Fers Kingz

6 Salaman staat bil wahn templ fi Jehoava* eena Ziv,* weh da di sekant mont. Dis da-mi di foat yaa afta Salaman staat rool az king oava Izrel, ahn bowt 480 yaaz afta di Izrelait dehn* mi lef Eejip. 2 Di templ weh King Salaman bil fi Jehoava mi 88 fut lang, 30 fut waid, ahn 44 fut hai.* 3 Di varanda rait fronta di templ mi 30 fut* lang* jos laik di wit a di templ, an ih mi mezha 15 fut* fahn di fronta di templ.

4 Dehn mi mek sohn windo fraym fi di templ weh mi luk naro pahn di owtsaid. 5 Pahn tap a dat, hihn put wahn adishan pahn di templ. Di adishan goh aal rong di waal fi di Hoali ahn Moas Hoali Room, an ih mi divaid op intu roomz. 6 Di loawis levl a di room mi 7 an a haaf fut* waid. Di midl levl mi 9 fut* waid, ahn di terd levl mi 10 an a haaf fut* waid.

7 Dehn mi bil di waal wahn sertn way soh dat dehn ku ga wahn plays fi set di beem dehn. Da way dehn neva haftu boar hoal eena di templ waal. Dehn mi bil di templ wid stoan weh dehn mi don pripyaa, soh dat yu kudn hyaa no hama, aks, er eni kaina tool eena di templ wail dehn mi-di bil it. 8 Di enchrans tu di loawis paat a di room mi deh pahn di sowt* said a di templ, ahn dehn mi ga wahn step weh goh op tu di sekant floa, ahn fahn deh di step goh tu di terd floa. 9 Hihn mi kantinyu bil di templ til dehn mi finish it. Ih yooz boad weh mek owta seedawud fi mek di beem dehn, an ih lay seedawud kraas di beem dehn fi mek di roof. 10 Hihn mi bil di room dehn aal rong di templ. Eech room mi 7 an a haaf fut* hai, ahn dehn mi yooz seedawud fi jain di wud dehn tu di templ.

11 Rong da taim, Jehoava tel Salaman: 12 “If yoo obay mai laa ahn mai komanment dehn ahn liv akaadn tu dehn, Ah wahn kip di pramis weh Ah mi mek tu yu pa Dayvid bowt dis templ weh yu di bil. 13 An Ai wahn deh monks mi peepl di Izrelait dehn, an Ah noh wahn abandan dehn.”

14 Salaman kantinyu bil di templ til ih don. 15 Hihn bil di waal dehn eensaida di templ wid seedawud. Hihn kova aala di waal dehn wid timba, fahn tap tu batam, an ih kova di templ floa wid joonipa wud. 16 Ahn tuwaadz di sekshan da bak a di templ, ih bil wahn room weh mezha 30 fut.* Ih bil dis room wid seedawud, fahn di floa op tu di roof. An een deh da-mi di Moas Hoali Room. 17 Ahn di Hoali Room, weh deh fronta di Moas Hoali Room, mi 58 fut* lang. 18 Aala di seedawud eensaida di templ mi ga smaal rong froot ahn flowaz kaav eena dehn. No stoan mi dehdeh.

19 An ih pripyaa di Moas Hoali Room weh mi deh eena di templ soh dat ih kuda mi put di aak a Jehoava kovenant eena da room. 20 Di Moas Hoali Room mi 30 fut lang, 30 fut waid, ahn 30 fut hai.* Ahn hihn mi kova di room wid pyoar goal bot ih kova di alta wid seedawud. 21 Salaman kova di eensaid a di templ wid pyoar goal, an ih maak aaf di ayrya fronta di Moas Hoali Room, weh mi kova wid goal tu, wid sohn goal chayn. 22 Ih kova di hoal templ wid goal an ih kova op di alta weh deh kloas tu di Moas Hoali Room wid goal tu.

23 An ih mek di too cherob* weh deh eena di Moas Hoali Room owta painwud,* an eech a dehn mi 15 fut* taal. 24 Wan a di cherob wing mi 7 an a haaf fut* lang ahn di ada wing mi 7 an a haaf fut* tu. Ahn fahn di en a wan wing tu di en a di neks wan da-mi 15 fut* lang. 25 Di sekant cherob wing dehn mi 15 fut* lang tu. Di too cherob dehn mi ga di sayhn saiz ahn shayp. 26 Di too cherob mi 15 fut* taal. 27 Den ih put di cherob dehn eena di Moas Hoali Room. Di cherob dehn wing mi deh spred owt. Wan a di cherob wing toch wan said a di waal ahn di neks cherob wing mi toch di ada said a di waal, ahn dehn wing mi spred owt da di midl a di room ahn di wing dehn toch eech ada. 28 An ih kova di cherob dehn wid goal.

29 An ih mi kaav sohn cherob, paam chree, ahn flowaz pan aala di waal dehn eena di Hoali ahn Moas Hoali Room. 30 Ih kova di templ floa wid goal eena di Hoali ahn Moas Hoali Room. 31 An ih mek di doa dehn tu di enchrans a di Hoali ahn Moas Hoali Room owta painwud. Ih mi mek said poas ahn doa poas, weh da-mi wahn fif sekshan.* 32 Ih mek di doa dehn owta painwud, an ih mi kaav sohn cherob, paam chree, ahn flowaz pahn dehn. Den ih kova di cherob ahn paam chree wid goal. 33 Hihn mi aalso mek di doa poas fi di enchrans a di Hoali Room owta painwud, weh da fi di foat sekshan.* 34 An ih mi mek too doa owta joonipa wud. An eech doa mi foal eena too wen ih swing oapm eena dehn sakit. 35 Ih mi kaav sohn cherob, paam chree, ahn flowaz pahn dehn. Den ih kova di doa dehn wid goal.

36 Ih bil wahn waal rong di prees dehn koatyaad wid chree roa a stoan, an ih ad wahn roa a seedawud tu it.

37 Eena di 4th yaa, eena di mont a Ziv,* dehn staat lay di fongdayshan fi Jehoava hows; 38 dehn finish bil di templ eena di 11th yaa eena Bul,* weh da di ayt mont. Ahn dehn bil it jos laik weh dehn mi plan, dong tu di veri laas deetayl. Soh hihn spen sevn yaaz di bil di templ.