Dyooteronomi

24 “If wahn man geh marid tu wahn laydi bot hihn noh waahn deh wid ahn nohmoh bikaaz ih fain owt dat shee mi du sohnting bad weh bring shaym, den ih fi rait owt wahn divoas paypa ahn giv it tu ahn. An ih fi sen ahn weh fahn ih hows. 2 Afta shee lef fi hihn hows, ih ku goh ahn geh marid tu wahn nada man. 3 If di sekant man weh mi geh marid tu shee hayt* ahn an ih rait owt wahn divoas paypa ahn giv it tu ahn an ih sen ahn weh fahn ih hows er if di sekant man weh mi geh marid tu shee ded, 4 den fi shee fers hozban weh mi sen ahn weh wahn kyaahn tek shee bak az ih waif, bikaaz shee noh kleen. If di man du dat, dat wahn bee sohnting weh Jehoava hayt. Unu noh fi komit dehndeh kaina sin eena di lan weh Jehoava unu Gaad di giv unu az wahn inheritans.

5 “Wen wahn man jos geh marid, ih noh fi serv eena di aami fi wahn hoal yaa, ahn dehn noh fi giv ahn no ada kaina werk. Ih fi stay hoam ahn mek ih waif hapi.

6 “If sombadi oa wahn persn, den da persn noh fi tek dehn han mil* ner di tap stoan fahn dehn han mil til dehn pay ahn bak, bikaaz dat bilangz tu dehn ahn da persn wuda di tek sohnting weh dehn need fi servaiv.

7 “If sombadi kidnap wan a ih Izrelait bradaz an ih chreet ahn bad ahn sel ahn, den dehn fi kil di persn weh kidnap ahn. Unu fi geh rid a eniting weh bad fahn monks unu.

8 “Wen sombadi kech leprosi,* unu fi mek shoar dat unu du evriting weh di Leevait dehn weh da prees tel unu fi du. Unu fi mek shoar dat unu obay di koman weh Ai gi dehn. 9 Memba weh Jehoava unu Gaad mi du tu Miryam wail unu mi-di kom owta Eejip.

10 “If unu len unu nayba sohnting an ih seh dat ih wahn giv unu sohnting fi hoal til ih ku pay unu bak, den unu noh fi goh eena ih hows ahn tek weh ih seh ih wahn giv unu. 11 Unu fi stay owtsaida ih hows, an unu nayba weh mi baro sohnting fahn unu wahn bring weh ih seh ih wahn giv unu fi hoal til ih pay unu bak. 12 An if unu nayba poa an ih mi giv unu ih kloaz fi hoal til ih pay unu bak, den unu noh fi goh sleep wail unu stil gat unu nayba kloaz. 13 Az soon az di son goh dong, unu fi mek shoar dat unu gi bak di kloaz weh unu nayba giv unu fi hoal til ih ku pay unu bak. Ahn wen unu nayba goh sleep, ih wahn ga ih kloaz an ih wahn aks Gaad fi bles unu. Ahn Jehoava unu Gaad wahn si weh unu du az sohnting raichos.

14 “If unu haiya sohnbadi weh poa fi werk fi unu, unu fi mek shoar dat unu pay ahn evriting weh ih sopoas tu geh, weda da persn da wan a unu bradaz er wahn farina weh di liv eena unu lan, eena wan a unu siti dehn. 15 Unu fi pay ahn da saym day, bifoa di son goh dong, bikaaz ih poa an ih need dat fi servaiv. If unu noh du dat, ih wahn komplayn tu Jehoava bowt unu, an unu wahn bee gilti a sin.

16 “Wahn pa noh fi ded sayka weh ih pikni du. Ahn wahn pikni noh fi ded sayka weh ih pa du. Eech persn fi ded fi ih oan sin.

17 “Wen unu joj wahn farina er wahn pikni weh noh ga wahn pa, unu fi mek shoar dat unu joj dehn eena wahn fyaa way. An unu noh fi tek weh wahn wido kloaz ahn hoal it til ih pay bak wahn loan. 18 Memba dat unu da-mi slayv da Eejip, ahn Jehoava unu Gaad mi sayv unu fahn deh. Dat da wai Ah di koman unu fi du dehndeh tingz.

19 “Wen unu haavis di grayn fahn unu feel an unu ferget wahn bondl a grayn eena unu feel, unu noh fi goh bak ahn get it. Unu fi lef it deh fi di farina dehn weh liv monks unu, di pikni dehn weh noh ga no pa, ahn di wido dehn, soh dat Jehoava unu Gaad bles evriting weh unu du.

20 “Wen unu haavis di aliv dehn fahn unu chree, unu onli fi shayk it wan taim. Wateva stay pahn di aliv chree wahn bee fi di farina dehn weh liv monks unu, di pikni dehn weh noh ga no pa, ahn di wido dehn.

21 “Wen unu gyada di grayp dehn fahn unu grayp aachad, unu noh fi goh bak ahn pik op wateva lefoava. Unu fi lef it fi di farina dehn weh liv monks unu, di pikni dehn weh noh ga no pa, ahn di wido dehn. 22 Memba dat unu da-mi slayv da Eejip. Dat da wai Ah di koman unu fi du dehndeh tingz.