Dyooteronomi

4 “Oa Izrel, lisn tu di roolz ahn laa dehn weh Ah di teech unu, an unu fi obay dehn soh dat unu ku kantinyu liv ahn goh ahn kanka di lan weh Jehoava, di Gaad a unu ansesta dehn, di giv unu. 2 Unu noh fi ad notn ner tek owt notn fahn di komanment dehn weh Ah di giv unu. Bot unu fi obay di komanment dehn fahn Jehoava unu Gaad weh Ah di giv unu.

3 “Unu mi si fi unuself weh Jehoava mi du tu di peepl weh mi wership di Bayal gaad da Peeyor. Jehoava unu Gaad mi dischrai aala dehn fahn monks unu. 4 Bot aala unu stil alaiv, bikaaz unu obay Jehoava unu Gaad. 5 Ah don teech unu di roolz ahn laa dehn weh Jehoava mi Gaad mi koman mi fi teech unu, soh dat unu ku obay dehn eena di lan weh unu wahn kanka. 6 Unu fi mek shoar dat unu obay dehn bikaaz dis wahn shoa dat unu waiz ahn dat unu ga andastandin. Ahn wen di peepl fahn di ada nayshan dehn hyaa bowt dehnya roolz, dehn wahn seh: ‘Dis powaful nayshan ga lata peepl weh waiz ahn weh ga andastandin.’ 7 Unu wel ahn noa dat Jehoava wi Gaad deh kloas tu wi wen wi pray tu ahn. Fi wee nayshan difrent fahn aala di ada nayshan dehn, bikaaz fi dehn gaadz noh deh kloas tu dehn. 8 Dehn noh ga no ada nayshan weh ga raichos roolz ahn laa laik di Laa weh Ai di giv unu tudeh.

9 “Unu jos bee kyaaful. Mek shoar dat unu noh ferget di tingz weh unu si soh dat ih aalwayz deh eena unu haat fi az lang az unu liv. Unu fi aalso teech dehndeh tingz tu unu pikni dehn ahn tu unu granpikni dehn. 10 Pahn di day wen unu mi stan op fronta Jehoava unu Gaad da Hoareb, Jehoava tel mi, ‘Bring aala di peepl tu mi fi mek dehn hyaa weh Ah wahn seh, soh dat dehn ku laan fi ga lata rispek fi mee fi az lang az dehn liv pahn di ert ahn soh dat dehn ku teech dehn pikni fi ga lata rispek fi mee.’

11 “Soh unu mi kohn kloas ahn stay da di batam a di mongtin. Wahn faiya mi deh pahn di mongtin ahn da faiya mi gaan op eena di skai. Ih mi pich blak ahn dehn mi ga sohn tik klowd weh mi daak. 12 Ahn Jehoava mi staat taak tu unu fahn owta di faiya. Unu mi hyaa sohnbadi di taak bot unu neva si nobadi. Unu onli mi hyaa weh ih mi-di seh. 13 Ahn hihn mi mek wahn kovenant* wid unu, weh da di Ten Komanment,* weh ih mi koman unu fi obay. Afta dat ih rait dehn dong pahn too flat stoan. 14 Joorin da taim, Jehoava mi koman mi fi teech unu di roolz ahn laa dehn weh unu fi obay wen unu goh liv eena di lan weh unu wahn kanka.

15 “Pahn di day wen Jehoava mi taak tu unu fahn di midl a di faiya da Hoareb, unu neva si nobadi. Soh mek shoar 16 dat unu noh du notn wikid ahn mek eni imij fi unuself weh reprizent wahn man er laydi, 17 er weh reprizent eni animal pahn di ert, eni berd weh flai eena di skai, 18 eni animal weh kraal pan di grong er eni fish weh liv eena di waata. 19 Jehoava unu Gaad mi mek di son, di moon, an aala di staarz fi di peepl weh liv pahn di ert. Soh wen unu luk op eena di skai ahn si dehndeh tingz, unu noh fi waahn bow dong tu dehn ahn wership dehn. 20 Now unu da Jehoava peepl. Hihn mi bring unu owta Eejip weh da laik wahn hat hat fernis* weh melt metal, soh dat unu ku bee fi hihn inheritans.

21 “Jehoava mi geh beks wid mi sayka unu, an ih mi swayr dat ih neva mi wahn mek Ah kraas di Jaadn Riva ahn goh eena di gud lan weh Jehoava unu Gaad di giv unu az wahn inheritans. 22 Ai wahn ded eena dis lan; Ah noh wahn kraas di Jaadn Riva, bot unu wahn kraas oava ahn kanka da gud lan. 23 Unu fi mek shoar dat unu noh ferget di kovenant weh Jehoava unu Gaad mek wid unu. An unu noh fi mek no kaina imij weh luk laik sohnting weh deh eena hevn er weh deh pahn di ert er eena di waata, bikaaz Jehoava unu Gaad tel unu noh fi du it. 24 Jehoava unu Gaad da laik wahn faiya weh bon op evriting, ahn hihn da wahn Gaad weh waahnt unu wership onli hihn.

