Sekant Kingz
21 Manaaseh mi 12 yaaz oal wen ih staat tu rool az king, an ih rool eena Jeroosalem fi 55 yaaz. Fi hihn ma mi naym Hefziba. 2 Hihn mi du weh bad eena Jehoava sait, an ih kantinyu fi du di saym disgostin tingz laik di ada nayshanz weh Jehoava mi jraiv owt fahn monks di Izrelait dehn. 3 Hihn bil bak di hoali hai plays dehn weh ih pa Hezikaiya mi brok dong, an ih bil sohn alta fi Bayal ahn wahn Ashera poas, jos laik weh Ayhab di king a Izrel mi du. An ih bow dong tu aala di staar dehn weh deh eena di skai ahn wership dehn. 4 Hihn mi aalso bil sohn alta eena Jehoava templ, di saym templ weh Jehoava mi seh mi wahn aana fi hihn naym eena Jeroosalem. 5 An ih bil sohn alta eena di too koatyaad da Jehoava templ soh dat ih ku wership aala di staar dehn eena di skai. 6 An ih aafa ih oan son az wahn bon sakrifais;* ih mi praktis majik, luk fi sainz, an ih haiya peepl weh kamyoonikayt wid di ded ahn peepl weh pridik di fyoocha. Ih du wahn lata bad tingz eena Jehoava sait fi ofen ahn.
7 Hihn put di imij a di Ashera poas weh hihn mi mek eena di templ. Ahn dis da weh Jehoava mi seh bowt di templ tu Dayvid an ih son Salaman: “Owta aala Izrel chraib dehn teritori, Ah mi pik Jeroosalem ahn put wahn templ deh, ahn rait deh Ah wahn aana mi naym fareva. 8 If di Izrelait dehn obay evriting weh Ah koman dehn fi du ahn fala di hoal Laa weh mi servant Moaziz mi koman dehn fi fala, den Ah wahn neva agen sen dehn weh fahn di lan weh Ah mi gi tu dehn ansestaz.” 9 Bot dehn neva obay, ahn Manaaseh mi kip di mek dehn du tingz weh bad; dehn mi du tingz weh mi wers dan weh di ada nayshanz dehn mi du, di saym nayshanz weh Jehoava mi kil owt bifoa ih mi gi di lan tu di Izrelait dehn.
10 Jehoava mi kip di sen ih prafit dehn fi tel dehn: 11 “Manaaseh di king a Jooda du aala dehnya wikid tingz, an ih bihayv eevn moa wikid dan aala di Amorait dehn weh mi dehdeh lang bifoa hihn staat tu rool, an ih mek di peepl fahn Jooda chraib sin wid di disgostin aidol dehn.* 12 Soh dis da weh Jehoava di Gaad a Izrel seh: ‘Ah di bring wahn dizaasta pahn Jeroosalem ahn pahn Jooda. Ahn wen peepl hyaa bowt it dehn wahn shak. 13 Ah wahn schrech owt di saym mezharin schring weh Ah mi yooz pahn Samayrya oava Jeroosalem, ahn di saym mezharin tool* weh Ah mi yooz pahn Ayhab famili, Ah wahn yooz pahn dehn. An Ah wahn kleen owt Jeroosalem jos laik how sohnbadi wuda waip owt wahn bowl ahn ton it opsaid dong. 14 Ah wahn ton mi bak pahn di res a mi peepl, an Ah wahn han dehn oava tu dehn enimi dehn, ahn dehn enimi dehn wahn tek aala dehn ahn kehr dehn az prizna, 15 bikaaz dehn mi du weh bad eena mai sait ahn kantinyu fi ofen mi fahn di day dehn ansestaz mi kom owta Eejip dong tu dis day.’”
16 Ahn Manaaseh neva onli mi-di sin wen ih mek Jooda sin ahn kaaz dehn fi du weh bad eena Jehoava sait. Bot pahn tap a dat, ih kil wahn lata inosent peepl* fahn wan en a Jeroosalem tu di ada. 17 Ahn di res a Manaaseh hischri weh taak bowt evriting weh hihn mi du an aala di sin dehn weh hihn mi komit, deh rait dong eena di hischri buk a Jooda king dehn. 18 Den Manaaseh ded,* ahn dehn beri ahn eena di gyaadn da ih palis, eena di gyaadn weh yoostu bilangz tu Oza. Ahn fi hihn son Aymon staat tu rool az king afta hihn.
19 Aymon mi 22 yaaz oal wen ih staat tu rool az king, ahn hihn mi rool oava Jeroosalem fi too yaaz. Fi hihn ma da-mi Hayroz daata Mesholemet, ahn Hayroz da-mi fahn Jotba. 20 Hihn mi kantinyu fi du weh bad eena Jehoava sait jos laik weh ih pa Manaaseh mi du. 21 Hihn mi kip di komit aala di sin dehn weh ih pa mi komit, an ih mi kip di wership ahn bow dong tu aala di disgostin aidol dehn weh ih pa mi wership. 22 Soh hihn ton ih bak pahn Jehoava di Gaad a ih ansestaz, an ih neva obay Jehoava. 23 An Aymon servant dehn en op di mek planz fi goh gens ahn, an dehn kil di king da ih oan palis. 24 Bot di peepl mi kil dehn wan weh mek planz fi goh gens King Aymon, ahn dehn mek fi hihn son Josaiya bee king afta hihn. 25 Ahn di res a Aymon hischri, evriting weh hihn mi du, deh rait dong eena di hischri buk a Jooda king dehn. 26 Soh dehn beri ahn eena ih grayv weh mi deh eena di gyaadn weh yoostu bilangz tu Oza. Ahn fi hihn son Josaiya staat tu rool az king afta ahn.