Dyooteronomi

16 “Unu fi selibrayt di Paasoava eena di mont a Aybib* fi aana Jehoava unu Gaad. Da mont impoatant bikaaz Jehoava unu Gaad mi bring unu owta Eejip joorin da mont eena di nait. 2 Unu fi aafa op wahn sheep, wahn goat, er wahn kow tu Jehoava unu Gaad wen unu di selibrayt di Paasoava. Unu fi du dat da wahn plays weh Jehoava chooz fi mek unu wership ahn. 3 Afta dat unu fi eet di meet fahn di animal lang wid sohn bred weh noh gat een ees. Unu noh fi eet notn weh gat een ees fi sevn dayz. Unu onli ku eet bred weh noh gat een ees jos laik weh unu mi du wen unu mi hori lef Eejip. Wen unu du dat unu wahn memba humoch unu mi sofa, an unu noh wahn ferget how Gaad mi sayv unu fahn Eejip. 4 Fi sevn dayz nobadi eena di hoal lan fi ga ees wid dehn.* Ahn wen unu aafa op di meet fahn di animal eena di eevnin pahn di fers day, unu fi mek shoar dat no meet lefoava fi di neks day. 5 Wen unu di selibrayt di Paasoava, unu kyaahn jos chooz eni a di siti dehn weh Jehoava unu Gaad giv unu fi aafa op di animal. 6 Bot unu fi aafa op di animal da wahn plays weh Jehoava unu Gaad chooz fi mek unu wership ahn. Unu fi sakrifais di animal fi di Paasoava eena di eevnin afta di son goh dong, pahn di saym day wen unu mi kom owta Eejip. 7 Unu fi kuk di meet fahn di animal an eet it da di plays weh Jehoava unu Gaad wahn chooz. An eena di maanin unu ku goh bak da unu tent. 8 Fi siks dayz unu noh fi eet no bred weh gat een ees, ahn pahn di sevent day unu fi gyada tugeda fi wership Jehoava unu Gaad. Unu noh fi du no kaina werk pahn da day.

9 “Unu fi staat konk sevn weeks fahn di taim unu mi fers kot aala di grayn eena unu lan. 10 Den unu fi selibrayt di Haavis Festival fi wership Jehoava unu Gaad, an unu fi bring di aafrin dehn weh unu waahn giv, bays pahn humoch Jehoava unu Gaad bles unu. 11 An unu, unu son dehn, unu daata dehn, unu mayl ahn feemayl slayv, di Leevait dehn weh di liv eena unu siti dehn, di farina dehn, di pikni dehn weh noh ga no pa,* ahn di wido dehn weh di liv monks unu fi bee hapi fronta Jehoava da wahn plays weh Jehoava unu Gaad chooz fi mek unu wership ahn. 12 Memba dat unu da-mi slayv da Eejip, soh unu fi obay aala dehndeh roolz.

13 “Wen unu gyada op aala di grayn fahn di plays wehpaat dehn beet owt grayn ahn wen unu gyada op aala unu wain an ail fahn di plays wehpaat unu mek dehn, unu fi selibrayt di Tach Shed Festival* fi sevn dayz. 14 Unu, unu son dehn, unu daata dehn, unu mayl ahn feemayl slayv dehn, di Leevait dehn, di farina dehn, di pikni dehn weh noh ga no pa, ahn di wido dehn weh di liv eena unu siti dehn fi bee hapi wen unu di selibrayt di festival. 15 Fi sevn dayz unu fi selibrayt di festival fi wership Jehoava unu Gaad da di plays weh Jehoava chooz. Jehoava unu Gaad wahn bles evriting weh groa pahn unu lan an evriting weh unu du, an unu wahn bee ful op a jai.

16 “Chree taimz a yaa, aala di man dehn fi goh fronta Jehoava da di plays weh hihn chooz. Dehn fi goh da di Festival a Bred Widowt Ees, di Haavis Festival, ahn di Tach Shed Festival. Ahn wen dehn goh fronta Jehoava, dehn fi kehr sohnting wid dehn. 17 Eech wan a unu fi bring wahn gif bays pahn humoch Jehoava unu Gaad bles unu.

18 “Unu fi chooz sohn peepl fi bee joj ahn sohn peepl fi bee in chaaj a eech chraib eena di siti dehn weh Jehoava unu Gaad di giv unu. Ahn dehn wahn joj unu eena wahn raichos way. 19 Unu fi mek shoar dat evribadi geh jostis, an unu fi chreet evribadi di saym way. Unu noh fi aksep wahn braib, bikaaz wahn braib ku mek wahn waiz persn stap si tingz eena wahn klyaa way an ih ku mek wahn raichos persn chaynj ih disizhan. 20 Unu fi kantinyu chreet evribadi eena wahn fyaa way, soh dat unu ku kantinyu liv ahn soh dat unu ku kanka di lan weh Jehoava unu Gaad di giv unu.

21 “Unu noh fi plaant eni kaina chree ahn yooz it az wahn poal fi wership. Unu noh fi du dat kloas tu di alta weh unu mi mek fi Jehoava unu Gaad.

22 “An unu noh fi set op eni stoan fi yooz az sohnting fi wership, bikaaz Jehoava unu Gaad hayt dat.