi kena alu kinitekenku.”—Rom. 1:11, 12.

ROMA—IBU KOTA SADA KERAJAN

Kerina kejadin bas buku Perbahanen Rasul-Rasul terjadi sanga Roma jadi kota si galangna ras si pentingna bas doni enda. Roma eme ibu kota sada kerajan. Sanga jaya kel kerajan e, daerah si ikuasaina eme arah Inggris nari seh ku Afrika Utara janah arah Samudra Atlantik nari seh ku Teluk Persia.

Bas Roma melala kebudayan, suku, bahasa, ras takhayul. Dalan-dalanna mejile janah terurus, emaka mbue kalak si rehen ku Roma, janah mbue ka barang dayan si ibaba ku je arah kerina daerah bas kerajan e. I deher Roma lit pelabuhen Ostia. Bas pelabuhen e, kapal-kapal bongkar muaten. Muatenna banci saja pangan ras barang-barang mewah si khusus ibaba ku kota e. Kapal-kapal e rusur ngelewati jalur perdagangen si meriah.

Bas abad pertama M, lebih sada juta kalak si tading i Roma. Mungkin setengah pendudukna eme budak. Kalak e jadi budak perban itaban sanga perang, perban ia kalak jahat si ihukum, perban idayaken orang tuana ntah pe la diate orang tuana. Piga-piga budak si ibaba ku Roma eme kalak Jahudi. Kalak e jadi budak perban bas tahun 63 SM kota Jerusalem italuken Jenderal Romawi eme Pompeius.

Teremen penduduk Roma mesera pergeluhna janah tading siasak-asaken bas rumah susun. Bergantung kel kalak e man penampat arah pemerentah. Tapi, bangunen-bangunen umum si lit bas ibu kota seh kel megahna, janah kaisar-kaisar si erbanca. Contohna eme teater ras bangunen si galang. I je lit tontonen bagi pertunjuken drama, pertandingen gladiator, ras perlomban kereta kuda. Kerina e gratis guna jadi hiburen man rakyat.

6, 7. Uga runggun Kristen si gundari ndalanken tugas arah Jesus guna erberita man kerina bangsa?

⁶ Runggun Kristen si gundari pe ngelakoken pendahin si seri ras runggun Kristen abad pertama. Mbarenda, enggo bereken Jesus tugas man kalak e. Amin gia mesera tugas e tapi banci ka erban meriah ukur. Nina man kalak e, “Banlah kalak arah kerina bangsa jadi murid-muridku, peridikenlah kalak e bas gelar Bapak ras Anak ras kesah si badia, ajarilah kalak e ngelakoken kerina si enggo kuperentahken man kena.”—Mat. 28:19, 20.

⁷ Gunaken Jahwe runggun Kristen Saksi Jahwe guna ndalanken pendahin e gundari. Memang labo nukah erberita man kalak arah erbage bahasa. Tapi publikasi si iban Saksi-Saksi Jahwe enggo lit bas lebih 1.000 bahasa. Adi ratur kam perpulungen radu ras turang senina janah ikut kam bas dahin mberitaken Kerajan bage pe erban murid, banci gejapkenndu keriahen ukur. Enggo datndu hak istimewa guna mereken kesaksin kerna gelar Jahwe. Sitik ngenca kalak si ndatken hak istimewa e!

8. Penampat kai si banci sidat arah runggun Kristen?

⁸ Bas masa si susah enda, enggo bereken Jahwe perkade-kaden sebelang doni guna nampati kita megenggeng janah ermeriah ukur. Bagenda itulis Paulus man kalak Kristen Heber: “Mari siperdiateken sada ras si debanna gelah siiah-iahen kita bas engkelengi ras ncidahken perbahanen si mehuli. Ula kita la reh ku perpulungen bagi si biasa ilakoken piga-piga kalak, tapi sipegegehilah sada ras si debanna, janah reh tutusna kita ngelakoken si e kerina perban siidah wari e enggo reh deherna.” (Heb. 10:24, 25) Runggun Kristen eme pemere Jahwe gelah banci kita mpegegehi ras ipegegehi. Tetaplah kita rembak ras turang seninata. Ula kita la reh ku perpulungen!

