“Éfufupe ya si nyô”: Mona Zambe

Môse wo su’ulan Abô’ô Tabernacle, Yésus a ye’ele éfase ya temple ba loone na, “éwolo akum.” (Jean 8:20, Mfefé Nkôñelan; Luc 21:1) Vôm ate a ne nseñe ya vôm binga be ne, vôme bôte ba zu li’i mimveane miap.

Éyoñ abô’ é ne, éfase ya temple ete é wô’ô dañ faé alu amu é bili beta belampe benyiñ, bese be bili beta bisua bi to njalan a mbon. Belampe bete ba ve abui éfufube ja kui ja’a bevôm be ne ôyap. Jam Yésus a jô éyoñe ji da volô bôte ba vô’ôlô nye na be simesan éfufub éte éyoñ a jô be na: “Me ne éfufupe ya si nyô: môt a tôñe ma, a ye wulu dibi, ve a ye tabe éfufupe ya ényiñ.”​—Jean 8:12.

Bepharisien be nji kañese mejô me Yésus, nde ba jô na: “Wo akate foé ajô dôé womien; foé jôé é nji bo été.” Yésus a yalane na: “Akôsa bo me akate foé jam, foé jam é ne été; amu me ayeme vôm me nga so, a vôm me aye ke; ve mia mi te yeme vôm me nga so, a vôm me aye ke.” A ke ôsu a jô na: “Metiñe menan me ne fe ntilane na, mejô bôte bebaé be akat, me ne été. Mamien me akate foé jam, a Tate a nga lôme ma, nnye fe a kate foé ajô dam.”​—Jean 8:13-18.

Bepharisien be nji kañese ôsimesane wé, nde ba sili nye na: “Éso a ne vé?” Yésus a ve be éyalan é ne été a jô’ô na: “Mi ne te yeme ma, te yeme fe Ésa wom: nge mi nga yeme ma, ve mi nga yeme fe Ésa wom.” (Jean 8:19) Ja’a Bepharisien be nga’ane be bili nkômbane ya bi Yésus, môt éziñ a nambe ki nye.

Yésus a beta ba’alane mejô mé a jô be na: ‘Ma zu ke, a mia ye jeñe ma, mia ye mane wu abé denan été; a mfa’a ma ke, mi se ngule ya zu wôé.’ Mbôle Bejuif be nji ve’ele wô’ô jôm a kômbô jô, nde ba taté na ba sili bebiene na: “Ye a ye wôé émien, éyoñ a jô jina na, e mfa’a ma ke, mi se ngule ya zu wôé?” Be nji wô’ô atinane ya bifia bi Yésus amu be nji yem vôm a so. Yésus a jô be na: “Mi mi ne bôte ya si nyô, me ki me ne môte ya yôp; mi mi ne bôte ya si ndône mu, me me nji bo môte ya si ndône nyô.”​—Jean 8:21-23, Mfefé Nkôñelan.

Yésus a kobô ajô ya ényiñ a nga taté nyiñe yôp ôsusua na a zu bialé ane môta binam a na nnye a ne Messie be nga ka’ale, nge na Krist, nyô betebe ôsu ya miñyebe bete ba too be yange’e. Akusa bo nalé, ba sili nye a ébiasé ése na: “Ô ne ne za?”​—Jean 8:25, Mfefé Nkôñelan.

Mbôl a yen ane ba bene nye a siñe nye, Yésus a yalane na: “Jé ébien ma ke ôsu a kobô a mia [MN]?” Ane a dutu ôsimesan e be Ésa wé a liti amu jé Bejuif ba yiane wô’ô Mon: “Môt a nga lôme ma, nnye a ne zôsô; mejô me nga wô’ô be nye, mme mete me ajô bôte ya si nyô.”​—Jean 8:25, 26.

Nde Yésus a liti ndi nlem a bili be Ésa, ndi nlem Bejuif be nji bi, a jô’ô na: “Éyoñ mi aye mane bete Mone môte yôp, éyoñe te mi aye yeme na me ne nye, a yeme fe na, me ne te bo jame da, ve ane Tate a nga ye’ele ma, nalé me akobô mejô ma. Môt a nga lôme ma a ne be ma; a nji li’i ma étam; amu me abo mam a nye’e melu mese.”​—Jean 8:28, 29.

Ve da, Bejuif béziñ ba buni Yésus, nde a jô be na: “Nge mi aba’ale mejô mam melu mese, wôna mi ne fo’o beyé’é bam ; mi aye yeme benya mejôô, a benya mejôô me aye bo mia beti.”​—Jean 8:31, 32.

Bôte béziñe ba yene bifia bite aval étam: e bo beti. Nde ba jô na: “Bi ne mvoñe bôt Abraham, bi nji bo belo be bôt: wo ajô na, Mi aye bo beti aya?” Bejuif ba yeme na, melu kôa, be nga too éjôé ayoñ afe si, nde ba bene na be beta loone be na belo. Ve Yésus a liti na be ngenane belo a jô’ô na: “Me abele fo’o ane me ajô mia na, Môt ase a bo abé a ne ôlo ya mam abé.”​—Jean 8:33, 34.

E bene kañese na be ne belo ya abé a telé Bejuif e mbia été. Yésus a timine na: “Ôlo ô nji tabe nda atabatabe, mone ya nda e nye a tabe atabatabe.” (Jean 8:35, Mfefé Nkôñelan) Ôlo ô nji bi éli’i éziñ, a be ne titane nye awolo ase. Fo’o ve mon a te bialé nda été nge ke mone ntoñ nnye a tabe nda “atabatabe.”

Ajô ete benya mejôô a lat a Mon be ne benya mejôô ba toé bôte fili ya awu a abé nnôm éto. Yésus a jô na: “Nge Mon a ye bo mia beti, mi aye fo’o bo beti.”​—Jean 8:36.