Dyooteronomi

5 Den Moaziz kaal di Izrelait dehn, an ih tel dehn: “Oa Izrel, lisn tu di roolz ahn di laa dehn weh Ah wahn anonks tu unu tudeh. Unu fi laan dehn an unu fi mek shoar dat unu obay dehn. 2 Jehoava wi Gaad mi mek wahn kovenant wid wee da Hoareb. 3 Jehoava neva mek dis kovenant wid wi ansestaz, bot ih mi mek it wid aala wee weh deh rait ya tudeh. 4 Jehoava mi taak fays tu fays wid unu fahn owta di faiya da di mongtin. 5 Joorin da taim, Ah mi taak tu unu fi Jehoava.* An Ah mi tel unu weh Jehoava mi seh, bikaaz unu mi frayd fi di faiya an unu neva gaan op di mongtin. Dis da weh hihn mi seh:

6 “‘Ai da Jehoava unu Gaad, an Ai da di wan weh mi tek unu owta Eejip wehpaat unu da-mi slayv.* 7 Unu noh fi wership no ada gaad. Da onli mee unu fi wership.

8 “‘Unu noh fi mek wahn imij fi unuself. An unu noh fi mek eniting weh luk laik sohnting weh deh eena hevn er sohnting weh deh pahn di ert er eena di waata. 9 Unu noh fi bow dong tu dehn an unu noh fi waahn wership dehn, bikaaz Ai, Jehoava, noh wahn talarayt non a unu weh wership wahn nada gaad. Yes, Ai da wahn Gaad weh waahnt unu wership onli mee. An if wahn pa hayt mi an ih du lata bad tingz, den Ah wahn ponish ih son dehn, ih granson dehn, an aala ih disendant dehn. 10 Bot if ih lov mee ahn kip mai komanment dehn, den Ah wahn shoa lata lov* tu aala ih disendant fi towznz a jenarayshan.

11 “‘Ai da Jehoava unu Gaad, an unu noh fi yooz mai naym eena wahn way weh noh shoa rispek bikaaz Ai, Jehoava, wahn ponish enibadi weh chreet mi naym eena wahn way weh noh shoa rispek.

12 “‘Kip di Sabat day ahn mek ih bee wahn hoali day, jos laik weh Jehoava mi koman unu fi du. 13 Unu fi werk fi siks dayz, 14 bot di sevent day wahn bee wahn sabat day fi aana mee, Jehoava, unu Gaad. Nobadi fi werk pahn da day, nat eevn unu son, unu daata, unu slayv man, unu slayv gyal, unu bul, unu dongki, er unu animal dehn ner di farin peepl weh di liv eena unu siti dehn, soh dat unu slayv man an unu slayv gyal ku res jos laik unu. 15 Memba dat unu da-mi slayv da Eejip, ahn dat Jehoava unu Gaad mi bring unu owt fahn deh wid ih powa ahn schrent. Dat da wai Jehoava unu Gaad mi koman unu fi kip di Sabat day.

16 “‘Unu fi rispek unu ma an unu pa, jos laik weh Jehoava mi koman unu fi du, soh dat tingz ku goh gud fi unu an unu ku liv wahn lang taim eena di lan weh Jehoava unu Gaad di giv unu.

17 “‘Unu noh fi kil nobadi.

18 “‘Unu noh fi ga seks wid sombadi weh da noh unu hozban er unu waif.

19 “‘Unu noh fi teef.

20 “‘If dehn kaal unu an aks unu bowt sohnting weh unu nayba mi du, unu noh fi tel lai bowt unu nayba.

21 “‘Unu noh fi waahn unu nayba hows. Unu noh fi waahn unu nayba waif, ih slayv man, ih slayv gyal, ih bul, ih dongki, er eniting weh bilangz tu ahn.’

22 “Dehndeh da di komanment dehn* weh Jehoava mi giv tu unu* wen unu mi deh da di mongtin. Hihn mi taak tu unu wid wahn lowd vais fahn owta di faiya, di klowd, ahn fahn owta di daaknis. Hihn neva ad aan notn moa tu dehndeh komanment. Den hihn mi rait dehn pahn too flat stoan an ih mi gi dehn tu mi.

23 “Bot az soon az unu mi hyaa fi hihn vais fahn owta di daaknis, wail di faiya mi deh pahn di mongtin, aala di cheef dehn fahn unu chraib an di eldaz mi kohn da mee. 24 Den unu mi seh, ‘Jehoava wi Gaad shoa wi ih gloari an ih powa, ahn wi mi hyaa hihn di taak fahn owta di faiya. Tudeh wi mi si dat Gaad ku taak tu hyoomanz ahn dehn ku stil liv. 25 Bot if wee kantinyu fi hyaa Jehoava di taak, fi shoar wi wahn ded, ahn wi noh waahn ded. Dis big faiya ku dischrai wi. 26 Nobadi els eva hyaa Gaad di taak fahn owta di faiya ahn kantinyu liv laik wee. 27 Yoo goh da Jehoava wi Gaad, ahn hyaa weh ih wahn seh, ahn yoo wahn bee di wan weh tel wi weh Jehoava wi Gaad seh, ahn wi wahn lisn an obay.’

28 “Soh Jehoava hyaa weh unu mi tel mi, ahn dis da weh Jehoava mi seh, ‘Ai hyaa weh di peepl mi tel yu, an evriting weh dehn seh gud. 29 Ah wish dehn wuda ga lata rispek fi mi fahn dehn haat, ahn lisn an obay aala mi komanment dehn, den tingz wuda goh gud fi dehn ahn fi dehn pikni fareva. 30 Dis da weh yu fi tel dehn: “Unu goh bak da unu tent.” 31 Bot yoo fi stay rait ya wid mee, an Ah wahn tel yu aala di komanment dehn, di roolz, ahn di laa dehn weh yu fi teech dehn fi mek dehn obay eena di lan weh Ah di gi dehn fi mek dehn kanka.’ 32 Soh unu fi mek shoar dat unu du egzakli weh Jehoava unu Gaad koman unu fi du. Unu noh fi goh tu di rait er tu di lef. 33 Unu fi fala di way Jehoava unu Gaad koman unu fi fala, soh dat unu ku liv fi wahn lang taim ahn soh dat tingz ku goh gud fi unu eena di lan weh unu wahn kanka.