Dyooteronomi

6 “Dehnya da di komanment dehn, di roolz, ahn di laa dehn weh Jehoava unu Gaad giv unu fi mek unu obay wen unu goh eena di lan weh unu wahn kanka. 2 Unu lang wid unu pikni ahn granpikni fi shoa lata rispek fi Jehoava unu Gaad. Unu fi obay ih laa dehn an ih komanment dehn weh Ah di giv unu fi az lang az unu liv, soh dat unu ku liv wahn lang taim. 3 Oa Izrel, unu fi mek shoar dat unu lisn an obay di komanment dehn, soh dat tingz ku goh gud fi unu ahn soh dat unu nayshan ku groa eena di lan weh soh gud dat da laik ih ful op wid milk ahn honi, weh Jehoava, di Gaad a unu ansesta dehn, mi pramis fi giv unu.

4 “Lisn, Oa Izrel: Jehoava da wi Gaad ahn dehn onli ga wan Jehoava. 5 Unu fi lov Jehoava unu Gaad wid aala unu haat, aala unu soal, an aala unu schrent. 6 Unu fi rait dong dehnya werdz weh Ah di koman unu tudeh eena unu haat. 7 Unu fi teech unu pikni dehn dehndeh komanment,* an unu fi taak bowt dehn wen unu di sidong eena unu hows, wen unu di waak pahn di road, bifoa unu goh sleep, ahn wen unu get op. 8 Dehn fi bee laik wahn rimainda weh unu tai pahn unu han ahn laik wahn sain* pahn unu farid.* 9 Rait dehn dong pahn di doa poas fi unu hows ahn pahn unu gayt dehn.

10 “Jehoava unu Gaad mi swayr tu unu ansestaz Aybraham, Aizak, ahn Jaykob dat ih mi wahn giv unu dis lan. Soh wen ih bring unu eena dis lan weh soh gud ahn weh ga sohn big siti weh unu neva bil, 11 weh ga sohn hows weh ful op a gud tingz weh unu neva werk fa, weh ga wel weh unu neva dig, ahn sohn grayp aachad ahn aliv chree weh unu neva plaant, den wen unu eet ahn geh ful, 12 unu fi mek shoar dat unu noh ferget Jehoava, hoo da di wan weh bring unu owta Eejip wehpaat unu da-mi slayv.* 13 Unu fi ga lata rispek fi Jehoava unu Gaad ahn da hihn unu fi serv. An unu fi yooz fi hihn naym wen unu mek wahn vow. 14 Unu noh fi wership eni ada gaad weh di nayshan dehn rong unu serv, 15 bikaaz Jehoava unu Gaad, weh deh monks unu, da wahn Gaad weh waahn unu wership onli hihn. If unu noh du dat, den Jehoava unu Gaad wahn geh beks bad wid unu an ih wahn dischrai unu.

16 “Unu noh fi tes Jehoava unu Gaad laik how unu mi tes ahn da Masa. 17 Unu fi mek shoar dat unu obay di komanment dehn, di roolz, ahn di laa dehn weh Jehoava mi koman unu fi obay. 18 Unu fi du tingz weh Jehoava si az gud, soh dat tingz ku goh gud fi unu ahn soh dat unu ku goh eena di gud lan weh unu wahn kanka weh Jehoava mi swayr tu unu ansestaz fi giv unu. 19 Unu wahn jraiv owt unu enimi dehn fahn fronta unu jos laik weh Jehoava mi pramis.

20 “Eena di fyoocha, wen unu pikni aks unu, ‘Wai Jehoava wi Gaad giv unu dehnya rimainda, roolz, ahn laa?’ 21 Den dis da weh unu fi tel unu pikni dehn, ‘Wee da-mi Fayro* slayv da Eejip, bot Jehoava mi bring wi owta Eejip wid ih powa. 22 Jehoava mi du lata miraklz fronta wi. Som a dehn mi amayzin ahn som a dehn mi bring dizaasta pahn Eejip, pahn Fayro, ahn pahn evribadi weh liv eena ih hows. 23 Hihn mi bring wi owt fahn deh soh dat ih kuda mi bring wi ya fi gi wi di lan weh ih mi swayr fi giv tu wi ansestaz. 24 Den Jehoava koman wi fi obay ih roolz ahn fi ga lata rispek fi Jehoava wi Gaad, soh dat tingz ku aalwayz goh gud fi wi ahn soh dat wi ku kip di liv jos laik how wi di liv tudeh. 25 Wen wi mek shoar dat wi obay aala di komanment dehn weh Jehoava wi Gaad koman wi fi obay, den wi wahn bee raichos.’