Fers Kingz
4 King Salaman mi rool oava di hoal a Izrel. 2 Dehnya da-mi ih hai ofishal dehn:* Zaydak son Azaraiya da-mi di prees; 3 Shaisha son dehn, Elihoref an Ahaija, da-mi di sekiteri dehn; Ahailod son Jehoshafat da-mi di wan weh mi kip di rekadz. 4 Jehoyada son Benaiya da-mi di aami cheef; Zaydak an Abaiyatar da-mi di prees dehn; 5 Naytan son Azaraiya mi in chaaj a aala di ofishal dehn; Naytan son Zaybod da-mi wahn prees ahn di king fren; 6 Ahaishar mi in chaaj a di palis; an Abda son Adonairam mi in chaaj a dehn wan weh di king koman fi werk far ahn.
7 Salaman mi ga 12 ofishal weh mi in chaaj a di hoal a Izrel. Dehn mi provaid food fi di king an evribadi eena ih palis, an eech wan a dehn mi fi provaid food fi wahn hoal mont owta di yaa. 8 Dehnya da-mi di ofishal dehn: Her son, hoo mi in chaaj a di ayrya eena di mongtin dehn da Eefrayim chraib teritori; 9 Deeker son, hoo mi in chaaj a Maykaz, Shayalbim, Bet-sheemesh, an Eelon-bet-haynan; 10 Heesed son, hoo mi in chaaj a Arobot (hihn mi ga atariti oava Soako ahn di hoal a Heefer); 11 Abinadab son, hoo mi in chaaj a di ayrya eena di hil dehn da Dor (Abinadab son mi marid tu Salaman daata Tayfat); 12 Ahailod son Bayana mi in chaaj a Tayanak, Megido, ahn di hoal a Bet-sheeyan, weh deh saida Zaretan ahn rait anda Jezriyel. Ih mi aalso in chaaj a di ayrya fahn Bet-sheeyan tu Aybl-mehoala ahn tu di ayrya rong Jokmiyam; 13 Geeber son mi in chaaj a Raymot-gilyad (hihn mi ga atariti oava di lee vilij dehn da Gilyad weh bilangz tu Manaaseh son Jayir, an ih mi ga atariti oava Argob teritori weh deh da Bayshan, an Argob mi ga 60 big siti wid waal ahn gayt weh lak wid kapa baar); 14 Ido son Ahinadab mi in chaaj a Mahanayim; 15 Ahimaaz mi in chaaj a Naftalai chraib teritori (hihn mi geh marid tu Salaman daata Basimat); 16 Hooshai son Bayana mi in chaaj a Asher chraib teritori ahn Biyaylot; 17 Paroowa son Jehoshafat mi in chaaj a Isakar chraib teritori; 18 Eela son Shimiyai mi in chaaj a Benjamin chraib teritori; 19 Yoorai son Geeber mi in chaaj a Gilyad, weh bilangz tu Saihon di king a di Amorait dehn an Og di king a Bayshan. Ahn wan ofishal mi in chaaj a di 12 ofishal dehn eena di lan.
20 Da mi soh moch peepl eena Jooda an Izrel dat dehn da-mi laik di san pahn di seesaid; dehn mi-di eet ahn jrink ahn liv wahn hapi laif.
21 Salaman mi rool oava aala di kingdom dehn fahn di Yoofraytis Riva tu di Filisteen dehn teritori ahn tu Eejip boada. Dehn mi pay taks ahn serv Salaman fi aal ih laif.
22 Evri day, Salaman palis mi get een 30 koar mezha* a fain fain flowa ahn 60 koar mezha a regyula flowa, 23 10 fat bul, 20 bul weh rayz eena paascha, 100 sheep, sohn dyaa, ahn sohn fat kookoo berd. 24 Hihn mi kanchroal evriting pahn di wes said a di Yoofraytis Riva, fahn Tifsa tu Gaza, eevn aala di king dehn pahn da said a di Riva; ahn hihn mi ga pees eena aala ih teritori dehn rong ahn. 25 Joorin da taim wen Salaman mi-di rool, aala di peepl fahn Jooda an Izrel mi-di liv eena pees. Aala dehn mi-di sidong anda dehn vain ahn fig chree, fahn Dan dong tu Beeyer-sheeba.
26 Ahn Salaman mi ga 4,000* staybl fi ih haas dehn weh pul ih chariyat, an ih mi ga 12,000 haas.*
27 Di ofishal dehn mi provaid food fi King Salaman ahn fi evribadi weh mi eet da Salaman taybl. An evri mont, wan ofishal mi rispansabl fi mek shoar dat di palis neva shaat a notn. 28 Pahn tap a dat, eech a di ofishal dehn mi ga di rispansabiliti fi mek shoar dat di haas dehn ahn di haas weh pul di chariyat mi geh di baarli ahn di schraa weh dehn need.
29 Ahn Gaad mi gi Salaman wahn lata wizdom an andastandin, an ih mi help ahn fi andastan wahn lata tingz. 30 Salaman mi ga way moa wizdom dan aala di peepl fahn di Ees an aala di Ijipshan dehn. 31 Hihn mi ga way moa wizdom dan enibadi els. Ih mi waiza dan Eetan, hoo da Zeera disendant, ahn Heeman. An ih mi waiza dan Mayhol son dehn, Kalkol ahn Darda; an aala di nayshan dehn rong hihn mi hyaa bowt ahn. 32 Hihn mi rait 3,000 praverb ahn 1,005 sang. 33 Hihn wuda taak bowt aal kaina chree, fahn di seeda chree da Lebanon dong tu di hisop plaant* weh groa pahn waal. An ih wuda taak bowt di animalz, di berdz, di reptailz, di insek dehn, ahn fish tu. 34 Peepl fan aala di nayshan dehn, eevn di king dehn fahn aal rong di werl weh mi hyaa bowt fi hihn wizdom mi kohn fi lisn tu how waiz Salaman mi waiz.