Dyooteronomi

28 “An if unu lisn tu evriting weh Jehoava unu Gaad di tel unu an unu mek shoar dat unu obay aala ih komanment dehn weh Ah di giv unu tudeh, den fi shoar Jehoava unu Gaad wahn mek unu bee moa impoatant dan aala di ada nayshan dehn pahn di ert. 2 If unu kantinyu lisn tu evriting weh Jehoava unu Gaad di tel unu, den unu wahn geh aala dehnya blesinz:

3 “Gaad wahn bles unu eena di siti, an ih wahn bles unu eena unu feel.

4 “Gaad wahn bles unu wid lata pikni, an ih wahn mek lata food groa pahn di lan. An ih wahn bles unu wid lata animal, laik sohn yong kyatl ahn sheep.

5 “Gaad wahn bles unu baaskit ahn di bowl weh unu need eena.*

6 “Gaad wahn bles unu eniway wehpaat unu goh an eena evriting weh unu du.

7 “Jehoava wahn mek unu win di fait gens unu enimi dehn weh atak unu. Dehn wahn atak unu fahn wan dairekshan, bot dehn wahn ron weh fahn unu eena sevn difrent dairekshan. 8 Jehoava wahn bles unu stoarhows dehn an ih wahn bles unu eena evriting weh unu du. Fi shoar Jehoava unu Gaad wahn bles unu eena di lan weh ih di giv unu. 9 Jehoava wahn mek unu bee ih hoali peepl, jos laik weh ih mi swayr fi du, bikaaz unu kantinyu fi obay di komanment dehn fahn Jehoava unu Gaad ahn liv akaadn tu ih standadz. 10 Aala di peepl pahn di ert wahn noa da hoo unu wen dehn hyaa Jehoava naym, ahn dehn wahn frayd fi unu.

11 “Jehoava wahn mek unu ga wahn lata pikni an ih wahn mek unu ga wahn lata animal. An ih wahn mek lata food groa pahn di grong eena di lan weh Jehoava mi swayr tu unu ansestaz dat ih mi wahn giv unu. 12 Jehoava wahn oapm op di skai laik how wahn man oapm op wahn gud stoarhows, an ih wahn mek ih rayn pahn unu lan da di rait taim. Ih wahn bles evriting weh unu du. An unu wahn len tu lata nayshanz, bot unu noh wahn haftu baro fahn nobadi. 13 If unu kantinyu fi obay di komanment dehn fahn Jehoava unu Gaad weh Ah di giv unu tudeh an unu fala it an obay it, den Jehoava unu Gaad wahn mek unu bee moa impoatant dan di ada nayshan dehn, an unu wahn ga wahn haiya pozishan dan dehn. Unu noh wahn ga wahn loa pozishan. 14 Unu fi mek shoar dat unu obay evriting weh Ah di koman unu tudeh. Unu noh fi goh tu di rait ner tu di lef. An unu noh fi wership ada gaadz.

15 “Bot if unu noh lisn tu weh Jehoava unu Gaad di tel unu, an unu noh obay ih komanment dehn an ih laa dehn weh Ah di giv unu tudeh, den unu wahn geh kers an aala dehnya bad tingz wahn hapm tu unu:

16 “Gaad wahn kers unu eena di siti, an ih wahn kers unu eena unu lan.

17 “Gaad wahn kers unu baaskit ahn di bowl weh unu need eena.

18 “Gaad wahn kers unu pikni ahn di food weh groa pahn di grong. An ih wahn kers unu animal dehn, laik unu yong kyatl ahn sheep.

19 “Gaad wahn kers unu eniway wehpaat unu goh an ih wahn kers unu eena evriting weh unu du.

20 “Jehoava wahn kers unu eena evriting weh unu chrai du, ahn hihn wahn mek unu feel kanfyooz an ih wahn ponish unu til unu geh dischrai ahn til unu ded, sayka aala di bad tingz weh unu praktis ahn sayka weh unu ferget bowt ahn. 21 Jehoava wahn mek unu kech lata terabl dizeez weh wahn mek unu sik fi wahn lang taim til ih dischrai unu fahn di lan weh unu wahn kanka. 22 Jehoava wahn mek unu kech tooberkoloasis, mek unu ga hai feeva, ahn mek paat a unu badi swel op. Ahn hihn wahn mek unu feel hat laik if unu ga feeva, an ih wahn mek unu enimi atak unu. Hihn wahn mek wahn schrang breez weh feel hat kil owt unu plaants ahn mek unu plaants ded. An aala dehndeh tingz wahn kantinyu fi hapm tu unu til unu ded. 23 Gaad noh wahn mek rayn kohn dong fahn di skai,* ahn hihn noh wahn mek notn groa pahn di ert.* 24 Jehoava wahn mek di rayn ton tu dos ahn san, ahn dehn wahn kohn dong pahn unu fahn di skai til unu geh dischrai. 25 Jehoava wahn mek unu enimi dehn kanka unu. Unu wahn atak dehn, bot unu wahn en op di ron weh fahn dehn ahn goh da difrent plays. An aala di kingdom dehn pahn di ert wahn geh frayd wen dehn si di bad tingz weh di hapm tu unu. 26 An unu ded badi wahn bee food fi aal kaina berd weh flai eena di skai ahn fi di animal dehn weh liv pahn di lan. Ahn nobadi wahn fraitn dehn weh.

