Saam
Wahn noat fi di dairekta: Play dis sang tu di choon a “Di Liliz.” Dis da Dayvid sang.
69 Oa Gaad, sayv mi, kaaz di waata di chretn fi tek weh mi laif.
2 Ah sink deep dong eena di mod; Ah kyaahn feel salid grong.
Ah deh eena deep waata,
Ahn di schrang korant di bak mi weh.
3 Ah hala fi help til Ah taiyad,
Ahn mi chroat geh hoas anaal.
Mi aiy dehn luk week ahn taiyad wail Ah di wayt pahn mi Gaad.
4 Di amonk a peepl weh hayt mi fi no reezn
Da moa dan di amonk a hyaa weh Ah ga pahn mi hed.
Ah ga lata enimiz weh di chrai kil mi, dehn daynjaros bad.
Dehn foas mi fi gi dehn tingz weh dehn klaym seh Ah teef.
5 Oa Gaad, yoo wel ahn noa aal di foolish tingz weh Ah du;
Ah kyaahn haid mi sin dehn fahn yu.
6 Moas Hai Laad, Ah pray dat dehn wan weh put dehn hoap eena yoo noh luk shaym bikaaz a mee,
Oa Jehoava di Komanda a di hevnli aamiz.
Pleez noh mek dehn wan weh pen pahn yu luk shaym bikaaz a mee,
Oa Gaad a Izrel.
7 Peepl insolt mi bikaaz Ah di serv yoo;
Shaym kova op mi fays.
8 Mi breda dehn chreet mi laik if Ai da wahn schraynja;
Mi ma son dehn chreet mi laik if Ai da wahn farina.
9 Ah feel soh moch lov fi yu hows dat da laik faiya weh di bon eensaida mi,
Ahn di tingz peepl mi seh fi insolt yoo, da weh dehn seh fi insolt mee tu.
10 Dehn insolt mi wen Ah hombl miself* ahn staat tu faas.*
11 Dehn staat tu mek fon a mi wen Ah wayr kloaz weh mek owta goat hyaa.*
12 Ai da di tapik a di kanvasayshan fi dehn wan weh di sidong da di siti gayt;
Di jronkad dehn stay sing bowt mi.
13 Wen yoo tink da di rait taim,
Oa Jehoava, Ah hoap dat yu hyaa mi pryaa.
Bikaaz yu ga lata lov,* Oa Gaad,
Ansa mi ahn shoa mi dat yu da wahn sayvya weh Ah ku pen pan.
14 Haal mi fahn owta di swamp;
Noh mek Ah sink dong eena it.
Sayv mi fahn dehn wan weh hayt mi
Ahn fahn di deep waata.
15 Noh mek di schrang korant bak mi weh,
Er mek di deep waata swala mi op,
Ner mek di pit* kova oava mi.
16 Ansa mi, Oa Jehoava, bikaaz yu lov* soh deep.
Bikaaz yu soh mersiful, noh ignoar mi.
17 Noh haid yu fays fahn mee, yu servant.
Pleez hori ansa mi bikaaz Ah deh eena chrobl.
18 Kohn kloas tu mi ahn reskyu mi;
Sayv mi fahn mi enimi dehn.
19 Yoo noa aala di insolt ahn shaym weh Ah sofa.
Yoo noa aala mi enimi dehn.
20 Aala di insolt dehn brok mi haat, ahn notn ku fiks di damij weh ih kaaz.*
Ah mi-di hoap fi mek sohnbadi feel sari fi mi, bot non neva deh,
An Ah mi-di hoap fi mek sohnbadi komfert mi, bot Ah neva fain nobadi.
21 Bot insteda food, dehn gi mi paizn.*
Ahn wen Ah mi tersti, dehn gi mi vineega fi jrink.
22 Mek dehn fees* ahn dehn richiz bee wahn chrap fi dehn.
23 Mek dehn aiy geh dol til dehn kyaahn eevn si,
Ahn mek dehn leg chrimbl bikaaz dehn frayd.
24 Mek dehn feel yu anga,*
Ahn shoa dehn how yu beks bad wid dehn.
25 Mek dehn abandan dehn kyamp,
Ahn noh mek nobadi liv eena dehn tent.
26 Dehn kip di goh afta dehn wan weh yoo hert,
Ahn dehn kip di taak bowt di payn weh yoo mi kaaz tu sohn peepl.
27 Bikaaz dehn gilti, mek di ponishment fi dehn gilt kohn dong haad pahn dehn;
Noh mek dehn benifit fahn yu raichosnis.
28 Irays dehn naym fahn di buk a laif;
Noh mek dehn naym geh rait dong monks di raichos.
29 Ah di sofa wahn lat an Ah deh eena lata payn.
Oa Gaad, Ah pray dat yu sayv mi ahn protek mi.
30 Ah wahn sing fi prayz Gaad naym,
An Ah wahn giv ahn tanks fi aana ahn.
31 Dis wahn mek Jehoava eevn moa hapi dan if wi aafa op wahn bul,
Wahn yong bul weh don groa op.
32 Di hombl wahn si how Gaad sayv ih peepl ahn dehn wahn rijais sayka dat.
Schrentn unu haat, aala unu weh di saach fi Gaad.
33 Bikaaz Jehoava di lisn tu dehn wan weh poa;
Ih noh wahn rijek ih peepl weh da prizna.
34 Mek hevn an ert prayz ahn,
An mek di see an evriting eena it prayz hihn tu.
35 Bikaaz Gaad wahn sayv Zaiyan
Ahn hihn wahn bil bak di siti dehn eena Jooda,
Ahn fi hihn peepl dehn wahn liv deh an ih* wahn bilangz tu dehn.
36 Aala fi hihn servant disendant wahn inherit it,
Ahn peepl weh lov fi hihn naym wahn liv deh.