Fers Kingz
18 Afta sohn taim paas, joorin di terd yaa a di jrowt, Jehoava tel Ilaija: “Goh da Ayhab, an Ai wahn mek ih rayn pahn di ert.” 2 Soh Ilaija gaahn da Ayhab wail dehn mi-di ga wahn bad famin da Samayrya.
3 Meenwail, Ayhab kaal Obadaiya, hoo mi in chaaj a di king palis. (Now Obadaiya mi ga lata rispek fi Jehoava, 4 ahn wen Jezibel mi-di kil owt Jehoava prafit dehn, Obadaiya geh 100 prafit an ih put 50 a dehn eena wahn kayv ahn 50 a dehn eena wahn nada kayv, ahn hihn gi dehn bred ahn waata.) 5 Den Ayhab tel Obadaiya: “Goh da aala di spring ahn vali* dehn weh deh eena di lan. Maybi wi wahn ku fain inof graas fi kip di haas ahn di dongki dehn alaiv. If nat, wi animal dehn wahn ded owt.” 6 Soh dehn divaid di lan bitween dehnself. Ayhab gaahn wan dairekshan bai ihself an Obadaiya gaahn di ada dairekshan bai ihself.
7 Wail Obadaiya mi deh pan ih way, Ilaija mi dehdeh fi meet ahn. Rait away Obadaiya rekonaiz ahn, an ih neel dong wid ih fays tu di grong an ih seh: “Mi laad Ilaija, da yoo dat?” 8 Hihn tel ahn: “Da mee. Goh tel yu laad dat Ai deh ya.” 9 Bot hihn tel ahn: “Da weh sin Ah komit dat yu waahn sen mi da Ayhab fi mek ih kil mi? 10 Ah swayr eena di naym a di livin Gaad Jehoava dat mi laad don luk fi yu eena evri nayshan ahn kingdom. Afta dehn tel ahn ‘Ih noh deh ya,’ hihn mek aala di nayshan ahn kingdom dehn swayr dat dehn kudn fain yu fi chroo. 11 Now yoo di tel mee fi goh ahn tel mi laad dat yoo deh ya. 12 Wen Ah lef yu, Jehoava spirit wahn kehr yu da wahn plays weh Ai noh noa. Ahn wen Ah tel Ayhab ahn hihn noh fain yu, fi shoar ih wahn kil mi. Bot aala mai laif Ah rispek Jehoava. 13 Mi laad, nobadi noh tel yu weh Ah du wen Jezibel mi-di kil Jehoava prafit dehn? Nobadi noh tel yu bowt how Ah mi haid 100 a Jehoava prafit ahn put 50 a dehn eena wahn kayv ahn 50 a dehn eena wahn nada kayv, ahn how Ah mi gi dehn bred ahn waata? 14 Bot now yu di tel mi fi goh ahn tel mi laad dat yoo deh ya. Fi shoar ih wahn kil mi.” 15 Bot Ilaija seh: “Jehoava da di Komanda a di hevnli aamiz, ahn hihn da di wan weh Ai serv. Ah swayr eena di naym a di livin Gaad, dat tudeh Ah gwehn goh si Ayhab.”
16 Soh Obadaiya gaahn tel Ayhab weh di hapm, an Ayhab gaahn fi meet Ilaija.
17 Az soon az Ayhab mi si Ilaija, ih tel ahn: “Da yoo. Yoo da di wan weh di kaaz lata chrobl fi Izrel.”
18 Soh ih tel ahn: “Da noh mee di kaaz chrobl fi Izrel, bot da yoo ahn yu famili, bikaaz unu neva obay weh Jehoava koman unu fi du an unu wership di Bayal dehn.* 19 Ahn now, kaal aala Izrel da Mongt Karmel, lang wid di 450 prafit weh wership Bayal ahn di 400 prafit weh wership di Ashera poas ahn weh eet da Jezibel taybl.” 20 Soh Ayhab sen wahn mesij tu evribadi da Izrel, ahn dehn gyada aala di prafit tugeda da Mongt Karmel.
21 Den Ilaija gaahn tu di peepl ahn seh: “How lang unu wahn tek fi mek op unu main?* If Jehoava da di chroo Gaad, fala hihn; bot if Bayal da di chroo gaad, den fala hihn!” Bot di peepl neva ansa. 22 Den Ilaija tel di peepl: “Ai da di onli wan a Jehoava prafit weh lef, wail Bayal ga 450 man weh da fi hihn prafit. 23 Mek dehn gi wi too yong bul, mek dehn tek wan yong bul fi dehnself ahn kot it op tu peesiz, ahn dehn fi put it pahn di wud, bot dehn noh fi lait faiya pan it. An Ai wahn pripyaa di ada yong bul, an Ah wahn put it pahn di wud, bot Ah noh wahn lait faiya pan it needa. 24 Den unu kaal owt tu unu gaad bai ih naym an Ah wahn kaal owt tu Jehoava. Di Gaad weh ansa ahn mek faiya kohn dong fahn hevn da di chroo Gaad.” Den aal di peepl ansa: “Wi agree wid weh yu seh.”
