Praverbz
12 Di persn weh lov karekshan lov nalij,
Bot nobadi ku reezn wid wahn persn weh hayt karekshan.*
2 Jehoava hapi wid wahn persn weh du gud tingz,
Bot ih seh dat sombadi weh plan fi du wikid tingz da wahn gilti persn.
3 Wahn persn kyaahn ga sokses wen ih praktis wikid tingz,
Bot wahn raichos persn wahn bee laik wahn chree weh nobadi ku root owt.
4 Wahn gud waif da laik wahn krong fi ih hozban,
Bot wahn waif weh bring shaym pan ih hozban da laik wahn dizeez weh mek ih hozban boan dehn ratn.
5 Raichos peepl tink bowt weh rait,
Bot wahn wikid persn gi gaidans weh chriki.
6 Di werdz weh wahn wikid persn seh da laik wahn enimi weh di laywayt sombadi fi atak ahn an kil ahn.
Bot di tingz weh kom owta wahn raichos persn mowt da wahn protekshan fahn daynja.
7 Wen wikid peepl geh dischrai, dehn noh wahn egzis nohmoh,
Bot di raichos persn hows wahn kantinyu fi stan op.
8 Peepl prayz wahn persn weh taak eena wahn waiz way,
Bot dehn hayt wahn persn weh ga wahn krukid haat.
9 Ih beta fi bee wahn aadineri persn weh onli ga wan servant
Dan fi bee wahn persn weh boas bowt ihself bot noh ga notn fi eet.*
10 Raichos peepl tek kayr a dehn animalz,
Bot eevn wen wikid peepl tink dat dehn di shoa mersi, dehn stil kruwil.
11 Di persn weh tek kayr a ih lan wahn get inof food,
Bot wahn persn weh goh afta wertles tingz noh ga gud sens.
12 Di wikid persn waahn di tingz weh ada wikid peepl teef,
Bot raichos peepl da laik wahn chree weh ga schrang root ahn weh byaa froot.
13 Di tingz weh wahn wikid persn seh da laik wahn chrap far ahn,
Bot di raichos persn wahn get weh fahn sofarin.
14 Di tingz weh wahn man seh ku mek tingz goh gud far ahn,
An ih wahn geh wahn riwaad bikaaz a di tingz weh ih du.
15 Wahn foolish persn tink dat ih aalwayz rait,
Bot wahn waiz persn aksep advais.*
16 Wahn waiz persn ignoar wen peepl insolt ahn,
Bot wahn foolish persn geh beks rait away,* an ih shoa it.
17 Wahn aanis persn wahn tel di chroot,
Bot wahn faals witnis wahn seh tingz weh chrik adaz.
18 Di werdz weh wahn persn seh widowt tink da laik wahn stab fahn wahn soad,
Bot di tingz weh waiz peepl seh mek adaz feel beta.
19 Di aanis tingz weh wahn persn seh wahn laas fareva,
Bot eniting weh da wahn lai noh wahn laas fareva.
20 Peepl weh plan fi du mischif ga chriki tingz eena dehn haat,
Bot dehn wan weh promoat pees ga lata jai.
21 Notn bad wahn hapm tu raichos peepl,
Bot wikid peepl wahn sofa bad tingz.
22 Jehoava hayt wahn persn weh tel lai,
Bot hihn hapi wid wahn aanis persn.
23 Wahn waiz persn noh seh evriting weh ih noa bowt sohnting,
Bot wahn foolish persn noh hoal bak fahn seh naansens.
24 Di persn weh werk haad wahn rool,
Bot sombadi weh layzi wahn bee wahn slayv.
25 Di tingz weh wahn persn wori bowt mek ih haat feel hevi,*
Bot di gud tingz weh wahn persn seh mek ih haat feel hapi agen.
26 Di raichos persn saach owt ih lan fi ih animal dehn,
Bot di wikid persn waak pahn di road weh mek ih schray weh.
27 Wahn layzi persn noh gwehn goh hont wahn animal fi food,
Bot wahn persn weh werk haad da wahn preshos chrezha.
28 Di road weh raichos peepl waak pan leed tu laif,
Ahn nobadi noh wahn ded pahn da road.