Look
10 Afta dis, di Laad chooz 70 ada disaipl ahn sen dehn owt too bai too heda hihn intu evri siti ahn vilij weh hihn mi gwehn. 2 Den ih tel dehn: “Lata werk deh fi du eena di haavis, bot wi onli ga lee bit a werkaz. Soh den, unu haftu bayg di Maasta a di haavis fi sen owt moa werkaz intu fi hihn haavis. 3 Soh unu goh, bot bee kyaaful! Kaaz Ah di sen unu owt laik sheep monks wulf. 4 Noh kehr moni, wahn bag, ner sandalz, ahn noh hayl nobadi weh unu meet pahn di road needa. 5 Ahn wen unu goh eena wahn hows, greet evribadi weh deh een deh ahn wish dehn pees. 6 An if wahn peesful persn noh dehdeh, da pees wahn stay wid unu. Bot if wahn peesful persn dehdeh, da pees wahn stay wid hihn. 7 Soh stay eena da hows; eet ahn jrink weh dehn gi unu, kaaz evri werka dizerv ih pay. Noh goh fahn wan hows tu di neks.
8 “Aalso, weneva unu goh eena wahn siti weh welkom unu, eet weh dehn giv unu fi eet 9 ahn kyoar di sik peepl weh dehdeh ahn tel dehn: ‘Di Kingdom a Gaad deh kloas.’ 10 Bot if unu goh eena wahn siti ahn dehn noh welkom unu, goh pahn di mayn schreet dehn ahn seh: 11 ‘Wee di waip aaf eevn di dos weh stik tu wi fut dehn fahn unu siti. Bot, noh ferget dis, di Kingdom a Gaad deh kloas kloas.’ 12 Fi tel unu di chroot, ih wahn bee eeziya fi Sadam pahn Jojment Day dan fi da siti deh.
13 “Ih wahn bee chrobl fi unu peepl a Korayzin! An ih wahn bee chrobl fi unu peepl a Betsayda! Kaaz if di peepl a Taiya ahn Saidan mi si aala di miraklz weh unu mi si, dehn wuda mi ripent lang taim; dehn wuda mi put aan sak klaat* ahn sidong eena ashiz. 14 Soh den, ih wahn bee eeziya fi di peepl a Taiya ahn Saidan pahn Jojment Day dan fi unu. 15 An az fi unu weh deh eena Kapernyam, unu tink Gaad wahn lif unu op tu hevn? Non ataal! Hihn wahn kehr unu schrayt dong tu di Grayv!*
16 “Hooeva lisn tu unu di lisn tu mee. Ahn hooeva rijek unu di rijek mee tu. Bot, noh onli dat, hooeva rijek mee di rijek di Wan weh sen mee.”
17 Den di 70 disaipl kohn bak ahn dehn mi hapi; dehn tel Jeezas: “Laad, eevn di deemon dehn mi obay wi wen wi yooz yu naym.” 18 Wid dat, Jeezas seh: “Ah don si Saytan jrap fahn hevn laik laitnin. 19 Ai giv unu di atariti fi chrampl snayk ahn skyaapyan anda unu fut, ahn di schrent fi win di vikchri oava di enimi, ahn notn wahn hert unu. 20 Soh noh bee hapi jos bikaaz di deemon dehn mi obay unu, bot bee hapi bikaaz Gaad don rait unu naym eena hevn.” 21 Da saym taim deh, Gaad gi Jeezas fi hihn hoali spirit, ahn Jeezas staat tu rijais ahn seh: “Faada, Laad a hevn an ert, Ai di prayz yu fronta evribadi, kaaz yu haid dehnya tingz fahn di ejukaytid ahn waiz peepl, bot yu shoa dehn tu di hombl peepl weh da laik smaal chiljren. Yes, Oa Faada, bikaaz dis da di way yoo mi waahn mek ih bee.” 22 Den Jeezas seh: “Mai Faada han oava evriting tu mee, ahn nobadi noa di Son eksep di Faada, ahn nobadi noa di Faada gud eksep di Son. Ahn nobadi noa di Faada anles di Son wilin fi teech dehn bowt hihn.”