25 Den Ilaija tel Bayal prafit dehn: “Unu pik wahn yong bul ahn pripyaa it fers, bikaaz da moa a unu. Den unu kaal owt tu unu gaad bai ih naym, bot unu noh fi lait faiya pan it.” 26 Soh dehn tek di yong bul weh dehn mi get, ahn dehn pripyaa it. Ahn dehn kip aan di hala owt tu Bayal fahn maanin til aftanoon, ahn dehn mi seh: “Bayal, pleez ansa wi!” Bot dehn neva geh no ansa ahn dehn mi kip di hap rong di alta weh dehn mek. 27 Rong di midl a di day Ilaija staat mek fon a dehn an ih seh: “Unu hala haada man! Hihn da noh wahn gaad den? Maybi ih main deh pahn sohnting els er ih gaahn da baachroom.* Er maybi ih jrap asleep ahn sohnbadi need fi goh wayk ahn op!” 28 Dehn mi-di hala owt lowd, ahn dehn mi-di kot op dehnself wid naif ahn spyaa, akaadn tu dehn kostom, til blod staat poar owt aal oava dehn badi. 29 Twelv aklak kom ahn gaan, ahn dehn stil mi-di goh aan krayzi.* Ahn dehn kantinyu laik dat til eevnin taim wen dehn wuda aafa di grayn aafrin, bot dehn neva hyaa no vais, ahn dehn neva geh no ansa. Bayal neva mi-di pay dehn no main.
30 Afta wahn wail, Ilaija tel di peepl: “Kohn tu mi.” Soh aala di peepl gaahn tu ahn, an den hihn fiks bak Jehoava alta weh mi geh dischrai. 31 Den Ilaija tek 12 stoan, wan fi eech a Jaykob son dehn chraib. Jaykob da-mi di wan weh Jehoava mi tel: “Yu naym wahn bee Izrel.” 32 Hihn bil wahn alta wid di stoan dehn fi aana Jehoava naym. Den ih dig wahn jrayn rong di alta. Ahn di ayrya fahn di alta tu di jrayn mi big inof fi plaant 20 pong* a seed. 33 Afta dat ih araynj op aal di pees a wud, kot op di yong bul, ahn den put it pahn di wud. An ih seh: “Ful op foa big jaar wid waata ahn den poar it pahn di bon aafrin ahn pahn di wud.” 34 Den ih seh: “Du it agen.” Soh dehn du it agen. Ahn fi di terd taim ih seh: “Du it agen.” Soh dehn du it agen. 35 Ahn di waata ron aal rong di alta, an ih ful op di jrayn wid waata tu.
36 Rong eevnin taim wen dehn aafa op di grayn aafrin, Ilaija di prafit gaan op tu di alta ahn seh: “Jehoava, di Gaad a Aybraham, Aizak, an Izrel, tudeh mek evribadi noa dat yoo da Izrel Gaad, dat Ai da yu servant, ahn dat evriting weh Ai mi du da weh yoo tel mi fi du. 37 Ansa mi, Jehoava! Ansa mi soh dat dehnya peepl ku noa dat yoo, Jehoava, da di chroo Gaad ahn dat yoo da di wan weh di mek dehn kohn bak tu yoo.”
38 Afta dat Jehoava sen dong faiya fahn hevn. Ahn di faiya eet op di bon aafrin, di pees a wud dehn, di stoan dehn, ahn di dos, an ih jrai op di waata weh mi deh eena di jrayn. 39 Az soon az di peepl dehn si dat, dehn bow dong wid dehn fays tu di grong ahn seh: “Jehoava da di chroo Gaad! Jehoava da di chroo Gaad!” 40 Den Ilaija tel dehn: “Unu grab di Bayal prafit dehn! Noh mek non a dehn get weh!” Rait away dehn grab dehn, an Ilaija kehr dehn dong da Kaishon Schreem* ahn kil dehn deh.
41 Den Ilaija tel Ayhab: “Goh op goh eet ahn jrink, kaaz ih song laik wahn hevi rayn di kohn dong.” 42 Soh Ayhab gaan op fi eet ahn jrink. An Ilaija gaan op tu di tap a Mongt Karmel ahn neel dong pahn di grong wid ih fays kloas tu ih nee. 43 Den ih tel ih servant: “Pleez goh op lee haiya ahn luk tuwaadz di see.” Soh ih servant gaan op gaahn luk, an ih seh: “Ah noh si notn deh.” Ahn sevn moa taim Ilaija tel ahn, “Goh bak.” 44 Ahn pahn di sevent taim, ih servant tel ahn: “Ah si wahn lee klowd bowt di saiz a sohnbadi han di kom owta di see.” Ahn den Ilaija seh: “Goh tel Ayhab fi geh di chariyat redi! Tel ahn fi goh dong soh dat di hevi rayn noh kip ahn bak!” 45 Meenwail, di skai geh daak, di breez staat tu bloa, an ih staat tu rayn haad. An Ayhab kantinyu raid eena ih chariyat til ih reech da Jezriyel. 46 Bot Jehoava giv Ilaija powa, an ih tai op ih kloaz rong ih ways ahn ron heda Ayhab aal di way tu Jezriyel.