‘Begina bas Bahasana Sekalak-Sekalak’ (Perb. 2:5-13)

Murid-murid Jesus erberita man kalak Jahudi bage pe man kalak si ngikutken agama Jahudi bas ingan si enterem jelma. — “Sibegi kalak e ngerana bas bahasata sekalak-sekalak kerna perbahanen Dibata si luar biasa.”—Perbahanen Rasul-Rasul 2:11

9, 10. Kai si lakoken piga-piga turang senina guna erberita man kalak si nggunaken bahasa si deban?

⁹ Bayangkenlah uga senggetna kalak Jahudi ras kalak si ngikutken agama Jahudi arah erbage bangsa si pulung bas wari Pentakosta 33 M e. Mbelin kemungkinenna, teremen arah kalak si reh e angkaina bahasa Junani ntah bahasa Heber. Tapi paksa si e “begina murid-murid ngerana bas bahasa kalak e sekalak-sekalak.” (Perb. 2:6) Pasti kena kel ku pusuh kalak e sanga begina berita si meriah bas bahasana sendiri. Memang kalak Kristen si gundari labo banci rempet beluh ngerana bas bahasa asing. Tapi enterem si nggit erberita nggunaken bahasa si deban. Carana, lit si erlajar bahasa si mbaru gelah banci ngelayani bas runggun bahasa asing si ndeherna ntah pe pindah ku negri si deban. Biasana luar biasa kel akap si mpuna rumah ngidah kai si lakoken kalak e.

¹⁰ Contohna Christine. Ikut ia erlajar bahasa Gujarati radu ras pitu Saksi si deban. Sanga jumpa ia ras temanna erdahin, eme sekalak diberu si nguda denga si nggunaken bahasa Gujarati, perkuankenna temanna e nggunaken bahasa Gujarati. Luar biasa kel akap diberu e, emaka merhat ia meteh engkai maka pala-palai Christine mpelajari bahasa si mesera mpelajarisa bagi bahasa Gujarati. Dungna banci peseh Christine berita si meriah man bana. Nina diberu e man Christine, “Pasti lit si penting si ate kena peseh kena.”

11. Uga carata mpeseh berita si meriah man kalak si nggunaken bahasa si deban?

¹¹ Memang labo kerina kita banci erlajar bahasa si deban. Amin pe bage, kerina kita banci erberita si meriah man kalak si nggunaken bahasa si deban. Salah sada carana eme nggunaken aplikasi JW Language^®. I je banci sipelajari cara mperkuanken kalak si nggunaken bahasa si deban. Banci ka sipelajari piga-piga kalimat bas bahasa e si erban kalak tertarik man beritata. Sipetandakenlah situs web jw.org man kalak e, janah adi banci sicidahken piga-piga video ras baca-bacanta si lit bas bahasana. Adi silakoken si e, pasti meriah ukurta bali bagi kalak Kristen bas abad pertama. Kalak e pe meriah kel ukurna ngidah tanggapen enterem kalak arah bangsa si deban si megi berita si meriah ‘bas bahasana sekalak-sekalak.’

KALAK JAHUDI I MESOPOTAMI RAS I MESIR

The History of the Jewish People in the Age of Jesus Christ (tahun 175 SM–135 M) ngataken, “Lit keturunen kerajan [Israel] sepuluh suku ras kerajan Juda si tading bas Mesopotami, Media, ras Babilon. Mbarenda, kalak e ibuang kalak Assur ras kalak Babilon ku je.” Menurut Esra 2:64, jumlah kalak Israel si mulih ku Jerusalem arah Babilon nari eme 42.360 kalak ngenca. Si e terjadi bas tahun 537 SM. Ikataken Flavius Yosefus maka bas abad pertama M, lit puluhen ribu kalak Jahudi si “tading i sekitar Babilon.” Bas abad peteluken seh abad pelimaken M, kalak Jahudi e erban Talmud Babilon, eme kumpulen undang-undang.

