Fers Kingz

7 Salaman mi bil ih oan palis,* an ih mi tek ahn 13 yaaz fi finish bil evriting.

2 Ih bil di hows weh dehn kaal Lebanon Faris. Di hows mi 146 fut lang, 73 fut waid, ahn 44 fut hai.* Ih bil it tap a foa roa a seeda poas. Ahn dehn mi ga seeda beem pahn tap a di poas dehn. 3 Dehn mi kova di bildin wid seedawud. Ahn dat mi deh tap a di kraas beem dehn weh mi-di res pahn di poas dehn. In aal da mi 45 a dehn; 15 mi deh eena wahn roa. 4 Dehn mi ga chree roa a windo, wan pahn tap a di ada. An eech windo mi-di fays wahn nada windo pahn di opozit said. 5 Aala di enchrans ahn doa poas dehn mi ga skwyaa fraym, jos laik di windo dehn weh deh opozit eech ada, wan tap a di neks.

6 Ahn hihn bil di Kolom Haal,* weh 73 fut* lang ahn 44 fut* waid. Ahn wahn varanda mi deh rait fronta it wid sohn kolom, an ih mi ga wahn roof.

7 Hihn mi aalso bil di Jojment Haal,* wehpaat hihn sidong pahn wahn chroan ahn joj difrent kays. Dehn mi kova di haal wid seedawud fahn tap tu batam.

8 Ahn dat da di sayhn way how Salaman mi bil di palis* weh ih mi fi liv eena. Fi hihn palis mi deh da di neks koatyaad bihain di Jojment Haal. Ih bil wahn hows jos laik dat fi ih waif, hoo da-mi Fayro daata.

9 Dehn mi yooz sohn ekspensiv stoan fi dehnya bildin, fahn di fongdayshan tu di tap a di waal dehn. Dehn mi kot ahn kaav dehnya stoan pahn evri said. Ahn dehn mi eevn yooz dehnya stoan fi di owtsaid aal di way tu di poblik koatyaad. 10 Dehn mi yooz sohn big ekspensiv stoan fi di fongdayshan; som a di stoan mi 15 fut* an adaz mi 12 fut.* 11 Dehn mi mezha ahn kot sohn ekspensiv stoan fi put tap a di fongdayshan, ahn dehn mi aalso yooz seedawud. 12 Ih bil wahn waal rong di poblik koatyaad owta chree roa a stoan ahn wahn roa a seedawud, jos laik weh dehn mi du fi di prees koatyaad, Jehoava templ, ahn di varanda fi di hows.

13 King Salaman mi sen fi Hairam, soh Hairam kohn fahn Taiya fi kohn si ahn. 14 Hairam ma da-mi wahn wido fahn Naftalai chraib, an ih pa da-mi wahn man fahn Taiya weh mek tingz owta kapa.* Hairam mi ga lata ekspeeryens ahn nalij wen ih kohn tu werk weh ga fi du wid kapa. Soh ih kohn da King Salaman ahn du aal di werk weh Salaman mi asain ahn fi du.

15 Hihn mi mek too kolom owta kapa. Eech kolom mi 26 fut* hai, ahn wahn mezharin schring mi need fi bee 17 an a haaf fut* lang fi goh rong di hoal kolom. 16 Hihn mek too big fansi kyap owta kapa fi put tap a di kolom. Di too kyap mi 7 an a haaf fut* hai. 17 Di kyap weh mi deh tap a eech kolom mi ga wahn metal mesh ahn sevn fansi chayn pahn eech a dehn. 18 Ih mek too roa a pomegranet fi goh rong di metal mesh weh dekorayt paat a di kyap dehn weh deh tap a di kolom; ih du dis fi di too kyap. 19 Di too kyap tap a di kolom dehn weh deh fronta di varanda mi shayp laik wahn lili, an ih mi 6 fut* hai. 20 Di batam haaf a di kyap dehn weh mi deh tap a di too kolom mi jain aan tu di metal mesh, ahn rait anda dat, too roa a 200 pomegranet mi deh rong eech kyap.

21 Ih set op di too kolom rait fronta di varanda fi di templ.* Ih set op wan kolom pahn di rait han* said ahn naym it Jaykin,* an ih set op di ada kolom pahn di lef han* said ahn naym it Boawaz.* 22 Soh dehn mi finish bil di too kolom, ahn di tap a dehn mi shayp laik wahn lili.

23 Den ih mek wahn big kapa baysn.* Ih mi 15 fut* waid ahn 7 an a haaf fut* hai. Dehn mi need wahn mezharin schring weh mi 44 fut* lang fi goh rong it. 24 Dehn mi ga too roa a rong froot az dekorayshan rait anda di rim, aal rong it. Dehn mi ga ten a dehn fi eech fut an a haaf,* aal rong di big kapa baysn. Dehn mi mek di dekorayshan ahn di big kapa baysn aal tugeda eena di saym moal. 25 Di big kapa baysn mi-di res pahn tap a 12 bul, ahn di bak a dehn mi-di point tuwaadz di midl; 3 mi-di fays naat, 3 mi-di fays wes, 3 mi-di fays sowt, ahn 3 mi-di fays ees. 26 Ahn di big kapa baysn mi bowt 3 inchiz tik,* ahn di rim a di baysn mi kerv tuwaadz di owtsaid laik wahn lili. Ih wuda hoal 11,620 gyalan* a waata.

