1 Timoti

2 Fers, Ah waahn inkorij aala unu fi pray fi aal kaina peepl. Wen unu pray, bayg Gaad fi help ahn tel ahn tanks. 2 Pray fi di king dehn an aala dehn peepl weh deh eena hai pozishan,* soh dat wi ku kantinyu fi liv wahn kaam ahn peesful laif ahn bee seeryos di serv Gaad wid aala wi haat. 3 Eena di sait a wi Gaad ahn Sayvya, dat da sohnting gud ahn dat pleez hihn. 4 Ahn da fi hihn wil dat aal kaina peepl geh sayv ahn geh di karek andastandin a di chroot. 5 Onli wan Gaad deh, an onli wan helpa deh fi di kovenant* weh Gaad ahn peepl mek, ahn da man da Krais Jeezas. 6 Hihn mi giv op ih laif fi pay di ransom* prais soh dat evribadi* ku bee free fahn sin. Peepl wahn taak bowt dat wen di rait taim kom. 7 Dat da di reezn wai Gaad mi apoint mi fi preech ahn bee wahn apasl, soh dat Ah ku teech peepl fahn di nayshanz bowt fayt ahn chroot. Ah di tel di chroot; Ah noh di tel lai.

8 Soh den, Ah waahn aala di laayal man dehn kantinyu fi pray evriway* unu meet tugeda. Dehn noh fi geh beks ner aagyu. 9 Saym way soh, di uman dehn fi jres eena wahn rispektabl way weh deesent ahn sensabl,* kaaz dat da weh mek dehn byootiful. Dehn noh fi di yooz big fansi hyaa stail, er goal, er perl, er ekspensiv kloaz. 10 Bot di rait way fi di uman dehn shoa dat dehn di serv Gaad da bai di gud tingz weh dehn du.

11 Di uman dehn fi kip kwaiyet* ahn bee wilin fi lisn wen di man dehn di teech. 12 Ah noh alow wahn uman fi teech er ga atariti oava wahn man, bot shee fi kip kwaiyet.* 13 Kaaz Gaad mek Adam fers, den Eev. 14 Pahn tap a dat, di Devl neva chrik Adam, bot hihn mi chrik di uman, ahn shee mi en op di sin. 15 Bot, di uman dehn wahn di protek* dehnself if dehn stay bizi di tek kayr a dehn pikni, az lang az dehn kantinyu fi shoa fayt ahn lov, ahn bee hoali ahn sensabl.*