Lit piga-piga dokumen si mbuktiken maka kalak Jahudi enggo tading i Mesir silang-langna mulai abad peenemken SM. Bas masa e, ikirim Jeremia pesan man kalak Jahudi si tading bas erbage ingan i Mesir, termasuk Mempis, si igelari ka Nop. (Jer. 44:1, bage pe cataten i teruh.) Mbelin kemungkinenna enterem kalak Jahudi si pindah ku Mesir mulai tahun 323-30 SM. Ikataken Yosefus maka lit kalak Jahudi si jadi penduduk pertama i Aleksandria. Bas pudi wari, ibereken kuasa man kalak Jahudi guna erban peraturen bas daerah inganna tading. Bas abad pertama M, penulis Jahudi si gelarna Filo ngataken maka lit sada juta kalak Jahudi tading i sebelang Mesir, mulai “pinggiren Libia seh ku perbatasen Etiopia.”

“Tedis Petrus” (Perb. 2:14-37)

12. (a) Kai hubungen nubuat Joel ras kejadin si terjadi bas Pentakosta 33 M? (b) Engkai maka itimai kalak Kristen abad pertama nubuat Joel terjadi?

¹² “Tedis Petrus” guna ngerana man jelma si enterem arah erbage bangsa e. (Perb. 2:14) Ijelaskenna maka kengasupen ngerana bas erbage bahasa si bereken Dibata secara mukjizat eme penggenapen nubuat Joel. Isina eme, “Kucurcurken pagi kesah si badiaKu man erbage jelma.” (Joel 2:28) Sope Jesus nangkih ku surga pe, katakenna man murid-muridna, “Kupindoken man Bapak gelah berekenNa man kena penampat si deban.” Penampat e igelari Jesus “kesah si badia.”—Joh. 14:16, 17.

13, 14. Uga Petrus erusaha gelah kai si pesehna kena ku pusuh kalak, janah uga carata ngusih ia?

¹³ Kata-kata penutup Petrus man jelma si enterem e lumayan tegas. Nina, “Kerina min kalak Israel tek maka Jesus si bunuh kena bas tiang enggo iban Dibata ia jadi Tuan ras Kristus.” (Perb. 2:36) Memang, teremen kalak si megiken Petrus e labo idahna langsung Jesus ibunuh i tiang siksan. Tapi perban kalak e bangsa Jahudi, arus kalak e ikut ertanggung jawap. Amin gia bage, mehamat Petrus ngerana man teman-temanna sada bangsa janah usahakenna gelah kai si katakenna kena ku pusuh kalak e. Tujun Petrus eme ngiahken kalak e robah, labo nalahken kalak e. Tersinggung nge jelma si enterem e? Lang, justru “sedak akap kalak e perban sedihna,” maksudna kena kel ku pusuh kalak kai si kataken Petrus. Nungkun kalak e, “Kai dage si arus lakoken kami?” Perban mehamat Petrus ngerana man kalak e janah banci banna kena ku pusuh jelma si enterem e, dungna teriahken kalak e guna robah.—Perb. 2:37.

¹⁴ Banci siusih cara Petrus ngiahken kalak. Sanga kita erberita, la perlu sipersoalken kerina pendapat si salah arah si mpuna rumah. Pangen sicakapken kai si setujui ras-ras. Adi sidarami persamanta ras si mpuna rumah, banci sisampati kalak e ngangkai Kata Dibata. Biasana, adi mehuli carata mpeseh kebenaren si lit bas Pustaka, reh nukahna akap kalak si pusuhna benar guna ngaloken beritata.

