Dyooteronomi
10 “Joorin da taim Jehoava mi tel mi, ‘Kot owt too flat stoan jos laik di fers too flat stoan weh Ah mi gi yu, ahn mek wahn baks* owta wud. Den kohn meet mi pahn di mongtin. 2 An Ah wahn rait di saym ting laik weh Ah mi rait pahn di too flat stoan weh yu mi brok eena peesiz, ahn yu fi put dehndeh flat stoan eena di baks. 3 Soh Ah mi mek wahn baks owta akaysha wud, an Ah mi kot owt too flat stoan jos laik di too flat stoan weh Ah mi mek. Den Ah gaan op di mongtin wid dehndeh stoan eena mi han. 4 Den Jehoava mi rait dong di Ten Komanment* pahn di too flat stoan laik weh ih mi du bifoa. Dehndeh da di saym komanment weh ih mi tel unu wen ih taak tu unu fahn owta di faiya pahn tap a di mongtin, pahn di day wen unu mi gyada tugeda. Den Jehoava mi gi mi di too flat stoan dehn. 5 Den Ah gaahn dong di mongtin an Ah put di too flat stoan eena di baks weh Ah mi mek, jos laik weh Jehoava mi koman mi fi du, ahn da rait deh dehn mi stay.
6 “Den di Izrelait dehn lef fahn Biyerot Bene-jayakan ahn dehn gaahn da Moseera. Da rait deh Ayron ded, ahn dehn beri ahn deh tu. An ih son Eliyayza mi tek fi hihn plays an ih staat serv az prees. 7 Afta dat dehn lef fahn wehpaat dehn mi deh ahn dehn gaahn da Godgoda. Den dehn lef fahn Godgoda ahn dehn gaahn da Jotbata, wehpaat lata waata mi deh.*
8 “Joorin da taim, Jehoava mi chooz Leevai chraib fi bak di aak a Jehoava kovenant.* Dehn stan op fronta Jehoava fi serv ahn, an dehn bles peepl eena fi hihn naym, laik weh dehn du tudeh. 9 Dat da wai Leevai chraib neva geh no shayr er inheritans laik di ada chraib dehn. Jehoava da dehn inheritans, jos laik weh Jehoava unu Gaad mi tel dehn. 10 Ahn fi 40 dayz ahn 40 naits, Ah mi stay pahn di mongtin laik weh Ah mi du bifoa. Ahn joorin da taim Jehoava mi lisn tu mi agen. Ahn Jehoava mi disaid dat ih neva mi wahn dischrai unu. 11 Den Jehoava tel mi, ‘Geh redi fi lef fahn wehpaat yu deh, ahn leed di peepl soh dat dehn ku goh kanka di lan weh Ah mi swayr tu dehn ansestaz dat Ah mi wahn gi dehn.’
12 “Oa Izrel, weh Jehoava unu Gaad di aks unu fi du? Jehoava unu Gaad onli di aks unu fi ga lata rispek far ahn, fi du weh hihn waahnt, ahn fi lov ahn. Jehoava unu Gaad onli di aks unu fi wership ahn wid aala unu haat an aala unu soal. 13 Ahn Jehoava di aks unu fi obay ih komanment dehn an ih laa dehn weh Ah di giv unu tudeh. If unu du aala dat, den tingz gwehn gud fi unu. 14 Di skai, yes, di hoal skai bilangz tu Jehoava unu Gaad, ahn di ert lang wid evriting weh deh pan it bilangz tu ahn tu. 15 Bot di onli peepl weh Jehoava mi jraa kloas tu da-mi unu ansestaz, an ih mi lov dehn an ih mi chooz fi dehn disendant dehn. Yes, laik weh unu si tudeh, ih chooz unu fahn monks aala di peepl. 16 Unu fi mek unu haat bee kleen ahn stap bee stobant. 17 Jehoava unu Gaad da Gaad oava aala di ada gaad dehn ahn laad oava aala di ada laad dehn. Hihn da wahn amayzin Gaad weh powaful ahn schrang. Hihn chreet evribadi di saym way an ih noh aksep wahn braib. 18 Hihn mek shoar dat peepl chreet di wido dehn ahn di pikni dehn weh noh ga no pa eena wahn fyaa way. Hihn lov di farina dehn, an ih gi dehn food ahn kloaz. 19 Unu da-mi farinaz da Eejip, soh unu fi lov di farina dehn weh di liv monks unu tu.
20 “Unu fi shoa lata rispek tu Jehoava unu Gaad ahn wership ahn. Unu fi stay kloas tu ahn an yooz fi hihn naym wen unu di swayr fi du sohnting. 21 Hihn da di wan weh unu fi prayz. Hihn da unu Gaad, an unu mi si aala di amayzin ahn powaful tingz weh ih don du fi unu. 22 Wen unu ansesta dehn gaahn da Eejip, da mi 70 a dehn* in aal. Ahn Jehoava mek unu bee soh moch peepl, dat unu da laik di staar dehn eena di skai.