Dyooteronomi
21 “If sohnbadi fain wahn ded badi eena wahn feel eena di lan weh Jehoava unu Gaad di giv unu ahn nobadi noh noa hoo kil ahn, 2 den unu joj an elda dehn fi goh owt ahn si wich siti deh kloasis tu di ded badi. 3 Den di eldaz fahn di siti weh deh kloasis tu di ded badi fi tek wahn yong kow weh neva pul wahn yoak* bifoa er du eni kaina werk, 4 ahn di eldaz fahn da siti fi kehr di yong kow dong tu wahn vali* wehpaat lata waata di floa ahn wehpaat nobadi plow di lan ner plaant seed, ahn rait deh dehn fi brok di yong kow nek.
5 “Ahn di Leevait dehn weh da prees fi dehdeh tu, bikaaz Jehoava unu Gaad chooz dehn fi serv ahn, an da dehn yooz Jehoava naym wen dehn bles di peepl. Dehn wahn disaid how fi handl eni prablem weh kom op wen sombadi atak wahn nada persn. 6 Den aala di eldaz fahn di siti weh deh kloasis tu di ded badi fi wash dehn han oava di yong kow weh dehn mi kil eena di vali. 7 Ahn dehn fi seh, ‘Wee neva kil dis persn, ahn wi neva si nobadi kil ahn needa. 8 Oa, Jehoava, noh blaym Izrel, hoo da yu peepl weh yu mi sayv, ahn noh mek dehn bee gilti sayka weh sombadi inosent ded.’ Afta dat dehn noh wahn bee gilti nohmoh. 9 If unu du weh Jehoava tel unu fi du, den unu noh wahn bee rispansabl fi di inosent persn weh mi ded.
10 “If unu fait gens unu enimi dehn ahn Jehoava unu Gaad win di fait fi unu an unu kyapcha dehn az priznaz, 11 ahn wan a unu si wahn byootiful wuman weh unu kyapcha an unu laik si ahn an unu waahn mek ih bee unu waif, 12 unu ku bring ahn da unu hows. Shee fi shayv ih hed, kot ih naylz, 13 ahn tek aaf di kloaz weh ih mi-di wayr wen dehn kyapcha ahn. Fi wahn mont shee wahn baal fi ih ma an ih pa. Afta dat di man ku ga seks wid ahn, an hihn wahn bee fi shee hozban ahn shee wahn bee fi hihn waif. 14 Bot if di man noh hapi wid ahn, den ih fi mek shee goh eniway weh shee waahn. Bot hihn noh fi chreet ahn bad ner sel ahn, sins ih mi foas shee fi bee ih waif.
15 “If wahn man ga too waif ahn hihn lov wan waif moa dan di ada wan, ahn too a dehn ga pikni far ahn, an di fersbaan son bilang tu di waif weh ih noh lov az moch, 16 den pahn di day wen ih giv ih inheritans tu ih son dehn, ih noh fi tek weh di rait weh bilangz tu di fersbaan son, hoo da di son weh ih ga wid ih waif weh ih noh lov az moch. An ih noh fi giv it tu ih son weh ih ga wid di waif weh ih lov moa. 17 Hihn fi giv ih son weh ih ga wid ih waif weh ih noh lov az moch wahn inheritans fahn owta evriting weh ih gat. Wateva ih giv ih ada pikni dehn, ih fi gi da son dobl di amonk a tingz. Ahn dat wahn shoa dat ih aksep ahn az ih fersbaan son. Da son da di fers pikni weh ih gat, ahn hihn ga di rait az di fersbaan son.
18 “If wahn man ga wahn son weh stobant an ih noh rispek atariti an ih noh waahn obay ih ma ner ih pa, ahn dehn don chrai karek ahn an ih stil noh waahn lisn tu dehn, 19 ih ma an ih pa fi grab ahn an kehr ahn da di eldaz weh deh da di gayt a di siti wehpaat ih liv. 20 Ahn dis da weh dehn fi tel di eldaz fahn di siti, ‘Fi wee son stobant an ih noh rispek atariti, an ih noh waahn obay wi. Ih eet tu moch an ih da wahn jronkad.’ 21 Den aala di peepl fahn di siti wahn stoan ahn til ih ded. Unu fi geh rid a eniting weh bad fahn monks unu. An aala di Izrelait dehn wahn hyaa weh hapm ahn dehn wahn geh frayd.
22 “If wahn man komit wahn sin an ih haftu ded sayka weh ih du an unu kil ahn an heng ih badi pahn wahn stayk, 23 ih badi noh fi stay di heng pahn di stayk aal nait. Bot unu fi mek shoar dat unu beri ahn da saym day, bikaaz enibadi weh geh heng da sohnbadi weh Gaad kers. An unu fi mek shoar dat di lan weh Jehoava unu Gaad di giv unu az wahn inheritans stay kleen.