KALAK KRISTEN I PONTUS

Piga-piga kalak si megiken khotbah Petrus bas Pentakosta 33 M eme kalak Jahudi arah Pontus nari. Pontus e eme sada daerah i bagin utara Asia Kecil. (Perb. 2:9) Piga-piga arah kalak e mungkin babana berita si meriah e ku kutana, sebap sanga tulis Petrus suratna si pertama, lit katakenna kerna kalak si erkiniteken “si lit bas” erbage ingan, salah sadana eme bas Pontus.g (1 Pet. 1:1) Arah tulisen Petrus pe banci siteh maka kalak e enggo “erceda ate ntisik perban erbage-bage percuban” si iadapina perban kinitekenna. (1 Pet. 1:6) Banci saja, percuban e termasuk tentangen ras penindasen.

Arah surat Kaisar Trayanus ras Plinius, banci siteh maka lit ka penindasen si terparahen si iadapi kalak Kristen i Pontus. Plinius eme gubernur Bitinia ras Pontus i daerah Romawi. Plinius nulis suratna arah Pontus kira-kira bas tahun 112 M. Laporkenna maka kalak Kristen eme “wabah” si ngancam tiap kalak, la soal jenis kelaminna, umurna, ras status sosialna. Bereken Plinius kesempaten man kalak Kristen guna mersoken kinitekenna. Kalak si la nggit, ihukum mate. Tapi, ise pe si nggit numpahi Kristus, si nggit ertoto man dewa-dewa ntah pe man patung Trayanus, ibebaskenna. Akui Plinius maka “kalak Kristen situhu-tuhu la banci ipaksa ngelakoken” si e.

g Istilah Junani si iterjemahken jadi “si lit bas” biasana maksudna eme kelompok kalak Jahudi. Arah e siteh maka piga-piga kalak si tangtangna jadi kalak Kristen eme kalak Jahudi.

“Kerina Kena Arus Iperidiken” (Perb. 2:38-47)

15. (a) Kai si ikataken Petrus ras uga tanggapen kalak? (b) Engkai maka ribun kalak si megiken berita si meriah bas Pentakosta e enggo cocok iperidiken bas wari e?

¹⁵ Bas wari Pentakosta 33 M si luar biasa e, bagenda nina Petrus man kalak Jahudi bage pe man kalak si ngikutken agama Jahudi: “Ertobatlah janah kerina kena arus iperidiken.” (Perb. 2:38) Hasilna, lit kira-kira 3.000 kalak si iperidiken.e Banci saja kalak e iperidiken bas kolam-kolam si lit i Jerusalem bage pe i sekitarna. Metersa nge kalak e iperidiken? Banci nge kejadin e jadi contoh man kalak si erlajar Pustaka bage pe anak-anak si orang tuana Kristen gelah meter iperidiken amin pe lenga ia siap? Lang. Perlu siinget kalak Jahudi ras kalak si ngikutken agama Jahudi si iperidiken bas wari Pentakosta 33 M rajin mpelajari Kata Dibata. Kalak e anggota arah bangsa si enggo ibaktiken man Jahwe. Selain si e, enggo buktiken kalak e maka kalak e semangat. Contohna, nggit kalak e ngelakoken perdalanen si ndauh kel guna reh ku perayan tahunen e. Kenca tek kalak e maka penting kel tugas Jesus bas ndalanken sura-sura Dibata, enggo siap kalak e terus ngelayani Dibata. Enggo siap kalak e iperidiken jadi pengikut Kristus.

ISE NGE MAKSUDNA KALAK SI NGIKUTKEN AGAMA JAHUDI?

Bas Pentakosta 33 M, ‘kalak Jahudi ras kalak si ngikutken agama Jahudi’ megiken Petrus erberita.—Perb. 2:10.

Nikolaus eme kalak “si enggo ngikutken agama Jahudi arah Antiokia nari.” Ia me salah sada si ipilih rasul-rasul guna ngurus “dahin si penting,” eme mbagiken pangan tiap wari. (Perb. 6:3-5) Kalak si ngikutken agama Jahudi eme kalak si labo Jahudi tapi dungna ikutkenna agama Jahudi. Kalak e enggo ianggap bali bagi kalak Jahudi perban enggo alokenna Dibata ras dalankenna Undang-Undang kalak Israel. Selain si e, la kalak e nggit nembah dibata-dibata si deban, janah kalak e pe enggo isunat (adi ia dilaki). Kalak e pe enggo jadi bagin bangsa Israel.