27 Den ih mek ten kyaat* owta kapa. Eech a dehn mi 6 fut lang, 6 fut waid, ahn 4 fut hai.* 28 Dis da how dehn mi mek di kyaat dehn: Eech said mi ga wahn panel, ahn di panel dehn goh bitween di kraasbaar dehn. 29 Di ayrya weh deh pahn di said panel dehn bitween di kraasbaar dehn mi ga sohn laiyan, bul, ahn cherob pan it, ahn di saym dizain mi deh oava di kraasbaar dehn. Ahn sohn reet dizain mi deh rait oava an anda di laiyan ahn bul dehn. 30 Eech kyaat mi ga foa kapa weel ahn foa rad, an ih mi ga foa pees eena di kaana weh mi sopoat di rad ahn di weel. Dehndeh foa pees weh mi deh da eech kaana mi deh anda di baysn, an ih mi ga sohn reet dizain pan it. 31 Di oapm paat a di baysn mi rong an ih mi wahn fut an a haaf* deep; di baysn mi fit eensaida di tap paat a di kyaat fraym. Ahn fahn deh dong tu di pees weh deh da eech kaana, ih mi 2 fut* hai, ahn di tap a di kyaat mi ga kaavin pan it. Eech panel pahn di said mi ga wahn skwyaa shayp, dehn neva rong. 32 Di foa weel mi deh da di batam a di said panel dehn, ahn di pees weh mi-di sopoat di weel dehn mi jain aan tu di kyaat, an eech weel mi 2 fut* hai. 33 Ahn dehn mek di weel dehn jos laik how dehn mek di weel dehn fi di chariyat. Di foa pees weh deh da di kaana a di kyaat, di rim, di spoaks, ahn di paat weh da di senta a di weel, mek owta kapa weh mek fahn wahn moal. 34 Dehn mi ga foa pees da eech kaana fi sopoat di kyaat. Di moal weh dehn yooz fi mek di kyaat mi inklood di foa pees weh deh da eech kaana. 35 Dehn mi ga wahn ban weh goh rong di tap a di kyaat, an ih mi 9 inchiz* hai. Di kyaat ahn di said dehn pahn di ban mi mek eena wan moal. 36 Ahn den pahn di panel dehn rong di ban, dehn mi kaav sohn cherob, laiyan, ahn paam chree, ahn dehn mi kaav reets aal rong di ban. 37 Dehn mi bil di ten kyaat di sayhn way, an aala dehn mi ga di saym saiz ahn shayp.

38 Hihn mi mek 10 kapa baysn, an eech a dehn mi 6 fut* waid; eech baysn mi hoal bowt 232 gyalan* a waata. An eech kyaat mi ga wahn baysn. 39 Den ih put faiv kyaat pahn di rait han said a di templ ahn faiv pahn di lef han said. An ih put di big kapa baysn pahn di rait han said a di templ, tuwaadz di ees.

40 Hairam mi mek di baysn dehn, di shovl dehn, ahn di bowl dehn tu.

Soh hihn finish aal di werk weh King Salaman mi asain ahn fi du fi Jehoava templ. 41 Hihn mek di too kolom, di too kyap weh shayp laik wahn bowl weh goh tap a di kolom, ahn di too metal mesh weh dekorayt paat a di kyap weh deh tap a di kolom dehn. 42 Ih mek 400 pomegranet ahn put too roa a pomegranet pahn eech metal mesh fi dekorayt di too kyap weh deh tap a di too kolom. 43 Ih aalso mek di ten kyaat, di ten baysn fi di kyaat dehn, 44 di big kapa baysn, ahn di 12 bul weh deh andaneet it, 45 ahn di bokit dehn, di shovl dehn, di bowl dehn, an ada tingz. Hairam mek aala dehndeh tingz owta shaini kapa fi mek King Salaman put eena Jehoava templ. 46 Di king mi yooz moal weh mek owta klay fi mek aala dehndeh tingz eena di Jaadn dischrik, bitween Sokot ahn Zaretan.

47 Salaman neva way eni a di tingz weh di prees yooz eena di templ, bikaaz da mi soh moch tingz. Dehn neva noa humoch di kapa way. 48 Salaman mi mek aala di tingz weh bilangz eena Jehoava templ. Hihn mek di goal alta, di goal taybl weh dehn put di hoali bred,* 49 ahn di lampstan dehn weh mek owta pyoar goal; faiv deh pahn di rait han said ahn faiv deh pahn di lef han said bifoa yu reech di Moas Hoali Room. An ih mek di goal flowaz, di goal lamp dehn, ahn di goal toolz weh dehn yooz fi hoal di schring fi lait op di lamp; 50 di baysn dehn, di toolz weh dehn yooz fi kot di wik, di bowl ahn kop dehn, ahn di faiya hoalda dehn; aala dehndeh tingz mi mek owta pyoar goal. Salaman mi aalso yooz goal fi mek di sakit dehn fi di doa tu di Moas Hoali Room ahn di doa dehn tu di enchrans a di templ.

51 Soh King Salaman finish aal di werk weh ih mi ga fi du pahn Jehoava templ. Den Salaman mi bring evriting weh ih pa Dayvid mi set wan said* fi Jehoava templ. An ih put di silva, di goal, an ada tingz eena di chrezhri dehn eena di templ.