Dyooteronomi

12 “Dehndeh da di roolz ahn laa dehn weh unu fi mek shoar dat unu obay fi az lang az unu liv eena di lan weh Jehoava di Gaad a unu ansesta dehn di giv unu fi kanka. 2 Wen unu jraiv owt di nayshan dehn ahn tek dehn lan, unu fi mek shoar dat unu dischrai aala di plays dehn wehpaat dehn mi wership dehn gaadz, weda da mi pahn wahn hai mongtin, wahn hil, er anda wahn big chree. 3 Unu fi pul dong aala dehn alta, brok op di stoan dehn weh dehn yooz fi wership, bon op di poal dehn weh dehn yooz fi wership, kot dong aala di imij a dehn gaadz, an afta dat peepl noh wahn memba dehn naym nohmoh.

4 “Unu noh fi wership Jehoava unu Gaad di saym way dehn mi wership fi dehn gaadz. 5 Jehoava wahn chooz wahn plays fahn monks di lan weh bilangz tu unu chraib dehn, an ih wahn chooz wahn plays fi bring gloari tu ih naym. Unu fi goh da da plays ahn wership ahn. 6 Dat da wehpaat unu fi kehr unu bon aafrin* dehn, unu sakrifais dehn, unu ten persent,* unu vow aafrin dehn, eni aafrin weh unu waahn aafa op, di fersbaan a unu animal dehn, an eniting els weh unu waahn giv. 7 Unu an evribadi weh liv wid unu fi eet deh fronta Jehoava unu Gaad ahn bee hapi fi evriting weh unu don du, bikaaz Jehoava unu Gaad bles unu.

8 “Unu noh fi wership Gaad eena unu oan way nohmoh. Dat da weh unu di du rait now, 9 bikaaz unu noh ga wahn plays fi liv yet an unu noh geh di lan weh Jehoava unu Gaad di giv unu. 10 Wen unu kraas di Jaadn Riva an unu liv eena di lan weh Jehoava unu Gaad di giv unu fi kanka, fi shoar ih wahn protek unu fahn unu enimi dehn, an unu wahn feel sayf di liv deh. 11 Unu wahn bring evriting weh Ah di koman unu fi bring da di plays weh Jehoava unu Gaad chooz fi mek unu wership ahn. Unu wahn bring unu bon aafrin dehn, unu sakrifais dehn, unu ten persent, evri vow aafrin weh unu vow fi gi Jehoava, an eniting els weh unu waahn giv. 12 Unu, unu son dehn, unu daata dehn, unu mayl ahn feemayl slayv dehn, ahn di Leevait dehn weh di liv eena unu siti weh noh geh no shayr er inheritans fi bee hapi fronta Jehoava unu Gaad. 13 Unu fi mek shoar dat unu noh aafa op unu bon aafrin dehn eena eni ada plays wehpaat unu waahn aafa dehn op. 14 Unu onli fi aafa op unu bon aafrin dehn da di plays weh Jehoava mi chooz eena wan a unu chraib dehn lan. Ahn da rait deh unu fi du evriting weh Ah di koman unu fi du.

15 “Weneva unu waahn eet meet, unu ku kil wan a unu animal an eet it. Unu ku du dat eena eni wan a unu siti dehn an injai di blesin weh Jehoava unu Gaad giv unu. Wahn persn weh noh kleen ahn wahn persn weh kleen ku eet it, jos laik how unu wuda eet wahn gazel er wahn dyaa. 16 Bot unu noh fi eet di blod fahn dehndeh animal. Unu fi poar it owt pahn di grong laik waata. 17 Ahn wail unu deh eena unu siti dehn, unu noh fi eet di ten persent a unu grayn, unu nyoo wain, unu ail, di fersbaan a unu animal dehn, eni vow aafrin weh unu vow fi aafa op, eni aafrin weh unu waahn aafa op, er eniting els weh unu waahn giv. 18 Bot unu, unu son dehn, unu daata dehn, unu mayl ahn feemayl servant dehn, ahn di Leevait dehn weh deh eena unu siti dehn fi eet dehndeh tingz fronta Jehoava unu Gaad da di plays weh Jehoava unu Gaad wahn chooz. Unu fi bee hapi fronta Jehoava unu Gaad eena evriting weh unu du. 19 Az lang az unu di liv eena unu lan, unu fi mek shoar dat unu noh ferget di Leevait dehn.

20 “Wen Jehoava unu Gaad giv unu moa lan, jos laik weh ih pramis unu, an if unu feel laik eet meet, den unu wahn eet meet weneva unu waahnt. 21 If di plays weh Jehoava unu Gaad chooz fi bring gloari tu ih naym deh faar fahn unu, den unu fi kil som a unu animal dehn weh Jehoava giv unu, jos laik weh Ah mi koman unu fi du, an unu fi eet it da unu siti dehn weneva unu waahnt. 22 Unu fi eet it laik how unu wuda eet di gazel ahn di dyaa. Wahn kleen persn ahn wahn persn weh noh kleen ku eet it. 23 Unu fi mek op unu main noh fi eet blod, bikaaz di blod da di laif.* Soh unu noh fi eet meet if blod deh een deh. 24 Unu noh fi eet it. Unu fi poar it owt pahn di grong laik waata. 25 Unu noh fi eet it, soh dat tingz ku goh gud fi unu ahn fi unu pikni dehn, bikaaz unu wahn di du tingz weh Jehoava si az gud. 26 Unu onli fi kehr di hoali tingz weh bilangz tu unu lang wid unu vow aafrin dehn wen unu goh da di plays weh Jehoava wahn chooz. 27 Rait deh unu wahn aafa op di meet ahn di blod az unu bon aafrin pahn di alta weh bilangz tu Jehoava unu Gaad. An unu fi poar owt di blod fahn unu sakrifais dehn saida di alta weh bilangz tu Jehoava unu Gaad, an unu ku eet di meet fahn unu sakrifais dehn.

28 “Unu fi mek shoar dat unu obay evriting weh Ah di tel unu fi du, soh dat tingz ku aalwayz goh gud fi unu ahn fi unu pikni dehn, bikaaz unu wahn di du tingz weh Jehoava unu Gaad si az gud ahn karek.

29 “Wen Jehoava unu Gaad dischrai aala di nayshan dehn weh unu wahn kanka an unu di liv eena fi dehn lan, 30 unu fi mek shoar dat unu noh du di saym ting dehn mi du. Unu noh fi eevn aks bowt how di nayshan dehn yoostu wership dehn gaadz, soh dat unu noh en op di du di saym ting tu. 31 Unu noh fi wership Jehoava unu Gaad eena da way, bikaaz wen dehndeh nayshan wership dehn gaadz, dehn du aala kaina disgostin tingz weh Jehoava hayt. Dehn eevn bon dehn son ahn dehn daata eena faiya az wahn sakrifais tu dehn gaadz. 32 Unu fi mek shoar dat unu obay evriting weh Ah di koman unu fi du. Unu noh fi ad aan notn tu it ner tek weh notn fan it.