Saam
Dis da Dayvid sang. Wahn dedikayshan sang fi ih hows.
30 Oa Jehoava, Ah wahn prayz yu bikaaz yu lif mi op;
Yu neva alow mi enimi dehn fi rijais oava mi sofarin.
2 Oa Jehoava mi Gaad, Ah krai tu yu fi help, ahn yu heel mi.
3 Oa Jehoava, yu lif mi* op fahn di Grayv.*
Yu sayv mi laif; yu noh lef mi fi sink eena di pit.*
4 Unu weh laayal, sing prayz tu* Jehoava,
Gi tanks tu ih hoali naym;
5 Bikaaz ih onli beks wid sohnbadi fi wahn lee wail,
Bot ih kainis wahn laas fareva.
Wahn persn mait krai eena di eevnin, bot eena di maanin, ih wahn showt wid jai.
6 Wen evriting mi-di goh gud, Ah mi seh:
“Notn wahn eva shayk mi.”
7 Oa Jehoava, wen yu mi shoa mi yu kainis, yu mi mek mi az schrang az wahn mongtin.
Bot wen yu haid yu fays fahn mi, Ah geh fraitn no miks.
8 Oa Jehoava, Ah kip di aks yu fi help;
Ahn tu yoo, Oa Jehoava, Ah kip aan di bayg fi mersi.
9 Weh benifit deh if Ah ded, if Ah goh dong eena di pit?*
Di dos kyaahn prayz yu, ih kyaahn taak bowt yu faytfulnis.
10 Oa Jehoava, lisn tu mi ahn ga mersi pahn mi.
Oa Jehoava, bee mi helpa.
11 Yu mek Ah daans insteda moarn* ahn baal;
Yu tek aaf mi kloaz weh mek owta goat hyaa,* ahn yu mek Ah wayr hapinis,
12 Soh dat Ah ku prayz yu wid sang ahn noh kip kwaiyet.
Oa Jehoava mi Gaad, Ah wahn prayz yu fareva.