Ise nge si Mpengaruhi Perukurenndu?

1, 2. (a) Sanga ikataken Petrus “Mekuahlah atendu bandu, Tuan,” uga nina Jesus ngaloisa? (Nen gambar pemena artikel.) (b) Engkai maka bage jawapen Jesus?

SENGGET murid-murid Jesus! Iakap kalak e Jesus me si mpesikap mulihi kerajan Israel, tapi ikataken Jesus maka lanai ndekah isiksa me ia janah mate. Mis ngerana rasul Petrus, nina, “Mekuahlah atendu bandu, Tuan. Labo banci terjadi si enda kerina man bandu.” Nina Jesus, “Laweslah ku pudiku, Setan! Kam kap si ngambati aku, perban kai si iukurindu labo perukuren Dibata tapi perukuren manusia.”​—Matius 16:21-23; Perbahanen Rasul-Rasul 1:6.

² Arah jawapen Jesus, jelas teridah maka beda kel perukuren Jahwe ras perukuren doni si ikuasai Setan enda. (1 Johanes 5:19) Iiahken Petrus Jesus gelah mentingken bana bali bagi si ilakoken melala kalak gundari. Tapi iteh Jesus maka ate Jahwe gelah ersikap ia, perban ia nandangi isiksa janah mate. Jawapen Jesus mbuktiken maka ialokenna perukuren Dibata janah itulakna perukuren doni enda.

3. Engkai maka la menukah ngikutken perukuren Jahwe ras nulak perukuren doni?

³ Adi kita uga? Bagi Jahwe nge perukurenta ntah bagi teremen kalak bas doni enda? Perban kita kalak Kristen, siusahaken kel gelah perbahanenta erban meriah ukur Jahwe. Tapi uga kerna perukurenta? Siusahaken nge gelah bali perukurenta bagi perukuren Jahwe khususna sanga lit masalahta? Arus siusahaken ngelakokenca. Menukah kel ngikutken perukuren kalak si lit bas doni enda perban kalak e lit i sekelilingta. (Epesus 2:2) Bas doni enda nterem kalak mentingken bana, janah banci saja kita tergoda gelah bagi kalak e. Payo, la menukah ngikutken perukuren Jahwe, tapi menukah kel ngikutken perukuren kalak si lit bas doni enda.

4. (a) Kai si terjadi adi sipediat ipengaruhi doni enda perukurenta? (b) Kai si banci sipelajari bas artikel enda?

⁴ Adi sipediat ipengaruhi doni enda perukurenta, dungna kita jadi kalak si mentingken bana janah kita me si erban keputusen kerna apai si benar ras si salah. (Markus 7:21, 22) Emaka penting kel gelah perukurenta bali bagi “perukuren Dibata” labo bagi “perukuren manusia.” Artikel enda nampati kita ngelakokenca. Sipelajari kari ngkai maka adi bali perukurenta bagi perukuren Jahwe enda labo mbatasi kita, tapi erguna man banta. Siteh ka kari uga carana gelah ula kita ipengaruhi perukuren doni enda. I bas artikel seterusna, sipelajari kari uga perukuren Jahwe kerna erbage situasi janah uga kita banci ngusih perukurenNa e.

PERUKUREN JAHWE ERGUNA MAN BANTA

5. Engkai maka piga-piga kalak la nggit ipengaruhi kalak si deban?

⁵ Piga-piga kalak, la ia nggit ise pe mpengaruhi carana rukur. Nina kalak e, “Ate-atekulah geluhku.” Iakap kalak e lit hakna nentuken apai si mehuli ras apai si la mehuli man bana. La kalak e nggit ipengaruhi ntah pe ipaksa gelah seri ras kalak si deban.a (Nen keterangen tambahen.)

6. (a) Kebebasen kai si ibereken Jahwe man banta? (b) Lit nge batasna kebebasen e?