27 “Jehoava wahn mek unu kech bail laik weh mi hapm tu di Ijipshan dehn. Ih wahn mek unu kech hemroydz ahn rash, an ih wahn mek unu skin eech. An unu noh wahn geh beta fahn dehndeh siknis. 28 Jehoava wahn mek unu geh krayzi, an ih wahn mek unu geh blain ahn kanfyooz. 29 Bowt di midl a di day, unu wahn saach fi tingz jos laik wahn blain persn saach fi tingz eena daaknis. Ahn noh mata weh unu du, tingz noh gwehn gud fi unu. Peepl wahn aalwayz di teef fahn unu ahn di cheet unu, ahn nobadi wahn dehdeh fi sayv unu. 30 Wahn man wahn geh ingayj tu wahn wuman, ahn wahn nada man wahn rayp shee. Unu wahn bil sohn hows, bot unu noh wahn liv eena dehn. Unu wahn plaant wahn grayp aachad, bot unu noh wahn injai notn fan it. 31 Dehn wahn kil unu bul dehn fronta unu, an unu noh wahn eet non a di meet fahn dehn. Dehn wahn teef unu dongki dehn rait fronta unu, an unu noh wahn get dehn bak. Unu enimi dehn wahn teef unu sheep, ahn nobadi wahn dehdeh fi help unu. 32 Peepl wahn tek weh unu son dehn an unu daata dehn, an aal weh unu wahn ku du da wach. Unu wahn aalwayz mis dehn, bot unu wahn kyaahn du notn bowt it. 33 Peepl weh unu noh noa wahn eet evriting weh unu haavis, ahn dehn wahn eet aala di food weh groa pahn unu lan. Dehn wahn aalwayz cheet unu ahn chreet unu bad. 34 Unu gwehn krayzi wen unu si aala dehndeh tingz.

35 “Jehoava wahn mek unu kech sohn bail pahn unu nee an unu leg. Unu wahn ga lata bail, fahn di tap a unu hed tu di batam a unu fut. Unu wahn deh eena wahn lata payn an unu noh wahn geh beta. 36 Jehoava wahn chays unu weh an unu king weh unu chooz fi rool oava unu. An ih wahn mek unu goh da wahn nada nayshan weh unu ner unu ansesta dehn neva noa bowt. Ahn rait deh unu wahn serv ada gaadz weh mek owta wud ahn stoan. 37 Wen unu reech da di difrent plays weh Jehoava sen unu, di peepl wahn sopraiz wen dehn si di tingz weh hapm tu unu. Ahn dehn wahn laaf aata unu ahn mek fon a unu.

38 “Unu wahn plaant wahn lata seed eena unu feel, bot unu wahn haavis lee bit fahn weh groa, bikaaz di loakos dehn wahn eet it. 39 Unu wahn plaant wahn lata grayp aachad, an unu wahn tek kayr a it fi mek ih groa, bot di werm dehn wahn eet evriting weh groa pan it. Soh unu noh wahn geh no wain an unu noh wahn geh notn fan it. 40 Unu wahn ga lata aliv chree pahn unu lan, bot unu wahn kyaahn rob ail pahn unuself, bikaaz di aliv dehn wahn jrap aafa di chree dehn. 41 Unu wahn ga wahn lata pikni, bot dehn noh wahn bee fi unu, bikaaz peepl wahn kehr dehn az priznaz. 42 Wahn lata insek wahn dischrai unu chree dehn, ahn dehn wahn eet aala di food weh groa eena unu lan. 43 Di farina dehn weh di liv monks unu wahn geh schranga ahn schranga, bot unu wahn geh weeka ahn weeka. 44 Unu nayba wahn len unu sohnting, bot unu noh wahn ga notn fi len ahn. Unu nayba wahn bee moa impoatant dan unu, an unu wahn ga wahn loawa pozishan dan unu nayba.

45 “Fi shoar Gaad wahn kers unu, an aala dehndeh bad tingz wahn hapm tu unu til unu geh dischrai, bikaaz unu neva lisn tu weh Jehoava unu Gaad mi tel unu an unu neva obay ih komanment dehn an ih laa dehn weh ih giv unu. 46 Dehndeh bad tingz wahn hapm tu unu ahn tu unu disendant dehn, ahn dehndeh tingz wahn bee wahn sain ahn wahn waanin fi evribadi, 47 bikaaz unu neva ga jai an unu haat neva hapi wen unu mi-di serv Jehoava unu Gaad ahn wen unu mi gat evriting weh unu mi need. 48 Jehoava wahn mek unu enimi dehn atak unu. Ahn wail unu da fi dehn slayv, unu wahn hongri ahn tersti an unu wahn bayli ga kloaz an unu noh wahn ga notn. Dehn wahn chreet unu kruwil wail unu da fi dehn slayv til dehn dischrai unu.

