Praverbz
29 Wahn persn weh geh stobant eevn afta dehn karek ahn soh moch taimz
Wahn geh dischrai sodn-wan.
2 Wen wahn raichos persn ga powa, peepl rijais,
Bot wen wahn wikid persn rool, peepl groan.
3 Wahn man weh lov wizdom mek ih pa hapi,
Bot wahn persn weh kip kompni wid di prastichoot dehn di ways ih richiz.
4 Wen wahn king rool eena wahn fyaa way, ih kingdom wahn bee sikyoar,
Bot wahn man weh fain wayz fi geh sohn gif az wahn braib dischrai ih kingdom.
5 Wahn persn weh laik sweet taak ih nayba
Set wahn chrap fronta ih fut dehn.
6 Raichos peepl sing, ahn dehn hapi.
Bot wen wahn wikid persn sin, dat da laik wahn chrap far ahn.
7 Wahn raichos persn kay bowt poa peepl weh noh geh jostis,
Bot wahn wikid persn noh kay bowt dehn non ataal.
8 Peepl weh boasi da laik dehn wan weh set wahn siti pahn faiya,
Bot wahn waiz persn kaam dong wahn persn weh beks.
9 Wen wahn waiz persn staat kwaaril wid wahn foolish persn, notn gud wahn kom owta it,
Bikaaz di foolish persn wahn rayl op wid ahn an mek fon a ahn.
10 Peepl weh laik kil ada peepl hayt enibadi weh inosent,
Ahn dehn chrai kil peepl weh raichos.*
11 Wahn schupid persn noh kanchroal ih feelinz,
Bot wahn waiz persn stay kaam.
12 Wen wahn roola staat lisn tu loan lai,
Den aala ih servant dehn wahn en op di bee wikid peepl.
13 Wahn poa man ahn sombadi weh persikyoot ahn ga dis eena kaman:
Jehoava mek di too a dehn si.*
14 Wen wahn king joj poa peepl eena wahn fyaa way,
Ih wahn rool fi wahn lang taim.
15 Ponishment* ahn karekshan ku help wahn persn bee waiz,
Bot wahn pikni weh du eniting weh ih waahn shaym ih ma.
16 Di moa wikid peepl deh rong, di moa peepl wahn sin,
Ahn raichos peepl wahn si wen dehn geh dischrai.
17 Karek yu son ahn hihn wahn mek yu feel gud,
An ih wahn mek yu* ga lata jai.
18 Wen peepl noh alow Gaad fi gaid dehn, nobadi ku kanchroal dehn,
Bot dehn wan weh obay di laa wahn bee hapi.
19 Werdz noh inof fi karek wahn servant,
Bikaaz ih andastan weh yu di tel ahn, bot ih noh obay.
20 Yu eva si wahn persn weh laik taak ahn noh tink bowt weh ih seh?
Wahn foolish persn ga moa hoap dan da persn.
21 If dehn baybi op wahn servant fan ih yong,
Den wen ih geh oalda ih noh wahn tankful fi notn.
22 Wahn persn weh eezi fi geh beks laik staat kwaaril,
An enibadi weh laik geh beks sin wahn lat.
23 Wahn man praid wahn shaym ahn,
Bot enibadi weh hombl wahn get aana.
24 Wahn persn hayt ihself* wen ih help wahn teef.
Ih wuda hyaa dat dehn di kaal ahn fi testifai,* bot ih wudn seh notn.
25 Da wahn chrap fi sohnbadi if dehn frayd fi ada peepl,
Bot enibadi weh chros eena Jehoava wahn geh protekshan.
26 Lata peepl goh luk fi wahn roola fi geh help,
Bot Jehoava da di wan weh gi peepl jostis.
27 Wahn raichos persn hayt dehn wan weh noh du weh rait,
Ahn wahn wikid persn hayt dehn wan weh du weh rait.