Kenca kalak Jahudi ibebasken arah pembuangen i Babilon tahun 537 SM, enterem kalak e si tading ndauh arah Israel, tapi tetap dalanken kalak e agama Jahudi. E me sebapna, i ja pe kalak e tading, kalak si lit i sekeliling kalak e meteh kerna agama Jahudi. Penulis-penulis si mbarenda, bagi misalna Horatius ras Seneka, ngataken maka enterem kalak arah erbage negri si tertarik man kalak Jahudi ras man kiniteken kalak e. Emaka, ikutken kalak e cara nggeluh kalak Jahudi janah dungna ikutkenna ka agama Jahudi.

16. Uga kalak Kristen bas abad pertama ncidahken semangat si nggit erkorban?

¹⁶ Kelompok e pasti ipasu-pasu Jahwe. Nina Pustaka, “Kerina kalak si enggo tek e pulung janah kai si lit bas ia pakena ras-ras. Dayaken kalak e erta-ertana janah hasilna ibagiken man kerina kalak, menurut keperlun tiap kalak.”f (Perb. 2:44, 45) Kerina kalak Kristen situhu-tuhu pasti merhat ngusih kekelengen ras semangat kalak e si nggit erkorban.

17. Kai langkah-langkah si perlu ilakoken gelah banci iperidiken?

¹⁷ Gelah sekalak jelma banci mbaktiken diri ras iperidiken, menurut Pustaka lit piga-piga langkah si perlu lakokenna. Arus lit bas ia pemeteh kerna Kata Dibata. (Joh. 17:3) Arus cidahkenna kinitekenna janah ertobat ia arah kesalahenna si mbarenda. Maksudna, tuhu-tuhu cidahkenna maka ia menyesal. (Perb. 3:19) Kenca si e arus ia mulihken, maksudna ubahna dalan geluhna. Jenari arus mulai lakokenna perbahanen si benar si sesuai ras sura-sura Dibata. (Rom. 12:2; Ep. 4:23, 24) Kenca lakokenna si e kerina, perlu baktikenna dirina man Dibata bas toto, kenca si e iperidiken.—Mat. 16:24; 1 Pet. 3:21.

18. Hak istimewa kai nge si banci idat murid-murid Kristus si enggo iperidiken?

¹⁸ Enggo nge kam mbaktiken diri ras iperidiken? Adi enggo, ergailah hak istimewa si enggo datndu e. Bali bagi murid-murid bas abad pertama si dem alu kesah si badia, kam pe banci igunaken Jahwe mberitaken berita si meriah ras ngelakoken sura-sura Jahwe!

a Nen kotak “Jerusalem—Pusat Agama Jahudi.”

b Nen kotak “Roma—Ibu Kota Sada Kerajan,” “Kalak Jahudi i Mesopotami ras i Mesir,” ras “Kalak Kristen i Pontus.”

c E labo tuhu-tuhu “dilah” api. Tapi “tempa-tempa bagi dilah api.” Mungkin bentuk si teridah i datas takal tiap murid paksa si e mirip ras dilah api janah ercahaya bagi gara api.

d Nen kotak “Ise nge Maksudna Kalak si Ngikutken Agama Jahudi?”

e Labo bas kejadin e si teremna kalak si iperidiken. Tanggal 7 Agustus 1993, bas pertemuan internasional Saksi-Saksi Jahwe i Kiev, Ukraina, lit 7.402 kalak si iperidiken bas enem kolam. Lit dua jam sepulu lima menit maka dung acara peridin e.

f Pengaturen enda sementara saja. Enda perlu perban enterem kalak si reh ku Jerusalem terdekahen tading i je guna erlajar terbuen kerna kinitekenna si mbaru. Kalak Kristen e nggit erbagi perban kekelengen, labo perban ngikutken politik tertentu.—Perb. 5:1-4.