Saam
137 Wi mi sidong bai di riva dehn da Babilan.
Wi baal ahn baal wen wi tink bowt Zaiyan.
2 Wi heng wi haap dehn pahn di poplar* chree dehn eena Babilan.
3 Di peepl weh tek wi az dehn prizna aks wi fi sing fi dehn,
Dehn wan weh mek fon a wi waahn wi entatayn dehn;
Dehn seh: “Unu sing sohn sang bowt Zaiyan.”
4 Da how wi ku sing wahn sang fi prayz Jehoava eena wahn farin lan?
5 If Ah ferget bowt yoo, Oa Jeroosalem,
Mek mi rait han geh yoosles.*
6 If Ah noh memba yu,
If Ah noh si Jeroosalem az mi graytis jai,
Den mek mi tong stik tu di roof a mi mowt.
7 Oa Jehoava, pleez noh ferget weh di Eedomait dehn mi seh
Pahn di day Jeroosalem geh kanka:
“Bring it dong! Bring it dong tu di grong!”
8 Oa daata a Babilan, yu wahn soon geh dischrai;
Di wan weh wahn rof yoo op di saym way how yu mi rof wee op wahn bee hapi.
9 Di wan weh tek weh yu pikni
Ahn mash dehn gens di rak dehn wahn bee hapi.