Sekant Kingz
22 Josaiya mi ayt yaaz oal wen ih staat tu rool az king, an ih rool eena Jeroosalem fi 31 yaaz. Fi hihn ma da-mi Adaiya daata Jedaida, an Adaiya da-mi fahn Bozkat. 2 Hihn mi du weh rait eena Jehoava sait, an ih mi fala ih ansesta Dayvid egzampl an obay aala Ih komanment dehn; ih neva schray fan it.
3 Eena di 18th yaa wen Josaiya mi-di rool az king, ih sen di sekiteri Shayfan da Jehoava templ. Shayfan pa da-mi Mesholam son Azalaiya. Ahn dis da weh Josaiya tel Shayfan: 4 “Goh da di hai prees Hilkaiya ahn kalek aala di moni weh di peepl bring eena Jehoava templ; dat da di moni weh di wan dehn weh main di gayt kalek fahn di peepl. 5 Mek dehn giv it tu di wan dehn weh di soopavaiz di werk pahn Jehoava templ, ahn dehn sayhn wan wahn giv it tu di man dehn weh ga di rispansabiliti fi fiks eni damij pahn Jehoava templ. 6 Soh di wan dehn weh dehn fi gi di moni tu da di kyaapenta dehn, di bilda dehn, ahn di peepl weh werk wid stoan. Ahn dehn fi yooz it fi bai timba an ekspensiv stoan fi fiks di templ. 7 Bot yu noh haftu aks dehn weh dehn du wid di moni weh dehn get, bikaaz wi ku chros dehn.”
8 Laytaraan di hai prees Hilkaiya tel di sekiteri Shayfan: “Ah fain di buk a di Laa eena Jehoava templ.” Soh Hilkaiya gi Shayfan di buk, ahn hihn staat tu reed it. 9 Den di sekiteri Shayfan gaahn da di king ahn tel ahn: “Yu ofishal dehn don kalek op aala di moni weh deh eena di templ ahn giv it tu dehn wan weh di soopavaiz di werk pahn Jehoava templ.” 10 Di sekiteri Shayfan mi aalso tel di king: “Di prees Hilkaiya mi gi mi wahn buk.” Soh Shayfan staat tu reed weh deh eena di buk tu di king.
11 Az soon az Shayfan staat tu reed di buk a di Laa, ahn di king hyaa weh ih seh, ih tayr ih kloaz. 12 Den di king gi wahn koman tu di prees Hilkaiya, Shayfan son Ahaikam, Mikaiya son Akbor, di sekiteri Shayfan, ahn di king servant Asaiya. Ih tel dehn: 13 “Goh taak tu Jehoava fi mee, di peepl, an evribadi weh deh da Jooda, ahn fain owt weh di werdz eena dis buk meenz fi wi, bikaaz Jehoava beks bad wid wi, sayka weh wi ansesta dehn neva obay weh deh rait dong eena dis buk. Dehn neva obay di tingz weh deh rait dong eena di buk bowt evriting weh wi peepl mi sopoas tu du.”
14 Soh di prees Hilkaiya, Ahaikam, Akbor, Shayfan, an Asaiya gaahn da di prafit Holda. Fi shee hozban da-mi Shalom, hoo mi in chaaj a di kloaz dehn.* Ahn fi hihn pa da-mi Harhas son Tikva. Holda mi liv eena di nyoo sekshan da Jeroosalem; ahn da deh dehn taak tu ahn. 15 Shee tel dehn: “Dis da weh Jehoava di Gaad a Izrel seh, ‘Tel di man weh sen unu tu mi: 16 “Dis da weh Jehoava seh, ‘Ah wahn bring dizaasta pahn dis plays an evribadi weh liv deh, an evriting weh di king a Jooda reed eena di buk wahn kohn chroo. 17 Bikaaz dehn ton dehn bak pahn mi, ahn dehn bon sakrifais ahn mek di smoak fahn dehn sakrifais goh op tu ada gaadz, ahn dehn ofen mi wid di tingz weh dehn du. Dat da wai Ah wahn beks bad wid dis plays. Ahn mi anga wahn bee laik wahn faiya weh nobadi kyaahn owt.’” 18 Bot dis da weh yu shuda tel di king a Jooda, hoo mi sen yu fi aks mee, Jehoava, bowt weh deh eena di buk a di Laa; yu fi tel ahn, ‘Dis da weh Jehoava di Gaad a Izrel seh bowt di werdz weh yu mi hyaa: 19 “Wen Ah mi tel yu dat wahn kers wahn kohn pahn dis plays ahn dehnya peepl ahn dat peepl wahn shak wen dehn si weh hapm tu dehn, yu mi hombl yuself fronta mee, Jehoava, ahn yu mi tayr yu kloaz ahn baal fronta mi. Soh Ah mi lisn tu yu pryaa. Dat da weh Jehoava seh. 20 Dat da wai yu noh wahn geh fi si di dizaasta weh Ah wahn bring pahn dis plays, bikaaz Ah wahn alow yu fi ded* bifoa ih hapm, ahn yu wahn ded joorin wahn peesful taim.’”’” Afta dat dehn gaahn tel di king evriting weh Holda seh.