Dyooteronomi
29 Dehnya da di werdz a di kovenant weh Jehoava mi koman Moaziz fi mek wid di Izrelait dehn da Moawab, apaat fahn di kovenant weh ih mi mek wid dehn da Hoareb.
2 Den Moaziz mi gyada aala di Izrelaits, an ih tel dehn: “Unu don si evriting weh Jehoava mi du tu Fayro, ih servant dehn, ahn tu ih hoal lan da Eejip. 3 An unu mi si wen ih du lata wandaful miraklz fi ponish dehn. 4 Eevn op tu now, Jehoava noh mek unu andastan di reel meenin a di tingz weh unu mi si ahn hyaa. 5 Ahn Gaad mi seh: ‘Wail Ah mi leed unu eena di wildanes fi 40 yaaz, unu kloaz neva wayr owt an unu sandalz neva bos. 6 Unu neva eet bred, an unu neva jrink wain ner eni kaina alkohol. Bot Ah mi stil tek kayr a unu fi mek unu noa dat Ai da Jehoava unu Gaad.’ 7 Afta sohn taim paas, unu mi reech da dis plays, ahn King Saihon weh mi liv da Heshbon ahn King Og weh mi liv da Bayshan mi kohn fait gens wi, bot wi mi win di fait gens dehn. 8 Afta dat wi mi tek oava fi dehn lan, ahn wi mi giv it tu Rooben chraib, Gad chraib, ahn tu di haaf chraib a Manaaseh. 9 Soh unu fi obay evriting weh dis kovenant seh, ahn den evriting weh unu du gwehn gud fi unu.
10 “Tudeh aala unu deh fronta Jehoava unu Gaad: unu cheef dehn fahn unu chraib, unu eldaz, di man dehn weh gat atariti, aala di ada Izrelait man dehn, 11 unu pikni dehn, unu waif dehn, di farinaz weh liv eena unu kyamp, ahn dehn wan weh gyada faiyawud ahn weh haal waata. 12 Tudeh Jehoava unu Gaad di mek wahn kovenant wid unu, an unu deh ya fi swayr fi kip da kovenant weh Jehoava unu Gaad di mek wid unu. 13 Soh unu wahn bee fi hihn peepl ahn hihn wahn bee unu Gaad, jos laik weh ih mi pramis unu ahn laik weh ih mi swayr tu unu ansestaz, Aybraham, Aizak, ahn Jaykob.
14 “Da noh onli wid unu Ah di mek di kovenant weh unu swayr fi kip, 15 bot da aalso wid dehn wen di stan op rait ya wid wi fronta Jehoava wi Gaad ahn wid di fyoocha jenarayshan.* 16 Unu noa how wi yoostu liv da Eejip ahn how wi mi paas chroo di lan dehn fahn di difrent nayshanz wen wi mi-di chravl. 17 An unu yoostu si bad tingz weh Gaad hayt, laik dehn disgostin aidol dehn* weh mek owta wud, stoan, silva, ahn goal. 18 Unu fi mek shoar dat nobadi, nat eevn wahn man, wahn wuman, wahn famili, er wahn chraib deh monks unu tudeh weh stap wership Jehoava wi Gaad ahn wership di gaad dehn fahn dehndeh nayshanz. Unu fi mek shoar dat nobadi monks unu bee laik wahn root weh groa intu wahn paiznos ahn bita plaant.
19 “Bot if wahn persn hyaa di pramis weh unu mi swayr fi kip an ih geh prowd an ih seh dat notn wahn hapm tu ahn eevn doa ih kantinyu fi du wateva ih waahnt, den tingz noh gwehn gud fi di peepl rong ahn, 20 an Jehoava noh wahn fergiv ahn. Bot insted, Jehoava wahn geh beks bad wid ahn. An aala di kers dehn weh deh eena dis buk wahn hapm tu ahn, an Jehoava noh wahn mek nobadi pahn di ert memba ahn. 21 Jehoava wahn separayt ahn fahn owta aala Izrel chraib dehn. Hihn wahn kers ahn an mek bad tingz hapm tu ahn. Di saym ting wahn hapm tu enibadi weh noh kip di kovenant weh deh eena dis buk a di Laa.
22 “An eena di fyoocha unu disendant dehn ahn di farina dehn weh kohn fahn faar wahn si how Jehoava mek bad tingz hapm tu unu lan. 23 Dehn wahn si how solfa, saalt, ahn faiya dischrai di hoal lan. Ahn nobadi wahn ku plaant pan it ahn notn wahn groa. Ih wahn luk laik how Sadam ahn Gomoara an Adma ahn Zeboyim mi luk wen Jehoava mi dischrai dehn sayka weh ih mi beks bad. 24 Unu disendant dehn ahn di farinaz an aala di nayshanz wahn seh, ‘Wai Jehoava mi du dat tu dis lan? Wai ih mi geh soh beks?’ 25 Den dehn wahn seh, ‘Dat mi hapm bikaaz dehn neva kip di kovenant weh Jehoava mek wid dehn. Hihn da di Gaad a fi dehn ansestaz weh mi bring dehn owta Eejip. 26 Dehn gaahn wership ada gaadz ahn bow dong tu dehn. Dehndeh da gaadz weh dehn neva noa bowt, ahn Gaad mi koman dehn noh fi wership dehn. 27 Den Jehoava mi geh beks bad, an ih mek di kers weh deh eena dis buk kohn pahn da lan. 28 Den Jehoava mi tek di Izrelaits owta dehn lan sayka weh ih mi soh beks. An ih sen dehn weh tu wahn nada lan, wehpaat dehn deh tudeh.’
29 “Jehoava wi Gaad noa evriting weh deh eena seekrit, ahn hihn mek wee ahn wi disendant dehn noa di tingz weh wi need fi noa, soh dat wi ku obay evriting weh dis Laa seh.