⁶ Siteh maka adi siikutken perukuren Jahwe, labo ertina lanai kita bebas. Nina 2 Korinti 3:17, “I ja lit kesah si badia Jahwe, i je lit kebebasen.” Ibereken Jahwe kita kebebasen jadi kalak si uga ateta kita. Lit hakta erban pilihen janah banci sipilih apai si meriah siakap. Memang bage kin kita iciptaken Jahwe. Tapi labo ertina kebebasenta e la lit batasna. (Baca 1 Petrus 2:16.) Sanga siteh ateta kerna kai si benar ntah pe si salah, ate Jahwe sipake min Pustaka guna metehsa. Erguna nge e, ntah erban kita lanai bebas?

7, 8. Lanai nge kita bebas adi siikutken perukuren Jahwe bas geluhta? Ban contohna.

⁷ Contohna, iusahaken orang tua ngajarken kai si mehuli man anakna. Banci jadi iajari kalak e anakna jadi kalak si jujur, pekerja keras, ras ermediate man kalak si deban. Enda labo erban anak e lanai bebas. Iusahaken orang tua gelah anakna e banci jadi kalak sukses. Sanga anak e reh galangna janah lanai tading i rumah, nggo bebas kalak e erban pilihen sendiri. Adi ipilihna ngelakoken kai si iajarken orang tuana, pasti reh ulina keputusen si ibanna. Dungna la melala masalahna, la melala si ikuatirkenna, janah la ia menyesal.

⁸ Bali bagi orang tua si mehuli, ate Jahwe gelah anak-anakNa pe senang geluhna. (Jesaya 48:17, 18) Emaka iberekenNa kita pedah-pedah kerna uga carana nggeluh ras erurusen ras kalak si deban. IajariNa kita ngadapi masalahta janah nggeluh bagi si ngena ateNa. Enda labo erban kita lanai bebas. Malahen enda banci erban kita lebih bijaksana janah banci nampati kita erban keputusen si terulin. (Masmur 92:6; Kuan-kuanen 2:1-5; Jesaya 55:9) Memang lit hakta erban pilihen, tapi sibanlah pilihen si erban meriah ukurta. (Masmur 1:2, 3) Melala kel gunana adi siikutken perukuren Jahwe.

PERUKUREN JAHWE SI MEHULINA

9, 10. Kai buktina maka perukuren Jahwe ndauh ulin asangken perukuren doni?

⁹ Alasen si deban ngkai maka merhat kita gelah perukurenta bali bagi perukuren Jahwe, perban perukurenNa me si mehulina. Ibereken doni enda pedah uga gelah mehuli perbahanenta, gelah keluargata ermeriah ukur, gelah sukses, ras si debanna. Tapi buen pedah e la cocok ras perukuren Jahwe. Contohna, ipengaruhi doni enda jelma si nterem gelah ngayaki kai si akapna meriah saja, bage pe gelah la salah iakapna perbahanen seks si salah. Mon-mon ikatakenna ka maka kalak si nggo erjabu banci ermeriah ukur adi sirang ntah pe cerai perban alasen-alasen si sepele. Pedah enda la cocok ras ajaren Pustaka. Tuhu nge ulin pedah doni enda asangken pedah Pustaka?

¹⁰ Nina Jesus, “Kepentaren teridah arah perbahanen kap.” (Matius 11:19) Aminna pe teknologi si gundari nggo canggih, tapi la banci idungina masalah si erban kita la ermeriah ukur, bagi perang, segat ate man suku si deban, bage pe kejahaten. Janah nggo biasa iakap doni enda perbahanen seks si salah. Tapi, iakui kalak e maka perbahanen si bage banci erban keluarga lanai ersada, melala penakit, ras si debanna. Uga kerna pedah si ibereken Jahwe? Kalak Kristen si ndalanken pedah Jahwe, keluargana banci ermeriah ukur, sehat, janah banci erteman ras turang seninana i sebelang doni. (Jesaya 2:4; Perbahanen Rasul-Rasul 10:34, 35; 1 Korinti 6:9-11) Enda me buktina maka perukuren Jahwe ndauh ulin asangken perukuren doni.

