Saam
Fi di dairekta. Dis da Dayvid sang.
19 Di tingz eena hevn tel wi bowt di gloari a Gaad,
Ahn dehn tel wi bowt weh hihn kriyayt.
2 Evri day, werdz poar owt fahn dehn,
An evri nait dehn tel wi bowt fi hihn nalij.
3 Yu noh hyaa wen dehn taak, no werdz kom owt;
Dehn noh ga no vais.
4 Bot eevn soh, di hoal ert hyaa dehn mesij,
Ahn dehn mesij reech tu evri kaana a di ert.
Eena hevn hihn set op wahn tent fi di son;
5 Ih da laik wahn braidgroom weh di shain wen ih kom owta ih room;
Ih da laik wahn maiti man weh hapi fi ron ih rays.
6 Ih staat fahn wan en a hevn,
Ahn goh rong tu di ada en;
Ahn notn kyaahn haid fan ih heet.
7 Di laa a Jehoava perfek, ih gi bak wahn persn ih schrent.
Yu ku chros Jehoava inschrokshanz, ih mek wahn persn weh noh ga ekspeeryens waiz.
8 Di inschrokshanz fahn Jehoava raichos; ih mek yu haat ful op a jai;
Di komanment fahn Jehoava kleen; ih braitn yu aiy ahn gi yu andastandin.
9 Rispek* fi Jehoava gud; ih laas fareva.
Jehoava jojment dehn aalwayz karek; hihn aalwayz joj eena wahn raichos way.
10 Dehnya tingz wert moa dan goal;
Dehn beta dan pyoar goal,
Ahn dehn sweeta dan honi weh jrip aafa di honikoam.
11 Dehn da wahn waanin fi yu servant;
Ahn wahn big riwaad deh fi enibadi weh obay dehn.
12 Hoo ku riyalaiz aala di mistayk dehn weh dehn mek?
Fergiv mi fi di sin dehn weh Ah neva noa Ah komit.
13 Ahn hoal bak yu servant fahn du tingz weh Ah noh ga di rait fi du;
Noh mek dehndeh tingz kanchroal mi.
Den Ah noh wahn gilti,
An Ah wahn free fahn seeryos sin.
14 Oa Jehoava, mi Rak ahn mi Sayvya,
Ah pray dat di tingz weh Ah seh ahn tink bowt eena mi haat wahn mek yu hapi.