Dyooteronomi
32 “Evribadi weh deh da hevn, lisn tu mi wen Ah taak,
Ahn mek evribadi weh deh pahn di ert hyaa weh Ah wahn seh.
2 Mai inschrokshanz wahn kohn dong laik rayn;
Mi werdz wahn jrip dong laik joo.
Ih wahn bee laik jentl rayn pahn di graas,
An ih wahn bee laik lata rayn weh kohn dong pahn di plaants.
3 Ah wahn mek evribadi noa bowt Jehoava naym.
Unu fi tel peepl dat wi Gaad amayzin!
4 Wi Gaad da laik wahn rak, an evriting weh hihn du perfek.
Hihn du evriting eena wahn fyaa way.
Hihn chreet evribadi di saym way, an ih da wahn Gaad weh wi ku chros;
Hihn raichos an ih aalwayz du weh rait.
5 Unu peepl du wikid tingz.
Da fi unu oan faalt dat unu da noh Gaad pikni.
Unu da wahn krukid ahn wikid jenarayshan!
6 Unu peepl foolish an unu noh waiz.
Wai unu kip di du dis tu Jehoava?
Hihn da unu Pa, ahn sayka hihn unu egzis.
Hihn da di wan weh kriyayt unu ahn mek unu bee wahn nayshan.
7 Memba weh mi hapm wahn lang taim agoa.
Tink bowt weh mi hapm eena unu ansestaz taim.
Aks unu pa, ahn hihn wahn tel unu.
Aks di oal peepl, ahn dehn wahn mek unu noa.
8 Memba wen di Moas Hai mi gi di nayshanz dehn inheritans.
Memba wen hihn skyata aala Adam disendant dehn.*
Hihn mi disaid wehpaat di ada nayshan dehn mi wahn liv.
Hihn mi du dat soh di Izrelait dehn mi wahn ga wahn big inof plays fi liv.
9 Jehoava peepl bilang tu hihn.
Jaykob da fi hihn inheritans.
10 Hihn mi fain ahn eena wahn wildanes,
Eena wahn dezert weh noh ga notn ahn wehpaat lata wail animal mek naiz.
Ih mi kip ahn sayf ahn tek kayr a ahn.
Ih mi protek ahn laik how ih protek ih aiy.
11 Jos laik how wahn eegl flai oava ih baybi dehn
An ih teech dehn fi flai,
Ahn jos laik how ih spred owt ih wingz an ih bak dehn,
12 Da rait soh Jehoava mi-di leed Jaykob,
Ahn no ada gaad mi deh wid ahn.*
13 Wi Gaad mek ih ga kanchroal oava di mongtin dehn pahn di ert,
Soh dat ih ku eet weh groa pahn di grong.
Ih giv ahn honi fahn owta wahn big rak fi mek ih eet,
An ih giv ahn ail fahn wahn rak.
14 Ih giv ahn bota weh kohn fahn di kow dehn
Ahn milk fahn di sheep ahn goat dehn lang wid di bes sheep.
Ih giv ahn di mayl sheep dehn weh kohn fahn Bayshan
Ahn di mayl goat dehn lang wid di bes weet flowa.
Ih giv ahn wain fi jrink weh kohn fahn di joos a di grayps.
15 Wen Jeshuron* mi geh fat, ih ribel gens ih maasta.
Oa Jeshuron, yu geh big ahn fat, ahn yu ful op a food.
Hihn mi abandan Gaad, di wan weh mi mek ahn.
An ih mi hayt Gaad, hoo da laik wahn rak ahn hoo da ih sayvya.
16 Di peepl mi mek Gaad geh beks bad wen dehn wership ada gaadz.
Dehn mi ofen Gaad wen dehn mi du tingz weh hihn hayt.
17 Dehn mi-di aafa op sakrifais tu deemonz ahn noh tu Gaad.
Dehn neva noa bowt dehndeh gaadz.
Dehndeh gaadz da-mi nyoo gaadz weh dehn mi jos geh fi noa bowt.
An unu ansestaz neva noa bowt dehndeh gaadz.
18 Unu ferget Gaad, hoo da unu Pa ahn hoo da laik wahn rak.
An unu neva memba di Gaad weh giv unu laif.
19 Wen Jehoava si weh dehn mi du, hihn rijek dehn
Bikaaz ih son dehn an ih daata dehn mi ofen ahn.
20 Soh hihn seh, ‘Ah wahn haid mi fays fahn dehn.
Ah wahn si weh wahn hapm tu dehn.
Dehn da wahn wikid jenarayshan.
Dehn da pikni weh noh faytful tu mee.
21 Dehn mek Ah geh beks bad* wen dehn wership faals gaadz,
Ahn dehn ofen mi wen dehn wership aidolz weh wertles.
Soh Ah wahn yooz peepl weh da noh fahn di nayshan a Izrel fi mek dehn geh jelos.
Ah wahn yooz wahn foolish nayshan fi mek dehn geh beks.
22 Mi anga kaaz wahn faiya
Weh wahn bon way da batam a di Grayv.*
Ahn da faiya wahn bon di ert an evriting weh groa pan it.
Ahn di batam a di mongtin dehn wahn deh pahn faiya.
23 Ah wahn mek dehn ga lata prablemz.
Ih wahn bee laik if Ah di shoot lata aro aata dehn.
24 Dehn wahn geh week bikaaz dehn hongri.
Wahn hai feeva wahn kil dehn, ahn dehn wahn geh dischrai fareva.