11. Ise si mpengaruhi perukuren Musa, janah kai hasilna?

¹¹ Umat Jahwe si mbarenda pe itehna maka perukuren Jahwe me si mehulina. Contohna, amin gia nggo ipelajari Musa “kerina kepentaren kalak Mesir,” tapi itehna maka kepentaren situhu-tuhu rehna arah Jahwe. (Perbahanen Rasul-Rasul 7:22; Masmur 90:12) Emaka isungkunna Jahwe, “Turikenlah man bangku sura-suraNdu.” (Keluaren 33:13) Perban ipeturut Musa Jahwe si mpengaruhi perukurenna, igunaken Jahwe ia alu cara si luar biasa guna ngelakoken sura-suraNa, janah iergaiNa Musa alu ngataken maka ia kalak si mbelin kel kinitekenna.​—Heber 11:24-27.

12. Kai si ikutken Paulus sanga erban keputusen?

¹² Rasul Paulus beluh kalakna, meganjang sekolahna, janah tehna bahasa Heber ras Junani. (Perbahanen Rasul-Rasul 5:34; 21:37, 39; 22:2, 3) Tapi la ikutkenna perukuren doni enda janah adi erban keputusen ia ikutkenna Kata Dibata. (Baca Perbahanen Rasul-Rasul 17:2; 1 Korinti 2:6, 7, 13.) Hasilna, berhasil ia bas pelayanenna janah lit arapenna ndatken pasu-pasu seh rasa lalap.​—2 Timotius 4:8.

13. Ise si ertanggung jawap ngubah perukurenta gelah seri bagi perukuren Jahwe?

¹³ Jelas me, perukuren Dibata ndauh ulin asangken perukuren doni enda. Adi siikutken pedah Dibata, pasti meriah ukurta janah berhasil kita. Tapi labo ipaksa Jahwe kita gelah seri perukurenta bagi Ia. “Budak si setia janah pentar” ras pertua pe la banci maksa kita. (Matius 24:45; 2 Korinti 1:24) Kerina kita ertanggung jawap ngubah perukurenta gelah seri bagi perukuren Jahwe. Uga carana?

ULA NGGIT IPENGARUHI DONI ENDA

14, 15. (a) Kai si arus siukuri gelah perukurenta bali bagi perukuren Jahwe? (b) Engkai maka ula min sipediat perukuren doni enda masuk ku pikirenta? Ban contohna.

¹⁴ Nina Roma 12:2, “Ula nai kena ipengaruhi doni enda. Tapi robahlah alu ngobah perukuren kena. Alu bage, banci ibuktiken kena maka peraten Dibata e mehuli, sempurna, janah erban Dibata senang.” Ikataken i bas ayat e, la soal kai pe si nggo mpengaruhi perukurenta ope erlajar Pustaka, banci nge siubah perukurenta e bali bagi perukuren Dibata. Banci siubah carata rukur amin gia perukurenta nggo ipengaruhi sipatta kitik-kitik nari ras kalak si lit i sekelilingta. Janah banci siubah carata rukur adi sipilih kai saja si ateta siukuri. Adi siukuri perukuren Jahwe, enda buktina tek kita perukuren Jahwe nge lalap si benar. Alu bage, perukurenta nggo bali bagi perukuren Jahwe.

¹⁵ Tapi gelah bagi Jahwe carata rukur, ‘ula kita nggit ipengaruhi doni enda.’ Maksudna, ula nai sitonton, sibaca, ntah pe sibegiken kai pe si la cocok ras perukuren Dibata. Gelah siangkai kerna si e, mari sibahas contohna. Kalak si atena reh sehatna arus ipanna pangan si sehat. Tapi adi terus ka ipanna pangan si macik, usahana e sia-sia. Bage ka pe, adi sipediat perukuren doni enda masuk ku pikirenta, usahata i bas mpelajari perukuren Jahwe dungna sia-sia.

