Dyooteronomi

23 “If wahn man testiklz geh damij er dehn kot aaf ih praivit paat, den ih wahn kyaahn bee paat a Jehoava peepl.

2 “If wahn man ahn wahn laydi noh marid tu eech ada ahn dehn ga wahn pikni, den da pikni wahn kyaahn bee paat a Jehoava peepl. Eevn ih disendant dehn wahn kyaahn bee paat a Jehoava peepl.

3 “Wahn Amonait er wahn Moawabait kyaahn bee paat a Jehoava peepl. Nat eevn dehn disendant dehn ku bee paat a Jehoava peepl, 4 bikaaz wen unu mi lef Eejip dehn neva gaahn help unu wen unu mi need food ahn waata ahn bikaaz dehn mi pay Baylam fi kers unu. Baylam da Beeyor son, ahn hihn da fahn Peetor weh deh da Mesopotaymya. 5 Jehoava unu Gaad neva lisn tu Baylam. Bot Jehoava unu Gaad mi mek ih bles unu insteda kers unu, bikaaz Jehoava unu Gaad lov unu. 6 Fi az lang az unu liv, unu noh fi du notn fi help dehn liv wahn gud laif.

7 “Unu noh fi hayt di Eedomait dehn, bikaaz dehn da unu faamili.

“Unu mi liv az farinaz da Eejip, soh unu noh fi hayt di Ijipshan dehn. 8 Dehn grayt granpikni ku bee paat a Jehoava peepl.

9 “Wen unu set op unu kyamp fi fait gens unu enimi dehn, unu fi mek shoar dat unu stay weh fahn eniting weh bad.* 10 Wahn man kyaahn stay eena di kyamp if sperm kom owta ih praivit paat joorin di nait. Ih haftu goh owtsaida di kyamp an ih haftu stay deh, bikaaz ih noh kleen. 11 Bot wen eevnin kom ih fi bayd, ahn den ih ku goh bak eena di kyamp afta di son goh dong. 12 Unu fi chooz wahn plays* owtsaida di kyamp wehpaat unu fi goh wen unu waahn stool. 13 Unu fi mek shoar dat unu ga wahn smaal shovl wid unu, soh dat wen unu goh owtsaida di kyamp fi stool,* unu ku dig wahn hoal wid it ahn kova unu stool. 14 Jehoava unu Gaad deh monks unu eena unu kyamp fi sayv unu ahn mek unu kanka unu enimiz. Unu kyamp fi bee hoali, soh dat hihn noh si eniting weh wahn bring shaym pahn unu ahn stap deh wid unu.

15 “If wahn slayv get weh fahn ih maasta an ih goh tu unu, unu noh fi giv ahn bak tu ih maasta. 16 Hihn ku liv wid unu da eni wan a unu siti weh ih waahn liv eena. Unu noh fi chreet ahn bad.

17 “Non a di Izrelait laydi dehn ahn non a di Izrelait man dehn fi bee wahn prastichoot.* 18 Wahn man er wahn laydi noh fi tek di moni weh ih mek az wahn prastichoot ahn bring it da di hows a Jehoava unu Gaad soh dat ih ku kip wahn vow weh ih mek, bikaaz da moni da sohnting weh Jehoava unu Gaad hayt.

19 “Wen unu len wahn nada Izrelait moni, food, er eniting els, unu noh fi mek ih pay unu bak wid inchres. 20 Unu ku mek wahn farina pay unu bak wid inchres, bot unu noh fi mek wahn Izrelait pay unu bak wid inchres, soh dat Jehoava unu Gaad ku bles unu eena evriting weh unu du eena di lan weh unu wahn kanka.

21 “If unu mek wahn vow tu Jehoava unu Gaad, unu noh fi tek lang fi du weh unu pramis fi du, bikaaz Jehoava unu Gaad di ekspek unu fi du it. If unu noh du it, den unu wahn di sin. 22 Bot if unu noh mek wahn vow, unu noh wahn di sin. 23 Unu fi du eniting weh unu seh unu wahn du, ahn wen unu mek wahn vow, dat wahn bee laik wahn aafrin weh unu waahn aafa op tu Jehoava unu Gaad. Soh unu fi mek shoar dat unu du weh unu mi vow fi du.

24 “If unu goh eena unu nayba grayp aachad, unu ku eet az moch grayps az unu waahn, bot unu noh fi put non eena unu kantayna.

25 “If unu goh eena unu nayba feel an ih ga grayn weh redi fi pik, unu ku pik di grayn wid unu han, bot unu noh fi kot unu nayba grayn wid wahn sikl.*