Ah wahn sen di wail animal dehn
Ahn di paiznos snayk dehn weh kraal pahn di dos fi bait dehn.
25 Wahn soad wahn kil dehn pikni owtsaida dehn hows.
Ahn di yong man dehn, di verjin dehn,
Di pikni dehn, ahn di oal man dehn
Weh deh eena dehn hows wahn frayd bad.
26 Ah kuda mi seh: “Ah wahn skyata dehn;
Ah wahn mek peepl ferget bowt dehn.”
27 Bot Ah neva seh dat,
Bikaaz Ah mi frayd a weh mi enimi mi wahn seh.
Dehn mi wahn seh: “Fi wee powa mi ga vikchri;
Da neva Jehoava du aala dis.”
28 Dehn da wahn nayshan weh noh ga kaman sens,
Ahn non a dehn noh ga no andastandin.
29 If onli dehn mi waiz! Dehn wuda mi tink bowt aala dis.
Dehn wuda mi tink bowt weh wahn hapm tu dehn.
30 If Jehoava, hoo da dehn rak, sel dehn
Ahn gi dehn tu dehn enimiz
Den dat da di onli way wan enimi ku chays 1,000 Izrelaits
Ahn too enimiz ku chays 10,000 Izrelaits.
31 Fi dehn gaad da noh laik fi wee Gaad, weh da wi Rak.
Eevn wi enimi dehn andastan dat.
32 Dehn da laik wahn vain weh kohn fahn Sadam
Ahn laik wahn feel weh deh da Gomoara.
Dehn grayps paiznos ahn dehn bita.
33 Dehn wain da laik paizn fahn wahn snayk.
Da laik dedli paizn fahn wahn koabra.
34 Ah wahn put evriting weh dehn du eena mi stoarhows.
Ah wahn lak it op wid wahn seel.
35 Ah wahn tek venjans,
An Ah wahn ponish dehn da di karek taim wen dehn fut slip.
Dizaasta wahn kohn pahn dehn,
An evriting weh fi hapm tu dehn wahn hapm soon.’
36 Jehoava wahn joj ih peepl,
An ih wahn feel sari fi ih servant dehn wen ih si dat dehn schrent gaan
Ahn wen ih si dat di onli peepl weh lef
Da dehn wan weh week ahn kyaahn help dehnself.
37 Den hihn wahn seh, ‘Wehpaat fi dehn gaadz deh,
Di gaadz weh dehn tink mi wahn protek dehn,
38 Di gaadz weh yoostu eet di fat fahn di sakrifais weh unu mi aafa,
Di gaadz weh mi jrink di wain weh unu mi gi dehn az wahn jrink aafrin?
Mek dehn get op ahn help unu.
Mek dehn bee wahn protekshan fi unu.
39 Luk ya! Ai da Gaad,
Ahn dehn noh ga no ada Gaad bisaidz mee.
Ai bring det an Ah gi laif.
Ai bring payn an Ah wahn heel,
Ahn nobadi ku sayv enibadi fahn mai han.
40 Ah rayz mi han fi mek wahn pramis
An Ah di swayr bai mi laif weh wahn neva en dat
41 Wen Ah shaapm mi soad weh shaini
An Ah geh redi fi joj,
Ah wahn tek venjans pahn mi enimi dehn
An Ah wahn ponish dehn wan weh hayt mi.
42 Ah wahn mek mi aro dehn geh jronk wid blod,
Wid blod fahn ded peepl ahn fahn di priznaz.
An Ah wahn mek mi soad eet flesh,
Di flesh fahn di hed dehn a di leedaz a di enimi dehn.’
43 Unu peepl fahn aala di ada nayshan dehn, bee hapi lang wid Gaad peepl,
Bikaaz ih wahn tek rivenj fi di blod a ih servant dehn.
An ih wahn ponish ih enimi dehn,
An ih wahn geh rid a di sin fahn ih peepl lan.”*
44 Den Moaziz ahn Hosheeya,* hoo da Non son, gaahn fronta di peepl ahn Moaziz tel dehn aala di werdz a da sang fi mek dehn hyaa. 45 Afta Moaziz mi don tel di Izrelait dehn aala dehndeh tingz, 46 ih tel dehn, “Mek shoar dat unu memba aala di waanin weh Ah tel unu tudeh, soh dat unu ku koman unu pikni dehn fi obay evriting weh di Laa seh. 47 Di tingz weh Ah di tel unu veri impoatant, an if unu obay dehn, unu wahn liv. An if unu obay evriting weh Ah seh, unu wahn liv fi wahn lang taim eena di lan weh unu wahn kanka wen unu kraas di Jaadn Riva.”
48 Pahn da saym day Jehoava mi taak tu Moaziz, an ih tel ahn: 49 “Goh op pahn Mongt Neebo weh deh da Abarim, weh deh eena di lan a Moawab. Da mongtin di fays Jeriko, ahn fahn deh yu wahn ku si di lan a Kaynan weh Ah di giv tu di Izrelait dehn, ahn da lan wahn bee fi dehn. 50 Wen yu goh op pahn da mongtin, da rait deh yu wahn ded, jos laik how yu breda Ayron mi ded pahn Mongt Her. Ahn dehn mi beri ahn jos laik how dehn mi beri ih ansesta dehn. 51 Wen unu mi deh da di waata da Meriba weh deh da Kaydesh eena di dezert weh naym Zin, unu neva stay faytful tu mee an unu neva prayz mi fronta di peepl. 52 Yu wahn si di lan fahn faar, bot yu noh gwehn eena di lan weh Ah di giv tu di Izrelait dehn.”