Dyooteronomi

30 “Wen Jehoava unu Gaad skyata unu monks di nayshan dehn an unu memba di blesin ahn di kers weh Ah mi tel unu bowt ahn dehndeh tingz hapm tu unu, 2 an unu an unu pikni dehn goh bak tu Jehoava unu Gaad ahn lisn tu ahn wid aala unu haat ahn soal an obay evriting weh Ah di tel unu fi du tudeh, 3 den Jehoava unu Gaad wahn shoa unu mersi, an ih wahn bring unu bak fahn di plays dehn weh ih mi sen unu tu, wehpaat unu da-mi priznaz. Ahn Jehoava unu Gaad wahn bring unu bak tugeda. 4 Jehoava unu Gaad wahn gyada unu ahn bring unu bak, eevn if unu deh da di en a di ert. 5 Jehoava unu Gaad wahn bring unu da di lan weh unu ansestaz mi kanka, an unu wahn liv deh. Hihn wahn mek tingz goh gud fi unu, an unu wahn ga wahn lat moa pikni dan unu ansestaz. 6 Jehoava unu Gaad wahn mek unu an unu disendant dehn ga wahn kleen haat, soh dat unu wahn lov Jehoava unu Gaad wid aala unu haat ahn wid aala unu soal ahn soh dat unu ku kantinyu liv. 7 Den Jehoava unu Gaad wahn mek aala dehndeh kers kohn pahn unu enimi dehn weh mi hayt unu ahn weh mi chreet unu bad.

8 “Den unu wahn lisn tu Jehoava agen, an unu wahn obay ih komanment dehn weh Ah di giv unu tudeh. 9 Jehoava unu Gaad wahn bles aala di werk unu du, an ih wahn mek unu ga lata pikni ahn lata animalz. An ih wahn mek lata food groa pahn unu lan. Jehoava wahn hapi wid unu agen an ih wahn mek tingz goh gud fi unu, jos laik how ih mi hapi wid unu ansestaz wen ih mi mek tingz gaahn gud fi dehn. 10 Aala dat wahn hapm tu unu bikaaz unu wahn lisn tu Jehoava unu Gaad an unu wahn obay ih komanment dehn an ih laa dehn weh deh eena dis buk a di Laa. An unu gwehn bak tu Jehoava ahn lisn tu ahn wid aala unu haat ahn wid aala unu soal.

11 “Dehnya komanment weh Ah di giv unu tudeh noh haad fi andastan ahn noh haad fi obay. 12 Dehn noh deh eena di skai soh dat unu haftu aks, ‘Hoo wahn goh op eena di skai ahn get it fi wi, soh dat wi ku hyaa it an obay it?’ 13 Ahn dehn noh deh pahn di ada said a di see needa, soh dat unu noh haftu aks, ‘Hoo wahn goh kraas di see ahn get it fi wi, soh dat wi ku hyaa it an obay it?’ 14 Gaad werd noh deh faar fahn unu. Ih deh eena unu oan mowt an ih deh eena unu oan haat, soh dat unu ku obay it.

15 “Tudeh Ah di mek unu chooz if unu waahn liv er ded. Unu eeda chooz gud er bad. 16 If unu lisn tu Jehoava unu Gaad an obay ih komanment dehn weh Ah di giv unu tudeh an if unu lov Jehoava unu Gaad, liv di way ih waahn unu liv, an unu kantinyu obay ih komanment dehn an ih laa dehn, den unu wahn liv an unu nayshan wahn geh biga, ahn Jehoava unu Gaad wahn bles unu eena di lan weh unu wahn kanka.

17 “Bot if unu stap obay Gaad an unu noh lisn tu ahn nohmoh, an unu goh ahn bow dong tu ada gaadz ahn wership dehn, 18 Ah di tel unu tudeh dat fi shoar unu wahn ded. Unu noh wahn liv lang eena di lan weh unu wahn kanka wen unu kraas di Jaadn Riva. 19 Tudeh Ah di mek unu chooz wahn blesin er wahn kers. Unu fi chooz if unu waahn liv er if unu waahn ded. An evribadi weh deh da hevn ahn pahn di ert wahn bee unu witnisiz ahn dehn wahn si weh unu chooz fi du. Soh unu an unu disendant dehn fi chooz laif soh dat unu ku kantinyu liv. 20 Unu fi lov Jehoava unu Gaad, lisn tu ahn, an stay faytful tu ahn, bikaaz da Jehoava giv unu laif ahn hihn wahn mek unu liv wahn lang taim eena di lan weh ih mi swayr fi giv tu Aybraham, Aizak, ahn Jaykob, hoo da unu ansestaz.”