Dyooteronomi

22 “If unu si sombadi bul er sheep di schray weh, unu noh fi ak laik if unu neva see’t. Unu fi mek shoar dat unu kehr it bak tu di persn. 2 Bot if da persn noh liv kloas tu unu er unu noh noa hoo di animal bilangz tu, den unu fi kehr di animal da unu hows an ih fi stay wid unu til di oana kohn luk far it. Den unu fi giv it bak tu ahn. 3 Unu fi du di saym ting if unu fain wahn dongki, sohn kloaz, er eniting els weh sohnbadi laas. Unu noh fi ak laik unu neva see’t.

4 “If unu si sohnbadi dongki er bul jrap dong pahn di road, unu noh fi ak laik unu neva see’t. Bot unu fi mek shoar dat unu help ahn pik op ih animal.

5 “Wahn laydi noh fi wayr man kloaz, an wahn man noh fi wayr laydi kloaz, bikaaz Jehoava unu Gaad hayt enibadi weh du dat.

6 “If unu fain wahn berd nes pahn di road, weda ih deh pahn wahn chree er pahn di grong, an ih ga sohn baybi er sohn eg ahn di ma di sidong pahn di baybi dehn er di eg dehn, unu noh fi tek di baybi dehn lang wid di ma. 7 Bot if unu waahn tek di baybi dehn, unu fi mek shoar dat unu let goh di ma. Unu fi du dat soh dat tingz ku goh gud fi unu an unu ku liv fi wahn lang taim.

8 “If unu bil wahn hows, unu fi mek shoar dat unu bil sohnting laik wahn raylin rong unu roof,* soh dat unu an unu famili noh wahn gilti if sohnbadi jrap aafa di roof ahn ded.

9 “Unu onli ku plaant grayp eena unu grayp aachad, bikaaz if unu plaant too difrent kaina seed, den evriting weh groa fahn di seed weh unu plaant er fahn di grayp vain eena da aachad wahn haftu bee fi di hoali plays.

10 “Unu noh fi mek wahn bul ahn wahn dongki plow wahn feel tugeda.

11 “Unu noh fi wayr kloaz weh mek owta wul ahn linen weh weev tugeda.

12 “Unu fi mek sohn dekorayshan owta chred ahn heng dehn rong di kloaz weh unu wayr.

13 “If wahn man geh marid tu wahn yong laydi an ih ga seks wid ahn bot afta dat ih staat tu hayt ahn 14 an ih akyooz ahn dat ih du sohnting bad an ih taak bad bowt ahn wen ih seh: ‘Ah mi geh marid tu dis yong laydi, bot wen Ah mi ga seks wid ahn, Ah fain owt dat shee da noh wahn verjin.’* 15 Den di yong laydi ma ahn pa gwehn da di siti gayt wehpaat di eldaz deh ahn gi dehn proof dat di yong laydi da-mi wahn verjin. 16 Di yong laydi pa fi tel di eldaz, ‘Ah mek mi daata geh marid tu dis man, bot hihn hayt ahn 17 an ih di akyooz shee dat ih du sohnting bad wen ih seh dat mi daata da neva wahn verjin. Bot dis da proof dat shee da-mi wahn verjin.’ Den dehn fi spred owt di klaat fronta di eldaz a di siti. 18 Di eldaz fahn di siti fi tek di man ahn ponish ahn. 19 Dehn fi chaaj ahn 100 pees a silva* ahn giv it tu di yong laydi pa, bikaaz da man shaym di Izrelait laydi weh da-mi wahn verjin, ahn shee wahn kantinyu fi bee ih waif. Hihn wahn kyaahn divoas shee fi az lang az ih liv.

20 “Bot if weh di man seh da chroo, ahn dehn noh ga no proof dat di yong laydi da-mi wahn verjin, 21 den di eldaz fi kehr di yong laydi fronta ih pa hows, ahn di peepl fahn di siti fi stoan ahn til ih ded, bikaaz shee bring shaym pahn di nayshan a Izrel wen ih komit sekshwal imoraliti* wail ih mi-di liv da ih pa hows. Soh unu fi geh rid a eniting weh bad fahn monks unu.

22 “If unu fain owt dat wahn man mi ga seks wid wahn laydi weh marid tu wahn neks man, den di too a dehn fi ded. Unu fi kil di man ahn di laydi weh ih mi ga seks wid. Soh unu fi geh rid a eniting weh bad fahn monks di nayshan a Izrel.

23 “If wahn yong laydi weh da wahn verjin ingayj tu wahn man ahn shee meet wahn nada man wen ih goh da di siti ahn hihn ga seks wid ahn, 24 den unu fi kehr di too a dehn da di siti gayt ahn stoan dehn til dehn ded. Unu fi kil di yong laydi bikaaz shee neva skreem fi help eena di siti ahn di man bikaaz hihn bring shaym pahn wahn neks man waif. Soh unu fi geh rid a eniting weh bad fahn monks unu.

25 “Bot if di man meet di yong laydi weh ingayj wail shee deh owtsaida di siti ahn hihn rayp ahn, den unu onli fi kil di man. 26 Unu noh fi du notn tu di yong laydi bikaaz shee neva sin an ih noh dizerv fi ded. Dis da di saym ting laik if sohnbadi atak wahn neks persn ahn kil ahn,* 27 bikaaz di man mi meet di yong laydi weh ingayj tu wahn neks man owtsaida di siti ahn shee mi skreem fi help, bot nobadi mi dehdeh fi sayv shee.

28 “If wahn man meet wahn yong laydi weh da wahn verjin ahn shee noh ingayj tu sohnbadi ahn hihn foas* shee fi ga seks wid ahn, an sohnbadi fain owt weh dehn du, 29 den di man weh mi ga seks wid di yong laydi haftu gi fi shee pa 50 pees a silva,* ahn shee wahn bee fi hihn waif. Hihn kyaahn divoas shee fi az lang az ih liv, bikaaz ih bring shaym pahn shee.

30 “Wahn man noh fi tek ih pa waif, soh dat ih noh shaym ih pa.