Praverbz
28 Wikid peepl ron weh wen nobadi di chays dehn,
Bot raichos peepl brayv laik wahn laiyan.*
2 Wen peepl fahn wahn lan sin,* dehn wahn kip di chaynj dehn roola,
Bot wahn roola weh geh help fahn wahn man weh ga andastandin ahn nalij wahn rool fi wahn lang taim .
3 Wahn poa man weh chaans wahn nada poa persn
Da laik hevi rayn weh wash weh aala di food.
4 Peepl weh stap obay di laa prayz wahn wikid persn,
Bot peepl weh obay di laa wahn beks bad wid dehndeh peepl.
5 Wikid peepl kyaahn andastan jostis,
Bot peepl weh saach fi Jehoava ku andastan evriting.
6 Ih beta fi bee wahn poa persn weh faytful
Dan fi bee wahn rich persn weh liv wahn wikid laif.
7 Wahn son weh ga andastandin wahn obay di laa,
Bot wahn son weh kip kompni wid greedi peepl wahn shaym ih pa.
8 Sombadi ku geh moa richiz wen dehn chaaj adaz inchres ahn du tingz weh noh aanis,
Bot dehn richiz wahn en op di bee fi di persn weh shoa mersi tu poa peepl.
9 Gaad hayt wahn persn weh noh obay di laa,
An eevn da persn pryaaz disgostin tu ahn.
10 Sombadi weh mek wahn raichos persn du bad tingz wahn jrap eena di saym hoal weh ih dig,
Bot wahn inosent persn wahn inherit gud tingz.
11 Wahn rich persn tink ih waiz,
Bot wahn poa persn weh ga andastandin ku si di chroot bowt ahn.
12 Wen raichos peepl ga vikchri, dehn geh lata aana,
Bot wen wikid peepl geh powa, peepl haid fahn dehn.
13 Di persn weh haid ih sin dehn noh wahn ga sokses,
Bot di persn weh kanfes ahn stap sin wahn geh mersi.
14 Wahn persn wahn bee hapi wen ih aalwayz ga lata rispek fi Gaad,
Bot bad tingz wahn hapm tu wahn persn weh stobant.
15 Wahn wikid roola weh rool oava peepl weh kyaahn help dehnself
Da laik wahn laiyan weh di growl ahn laik wahn byaa weh redi fi atak.
16 Wahn leeda weh noh ga andastandin yooz ih powa eena di rang way,
Bot wahn persn wahn liv wahn lang laif if ih hayt mek moni eena wahn way weh noh aanis.
17 Wahn persn weh gilti sayka weh ih rispansabl fi sombadi det* wahn aalwayz deh pahn di ron til ih goh da ih grayv.
Noh mek nobadi help ahn.
18 Sombadi weh liv wahn kleen laif wahn geh sayv,
Bot bad tingz wahn hapm tu enibadi weh du wikid tingz.
19 Wahn persn weh tek kayr a ih lan wahn ga lata food fi eet,
Bot wahn persn weh goh afta wertles tingz wahn geh reeli poa.
20 Wahn faytful persn wahn geh lata blesin,
Bot di persn weh chrai geh rich faas noh wahn stay inosent.
21 Ih noh gud fi chreet wan persn beta dan adaz,
Bot wahn persn mait du sohnting rang fi geh wahn lee bit a food.
22 Sombadi weh jelos wahn nada persn* eega fi geh rich,
Bot dehn noh noa dat dehn wahn geh poa.
23 Di persn weh karek adaz wahn geh moa rispek
Dan di persn weh sweet taak adaz.
24 Sombadi weh teef fan ih ma an ih pa ahn seh, “Ih noh rang,”
Da fren wid peepl weh laik teef.
25 Wahn greedi persn* mek peepl goh gens wan anada,
Bot tingz gwehn gud fi wahn persn weh pen pahn Jehoava.
26 Wahn schupid persn chros eena ih oan haat,
Bot wahn persn weh ak eena wahn waiz way wahn geh sayv.
27 Sombadi weh shayr wid poa peepl wahn ga evriting weh dehn need,
Bot wahn persn weh noh help dehn wahn geh lata kers.
28 Wen wikid peepl geh powa, peepl haid fahn dehn,
Bot wen dehn ded, moa raichos peepl wahn deh.