25 “Eevn if unu don di liv eena di lan fi wahn lang taim an unu ga pikni ahn granpikni an unu du bad tingz ahn mek sohn imij ahn du tingz weh Jehoava unu Gaad si az wikid an unu mek ih geh beks, 26 den fi shoar unu wahn ded owt faas eena di lan weh unu wahn kanka afta unu kraas di Jaadn Riva. Unu noh wahn liv deh fi wahn lang taim, bikaaz unu wahn geh dischrai. An evribadi da hevn ahn pahn di ert da mai witnisiz gens unu. 27 Jehoava wahn tek unu owta unu lan, ahn Jehoava wahn skyata unu monks di ada nayshan dehn. Sayka dat, onli wahn lee bit a unu wahn servaiv monks dehndeh nayshan. 28 Rait deh unu wahn haftu wership di gaadz weh peepl mek owta wud ahn stoan. Dehndeh gaadz kyaahn si, hyaa, eet, er smel.

29 “Bot if unu luk fi Jehoava unu Gaad wid aala unu haat an aala unu soal* wail unu dehdeh, den fi shoar unu wahn fain ahn. 30 An eena di fyoocha wen aala dehndeh tingz hapm tu unu an unu di sofa wahn lat, den unu gwehn bak tu Jehoava unu Gaad ahn lisn tu ahn. 31 Jehoava unu Gaad da wahn Gaad weh shoa lata mersi. Hihn noh wahn lef unu er dischrai unu er ferget di kovenant weh ih mek wid unu ansestaz.

32 “Tink bowt weh mi hapm eena di paas bifoa unu mi egzis, fahn di day wen Gaad mek hyoomanz pahn di ert op tu now. Saach fahn wan en a di ert tu di neks en a di ert. Notn laik dis eva hapm bifoa ahn nobadi ku seh dat dehn hyaa bowt dis eeda. 33 Nobadi els hyaa Gaad di taak owta di faiya di way unu mi hyaa hihn. Unu mi hyaa hihn an unu stil liv! 34 Jehoava unu Gaad neva tek eni ada nayshan fi ihself fahn monks wahn nada nayshan laik weh ih mi du wid unu da Eejip. Unu mi si fi unuself how ih joj peepl, du lata miraklz, fait fi unu, du lata fraitnin tingz, an ih mi shoa ih powa ahn schrent wen ih mi tek unu owta da lan. 35 Unu geh fi si dehndeh tingz soh dat unu ku noa dat Jehoava da di chroo Gaad, ahn dehn noh ga no ada Gaad laik hihn. 36 Hihn mi mek unu hyaa ih vais fahn hevn soh dat ih ku karek unu. Ahn hihn mi mek unu si ih big faiya pahn di ert, an unu mi hyaa weh ih seh fahn owta di faiya.

37 “Hihn mi lov unu ansesta dehn ahn hihn mi chooz fi dehn disendant, ahn sayka dat, hihn mi deh wid unu wen ih mi yooz ih powa fi bring unu owta Eejip. 38 Hihn mi dischrai di ada nayshan dehn weh mi biga ahn moa powaful dan unu. Ahn hihn mek unu goh eena fi dehn lan an ih giv unu fi dehn lan az wahn inheritans, laik weh unu si tudeh. 39 Soh memba dis day ahn neva ferget dat Jehoava da di chroo Gaad da hevn ahn pahn ert. Ahn dehn noh ga no ada Gaad laik hihn. 40 Unu fi obay ih roolz ahn komanment dehn weh Ah di giv unu tudeh, soh dat evriting ku goh gud fi unu ahn fi unu pikni dehn, ahn soh dat unu ku liv wahn lang taim eena di lan weh Jehoava unu Gaad di giv unu.”

41 Rong da taim Moaziz mi set chree siti wan said pahn di ees said a di Jaadn Riva. 42 If sohnbadi kil wahn nada persn bai aksident an ih neva hayt da persn, den ih fi ron tu wan a dehndeh siti soh dat ih ku sayv ih laif. 43 Di fers siti da Beezer weh deh eena di wildanes pahn tap a di flat lan, ahn da siti da fi Rooben chraib. Di sekant siti da Raymot weh deh da Gilyad, ahn da siti da fi Gad chraib. Di terd siti da Goalan weh deh da Bayshan, ahn da siti da fi Manaaseh chraib.

44 Now Moaziz mi gi Gaad Laa tu di Izrelait dehn. 45 Da Laa da di rimaindaz, di roolz, ahn komanment dehn weh Moaziz mi gi di Izrelait dehn afta dehn kom owta Eejip. 46 Hihn mi gi dehn da Laa eena di vali weh mi deh kloas tu di Jaadn Riva, ahn da vali mi deh fronta Bet-peeyor, weh mi deh eena di lan weh bilangz tu King Saihon, hoo da-mi wahn Amorait. Hihn mi-di liv da Hesbon ahn Moaziz ahn di Izrelait dehn mi win di fait gens hihn afta dehn kom owta Eejip. 47 Dehn mi kanka fi hihn lan ahn di lan weh bilangz tu Og, hoo da di king a Bayshan. Dehn da-mi too Amorait king weh mi rool pahn di ees said a di Jaadn Riva. 48 Da lan staat fahn Aroawer, weh deh pahn di ej a di Arnon Vali,* an ih goh op tu Mongt Saiyon, weh da Hermon. 49 Da lan inklood di Araba weh deh pahn di ees said a di Jaadn Riva, an ih goh az faar az di See a di Araba,* weh deh pahn di batam a Pisga.