Dyooteronomi

27 Den Moaziz lang wid di eldaz fahn monks di Izrelait dehn mi stan op fronta di peepl, ahn Moaziz seh: “Unu fi obay aala di komanment dehn weh Ah di giv unu tudeh. 2 Ahn wen unu kraas di Jaadn Riva fi goh da di lan weh Jehoava unu Gaad di giv unu, unu fi chooz sohn big stoan ahn wait wash dehn.* 3 Den unu fi rait dong evriting weh di Laa seh pahn dehndeh stoan, soh dat unu ku goh eena di lan weh Jehoava unu Gaad di giv unu. Da lan soh gud dat da laik ih ful op a milk ahn honi, jos laik weh Jehoava, di Gaad a unu ansesta dehn, mi pramis unu. 4 Wen unu don kraas di Jaadn Riva, unu fi du weh Ah di koman unu tudeh. Unu fi set op dehndeh stoan da Mongt Eebal ahn wait wash dehn. 5 Unu fi bil wahn alta tu Jehoava unu Gaad rait deh. Unu fi mek da alta owta stoan, an unu noh fi yooz no kaina toolz weh mek owta aiyan fi kot di stoan dehn. 6 Unu fi bil di alta tu Jehoava unu Gaad owta sohn stoan. An unu fi aafa sohn bon aafrin tu Jehoava unu Gaad pan it. 7 Unu fi aafa op sohn pees sakrifais rait deh, an unu fi eet dehn rait deh. An unu fi bee hapi fronta Jehoava unu Gaad. 8 Ahn wen unu rait evriting weh di laa seh pahn di stoan dehn, ih fi bee eezi fi reed.”

9 Den dis da weh Moaziz ahn di Leevait dehn weh da prees tel di Izrelait dehn: “Oa Izrel, lisn ahn pay atenshan. Tudeh unu geh fi bee Jehoava peepl ahn hihn wahn bee unu Gaad. 10 Unu fi lisn tu weh Jehoava unu Gaad seh an obay ih komanment dehn an ih laa dehn weh Ah di giv unu tudeh.”

11 Pahn da saym day, Moaziz mi koman di peepl, an ih tel dehn: 12 “Dehnya da di chraib dehn weh wahn stan op pahn Mongt Gerizim fi bles di peepl wen unu don kraas di Jaadn Riva: Simiyan chraib, Leevai chraib, Jooda chraib, Isakar chraib, Joazef chraib, ahn Benjamin chraib. 13 Ahn dehnya da di chraib dehn weh wahn stan op pahn Mongt Eebal fi seh wahn kers: Rooben chraib, Gad chraib, Asher chraib, Zebyulon chraib, Dan chraib, ahn Naftalai chraib. 14 Ahn dis da weh di Leevait dehn wahn hala owt ahn tel di Izrelait dehn:

15 “‘Gaad wahn kers enibadi weh mek wahn imij er wahn stachu owta metal ahn weh wership it eena seekrit. Jehoava hayt wen wahn persn yooz ih skil fi du dehndeh kaina tingz.’* An aala di peepl wahn seh, ‘Aymen!’*

16 “‘Gaad wahn kers enibadi weh hayt ih ma er ih pa.’ An aala di peepl wahn seh, ‘Aymen!’

17 “‘Gaad wahn kers enibadi weh moov dehn nayba bongjri maaka.’ An aala di peepl wahn seh, ‘Aymen!’

18 “‘Gaad wahn kers enibadi weh mek wahn blain persn goh di rang way.’ An aala di peepl wahn seh, ‘Aymen!’

19 “‘Gaad wahn kers enibadi weh noh joj wahn farina, wahn pikni weh noh ga no pa, er wahn wido eena wahn fyaa way.’ An aala di peepl wahn seh, ‘Aymen!’

20 “‘Gaad wahn kers enibadi weh ga seks wid ih pa waif, bikaaz ih shaym ih pa.’ An aala di peepl wahn seh, ‘Aymen!’

21 “‘Gaad wahn kers enibadi weh ga seks wid wahn animal.’ An aala di peepl wahn seh, ‘Aymen!’

22 “‘Gaad wahn kers enibadi weh ga seks wid ih sista, weda da ih ma daata er ih pa daata.’ An aala di peepl wahn seh, ‘Aymen!’

23 “‘Gaad wahn kers enibadi weh ga seks wid ih mada-in-laa.’ An aala di peepl wahn seh, ‘Aymen!’

24 “‘Gaad wahn kers enibadi weh laywayt ih nayba fi kil ahn.’ An aala di peepl wahn seh, ‘Aymen!’

25 “‘Gaad wahn kers enibadi weh aksep wahn braib fi kil wahn inosent persn.’* An aala di peepl wahn seh, ‘Aymen!’

26 “‘Gaad wahn kers enibadi weh noh obay evriting weh dis Laa seh.’ An aala di peepl wahn seh, ‘Aymen!’