Dyooteronomi

13 “Dehn mait ga peepl weh klaym dat dehn da prafit ahn peepl weh klaym dat dehn ku pridik di fyoocha chroo jreemz, ahn dehn mait tel unu bowt sohnting amayzin weh wahn hapm eena di fyoocha er tel unu bowt sohn sain. 2 Ahn di sain er weh dehn mi pridik bowt di fyoocha mait kohn chroo wail dehn di tel unu fi wership ada gaadz weh unu noh noa bowt. 3 Bot unu noh fi lisn tu da prafit er tu di persn weh pridik di fyoocha chroo jreemz, bikaaz Jehoava unu Gaad di tes unu fi si if unu lov Jehoava unu Gaad wid aala unu haat an aala unu soal. 4 Unu fi fala Jehoava unu Gaad, ga lata rispek far ahn, an obay ih komanment dehn. Unu fi lisn tu ahn, serv ahn, an stay kloas tu ahn. 5 Bot unu fi kil da prafit er da persn weh pridik di fyoocha chroo jreemz, bikaaz ih mi chrai mek unu ribel gens Jehoava unu Gaad ahn mek unu stap goh di way Gaad koman unu fi goh. Jehoava unu Gaad da di wan weh mi bring unu owta Eejip ahn sayv unu fahn da plays wehpaat unu da-mi slayv. Unu fi geh rid a enibadi weh du wikid tingz monks unu.

6 “If unu breda, unu son, unu daata, unu waif weh unu reeli lov, er unu kloasis fren chrai temp unu eena seekrit fi serv ada gaadz weh unu ner unu ansestaz noh noa bowt, 7 gaadz weh di peepl rong unu serv, noh mata wehpaat a di lan dehn du dat, weda dehn du dat kloas tu unu er faar fahn unu, 8 unu noh fi lisn tu dehn ner mek dehn kanvins unu. Noh feel sari fi dehn er shoa dehn mersi er protek dehn. 9 Bot unu fi mek shoar unu kil da persn. Di persn weh ih mi chrai kanvins fi bee di fers wan fi stoan ahn, an den di res a di peepl wahn stoan ahn afta dat fi help ahn kil ahn. 10 An unu fi stoan ahn an kil ahn, bikaaz ih mi chrai mek unu stap serv Jehoava unu Gaad, hoo da di wan weh mi bring unu owta Eejip wehpaat unu da-mi slayv. 11 Den aala di Izrelait dehn wahn hyaa bowt weh hapm ahn dehn wahn geh frayd, ahn dehn wahn neva du sohnting bad laik dat monks unu agen.

12 “If unu deh eena wan a unu siti weh Jehoava unu Gaad di giv unu fi liv eena, an unu hyaa sombadi seh 13 dat sohn man weh gud fi notn di chrai mek som a unu weh liv eena di saym siti laik dehn stap serv Gaad ahn dehn seh dat unu shuda serv ada gaadz weh unu noh noa bowt, 14 den unu fi aks peepl ahn fain owt moa infamayshan. An if unu fain owt dat di peepl di du dehndeh wikid tingz fi chroo, 15 unu fi tek unu soad ahn kil evribadi eena da siti. Unu fi dischrai evriting eena da siti lang wid aala di animal dehn. 16 Unu fi kalek op evriting fahn di siti ahn bring dehn da wahn oapm ayrya eena di siti, an unu fi bon dehn wid faiya. Dehndeh tingz wahn bee wahn aafrin tu Jehoava unu Gaad. Di siti wahn bee wahn pail a stoan weh wahn stay soh fareva, ahn nobadi wahn bil it op agen. 17 Unu noh fi tek notn weh sopoas tu geh dischrai soh dat Jehoava stap bee beks wid unu ahn soh dat ih ku shoa unu mersi ahn kompashan ahn soh dat unu ga lata pikni, jos laik weh ih mi swayr tu unu ansesta dehn. 18 Unu fi obay* Jehoava unu Gaad an obay aala ih komanment dehn weh Ah di giv unu tudeh, ahn den unu wahn di du weh Jehoava unu Gaad seh da di rait ting fi du.