Fers Kingz
5 Wen Hairam, di king a Taiya, mi hyaa dat Salaman da di nyoo king sins ih pa ded, ih sen ih servant dehn fi vizit Salaman bikaaz Hairam da-mi wahn kloas fren tu Dayvid.* 2 Soh Salaman mi sen dis mesij tu Hairam: 3 “Yu noa dat mi pa Dayvid kudn bil wahn templ fi aana di naym a Jehoava ih Gaad bikaaz a aala di waar weh ih fait gens ih enimi dehn hoo mi deh aal rong ahn. Bot afta sohn taim, Jehoava mi gi Dayvid vikchri oava aala ih enimi dehn. 4 Bot now, nobadi deh gens mi ahn notn bad di hapm, bikaaz Jehoava mi Gaad gi mi pees fan aala mi enimi dehn. 5 Soh Ah ga planz fi bil di templ fi aana di naym a Jehoava mi Gaad, jos laik weh Jehoava mi pramis mi pa Dayvid, wen ih seh: ‘Fi yoo son, weh Ah wahn put fi bee king afta yu, wahn bee di wan fi bil di templ fi aana mai naym.’ 6 Soh koman yu peepl fi kot dong sohn seeda chree fahn Lebanon fi mi. Mai servant dehn wahn werk lang wid fi yoo servant dehn, ahn yu ku tel mi humoch fi pay dehn, bikaaz yu noa dat non a wi noa how fi kot dong chree laik di peepl fahn Saidan.”
7 Wen Hairam mi hyaa weh Salaman seh, ih mi geh soh hapi an ih seh: “Mek Jehoava geh aala di prayz bikaaz ih gi Dayvid wahn waiz son fi rool oava aala dehnya peepl!” 8 Soh Hairam sen dis mesij tu Salaman: “Ah geh di mesij weh yu mi sen. Ah wahn gi yu evriting weh yu aks fa, an Ah wahn gi yu di seeda ahn joonipa wud dehn. 9 Mai servants wahn bring dehn dong fahn Lebanon tu di see, an Ai wahn tai dehn op tugeda, ahn put dehn fi float tu di plays wehpaat yu waahn Ah sen dehn. Den Ah wahn separayt dehn fi yu, ahn yu ku kehr dehn. Ah wahn du aala dis, ahn yu fi gi di food weh Ah aks fa tu evribadi eena mai hows.”
10 Soh Hairam mi sen aala di seeda ahn joonipa wud weh Salaman mi aks fa. 11 An evri yaa, Salaman mi provaid 20,000 koar mezha* a weet fi Hairam an evribadi eena ih hows, an ih mi provaid 20 koar mezha a pyoar aliv ail. 12 Ahn Jehoava mi gi Salaman wizdom, jos laik weh Ih pramis ahn. Hairam ahn Salaman mi ga pees wid wan anada, ahn di too a dehn mi mek wahn kovenant* wid eech ada fi aalwayz kip da pees.
13 King Salaman mi koman 30,000 man fan Izrel fi werk far ahn. 14 Eech mont, ih wuda sen 10,000 man da Lebanon. Dehn wuda spen wan mont da Lebanon ahn too monts da dehn hows; an Adonairam mi in chaaj a aala di man dehn weh mi werk fi di king. 15 Salaman mi ga 70,000 kaman peepl weh werk far ahn, ahn 80,000 man weh kot stoan da di mongtin dehn, 16 ahn Salaman mi put 3,300 man fi soopavaiz di werka dehn. 17 Ahn di king koman dehn fi dig owt sohn big an ekspensiv stoan, ahn dehn kot dehn stoan fi yooz az di fongdayshan fi di templ. 18 Soh Salaman werkaz ahn Hairam werkaz, lang wid di peepl fahn Geebal, mi kot di stoan. Ahn dehn mi geh di wud ahn stoan redi fi bil di templ.