Fers Kingz
19 Den Ayhab tel Jezibel bowt evriting weh Ilaija mi du ahn how hihn mi kil di prafit dehn wid di soad. 2 Soh Jezibel sen wahn mesinja da Ilaija fi tel ahn: “Mek di gaad dehn ponish mi er wers if dehnya taim tumaaro Ah noh mek yu en op laik di prafit dehn weh yu kil!” 3 Wen Ilaija hyaa dis, ih geh frayd an ih ron fi ih laif. Wen ih reech Beeyer-sheeba, weh bilangz tu Jooda, ih lef ih servant deh. 4 Den ih gaahn da di wildanes, an ih waak fi wahn day til ih reech wahn chree.* Ih sidong anda it, an ih aks fi mek ih ded. Ih seh: “Pleez kil mi,* Jehoava! Ah kyaahn tek it nohmoh! Ai noh eni beta dan mi ansesta dehn weh don ded.”
5 Den ih lidong anda di chree* ahn jrap asleep. Den aal af a sodn wahn aynjel toch ahn an tel ahn: “Get op an eet.” 6 Wen ih luk, ih si wahn rong bred bai ih hed pahn sohn hat stoan ahn wahn waata jog. Soh ih eet ahn jrink ahn gaahn bak gaahn lidong. 7 Laytaraan Jehoava aynjel kohn bak agen, an ih toch ahn an seh: “Get op an eet, bikaaz yu ga wahn lang jerni heda yu.” 8 Soh ih get op an ih eet ahn jrink, ahn wid di schrent weh ih get fahn di food, ih chravl fi 40 dayz ahn 40 naits til ih reech Hoareb, di mongtin a di chroo Gaad.
9 Wail ih mi dehdeh, ih gaan eena wahn kayv fi stay di nait. Ahn joorin di nait Jehoava aks ahn: “Da weh yu di du ya, Ilaija?” 10 Ih ansa ahn seh: “Jehoava di Komanda a di hevnli aamiz, Ah serv yu wid aala mi haat. Bot di peepl a Izrel noh kip yu kovenant, dehn brok dong yu alta dehn, ahn dehn kil yu prafit dehn wid di soad, an Ai da di onli wan weh lef. Ahn now dehn di luk fi chrai kil mi.”* 11 Bot Gaad seh: “Goh stan op pahn di mongtin fronta Jehoava.” Ahn wen Ilaija luk, ih si Jehoava di paas bai, ahn wahn schrang breez mi-di split oapm di mongtin dehn ahn di brok op di big rak dehn fronta Jehoava, bot Jehoava neva deh eena di breez. Afta di breez bloa, dehn mi ga wahn ertkwayk, bot Jehoava neva deh eena di ertkwayk eeda. 12 Afta di ertkwayk, dehn mi ga wahn faiya, bot Jehoava neva eena di faiya. An afta di faiya, Ilaija mi hyaa wahn kaam, loa vais. 13 Az soon az Ilaija hyaa di vais, ih rap ih fays eena ih kloaz an ih gaahn stan op da di enchrans a di kayv. Den wahn vais aks ahn: “Da weh yu di du ya, Ilaija?” 14 Ih ansa ahn seh: “Jehoava di Komanda a di hevnli aamiz, Ah serv yu wid aala mi haat. Bot di peepl a Izrel noh kip yu kovenant, dehn brok dong yu alta dehn, ahn dehn kil yu prafit dehn wid di soad, an Ai da di onli wan weh lef. Ahn now dehn di luk fi chrai kil mi.”*
15 Den Jehoava tel ahn: “Goh bak ahn goh da di wildanes bai Damaskos. Wen yu get deh, anoint Hazayel az king oava Siriya. 16 Ahn yu fi anoint Nimshai granson Jeehoo az king oava Izrel. Ahn yu fi anoint Shayfat son Ilaisha* az wahn prafit afta yoo; Shayfat da fahn Aybl-mehoala. 17 Jeehoo wahn kil enibadi weh get weh fahn Hazayel soad, an Ilaisha wahn kil enibadi weh get weh fahn Jeehoo soad. 18 An Ah stil ga 7,000 peepl eena Izrel hoo neva neel dong fi wership Bayal ahn hoo neva yet kis ahn.”
19 Soh ih lef fahn deh an ih fain Shayfat son Ilaisha di plow wid 24 bul heda ahn. Dehn mi-di goh too bai too, ahn hihn mi deh wid di laas too. Soh Ilaija gaahn tu ahn, an chroa ih kloaz pan ahn. 20 Wen dat hapm, ih lef di bul ahn ron bihain Ilaija ahn seh: “Pleez, mek Ah kis mi ma ahn mi pa fers, den Ah wahn fala yu.” Ahn hihn tel ahn: “Goh. Ai noh di stap yu.” 21 Soh ih gaahn bak ahn tek too bul ahn sakrifais dehn, an ih yooz di plow ahn di yoak* fi staat wahn faiya soh dat ih ku bail di meet fahn di bul. Den ih giv it tu di peepl, ahn dehn eet it. Afta dat, ih get op an ih fala Ilaija ahn staat serv ahn.