Dyooteronomi
7 “Wen Jehoava unu Gaad mek unu goh eena di lan weh unu wahn soon kanka, hihn wahn chays weh di nayshan dehn weh ga lata peepl fahn fronta unu. Dehnya da di nayshan dehn weh hihn wahn chays weh: di Hitait dehn, di Gergashait dehn, di Amorait dehn, di Kaynanait dehn, di Perizait dehn, di Haivait dehn, ahn di Jebyusait dehn. Dehndeh sevn nayshan ga moa peepl dan unu ahn dehn moa powaful dan unu. 2 Jehoava unu Gaad wahn han aala dehn oava tu unu, an unu wahn ga vikchri oava dehn. Unu noh fi mek no kovenant wid dehn ner feel sari fi dehn, bot unu fi mek shoar dat unu dischrai aala dehn. 3 Unu noh fi geh marid tu nobadi fahn dehndeh nayshan. Unu noh fi mek unu daata dehn marid fi dehn son dehn an unu noh fi mek unu son dehn marid fi dehn daata dehn, 4 bikaaz dehn wahn mek unu pikni dehn stap wership Gaad ahn wership ada gaadz insted. Den Jehoava wahn geh beks bad wid unu, an ih wahn dischrai unu rait away.
5 “Insted dis da weh unu fi du tu dehn: Unu fi brok dong aala dehn alta, brok op di stoan dehn weh dehn wership, kot dong di poal dehn weh dehn yooz fi wership, ahn bon op dehn aidol dehn. 6 Unu da wahn hoali peepl tu Jehoava unu Gaad, ahn Jehoava unu Gaad chooz unu fi bee ih peepl. Hihn pik unu fi bee ih speshal peepl fahn monks aala di peepl pahn di ert.
7 “Jehoava neva lov unu ahn chooz unu bikaaz unu da-mi di bigis nayshan. In fak, unu da-mi di smaalis nayshan owta aala di ada nayshan dehn. 8 Bot Jehoava mi lov unu, an ih mi kip di pramis weh ih mi swayr tu unu ansesta dehn. Sayka dat, Jehoava mi yooz ih powa fi reskyu unu fahn di lan wehpaat unu da-mi slayv, an ih sayv unu fahn di king da Eejip weh mi ga kanchroal oava unu. 9 Unu noa dat Jehoava unu Gaad da di chroo Gaad, ahn hihn da wahn faytful Gaad weh kip ih kovenant fareva wid peepl weh lov hihn ahn weh obay ih komanment dehn, ahn hihn shoa lata lov* tu dehn tu. 10 Bot hihn wahn dischrai dehn wan weh hayt ahn, an ih noh wahn tek lang fi deel wid dehn. Yes, fi shoar hihn wahn ponish dehn. 11 Soh mek shoar dat unu fala di komanment dehn, di roolz, ahn di laa dehn weh Ah di koman unu tudeh fi obay.
12 “If unu kantinyu lisn tu di laa dehn an unu obay dehn, den Jehoava unu Gaad wahn kantinyu kip di kovenant an ih wahn kantinyu shoa unu lata lov* laik weh ih mi swayr tu unu ansestaz dat ih mi wahn du. 13 Hihn wahn lov unu ahn bles unu ahn mek unu nayshan geh biga eena di lan weh ih mi swayr tu unu ansestaz fi giv unu. Yes, ih wahn bles unu wid lata pikni, an ih wahn mek lata food groa pahn da lan. Unu wahn ga lata grayn, nyoo wain, ail, ahn lata kyatl ahn lata sheep. 14 Unu wahn geh moa blesinz dan eni ada nayshan. Aala di man dehn ahn wuman dehn wahn ga pikni, eevn unu animal dehn wahn ga dehn yong baybi. 15 Jehoava noh wahn mek unu geh sik, ahn hihn noh wahn mek unu kech sohn terabl dizeez laik weh unu mi si da Eejip. Insteda dat, hihn wahn mek di peepl weh hayt unu kech dehndeh dizeez. 16 Unu fi dischrai aala di nayshan dehn weh Jehoava unu Gaad mi han oava tu unu. Unu* noh fi feel sari fi dehn ner wership fi dehn gaadz, bikaaz dat wahn bee wahn chrap fi unu.
17 “If unu seh tu unuself, ‘Dehnya nayshan ga moa peepl dan wee. Soh how wi wahn chays dehn weh?’ 18 Unu noh fi frayd fi dehn. Unu fi memba weh Jehoava unu Gaad mi du tu Fayro ahn tu evribadi da Eejip. 19 Unu fi memba how Jehoava unu Gaad mi ponish dehn, ahn memba di miraklz weh ih mi du deh, ahn how ih mi shoa ih powa ahn schrent wen ih mi bring unu owta da lan. Dat da weh Jehoava unu Gaad wahn du tu aala di peepl weh unu frayd fa. 20 Jehoava unu Gaad wahn mek dehn wan weh servaiv ahn weh di haid fahn unu feel frayd fi unu til dehn ded. 21 Unu noh fi mek dehn fraitn unu, bikaaz Jehoava unu Gaad da wahn amayzin Gaad ahn hihn deh wid unu.
22 “Lee bit bai lee bit, Jehoava unu Gaad wahn jraiv weh aala di nayshan dehn fahn fronta unu. Hihn noh wahn alow unu fi dischrai aala di nayshan dehn rait away, soh dat di wail animal dehn noh tek oava di lan ahn put unu eena daynja. 23 Jehoava unu Gaad wahn han dehn oava tu unu, ahn hihn wahn kanka dehn, wan afta di ada, til aala dehn geh dischrai. 24 Hihn wahn mek unu kanka di king dehn, an unu wahn dischrai dehn ahn nobadi wahn memba dehn naym. Unu wahn dischrai aala dehn, ahn non a dehn wahn ku stan op gens unu. 25 Unu fi bon op aala dehn aidol. Unu noh fi waahn di silva ahn di goal an unu noh fi tek it fi unuself, soh dat dehndeh tingz noh en op di bee wahn chrap fi unu, bikaaz Jehoava unu Gaad hayt aala dehndeh tingz. 26 Unu noh fi bring eniting weh Gaad hayt eena unu hows, soh dat Gaad noh dischrai unu lang wid dehndeh tingz. Unu fi hayt dehndeh tingz wid aala unu haat bikaaz dehndeh tingz haftu geh dischrai.