16. Arah kai saja arus silindungi dirita?

¹⁶ Banci nge tuhu-tuhu situlak perukuren doni enda? Lang. Pasti lit sitik perukuren doni enda si masuk ku perukurenta perban kita tading bas doni enda. (1 Korinti 5:9, 10) Sanga kita erberita pe, banci sibegi pendapat si salah bage pe ajaren agama palsu. Amin gia la banci tuhu-tuhu siambekken perukuren si salah e, tapi ula terus siukuri ntah pe sialoken perukuren e. Bagi Jesus, arus mis situlak perukuren Setan si banci mpengaruhi kita. Alu bage banci silindungi dirita arah perukuren doni enda.​—Baca Kuan-kuanen 4:23.

17. Uga carana gelah banci silindungi dirita arah perukuren doni enda?

¹⁷ Contohna, arus kita hati-hati milih teman. Ipersingeti Pustaka kita maka adi erteman kita ras kalak si la ngelayani Jahwe, dungna perukurenta banci bagi perukuren kalak e. (Kuan-kuanen 13:20; 1 Korinti 15:12, 32, 33) Arus ka kita hati-hati milih hiburenta. Sanga situlak hiburen si lit hubungenna ras evolusi, kekerasen, ntah pe perbahanen si la mehuli, silindungi me perukurenta arah kai si “erlawanen ras pemeteh kerna Dibata.”​—2 Korinti 10:5.

18, 19. (a) Engkai maka arus kita hati-hati nandangi perukuren doni si tempa-tempa mehuli? (b) Penungkunen kai si perlu sisungkun man dirita? Engkai?

¹⁸ Arus ka siteh janah situlak perukuren doni enda si tempa-tempa mehuli. Contohna, lit piga-piga laporen berita si ndukung pendapat politik tertentu. Lit ka si mbanggaken kesuksesen ras sura-sura doni enda. Iban piga-piga film ras buku gelah lit bas pikirenta “aku si pentingna” ntah pe “keluargaku si pentingna” janah e tempa-tempa masuk akal ras la salah. Tapi perukuren si bagenda la cocok ras Pustaka. Ikataken bas Pustaka maka kita ras keluargata banci tuhu-tuhu ermeriah ukur adi kelengen ateta Jahwe asangken kai pe. (Matius 22:36-39) Aminna pe mungkin la salah piga-piga cerita ras tontonen anak-anak, tapi e banci erban la salah iakap anak-anak perbahanen si la mehuli.

¹⁹ Enda labo maksudna kerina hiburen salah. Tapi arus sisungkuni banta, ‘Sanga lit kuidah si tempa-tempa mehuli, mis nge kuteh e perukuren doni? Kulindungi nge diriku bage pe anakku arah acara TV ntah pe bacan si la mehuli? Kusampati nge anakku gelah bagi Jahwe perukurenna, alu bage la ia ipengaruhi perukuren doni enda arah kai si ibegi ras si idahna?’ Adi siteh kai bedana perukuren Dibata ras perukuren doni enda, la kita “ipengaruhi doni enda.”

GUNDARI, ISE NGE SI MPENGARUHI KAM?

20. Ja nari siteh ise si mpengaruhi perukurenta?

²⁰ Arus siinget maka dua ngenca si banci mpengaruhi perukurenta, eme Jahwe ras doni Setan. Ise nge si mpengaruhi kam? Jawapenna eme kai si imasukkenndu ku pikirenndu. Adi sialoken perukuren doni enda, ipengaruhina me perukurenta janah kita pe jadi kalak si mentingken bana. Emaka arus kita hati-hati milih kai si ateta sitonton, sibaca, sibegi, bage pe kai si ateta simasukken ku pikirenta.

21. Kai si man bahasenta bas pelajaren seterusna?

²¹ Bas pelajaren enda nggo sibahas maka gelah bagi Jahwe perukurenta, arus situlak perukuren doni. Arus ka siukuri uga perukuren Jahwe gelah perukurenta bali bagi perukurenNa. Bas pelajaren seterusna, sipelajari kari uga cara ngelakokenca.