Dyooteronomi

18 “Di prees ahn di ada Leevait dehn, weh da di hoal chraib a Leevai, noh wahn geh no shayr ner inheritans laik di ada Izrelait dehn. Dehn fi eet fahn di aafrin dehn weh di peepl bring tu Jehoava weh geh bon op wid faiya ahn weh bilangz tu hihn. 2 Soh dehn noh fi geh no inheritans laik di ada Izrelait dehn. Jehoava da fi dehn inheritans, jos laik weh ih mi tel dehn.

3 “Di prees dehn ga di rait fi geh dehnya tingz fahn di peepl: Enibadi weh aafa op wahn bul er wahn sheep fi gi di shoalda, di jaa dehn, ahn di beli tu di prees dehn. 4 An unu fi gi dehn di fers amonk a grayn weh unu haavis, di fers amonk a nyoo wain an ail weh unu mek, ahn di fers amonk a wul weh unu kot aaf fahn unu sheep dehn. 5 Jehoava unu Gaad chooz di Leevait dehn fi werk far ahn. Dehn ahn dehn son fi aalwayz serv az prees fi Jehoava.

6 “Bot if wahn Leevait lef fahn wan a di Izrelait siti dehn wehpaat ih mi-di liv an ih waahn goh da di plays weh Jehoava chooz,* den ih ku goh. 7 Hihn ku werk deh fi Jehoava ih Gaad jos laik di Leevait dehn weh da ih bradaz ahn weh di serv deh fronta Jehoava. 8 Hihn fi geh di saym amonk a food laik di ada Leevait dehn, eevn doa ih mi geh moni wen ih sel di tingz weh ih mi inherit fahn ih ansesta dehn.

9 “Wen unu goh eena di lan weh Jehoava unu Gaad di giv unu, unu noh fi du di saym tingz weh Gaad hayt weh di ada nayshanz di du. 10 Nobadi monks unu fi aafa op dehn son er dehn daata ahn bon dehn eena faiya.* Ahn dehn noh fi pridik di fyoocha, praktis majik, er luk fi sainz. 11 Nobadi fi put wahn spel pahn wahn nada persn ner taak tu di ded. Ahn dehn noh fi goh da sombadi weh tel di fyoocha ner goh da sombadi weh chrai taak tu di ded. 12 Jehoava hayt enibadi weh praktis dehndeh tingz. Ahn Jehoava unu Gaad di jraiv weh di peepl weh praktis di tingz weh hihn hayt fahn fronta unu. 13 Unu fi mek shoar dat unu aalwayz du weh rait fronta Jehoava unu Gaad.

14 “Di peepl fahn di nayshan dehn weh unu di kanka yoostu lisn tu di peepl dehn weh praktis majik ahn weh pridik di fyoocha, bot Jehoava unu Gaad noh di alow unu fi du di saym ting laik dehn. 15 Jehoava unu Gaad wahn chooz sombadi fahn monks di peepl fi bee wahn prafit laik mee, an unu fi lisn tu ahn. 16 Di reezn wai hihn di du dis da sayka weh unu mi seh tu Jehoava unu Gaad da Hoareb wen unu mi gyada tugeda ahn seh, ‘Noh mek Jehoava taak tu wi ahn noh mek wi si di big faiya nohmoh, soh dat wi noh ded.’ 17 Den Jehoava tel mi, ‘Weh dehn seh song gud. 18 Ai wahn chooz sombadi fahn monks di peepl fi bee wahn prafit laik yoo, an Ah wahn tel ahn weh fi seh, ahn hihn wahn tel di peepl weh Ai koman dehn fi du. 19 Di persn weh noh lisn tu di tingz weh Ai tel di prafit fi seh wahn haftu ansa tu mee.

20 “‘If wahn prafit geh brayzn an ih seh dat ih di reprizent mee, bot ih seh sohnting weh Ai neva koman ahn fi seh er ih staat reprizent ada gaadz wen ih di taak, den da prafit fi ded. 21 Bot unu mait aks unuself: “How wi wahn noa dat da noh Jehoava di taak?” 22 Wen wahn prafit weh seh dat ih di reprizent mee, Jehoava, seh sohnting an ih neva kohn chroo, den dat meenz dat Ai, Jehoava, neva seh dat. Da prafit mi ak eena wahn brayzn way wen ih seh dat. Soh unu noh fi frayd far ahn.’