Saam
Wahn noat fi di dairekta: Play dis sang eena di Alamot* stail. Dis da Koara disendant dehn sang.
46 Gaad da wi schrent ahn wi sayf plays;
Hihn deh rait deh fi help wi wen tingz geh haad.
2 Dat da wai wi noh haftu frayd fi notn, eevn if di ert ton opsaid dong,
Eevn if di mongtin dehn jrap da di batam a di see,
3 Eevn if di see geh rof ahn staat foam op,
An eevn if di mongtin dehn shayk op sayka weh di see soh rof. (Seela)
4 Dehn ga wahn riva weh ga lata schreem, an ih mek Gaad siti rijais.
Dehn mek yu hoali plays rijais, di grayt tabernakl* a di Moas Hai.
5 Gaad deh eena di siti; nobadi ku dischrai it.
Gaad wahn reskyu it az maanin kohn.
6 Di peepl fahn di nayshan dehn kaaz wahn rokshan ahn di kingdom dehn geh dischrai;
Wen Gaad staat tu taak, di ert shayk op.
7 Jehoava di Komanda a di hevnli aamiz deh wid wi;
Jaykob Gaad da fi wee sayf plays. (Seela)
8 Kohn si fi unuself aal di tingz weh Jehoava du,
Si aala di wandaful tingz weh hihn du pahn di ert.
9 Hihn di put wahn stap tu waar aal rong di werl.
Hihn brok op di boa an aro ahn smash di spyaa;
Hihn bon op di waar chariyat dehn* wid faiya.
10 “Giv op ahn rekonaiz dat Ai da Gaad.
Aala di nayshan dehn wahn prayz mi;
Di hoal ert wahn prayz mi.”
11 Jehoava di Komanda a di hevnli aamiz deh wid wi;
Jaykob Gaad da fi wee sayf plays. (Seela)