Saam

28 Oa Jehoava mi Rak, Ah kip di aks yu fi help;

Pleez noh ignoar mi.

If yu noh ansa mi,

Ah wahn en op jos laik dehn wan weh gwehn dong tu di pit.*

 2 Hyaa mi wen Ah di krai owt tu yu fi help,

Az Ah rayz mi han tuwaadz di Moas Hoali Room weh deh eena yu hows.

 3 Noh jreg mi weh lang wid wikid peepl, lang wid dehn wan weh praktis fi du bad tingz,

Dehn wan weh priti op dehn werdz wen dehn di taak tu dehn nayba, bot reeli, dehn ga wahn wikid haat.

 4 Ponish dehn fi weh dehn du,

Fi di wikid tingz weh dehn praktis.

Yes, ponish dehn fi weh dehn du,

Fi aal di tingz weh dehn gilti a.

 5 Bikaaz dehn noh pay no main tu di tingz weh Jehoava du,

Tu di wandaful tingz weh hihn du.

 6 Prayz Jehoava,

Bikaaz hihn hyaa wen Ah di bayg ahn fi help.

 7 Jehoava da mi schrent ahn mi sheel;

Ah chros ahn wid aala mi haat.

Hihn help mi, ahn dat mek mi haat feel hapi,

Soh Ah wahn prayz ahn wid mi sang.

 8 Jehoava gi schrent tu ih peepl;

Hihn da wahn sayf siti, ahn hihn sayv di wan weh hihn pik eena wahn amayzin way.