49 “Jehoava wahn sen wahn nayshan fi atak unu. Da nayshan wahn kohn fahn faar, fahn di en a di ert. Da nayshan wahn atak unu, jos laik how wahn eegl moov faas fi atak di animal weh ih di hont. An unu wahn kyaahn andastan di langwij weh di peepl fahn da nayshan taak. 50 Da nayshan kruwil, an ih noh wahn feel sari fi oal peepl an ih noh wahn ga mersi fi yong peepl. 51 Dehn wahn eet unu animalz, ahn dehn wahn eet aala di food weh groa pahn unu lan til unu geh dischrai. Dehn noh wahn lef unu wid eni grayn, nyoo wain, ail, yong kyatl, er sheep til dehn dischrai unu. 52 Dehn wahn sorong unu siti dehn fi kyapcha dehn. Ahn dehn wahn lak unu op eena di siti dehn weh deh eena unu lan til di big ahn schrang waal dehn weh unu chros eena jrap dong. Yes, fi shoar dehn wahn sorong unu siti dehn fi kyapcha dehn. Dehndeh siti deh eena di lan weh Jehoava unu Gaad giv unu. 53 Wen unu enimi dehn sorong unu siti dehn ahn dehn mek unu sofa, unu wahn haftu kil unu pikni dehn weh Jehoava unu Gaad giv unu an eet dehn badi.

54 “Eevn wahn kain man weh yoostu wahn gud laif ahn weh di liv monks unu noh wahn feel sari fi ih breda, ih waif, er ih pikni dehn weh servaiv. 55 Ahn bikaaz unu enimi dehn sorong unu siti ahn dehn di mek unu sofa, da man wahn haftu kil ih pikni dehn an eet dehn badi, an ih noh wahn shayr wid nobadi. 56 Ahn wahn wuman weh soh spail, weh yoostu liv wahn komfatabl laif, ahn weh noh eevn waahn waak noh wahn feel sari fi ih hozban ner ih son er daata. 57 Shee noh wahn feel sari fi ih baybi weh jos baan. Ih eevn wahn eet evriting els weh kom owta ih badi afta ih baybi baan. Ih wahn eet it eena seekrit sayka weh unu enimi dehn kyapcha unu siti dehn ahn mek unu sofa eena dehndeh siti.

58 “If unu noh obay evriting weh di Laa seh weh rait dong eena dis buk an unu noh ga lata rispek fi dis amayzin naym weh bilang tu Jehoava unu Gaad, 59 Jehoava wahn mek unu an unu disendant dehn kech sohn terabl dizeez weh wahn laas fi wahn lang taim. An ih wahn mek unu kech sohn siknis weh wahn mek unu ga wahn lata payn. 60 Ahn hihn wahn mek unu kech di saym dizeez dehn weh di peepl da Eejip mi kech weh unu mi frayd fa, an unu noh wahn geh beta. 61 Pahn tap a dat, Jehoava wahn mek unu kech sohn ada siknis ahn dizeez weh noh rait dong eena dis Laa til di taim kohn wen unu ded owt. 62 An eevn doa da soh moch a unu, laik di staarz weh deh eena di skai, onli wahn lee bit a unu wahn lef, bikaaz unu neva obay weh Jehoava unu Gaad tel unu fi du.

63 “Ahn jos laik how Jehoava mi hapi fi mek tingz goh gud fi unu ahn fi mek unu ga lata pikni, rait soh Jehoava wahn hapi fi dischrai unu, ahn dehn wahn tek unu owta di lan weh unu wahn soon kanka.

64 “Jehoava wahn skyata unu monks di ada nayshan dehn, fahn wan en a di ert tu di ada en a di ert. Rait deh unu wahn haftu wership ada gaadz weh di peepl mek owta wud ahn stoan, weh unu ner unu ansestaz neva noa bowt. 65 Wen unu deh monks di ada nayshan dehn, unu noh wahn ga pees ner wahn plays fi res. Jehoava wahn mek unu wori. Unu wahn kyaahn si gud, an unu noh wahn ga no hoap. 66 Unu laif wahn deh eena daynja. Unu wahn feel frayd joorin di day ahn joorin di nait, an unu noh wahn noa if unu wahn servaiv. 67 Wen unu feel frayd ahn wen unu si weh di hapm, eena di maanin unu wahn seh, ‘Ah wish da mi eevnin!’ an eena di eevnin unu wahn seh, ‘Ah wish da mi maanin!’ 68 Jehoava wahn mek unu goh bak da Eejip pahn wahn ship. Unu gwehn bak da di plays wehpaat Ah mi seh unu neva mi wahn si agen. Ahn rait deh unu wahn sel unuself tu unu enimi dehn az mayl ahn feemayl slayv, bot nobadi wahn bai unu.”