23 Wen hihn an ih disaipl dehn mi deh bai dehnself, ih tel dehn: “Di peepl weh si weh unu di si wahn bee hapi. 24 Kaaz Ai di tel unu, lata prafit ahn kingz wuda mi waahn si di tingz weh unu di si bot dehn neva geh fi si dehn, ahn dehn wuda mi waahn hyaa di tingz weh unu di hyaa bot dehn neva did geh fi hyaa dehn.”
25 Den wahn teecha a di Laa stan op fi tes ahn; ih seh: “Teecha, da weh Ah need fi du fi geh* evalastin laif?” 26 Jeezas tel ahn: “Weh yoo andastan fahn weh yu reed fahn di Laa?” 27 Di teecha tel ahn: “‘Yu fi lov Jehoava yu Gaad wid yu hoal haat ahn wid yu hoal soal* ahn wid yu hoal schrent ahn wid yu hoal main’ ahn ‘yu fi lov yu nayba jos laik how yu lov yuself.’” 28 Soh Jeezas tel ahn: “Yu karek; kip aan di du dat ahn yu wahn geh evalastin laif.”
29 Bot now hihn mi waahn shoa dat hihn raichos, soh ih aks Jeezas: “Hoo reeli da mai nayba?” 30 Soh Jeezas ansa ahn wid wahn stoari: “Wahn day, wahn man fahn Jeroosalem mi-di chravl tu Jeriko, ahn sohn teef tek weh evriting fan ahn, inkloodin di kloaz weh ih mi gat aan. Dehn beet ahn op bad ahn lef ahn pahn di road haaf-ded. 31 Now ih hapm dat wahn prees mi-di chravl da saym road tu, bot wen ih si di man, ih paas pahn di ada said a di road. 32 Wahn Leevait mi-di chravl di saym road tu, ahn wen hihn si di man, ih du di saym ting ahn paas pahn di ada said a di road. 33 Fainali, wahn Samaritan mi-di chravl pahn di saym road, ahn wen hihn si di man, ih haat gaan owt tu ahn. 34 Soh ih gaahn tu di man ahn kleen op ih kot ahn brooz dehn wid ail ahn wain, an ih put bandij pan ahn. Den ih put ahn pan ih dongki ahn kehr ahn tu wahn in ahn tek kayr a ahn. 35 Di neks day, ih gi di oana a di in too denayriyai ahn tel ahn: ‘Tek kayr a dis man fi mi, an if yu spen moa dan dis, Ah wahn pay yu di res wen Ah kohn bak.’ 36 Now tel mi, wich wan a dehnya man mi ak moa laik wahn nayba tu dis man weh di teef dehn beet op?” 37 Ih tel Jeezas: “Wel, di wan weh mi shoa ahn kompashan.”* Den Jeezas tel ahn: “Wel, yoo goh ahn du di saym ting tu.”
38 Jeezas an ih disaipl dehn kantinyu pahn dehn way. Den dehn stap da wahn sertn vilij weh dehn mi meet wahn uman weh naym Marta. Shee mi welkom Jeezas az wahn ges eena fi shee hows. 39 Marta mi ga wahn sista weh mi naym Mayri, ahn shee sidong bai di Laad fut ahn lisn tu weh hihn mi-di seh. 40 Bot Marta mi-di pripyaa op aal kaina tingz, ahn dehndeh tingz mi-di dischrak ahn. Soh shee gaahn tu Jeezas ahn seh: “Laad, yoo noh kay dat mi sista lef mee ya fi pripyaa op aala dehnya tingz aal bai miself? Pleez tel ahn fi kohn help mi noh?” 41 Soh di Laad tel ahn: “Marta, Marta, yu di wori bowt tu moch tingz. 42 Wi jos need wahn fyoo tingz; eevn if da jos wan ting, dat wuda bee inof. Yu si Mayri ya? Shee mi mek di rait chois;* ahn nobadi wahn eva tek dat weh fan ahn.”