2 Timoti

3 Bot Ah waahn yu noa dat di laas dayz wahn bee daynjaros ahn laif wahn bee haad, 2 bikaaz peepl wahn lov dehnself ahn lov moni. Dehn wahn boasi ahn prowd. Dehn wahn insolt op Gaad ahn wan anada. Dehn noh wahn obay dehn payrents, dehn noh wahn bee tankful, ahn dehn noh wahn bee laayal. 3 Dehn noh wahn ga no afekshan fi wan anada. Dehn noh wahn bee wilin fi get lang wid wan anada. Dehn wahn slanda eech ada, ahn dehn noh wahn ga no self-kanchroal. Dehn wahn bihayv laik wail animal, ahn dehn wahn hayt evriting weh gud. 4 Dehn wahn bichray wan anada. Dehn wahn stobant an onli waahn du dehn oan ting. Dehn wahn tink tu moch a dehnself, ahn dehn wahn lov plezha insteda lov Gaad. 5 Dehn wahn play laik dehn di wership Gaad wid aala dehn haat, bot dehn noh wahn liv dehn laif akaadn tu weh dehn seh dehn bileev. Noh ga notn fi du wid peepl laik dehndeh. 6 Ahn fahn monks peepl laik dehndeh sohn man weh chriki goh eena ada peepl hows ahn chrik di uman dehn weh week ahn weh berdn dong wid dehn oan sin ahn hoo deh anda di kanchroal a aal kaina dizaiyaz. 7 Dehn laydi aalwayz di laan, bot dehn ku neva geh di karek andastandin a di chroot.

8 Jos laik how Janeez ahn Jambreez mi gaahn gens Moaziz, da rait soh dehn peepl goh gens di chroot. Dehn kaina peepl korop eena dehn main. Gaad noh pleez wid dehn bikaaz dehn noh di liv akaadn tu di fayt. 9 Bot dehn noh wahn mek no hedway, bikaaz evribadi wahn ku si dat dehn foolish, jos laik Janeez ahn Jambreez. 10 Bot yoo aalwayz pay kloas atenshan tu mi teechin, di way how Ah liv mi laif, mi perpos, mi fayt, mi payshens, mi lov, ahn di way how Ah bayr op chroo chraiyalz. 11 Ahn yu noa bowt di persikyooshan ahn sofarin weh Ah mi gaahn chroo da Antiyak, Aikoanyom, ahn Lischra. Ah mi bayr op chroo aala dehndeh persikyooshan, ahn di Laad mi reskyu mi fahn aala dehn. 12 In fak, evribadi weh waahn wership Gaad wid aala dehn haat az wahn disaipl a Krais Jeezas wahn fays persikyooshan. 13 Bot peepl weh wikid ahn di hipokrit dehn wahn goh fahn bad tu wers. Dehn wahn chrik peepl, ahn peepl wahn chrik dehn tu.

14 Bot yu mos kantinyu fala aala di tingz weh yu mi laan ahn weh yoo bileev da di chroot, bikaaz yu noa da fahn hoo yu mi laan dehn tingz, 15 ahn yu noa di hoali raitin dehn fahn yu smaal. Di wizdom weh yu geh fahn di hoali raitin dehn wahn gi yu salvayshan bikaaz a di fayt weh yu gat eena Krais Jeezas. 16 Evriting weh deh eena di Skripchaz kohn fahn Gaad an ih gud fi teech wi, fi karek wi, fi set tingz schrayt, ahn fi disiplin wi akaadn tu Gaad raichos standadz, 17 soh dat enibadi weh wership Gaad wahn bee redi ahn wilin fi du evri gud werk.